29 C
Phnom Penh

សង្គម​ស៊ីវិល​បារម្ភ​ពី​វិធានការ​រឹតត្បិត​សេរីភាព​របស់​រដ្ឋាភិបាល​ថា​អាច​នឹង​រុញ​ឱ្យ​កម្ពុជា​ប្រឈម​នឹង​វិបត្តិ​កាន់តែ​ច្រើន

ដោយ ឌឹ ខេមបូឌា ដេលី

បទវិភាគ

ក្រុម​សង្គម​ស៊ីវិល​សម្ដែង​ការ​ព្រួយបារម្ភ​ថា ប្រសិនបើ​រដ្ឋាភិបាល​កម្ពុជា​នៅតែ​បន្ត​វិធានការ​រឹតត្បិត​សេរីភាព​នានា អាច​នឹង​រុញ​ឲ្យ​កម្ពុជា​ប្រឈម​នឹង​វិបត្តិ​ជាច្រើន​បន្ថែម​ទៀត​ទៅ​ថ្ងៃ​មុខ។

អ្នក​នាំពាក្យ​សមាគម​ការពារ​សិទ្ធិមនុស្ស​អាដហុក លោក ស៊ឹង សែនករុណា ប្រាប់​សារព័ត៌មាន The Cambodia Daily នៅ​ថ្ងៃទី​១ មីនា នេះ​ថា សិទ្ធិ​សេរីភាព​បញ្ចេញមតិ​នៅ​កម្ពុជា​មួយ​ចំនួន​ដែល​រង​នូវ​ការ​ចោទប្រកាន់​ថា​បាន​ធ្វើ​ឱ្យ​ប៉ះពាល់​ដល់​រដ្ឋាភិបាល ត្រូវ​មជ្ឈដ្ឋាន​ជាតិ និង​អន្តរជាតិ​រិះគន់​ថា បាន​រង​នូវ​ការ​គាបសង្កត់​យ៉ាង​ធ្ងន់ធ្ងរ​ពី​វិធានការ​របស់​រដ្ឋាភិបាល​ដែល​ជា​មូលហេតុ​ធ្វើ​ឱ្យ​ប៉ះពាល់​យ៉ាង​ខ្លាំង​ដល់​ដំណើរការ​លទ្ធិប្រជាធិបតេយ្យ​របស់​កម្ពុជា​សព្វថ្ងៃ​នេះ។

លោក ស៊ឹង សែនករុណា លើកឡើង​ថា ដោយសារតែ​បញ្ហា​នេះ សហគមន៍​អន្តរជាតិ​តែង​ទាមទារ​ឱ្យ​រដ្ឋាភិបាល​បើក​នូវ​លំហ​សេរីភាព​បញ្ចេញមតិ និង​សកម្មភាព​នយោបាយ​ដើម្បី​ឱ្យ​ពលរដ្ឋ​ខ្មែរ​អាច​អនុវត្ត​នូវ​សិទ្ធិ​របស់​ខ្លួន​បាន​ពេញលេញ​ស្រប​ទៅ​តាម​ច្បាប់​ដែល​បាន​ចែង។

លោក​បន្ថែម​ថា ដើម្បី​ជំរុញ​ឱ្យ​រដ្ឋាភិបាល​អនុវត្ត​នូវ​ការ​ទាមទារ​របស់​ពួកគេ សហគមន៍​អន្តរជាតិ​ទាំងនោះ​បាន​ដាក់​ទណ្ឌកម្ម​មួយ​ចំនួន​លើ​រដ្ឋាភិបាល​កម្ពុជា ដូចជា​ការ​ព្យួរ​ប្រព័ន្ធ​អនុគ្រោះ​ពន្ធ EBA និង GSP របស់​សហរដ្ឋ​អាមេរិក ជាដើម។

មន្ត្រី​ជាន់ខ្ពស់​នៃ​អង្គការ​ការពារ​សិទ្ធិមនុស្ស​រូប​នេះ អំពាវនាវ​ឱ្យ​រដ្ឋាភិបាល​កម្ពុជា​បើក​លំហ​លទ្ធិប្រជាធិបតេយ្យ​ឱ្យ​ទូលំទូលាយ និង​អំពាវនាវ​ឱ្យ​មេដឹកនាំ​នយោបាយ​គ្រប់​និន្នាការ​ស្វែងរក​ការ​ចរចា​ដើម្បី​គិតគូរ​ពី​ផល​ប្រយោជន៍​របស់​ប្រទេស​កម្ពុជា និង​ដើម្បី​បើក​លំហ​សេរីភាព​នយោបាយ​សម្រាប់​ការ​បោះឆ្នោត​ជាតិ​ខាងមុខ​នេះ​ផង​ដែរ។

កាលពី​ថ្ងៃទី​២៧ ខែ​កុម្ភៈ ឆ្នាំ​២០២៣ សាលាដំបូង​រាជធានី​ភ្នំពេញ បាន​ប្រកាស​សាលក្រម​សម្រេច​តម្កល់​ទោស​អតីត​មេឃុំ​ត្រែងត្រយឹង ជាប់​ឆ្នោត​របស់​អតីត​គណបក្ស​សង្គ្រោះ​ជាតិ ដាក់​ពន្ធនាគារ ១៨​ខែ​ដដែល ក្រោម​ការ​ចោទប្រកាន់​ពី​បទ ញុះញង់​បង្ក​ឱ្យ​មាន​ភាព​វឹកវរ​ធ្ងន់ធ្ងរ​ដល់​សន្តិសុខ​សង្គម។ សាលាដំបូង​រាជធានី​ភ្នំពេញ​បញ្ជាក់​ថា ខ្លួន​បាន​ទុក​សិទ្ធិ​ឱ្យ​ជនជាប់ចោទ​ប្តឹង​ជំទាស់​ទៅ​កាន់​តុលាការ​ឧទ្ធរណ៍​បន្ត​ទៀត​តាម​ការ​កំណត់​ច្បាប់​ជុំវិញ​ករណី​នេះ។

ការ​សម្រេច​របស់​តុលាការ​ក្រុង​ភ្នំពេញ​បែប​នេះ ធ្វើឡើង​បន្ទាប់ពី​ជនជាប់ចោទ​បាន​ប្តឹង​សើរើ​ជំទាស់​នឹង​ការ​សម្រេច​របស់​សាលាដំបូង​រាជធានី​ភ្នំពេញ កាលពី​ថ្ងៃទី​០៧ ខែ​កុម្ភៈ ឆ្នាំ​២០២៣ ក្រោយពី​តុលាការ​ផ្ដន្ទាទោស​ដោយ​កំបាំង​មុខ​លើ​ខ្លួន​កាលពី​អំឡុង​ខែ​សីហា ឆ្នាំ​២០២២ កន្លងទៅ។

អង្គការ​លើកលែង​ទោស​អន្តរជាតិ (Amnesty International) បាន​ចេញ​របាយការណ៍​របស់​ខ្លួន​ស្តីអំពី​ស្ថានភាព​សិទ្ធិមនុស្ស​នៅ​កម្ពុជា​កាលពី​ពេល​កន្លងទៅ​ថា អាជ្ញាធរ​នៃ​រដ្ឋាភិបាល​លោក ហ៊ុន សែន បាន​រំលោភ​បំពាន​ទៅ​លើ​សិទ្ធិ​ប្រជាពលរដ្ឋ គណបក្ស​ប្រឆាំង សង្គម​ស៊ីវិល និង​ប្រព័ន្ធ​ផ្សព្វផ្សាយ​ឯករាជ្យ​នានា​យ៉ាង​ធ្ងន់ធ្ងរ។ ចំណែក​ប្រព័ន្ធ​យុត្តិធម៌ និង​តុលាការ ក៏​ត្រូវ​បាន​ប្រើប្រាស់​ដោយ​មិន​ត្រឹមត្រូវ ដើម្បី​បង្ក្រាប​ទៅ​លើ​អ្នក​បញ្ចេញមតិ​រិះគន់​រដ្ឋាភិបាល​ដែល​ដឹកនាំ​ដោយ​ឯក​បក្ស​សព្វថ្ងៃ​នេះ​ផង​ដែរ។

ចំណែក​គម្រោង​យុត្តិធម៌​ពិភពលោក (The World Justice Project) បាន​ចេញ​របាយការណ៍​របស់​ខ្លួន​ស្ដីពី​នីតិរដ្ឋ​សម្រាប់​ឆ្នាំ​២០២២ ថា កម្ពុជា​បាន​ជាប់​ចំណាត់ថ្នាក់​លេខ​ទី​១៣៩ ក្នុង​ចំណោម ១៤០​ប្រទេស​ដែល​មាន​នីតិរដ្ឋ​ទាប​បំផុត ដោយសារតែ​ការ​ដឹកនាំ​របស់​រដ្ឋាភិបាល​កម្ពុជា​គ្មាន​តម្លាភាព មាន​ការ​គំរាមកំហែង​សិទ្ធិ​ជា​មូលដ្ឋាន​របស់​ពលរដ្ឋ និង​ការ​មិន​ធានា​បាន​នូវ​ប្រព័ន្ធ​យុត្តិធម៌​របស់​ខ្លួន​ជាដើម៕

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស