30 C
Phnom Penh

លោក ហ៊ុន សែន ជំរុញ​ឱ្យ​ក្រសួង​មហាផ្ទៃ​លើក​កម្ពស់​លទ្ធិប្រជាធិបតេយ្យ​និង​សិទ្ធិ​សេរីភាព​ពលរដ្ឋ

ដោយ ឌឹ ខេមបូឌា ដេលី

បទវិភាគ

មេដឹកនាំ​ខ្មែរ​ដែល​ក្រាញ​អំណាច​ផ្ដាច់មុខ លោក ហ៊ុន សែន ជំរុញ​ឱ្យ​ក្រសួង​មហាផ្ទៃ​ការពារ​សន្តិភាព លើក​កម្ពស់​លទ្ធិប្រជាធិបតេយ្យ​សេរី​ពហុបក្ស សិទ្ធិ​សេរីភាព​របស់​ប្រជាពលរដ្ឋ និង​ការ​ពង្រឹង​នីតិរដ្ឋ​ស្រប​តាម​រដ្ឋធម្មនុញ្ញ​នៃ​ព្រះរាជាណាចក្រ​កម្ពុជា។

មេដឹកនាំ​ខ្មែរ​ដែល​ឡើង​កាន់​អំណាច​ដោយសារ​វៀតណាម​លើក​បន្តុប លោក ហ៊ុន សែន បាន​លើកឡើង​ក្នុង​ពិធី​បិទ​សន្និបាត​បូក​សរុប​លទ្ធផល​ការងារ​ឆ្នាំ​២០២២ របស់​ក្រសួង​មហាផ្ទៃ កាលពី​ថ្ងៃទី​២៣ ខែ​កុម្ភៈ ឆ្នាំ​២០២៣ ថា ក្រសួង​មហាផ្ទៃ​ត្រូវតែ​ពង្រឹង និង​ថែរក្សា​ការពារ​សន្តិភាព ស្ថិរភាព​នយោបាយ បូរណភាព​ទឹកដី អធិបតេយ្យ​ជាតិ ការពារ​ព្រះមហាក្សត្រ និង​ការពារ​របប​រាជា​និយម​អាស្រ័យ​រដ្ឋធម្មនុញ្ញ​ឲ្យ​បាន​ដាច់ខាត។

មេដឹកនាំ​បក្ស​កាន់​អំណាច លោក ហ៊ុន សែន លើកឡើង​ថា ក្រសួង​មហាផ្ទៃ​ក៏​ត្រូវ​ជំរុញ​ការ​អនុវត្ត​គោល​នយោបាយ​ភូមិ-ឃុំ​មាន​សុវត្ថិភាព ដើម្បី​លើក​កម្ពស់​ការ​ចូលរួម​របស់​ប្រជាពលរដ្ឋ​ក្នុង​ការ​បង្ការ​ទប់ស្កាត់​បង្ក្រាប​បទល្មើស​នានា​ក្នុង​សង្គម​ផង​ដែរ។

អ្នកវិភាគ​ឯករាជ្យ និង​ជា​ប្រធាន​វេទិកា​ពលរដ្ឋ លោក គឹម សុខ ប្រាប់​សារព័ត៌មាន The Cambodia Daily នៅ​ថ្ងៃទី​២៤ កុម្ភៈ នេះ​ថា ក្រសួង​មហាផ្ទៃ​មិន​អាច​ការពារ​សន្តិភាព រក្សា​ស្ថិរភាព​នយោបាយ និង​លើក​កម្ពស់​លទ្ធិប្រជាធិបតេយ្យ​នៅ​កម្ពុជា​បាន​ទេ ព្រោះ​អ្នក​ដែល​បំផ្លាញ​សន្តិភាព ធ្វើ​ឲ្យ​អស្ថិរភាព​នយោបាយ និង​ជាន់​ឈ្លី​លទ្ធិប្រជាធិបតេយ្យ គឺជា​លោក ហ៊ុន សែន ខ្លួនឯង​តែម្តង ខណៈ​គាត់​គឺជា​មេដឹកនាំ​ដែល​មាន​អំណាច​គ្រប់គ្រង​ទាំង​ក្រសួង​មហាផ្ទៃ​សព្វថ្ងៃ​នេះ។

លោក គឹម សុខ លើកឡើង​ថា ក្រសួង​មហាផ្ទៃ​ក៏​មិន​អាច​ការពារ​ព្រះមហាក្សត្រ​បាន​ដែរ ព្រោះ​អ្នក​ដែល​គំរាម និង​ប្រមាថ​រហូត​ដល់​រំលោភ​ព្រះរាជកិច្ច​របស់​ព្រះអង្គ គឺជា​លោក ហ៊ុន សែន។ ជាង​នេះ​ទៀត ក្រសួង​មហាផ្ទៃ​ក៏​គ្មាន​សមត្ថភាព​ការពារ​បូរណភាព​ទឹកដី​របស់​កម្ពុជា​ដែរ ព្រោះ​មនុស្ស​ដែល​ជា​មេរោគ​ធំ​ជាងគេ​ក្នុង​ការ​បំផ្លាញ​បូរណភាព​ទឹកដី បំផ្លាញ​អធិបតេយ្យ​ជាតិ​ខ្មែរ ក៏​នៅតែ​ជា​លោក ហ៊ុន សែន ដដែល ព្រោះ​គាត់​បាន​ឃុបឃិត​ជាមួយ​បរទេស​ឈ្លានពាន​បង្ហូរ​និគមជន​វៀតណាម​ចូល​ទឹកដី​កម្ពុជា​រាប់​ម៉ឺន​នាក់​រហូត​មក។

លោក​បន្ថែម​ថា ជាក់ស្តែង​កាលពី​ឆ្នាំ​២០២២ លោក ហ៊ុន សែន បង្ហូរ​ជនជាតិ​វៀតណាម​ខុស​ច្បាប់​ឲ្យ​ទៅ​រស់នៅ​ប្រទេស​កម្ពុជា​យ៉ាងហោចណាស់ ៦​ម៉ឺន​នាក់​ឯណោះ។ លើស​ពី​នេះ ជនជាតិ​វៀតណាម​ខុស​ច្បាប់​ទាំងនោះ​ទទួល​បាន​ប័ណ្ណ​ស្នាក់នៅ​ក្នុង​ប្រទេស​កម្ពុជា​ដោយ​ស្រប​ច្បាប់​ថែម​ទៀត។

អ្នកវិភាគ​ឯករាជ្យ​រូប​នេះ​បញ្ជាក់​ថា ការ​លើកឡើង​របស់​លោក ហ៊ុន សែន គ្រាន់តែ​និយាយ​ដើម្បី​ធ្វើ​ប្រជាភិថុតិ និង​ភូត​កុហក​ពលរដ្ឋ​ខ្មែរ​ប៉ុណ្ណោះ ព្រោះ​ថា​ការ​បាត់បង់​កោះត្រល់​ទៅ​វៀតណាម ក៏​គាត់​ជា​អ្នក​ធ្វើ​ឲ្យ​បាត់បង់ ការ​កែប្រែ​ផែនទី​ថ្មី​តាម​ការ​ចង់​បាន​របស់​វៀតណាម ក៏​គាត់​ជា​អ្នក​ឃុបឃិត​ជាមួយ​វៀតណាម ខណៈ​កូនប្រុស​របស់​គាត់ គឺ​លោក ហ៊ុន ម៉ាណែត ដែល​ជា​បញ្ជាការ​កងទ័ព​ជើងគោក​មិន​ដែល​បង្ហាញ​ពី​ឆន្ទៈ​ក្នុង​ការ​ការពារ​ព្រំដែន​ទាល់តែសោះ គឺ​ទុក​ឲ្យ​វៀតណាម​ឈ្លានពាន​តាម​អំពើ​ចិត្ត​រហូត​មក។

ការ​ដឹកនាំ​នយោបាយ​របស់​លោក ហ៊ុន សែន ចាប់តាំងពី​ឡើង​កាន់​តំណែង​ជា​នាយករដ្ឋមន្ត្រី​ឆ្នាំ​១៩៨៥ មក ត្រូវ​គេ​មើល​ឃើញ​ថា មេដឹកនាំ​ខ្មែរ​រូប​នេះ​បាន​ប្រើ​អំណាច​ហួស​ដែន​កំណត់ ដោយ​រំលោភ​លើ​សិទ្ធិ​មូលដ្ឋាន​របស់​ពលរដ្ឋ បំពាន​រដ្ឋធម្មនុញ្ញ រំលោភ​ព្រះមហាក្សត្រ និង​រំលោភ​លើ​ច្បាប់​អន្តរជាតិ​នានា ដូចជា​កិច្ចព្រមព្រៀង​សន្តិភាព​ទីក្រុង​ប៉ារីស​ឆ្នាំ​១៩៩១ ជាដើម។

ទាក់ទិន​នឹង​បញ្ហា​នេះ អតីត​ប្រធាន​សហភាព​សហជីព​កម្ពុជា លោក រ៉ុង ឈុន បាន​អះអាង​កាលពី​ពេល​ថ្មីៗ​នេះ​ថា កម្ពុជា​ដែល​ក្រោម​ការ​ដឹកនាំ​របស់​បក្ស​កាន់​អំណាច ធ្វើ​ឱ្យ​មាន​សំឡេង​ទ្រហោ​យំ​របស់​ប្រជាពលរដ្ឋ​ខ្មែរ​គ្រប់​ទីកន្លែង ដោយសារ​ការ​រំលោភ​យក​ដីធ្លី ការ​ចាប់​ឃុំ​ខ្លួន​អ្នក​តវ៉ា​ដើម្បី​សេរីភាព និង​ការ​បិទ​ខ្ទប់​សេរីភាព​បញ្ចេញមតិ​គ្រប់​បែប​យ៉ាង​ពី​សំណាក់​រដ្ឋាភិបាល​កម្ពុជា​សព្វថ្ងៃ​នេះ។

ក្រុម​អ្នក​សង្កេតការណ៍​លើកឡើង​ថា កម្ពុជា​ដែល​ក្រោម​ការ​ដឹកនាំ​របស់​គណបក្ស​កាន់​អំណាច​ដែល​មាន​លោក ហ៊ុន សែន ជា​មេដឹកនាំ​ជាង ៤០​ឆ្នាំ​មក​នេះ​មាន​តែ​ការ​រំលោភ​ច្បាប់ រំលោភ​សិទ្ធិ​មូលដ្ឋាន​របស់​ពលរដ្ឋ ជាន់​ឈ្លី​លទ្ធិប្រជាធិបតេយ្យ និង​ធ្វើ​ឱ្យ​បាត់បង់​នូវ​អធិបតេយ្យ​ជាតិ ជាដើម តាមរយៈ​នៃ​ការ​សម្បទាន​ទឹកដី​ខ្មែរ​ឱ្យ​បរទេស​ឈ្លានពាន​គ្រប់​រូបភាព​តាំងពី​ឆ្នាំ​១៩៨៥ មក។ ជាក់ស្តែង កោះត្រល់ និង​ចង្កោម​កោះសេះ ត្រូវ​បាន​វៀតណាម​គ្រប់គ្រង​ទាំងស្រុង​ក្រោម​ការ​ឃុបឃិត​គ្នា​រវាង​លោក ហ៊ុន សែន និង​វៀតណាម រហូត​មក៕

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស