 ទទូចឲ្យតំណាងរាស្ត្រកោះហៅរដ្ឋាភិបាលទៅសាកសួរ ជុំវិញការបិទសារព័ត៌មាន វីអូឌី ដើម្បីឆ្លុះបញ្ចាំងអំពីការគោរព និងអនុវត្តនូវសិទ្ធិទទួលបានព័ត៌មានដែលធានាដោយរដ្ឋធម្មនុញ្ញ។){kind=link}
គណបក្សប្រជាធិបតេយ្យមូលដ្ឋាន (GDP) ទទូចឲ្យតំណាងរាស្ត្រកោះហៅរដ្ឋាភិបាលទៅសាកសួរ ជុំវិញការបិទសារព័ត៌មាន វីអូឌី ដើម្បីឆ្លុះបញ្ចាំងអំពីការគោរព និងអនុវត្តនូវសិទ្ធិទទួលបានព័ត៌មានដែលធានាដោយរដ្ឋធម្មនុញ្ញ។
ក្នុងញត្តិរបស់គណបក្សប្រជាធិបតេយ្យមូលដ្ឋាន (GDP) ចុះថ្ងៃទី២៣ ខែកុម្ភៈ ឆ្នាំ២០២៣ បានឲ្យដឹងថា ការស្នើសុំឲ្យតំណាងរាស្ត្រអាណត្តិទី៦ កោះហៅរដ្ឋាភិបាលដោយមើលឃើញថាការសម្រេចភ្លាមៗលុបចោលអាជ្ញាប័ណ្ណវិទ្យុសំឡេងប្រជាធិបតេយ្យ (VOD) ដែលបានដំណើរការអស់រយៈពេលជាង ២០ឆ្នាំនេះ បង្ហាញពីមន្ទិលសង្ស័យ ខណៈស្ថាប័នសារព័ត៌មាន VOD មានការគាំទ្រពីសំណាក់ប្រជាពលរដ្ឋកម្ពុជាជាច្រើន។
GDP បន្តថា តំណាងរាស្ត្រត្រូវហៅរដ្ឋាភិបាលមកសួរអំពីមូលហេតុដែលសម្រេចលុបចោលអាជ្ញាប័ណ្ណ VOD ដែលធ្វើឲ្យសារព័ត៌មាននេះមិនអាចបន្តសកម្មភាពការងារលើវិស័យព័ត៌មាន និងសោតទស្សន៍នៅក្នុងព្រះរាជាណាចក្រកម្ពុជា។ មួយវិញទៀត ថាតើការសម្រេចលុបចោលអាជ្ញាប័ណ្ណនេះ សមទៅនឹងការប្រព្រឹត្តរបស់វិទ្យុសំឡេងប្រជាធិបតេយ្យ (VOD) ដែរឬទេ? តើហេតុអ្វីបានជារាជរដ្ឋាភិបាលយល់ឃើញថា ការឆ្លើយតបរបស់អង្គភាពនេះនៅមិនគ្រប់គ្រាន់ ឬយ៉ាងណា?
គណបក្សប្រជាធិបតេយ្យមូលដ្ឋាន បញ្ជាក់ថា នៅក្នុងសង្គមប្រជាធិបតេយ្យ ប្រសិនបើការផ្សព្វផ្សាយព័ត៌មានមួយមានការភាន់ច្រឡំ ការផ្សាយនូវព័ត៌មានមិនពិត បុគ្គលសាធារណៈឬស្ថាប័នសាធារណៈនោះអាចធ្វើការឆ្លើយតប ឬស្នើឲ្យមានការកែតម្រូវចំពោះការផ្សព្វផ្សាយនោះ គឺជាការគ្រប់គ្រាន់ហើយ។
ជាមួយគ្នានេះ ការកោះហៅរដ្ឋាភិបាលទៅសាកសួរនេះ ដើម្បីជាការឆ្លុះបញ្ចាំងអំពីការគោរព និងអនុវត្តនូវសិទ្ធិទទួលបានព័ត៌មានដែលធានាដោយរដ្ឋធម្មនុញ្ញនៃព្រះរាជាណាចក្រកម្ពុជា តាមរបបសភានិយម ដូច្នេះគណបក្សប្រជាធិបតេយ្យមូលដ្ឋាន សង្ឃឹមថា តំណាងរាស្ត្រនីតិកាលទី៦ នឹងពិចារណាដាក់ជាសំណួរដល់រាជរដ្ឋាភិបាលក្នុងការឆ្លើយតបជុំវិញការបិទសារព័ត៌មាន VOD នាពេលថ្មីៗនេះ។
គណបក្សប្រជាធិបតេយ្យមូលដ្ឋាន ឲ្យដឹងថា វិទ្យុសំឡេងប្រជាធិបតេយ្យ (VOD) បង្កើតឱ្យមានតុល្យភាពសារព័ត៌មាន និងផ្ដល់ចំណេះដឹងទាក់ទិននឹងជីវភាពសង្គម សេដ្ឋកិច្ច និងនយោបាយសំខាន់ៗ។ វិទ្យុវីអូឌីនេះបានផ្ដល់នូវសំឡេងទៅដល់អ្នកដែលគ្មានមធ្យោបាយ អ្នកដែលគ្មានឱកាសបញ្ចេញសំឡេង ឱ្យអ្នកមានតួនាទីធ្វើសេចក្តីសម្រេចនៅថ្នាក់ជាតិ និងមូលដ្ឋានបានដឹងបានឮ និងឆ្លើយតបសមស្រប និងទាន់ពេលវេលា។
បន្ថែមពីនេះ សិទ្ធិទទួលបានព័ត៌មានត្រូវបានធានាដោយរដ្ឋធម្មនុញ្ញនៃព្រះរាជាណាចក្រកម្ពុជា ប្រជាពលរដ្ឋត្រូវការព័ត៌មានដែលមានតុល្យភាព តម្លាភាព និងគ្រប់ជ្រុងជ្រោយ។
វិទ្យុសំឡេងប្រជាធិបតេយ្យ (VOD) ត្រូវបានប្រកាសឱ្យលុបអាជ្ញាប័ណ្ណកាលពីថ្ងៃទី១៣ ខែកុម្ភៈ ឆ្នាំ២០២៣ បន្ទាប់ពីមានបញ្ជាពីលោក ហ៊ុន សែន ថាអង្គភាពសារព័ត៌មានមួយនេះមានចេតនាមួលបង្កាច់កូនប្រុសរបស់លោកជុំវិញការចុះហត្ថលេខាផ្តល់ជំនួយឱ្យប្រទេសតួកគី និងបានធ្វើឱ្យប៉ះពាល់ដល់កិត្តិយសរបស់រដ្ឋាភិបាលរបស់លោកជុំវិញការគ្រប់គ្រងថវិកាជាតិផងដែរ។
ក្រៅពីបិទហើយ បុរសខ្លាំងកាន់អំណាចជិត ៤០ឆ្នាំនៅកម្ពុជា បានប្រកាសជាសាធារណៈដោយកុំឲ្យអន្តរជាតិលូកដៃពាក់ព័ន្ធនឹងរឿងដែលលោកបិទសារព័ត៌មាន VOD ក្រោមហេតុផលថា កម្ពុជាមិនមែនជាប្រទេសរបស់ជនបរទេសទាំងនោះឡើយ។
ការប្រកាសរបស់លោក ហ៊ុន សែន នេះ បន្ទាប់ពីសហគមន៍អន្តរជាតិបានចេញញត្តិថ្កោលទោសដោយចាត់ទុកការបិទស្ថាប័នព័ត៌មានឯករាជ្យចុងក្រោយថាបានប៉ះពាល់សិទ្ធិសេរីភាពបញ្ចេញមតិ និងប្រព័ន្ធផ្សព្វផ្សាយនៅកម្ពុជា៕