32 C
Phnom Penh

លោក ហ៊ុន សែន ថា​ថ្ងៃទី​២៩​ធ្នូ​១៩៩៨​គឺ​ពេល​បញ្ចប់​ការ​បែកបាក់​សាមគ្គី​ជាតិ​ជាង​៥​ទសវត្ស

ដោយ ឌឹ ខេមបូឌា ដេលី

បទវិភាគ

មេដឹកនាំ​ខ្មែរ​ដែល​ក្រាញ​អំណាច​ជាង ៤​ទសវត្ស លោក ហ៊ុន សែន ណែនាំ​មន្ត្រី​ក្រោម​ឱវាទ​របស់​ខ្លួន​ថា ថ្ងៃទី​២៩ ខែ​ធ្នូ ឆ្នាំ​១៩៩៨ គឺជា​ថ្ងៃ​ជោគជ័យ​នៃ​នយោបាយ​ឈ្នះ​ឈ្នះ​របស់​លោក ក្រោយ​កម្ពុជា​កើតមាន​ជម្លោះ​បែកបាក់​ជាតិ​ជាង ៥​សតវត្ស​ទៅ​ហើយ​នោះ។

ការ​អះអាង​របស់​បុរស​ខ្លាំង​ដែល​វៀតណាម​លើក​បន្តុប​ឲ្យ​ឡើង​កាន់​អំណាច​រូប​នេះ បាន​លើកឡើង​នៅ​ក្នុង​ពិធី​ប្រគល់​សញ្ញាបត្រ​ដល់​និស្សិត​នៃ​វិទ្យាស្ថាន​ជាតិ​បណ្តុះបណ្តាល​បច្ចេកទេស (NTTI) នៅ​ថ្ងៃទី​២៧ ខែ​កុម្ភៈ ឆ្នាំ​២០២៣ នេះ​ថា ឆ្នាំ​១៩៩៨ គឺជា​ឆ្នាំ​ដែល​បាន​បញ្ចប់​សង្គ្រាម​លើ​ទឹកដី​កម្ពុជា​ជា​លើកដំបូង​ក្នុង​ប្រវត្តិសាស្ត្រ​ដែល​មិន​ធ្លាប់​មាន និង​បាន​នាំ​មក​នូវ​សុខ​សន្តិភាព​រហូត​ដល់​សព្វថ្ងៃ​នេះ។

លោក ហ៊ុន សែន លើកឡើង​ថា នយោបាយ​ឈ្នះ​ឈ្នះ​របស់​លោក​បាន​ចាប់ផ្ដើម​អនុវត្ត​កាលពី​ខែ​កុម្ភៈ ឆ្នាំ​១៩៩៦ ដែល​ពេល​នោះ​លោក​បាន​ចុះ​ដោយ​ផ្ទាល់​នៅ​តាម​មូលដ្ឋាន​នានា​ដើម្បី​ធ្វើ​សមាហរណកម្ម​បង្រួបបង្រួម​ជាតិ​ឡើងវិញ ព្រោះ​តាំងពី​អតីតកាល​មក កម្ពុជា​មាន​ការ​បែកបាក់​ជាតិ​ស្ទើរ​គ្រប់​សម័យកាល​ដែល​ធ្វើ​ឱ្យ​ប្រទេស​ជាតិ​ធ្លាក់​ចូល​ទៅ​ក្នុង​ជ្រោះ​នៃ​គ្រោះ​មហន្តរាយ និង​បង្ក​ការ​លំបាក​ដល់​ពលរដ្ឋ​គ្រប់​បែប​យ៉ាង។

មេដឹកនាំ​បក្ស​កាន់​អំណាច​ដែល​ចូលចិត្ត​ប្រើ​អំពើ​ហិង្សា លោក ហ៊ុន សែន បញ្ជាក់​ថា ខ្មែរក្រហម​ទោះ​ខ្លាំង​យ៉ាងណា​ក៏ដោយ ក៏​មិន​អាច​គ្រប់គ្រង​កម្លាំង​របស់​ខ្លួន​បាន​ទាំងអស់​បាន​ដែរ។ លើស​ពី​នេះ អ៊ុនតាក់​ចូល​មក​កម្ពុជា និង​ចាយ​លុយ​អស់​យ៉ាង​ច្រើន​សន្ធឹកសន្ធាប់ បាន​ដក​ចេញពី​កម្ពុជា​វិញ​ដោយ​បន្សល់​ទុក​ឱ្យ​កម្ពុជា​មាន​តំបន់​ត្រួតត្រា​ជាច្រើន និង​មាន​ការ​ផ្ទុះ​អាវុធ​គ្រប់​ទីកន្លែង ប៉ុន្តែ​កម្ពុជា​ដែល​ក្រោម​ការ​ដឹកនាំ​របស់​លោក ទទួល​បាន​នូវ​សុខ​សន្តិភាព​យ៉ាង​ពេញលេញ។

កាលពី​ថ្ងៃទី​២៦ ខែ​កុម្ភៈ កូនប្រុស​ច្បង​លោក ហ៊ុន សែន គឺ​លោក ហ៊ុន ម៉ាណែត ដែល​ជា​បេក្ខភាព​អនាគត​នាយករដ្ឋមន្ត្រី​ដ៏​ចម្រូងចម្រាស​របស់​បក្ស​កាន់​អំណាច បាន​លើកឡើង​ថា នយោបាយ​ឈ្នះ​ឈ្នះ​របស់​រាជរដ្ឋាភិបាល​ដឹកនាំ​ដោយ​បក្ស​ប្រជាជន​កម្ពុជា​របស់​លោក ហ៊ុន សែន បាន​កម្ចាត់​ចោល​នូវ​សត្រូវ​ដ៏​ធំ​បំផុត​របស់​កម្ពុជា គឺ​សង្គ្រាម និង​ការ​បែកបាក់​ជាតិ ដោយ​ប្តូរ​បាន​មក​វិញ​នូវ​ការ​បង្រួបបង្រួម​ជាតិ និង​សុខ​សន្តិភាព​រហូត​ដល់​សព្វថ្ងៃ​នេះ។ ប៉ុន្តែ​ឧបនាយករដ្ឋមន្ត្រី និង​ជា​រដ្ឋមន្ត្រី​ក្រសួង​មហាផ្ទៃ​លោក ស ខេង ធ្លាប់​មាន​ប្រសាសន៍​ថា សត្រូវ​ធំ​បំផុត​របស់​មហាជន គឺ​ភាព​អវិជ្ជា និង​ភាព​ក្រីក្រ។

អ្នកវិភាគ​ឯករាជ្យ និង​ជា​ប្រធាន​វេទិកា​ពលរដ្ឋ​លោក គឹម សុខ ប្រាប់​សារព័ត៌មាន The Cambodia Daily នៅ​ថ្ងៃទី​២៧ កុម្ភៈ នេះ​ថា ការ​ដឹកនាំ​របស់​លោក ហ៊ុន សែន មិនមែន​បញ្ចប់​សង្គ្រាម និង​រក​សន្តិភាព​ឱ្យ​កម្ពុជា​ទេ ព្រោះ​ថា​ការ​ដឹកនាំ​របស់​គាត់​សព្វថ្ងៃ​នេះ​កំពុង​ប្រព្រឹត្ត​អំពើ​ឃាតកម្ម​នីតិរដ្ឋ និង​ឃាតកម្ម​ប្រជាធិបតេយ្យ​យ៉ាង​ធំធេង​ដែល​បាន​បង្កើត​ឡើង​ក្រោយ​កិច្ចព្រមព្រៀង​សន្តិភាព​ទីក្រុង​ប៉ារីស​ឆ្នាំ​១៩៩១ ខណៈ​នយោបាយ​ឈ្នះ​ឈ្នះ​ដែល​លោក ហ៊ុន សែន បាន​លើកឡើង​នោះ​គ្រាន់តែ​ជា​ជ័យជម្នះ​នយោបាយ​ក្តោប​ក្តាប់​អំណាច​របស់​គាត់​ប៉ុណ្ណោះ។

លោក គឹម សុខ លើកឡើង​ថា បន្ទាប់ពី​លោក ហ៊ុន សែន ឡើង​កាន់​អំណាច​ក្រោយ​វៀតណាម​លើក​បន្តុប គាត់​មិន​អាច​ដឹកនាំ​រក​ការ​បង្រួបបង្រួម​បាន​ទេ គឺ​មាន​តែ​សម្លាប់​អ្នក​នយោបាយ និង​ពលរដ្ឋ​ខ្លួនឯង​ប៉ុណ្ណោះ​នៅ​មុន​ពេល​មាន​កិច្ចព្រមព្រៀង​សន្តិភាព​ទីក្រុង​ប៉ារីស​ឆ្នាំ​១៩៩១ ប៉ុន្តែ​នៅ​ពេល​ដែល​កិច្ចសន្យា​អន្តរជាតិ​មួយ​នេះ​បាន​ចូល​មក​ដល់ ទើប​កម្ពុជា​ចាប់ផ្តើម​មាន​ការ​ចរចា​ពី​គ្រប់​ភាគី និង​អាច​បញ្ចប់​បាន​នូវ​ជម្លោះ​ប្រដាប់​អាវុធ​ផ្ទៃក្នុង​របស់​ខ្លួន​បាន​រហូត​ដល់​ពេលនេះ។

អ្នកវិភាគ​ឯករាជ្យ​រូប​នេះ បញ្ជាក់​ថា លោក ហ៊ុន សែន អួត​ថា​នយោបាយ​ឈ្នះ​ឈ្នះ​របស់​គាត់​ចាប់ផ្តើម​ពី​អំឡុង​ឆ្នាំ​១៩៩៦ និង​បញ្ចប់​នៅ​ឆ្នាំ​១៩៩៨ គឺ​មាន​រយៈពេល​តែ ២​ឆ្នាំ​ប៉ុណ្ណោះ ដូច្នេះ​បើ​គាត់​ពិត​ជា​មាន​សមត្ថភាព​បែប​នេះ​មែន ហេតុ​អ្វី​គាត់​មិន​ប្រើ​នយោបាយ​ឈ្នះ​ឈ្នះ​ពី​ឆ្នាំ​១៩៨៥ ដែល​វៀតណាម​លើក​បន្តុប​មក ដើម្បី​បញ្ចប់​សង្គ្រាម​នៅ​ឆ្នាំ​១៩៨៧ តែម្តង​ទៅ ចាំបាច់​ទុក​ឱ្យ​សង្គ្រាម​នៅ​កម្ពុជា​អូស​បន្លាយ​រហូត​មាន​កិច្ចព្រមព្រៀង​សន្តិភាព​ទីក្រុង​ប៉ារីស​ឆ្នាំ​១៩៩១ ធ្វើ​អ្វី?

លោក គឹម សុខ គូស​បញ្ជាក់​ថា ការ​អួត​ពី​នយោបាយ​ឈ្នះ​ឈ្នះ គ្រាន់តែ​ជា​វិធី​ធ្វើ​ប្រជាភិថុតិ​ដែល​គាត់​ប្រើ​ដើម្បី​បំភ្លៃ​ការពិត និង​មាន​ចេតនា​លុប​បំបាត់​កិច្ចព្រមព្រៀង​សន្តិភាព​ទីក្រុង​ប៉ារីស​ឆ្នាំ​១៩៩១ ប៉ុណ្ណោះ។

ទាក់ទិន​នឹង​បញ្ហា​នេះ អ្នក​សង្កេតការណ៍​កម្ពុជា​លោក សុខ សុគន្ធ អះអាង​ថា មេដឹកនាំ​នយោបាយ​នៅ​កម្ពុជា គឺជា​ក្រុម​អ្នក​នយោបាយ​ដែល​គ្មាន​គោលដៅ​ដើម្បី​ជាតិ​ពិតប្រាកដ​នោះ​ទេ ប៉ុន្តែ​ពួកគេ​គ្រាន់តែ​ប្រឹង​រក​កន្លែង​ឈរ​ជើង​ដើម្បី​ជីវភាព​នយោបាយ​ខ្លួនឯង​ប៉ុណ្ណោះ មិនមែន​ដើម្បី​ប្រទេស​ជាតិ ឬ​ប្រជាជន​ខ្មែរ​នោះ​ឡើយ។

ក្រុម​អ្នក​ឃ្លាំមើល​និយាយ​ថា អស់​រយៈពេល​ជិត ១៨​ឆ្នាំ​មក​នេះ ក្រោយ​វិសោធនកម្ម​រដ្ឋធម្មនុញ្ញ​ពី ២​ភាគ​៣ មក ៥០​ភាគរយ​បូក​១ កម្ពុជា​បាន​ប្រែ​ក្លាយ​ជា​ប្រទេស​ដែល​ដឹកនាំ​ដោយ​ពហុបក្ស​ទៅ​ជា​រដ្ឋ​មួយ​ដឹកនាំ​ដោយ​ឯក​បក្ស ដែល​នាំ​ឲ្យ​លោក ហ៊ុន សែន អាច​ជិះ​សេះ​លែង​ដៃ​ប្រើ​អំណាច​តាម​ទំនើង​ចិត្ត រំលោភ​រដ្ឋធម្មនុញ្ញ រំលោភ​តួនាទី​របស់​ព្រះមហាក្សត្រ រំលោភ​កិច្ចព្រមព្រៀង​សន្តិភាព​ទីក្រុង​ប៉ារីស បំផ្លាញ​មូលដ្ឋានគ្រឹះ​នៃ​លទ្ធិប្រជាធិបតេយ្យ រំលាយ​គណបក្ស​សង្គ្រោះ​ជាតិ រំលោភ​សិទ្ធិមនុស្ស រំលោភ​នីតិរដ្ឋ សម្លាប់​បណ្ដាញ​សារព័ត៌មាន​ឯករាជ្យ បង្កើន​ការ​ប្រព្រឹត្ត​អំពើពុករលួយ ការ​លាង​លុយ​កខ្វក់ ការ​ឃុំ​ខ្លួន​សកម្មជន​នយោបាយ និង​សកម្មជន​សង្គម​ជាដើម៕

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស