28 C
Phnom Penh

លោក ហ៊ុន សែន ថា​បើ​ចុះហត្ថលេខា​លើកលែង​ទោស​ឱ្យ​លោក សម រង្ស៊ី គាត់​នឹង​មាន​តម្លៃ​ស្មើ​សត្វ​តិរច្ឆាន

ដោយ ឌឹ ខេមបូឌា ដេលី

បទវិភាគ

លោក ហ៊ុន សែន ថ្លែង​ថា លោក​នឹង​មាន​តម្លៃ​ស្មើ​សត្វ​តិរច្ឆាន ប្រសិនបើ​លោក​ចុះហត្ថលេខា​ស្នើ​ទៅ​ព្រះមហាក្សត្រ​ដើម្បី​លើកលែង​ទោស​ឱ្យ​អ្នក​នយោបាយ​ដែល​កំពុង​មាន​ទោស​នៅ​តុលាការ ពី​បទ​ព្រហ្មទណ្ឌ​សព្វថ្ងៃ​នេះ ដែល​ការ​លើកឡើង​មិន​ចំ​ឈ្មោះ​នេះ គឺ​មាន​ចេតនា​សំដៅ​ដល់​អតីត​មេដឹកនាំ​បក្ស​ប្រឆាំង លោក សម រង្ស៊ី។

បុរស​ខ្លាំង​ដែល​អនុវត្ត​អំណាច​បែប​ផ្ដាច់ការ​នៅ​កម្ពុជា លោក ហ៊ុន សែន បាន​យក​ពិធី​អបអរ​សាទរ​ទិវា​អន្តរជាតិ​នារី ៨​មីនា ខួប​លើក​ទី​១១២ នៅ​ថ្ងៃទី​៧ ខែ​មីនា ឆ្នាំ​២០២៣ នេះ និយាយ​ទៅ​កាន់​លោក សម រង្ស៊ី និង​ក្រុម​អ្នកគាំទ្រ​របស់​អតីត​មេដឹកនាំ​បក្ស​ប្រឆាំង​រូប​នេះ​ថា ក្នុង​នាម​លោក​ជា​មេដឹកនាំ​ដែល​កាន់​អំណាច ត្រូវតែ​ប្រើ​អំណាច​របស់​ខ្លួន​ដែល​កំពុង​មាន។

លោក ហ៊ុន សែន បន្ថែម​ថា បើ​មាន​អំណាច​ហើយ​មិន​ប្រើ​អំណាច គឺ​ស្មើ​នឹង​អត់​អំណាច ដូច្នេះ​សូម​កុំ​សង្ឃឹម​ថា​លោក​ស្នើ​ទៅ​ព្រះមហាក្សត្រ​ដើម្បី​លើកលែង​ទោស​ឱ្យ​ពួកគេ​ឱ្យ​សោះ។

មេដឹកនាំ​ខ្មែរ​ដែល​ប្រើ​អំណាច​រំលោភ​ច្បាប់​ផ្ដាច់មុខ លោក ហ៊ុន សែន អះអាង​ថា ពួក​អ្នក​នយោបាយ​ដែល​ប្រមាថ​កិត្តិយស​ក្រុម​គ្រួសារ​របស់​លោក​ទាំង​ដែល​លោក​កំពុង​មាន​ទុក្ខ​ដោយសារ​ប្អូនស្រី​ស្លាប់ គឺ​អាក្រក់​ជាង​សត្វ​តិរច្ឆាន​ទៅ​ទៀត ដូច្នោះ​លោក​នឹង​មិន​អនុគ្រោះ​ឱ្យ​ពួកគេ​ឡើយ។

ការ​ព្រមាន​របស់​មេដឹកនាំ​បក្ស​កាន់​អំណាច​បែប​នេះ ធ្វើឡើង​បន្ទាប់ពី​អតីត​មេដឹកនាំ​បក្ស​ប្រឆាំង លោក សម រង្ស៊ី ដែល​បាន​រិះគន់ និង​បើក​កកាយ​ពី​ប្រវត្តិ​ប្អូនស្រី​របស់​លោក ហ៊ុន សែន កាលពី​ថ្មីៗ​នេះ។

កាលពី​ថ្ងៃទី​៣ ខែ​កុម្ភៈ ឆ្នាំ​២០២៣ អ្នកស្រី ប៊ុន សុថា ត្រូវ​ជា​ប្អូនស្រី​បង្កើត​របស់​ភរិយា​លោក​នាយករដ្ឋមន្ត្រី ហ៊ុន សែន គឺ​អ្នកស្រី ប៊ុន រ៉ានី បាន​ទទួល​មរណភាព​ដោយ​រោគាពាធ។ ស្រប​ពេល​ដែល​អ្នកស្រី ប៊ុន សុថា ទទួល​មរណភាព អតីត​មេដឹកនាំ​បក្ស​ប្រឆាំង​លោក សម រង្ស៊ី បាន​លើកឡើង​កាលពី​ថ្ងៃទី​៥ កុម្ភៈ ថា ក្នុង​ជួរ​គ្រួសារ​លោក ហ៊ុន សែន មាន​មនុស្ស​សាហាវៗ​ជាច្រើន ដូច​ករណី​អ្នកស្រី ប៊ុន សុថា ដែល​មាន​ឈ្មោះ​ដើម ប៊ុន សាមហ៊ឹង ជាដើម ធ្លាប់​បាន​បញ្ជា​ឲ្យ​គេ​សម្លាប់​ប្តី​ខ្លួនឯង គឺ​លោក កូវ សាមុត កាលពី​អំឡុង​ឆ្នាំ​១៩៩៦ ដោយសារតែ​ជម្លោះ​ផ្ទៃក្នុង​គ្រួសារ​របស់​ខ្លួន​ដែល​មាន​លោក ហ៊ុន សែន ជា​អ្នក​បញ្ជា​ពីក្រោយ​ខ្នង។

លោក សម រង្ស៊ី បញ្ជាក់​ថា មិន​ត្រឹមតែ​អ្នកស្រី ប៊ុន សុថា នេះ​ទេ​ដែល​មាន​ចរិត​កាច​សាហាវ សូម្បី​អ្នកស្រី ប៊ុន រ៉ានី ដែល​មាន​ឈ្មោះ​ដើម​ថា ប៊ុន សាមហ៊ាង ជា​ប្រពន្ធ​លោក ហ៊ុន សែន ក៏​ធ្លាប់​បាន​បញ្ជា​ឲ្យ​គេ​សម្លាប់​អ្នកស្រី ពិសិដ្ឋ ពីលីកា ក្នុង​ឆ្នាំ​១៩៩៩ ដោយសារ​ភ្លើង​ប្រចណ្ឌ​នឹង​លោក ហ៊ុន សែន ដែល​លួច​បង្កាត់​ភ្លើង​ស្នេហ៍​ត្រីកោណ​ដែរ។

លោក​បន្ថែម​ថា នៅ​ពេល​អ្នកស្រី ពិសិដ្ឋ ពីលីកា ត្រូវ​រង​របួស​ដោយ​ការ​បាញ់​ប្រហារ និង​ត្រូវ​បញ្ជូន​ទៅ​មន្ទីរពេទ្យ​កាល់ម៉ែត (Calmette Hospital) អ្នកស្រី ប៊ុន រ៉ានី បាន​បញ្ជា​ឲ្យ​គ្រូពេទ្យ​ផ្តាច់​ជីវិត​អ្នកស្រី ពិសិដ្ឋ ពីលីកា នៅ​មន្ទីរពេទ្យ​នោះ​តែម្តង។

ក្រោយ​ការ​លើកឡើង​របស់​លោក សម រង្ស៊ី មន្ត្រី​បក្ស​កាន់​អំណាច ជាពិសេស​លោក ហ៊ុន សែន បាន​ឆ្លើយតប​ទៅ​លោក សម រង្ស៊ី ដោយ​ចាត់ទុក​អតីត​មេដឹកនាំ​បក្ស​ប្រឆាំង​រូប​នេះ និង​អ្នក​គាំទ្រ​មួយ​ចំនួន​របស់​គាត់​ថា ពួកគេ​លែង​មាន​សារជាតិ​ជា​មនុស្ស​ទៀត​ហើយ។ ដោយសារ​តែ​បញ្ហា​នេះ បាន​ធ្វើ​ឱ្យ​កម្ដៅ​នយោបាយ​នៅ​កម្ពុជា​កាន់តែ​ឆាបឆេះ​ឡើងៗ​រហូត​ដល់​ពេលនេះ។

ទាក់ទិន​នឹង​បញ្ហា​នេះ សកម្មជន​សហគមនាគមន៍​ខ្មែរ​នៅ​ក្រុង​ឡុងប៊ិច (Long Beach) នៃ​រដ្ឋ​កាលីហ្វ័រញ៉ា (California) សហរដ្ឋ​អាមេរិក លោក មួង ណារ៉េត បាន​អះអាង​ថា ការ​ឆ្លើយឆ្លង​រវាង​អតីត​មេដឹកនាំ​បក្ស​ប្រឆាំង លោក សម រង្ស៊ី និង​មេដឹកនាំ​បក្ស​កាន់​អំណាច លោក ហ៊ុន សែន ត្រូវ​គេ​មើល​ឃើញ​ថា​ជា​ការ​សងសឹក​គំនុំ​បុគ្គល​ផ្ទាល់ខ្លួន​របស់​ពួកគេ​ប៉ុណ្ណោះ ដែល​នឹង​ធ្វើ​ឲ្យ​វិបត្តិ​នយោបាយ​នៅ​កម្ពុជា​កាន់តែ​អាប់អួរ​ឡើងៗ​បន្ថែម​លើ​វិបត្តិ​នយោបាយ​ដែល​មាន​ស្រាប់​នៅ​ពេលនេះ។

កាលពី​ថ្ងៃទី​៥ ខែ​តុលា ឆ្នាំ​២០១៨ លោក ហ៊ុន សែន ធ្លាប់​បាន​អះអាង​ថា បើ​លោក​ចុះហត្ថលេខា​ស្នើ​ព្រះមហាក្សត្រ​លើកលែង​ទោស​ឱ្យ​លោក សម រង្ស៊ី លោក​សុខចិត្ត​កាត់​ដៃ​ស្តាំ​ខ្លួនឯង​ក្រវាត់​ចោល។

យ៉ាងណាក៏ដោយ ក្រុម​អ្នក​សង្កេតការណ៍​លើកឡើង​ថា លោក ហ៊ុន សែន សម្លឹង​មើល​ប្រយោជន៍​នយោបាយ​របស់​គាត់​ធំ​ជាង​អ្វីៗ​ទាំងអស់ ដូច្នេះ​គាត់​អាច​មិន​ធ្វើ​ដូច​អ្វី​ដែល​គាត់​បាន​និយាយ​នៅ​ពេល​លោក សម រង្ស៊ី អាច​ផ្តល់​ប្រយោជន៍​នយោបាយ​ណា​មួយ​ដល់​គាត់​បន្ត​ទៀត៕

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស