មន្ត្រីជាន់ខ្ពស់ក្រសួងព័ត៌មាន អះអាងថា គិតត្រឹមថ្ងៃទី២៨ ខែកុម្ភៈ កន្លងទៅ អតីតបុគ្គលិកវិទ្យុ VOD ជិត ៣០នាក់បានដាក់ពាក្យបម្រើការងារក្របខ័ណ្ឌរដ្ឋដែលលោក ហ៊ុន សែន ផ្ដល់ឲ្យបន្ទាប់ពីលោកបិទសារព័ត៌មាន VOD កាលពីថ្ងៃទី១៣ ខែកុម្ភៈ។
រដ្ឋមន្ត្រីក្រសួងមុខងារសាធារណៈ លោក ព្រុំ សុខា បានប្រាប់សារព័ត៌មានក្នុងស្រុកនៅថ្ងៃទី១ ខែមីនា នេះថា អតីតបុគ្គលិកវិទ្យុ VOD ចំនួន ២៨នាក់បានដាក់ពាក្យស្នើសុំធ្វើការក្របខ័ណ្ឌរដ្ឋ ក្នុងនោះមានស្ត្រី ៦នាក់។
លោក ព្រុំ សុខា អះអាងថា លោក ហ៊ុន សែន បានប្រកាសផ្ដល់ក្របខ័ណ្ឌរដ្ឋឲ្យបុគ្គលិកវិទ្យុ VOD បន្ទាប់ពីលោកបានបញ្ជាទៅរដ្ឋមន្ត្រីក្រសួងព័ត៌មាន ឲ្យដកអាជ្ញាប័ណ្ណសារព័ត៌មាន VOD កាលពីថ្ងៃទី១៣ ខែកុម្ភៈ ឆ្នាំ២០២៣។
ក្នុងចំណោមបុគ្គលិកវិទ្យុ VOD ប្រមាណ ៦០នាក់ ក្នុងនោះចំនួន ២៨នាក់បានដាក់ចូលក្របខ័ណ្ឌរដ្ឋ ហើយខ្លះទៀតមិនទទួលឡើយ ដែលនាំឲ្យលោក ហ៊ុន សែន កាលពីថ្ងៃទី១៧ ខែកុម្ភៈ បានផ្ញើសារឌឺដងលើហ្វេសប៊ុករបស់លោកថា លោកសូមអរគុណចំពោះអ្នកបង្ហោះសារថា មិនចូលមកធ្វើការរដ្ឋទេ សុខចិត្តធ្វើស្រែ និងឡើងត្នោត។ ជាងនេះទៅទៀត លោក ហ៊ុន សែន បានបន្ទោសបុគ្គលិក VOD ដែលបង្ហោះសារនោះថាជាពួកអាក្រក់ ហើយថាបើមិនទទួលយក មិនចាំបាច់បង្ហោះសារឌឺដងដាក់លោកនោះទេ។
លោកថា ចំពោះរឿងនេះ លោកនឹងរុញទូកបណ្តោយទឹក ដើម្បីឲ្យពួកគេដឹងពីរបៀបដែលលោកគិត និងធ្វើការ ហើយលោកនឹងកំដរលេងជាមួយអ្នកដែលមិនទទួលយកក្របខ័ណ្ឌរដ្ឋទាំងនោះ។
ក្រុមអ្នកឃ្លាំមើលចាត់ទុកសាររបស់លោក ហ៊ុន សែន បែបនេះ ថាជាការគំរាមកំហែងធ្ងន់ធ្ងរដល់សុវត្ថិភាពរបស់អតីតបុគ្គលិក VOD។
សារព័ត៌មាន The Cambodia Daily មិនទាន់អាចសុំការឆ្លើយតបពីប្រធានស្ដីទីសារព័ត៌មាន វីអូឌី (VOD) លោក អ៊ិត សុធឿត ជុំវិញរឿងនេះបាននៅឡើយទេ៕