33 C
Phnom Penh

តុលាការ​កំពូល​នឹង​ប្រកាស​សាលដីកា​បណ្ដឹង​សុំ​នៅ​ក្រៅ​ឃុំ​កញ្ញា ឈឹម ស៊ីថរ នៅ​សប្ដាហ៍​ក្រោយ

ដោយ ឌឹ ខេមបូឌា ដេលី

បទវិភាគ

តុលាការ​កំពូល​នឹង​ប្រកាស​សាលដីកា​លើ​បណ្ដឹង​សុំ​នៅ​ក្រៅ​ឃុំ​របស់​កញ្ញា ឈឹម ស៊ីថរ នៅ​សប្ដាហ៍​ក្រោយ បន្ទាប់ពី​តុលាការ​បើក​សវនាការ​នា​ព្រឹក​ថ្ងៃ​ពុធ​នេះ។

ការ​បណ្ដឹង​សារទុក្ខ​មក​តុលាការ​កំពូល​នេះ ធ្វើឡើង​បន្ទាប់ពី​សាលា​ឧទ្ធរណ៍​រាជធានី​ភ្នំពេញ បាន​បដិសេធ​បណ្ដឹង​សុំ​នៅ​ក្រៅ​ឃុំ​របស់​មេធាវី​ការពារ​ក្ដី​ឲ្យ​កញ្ញា ឈឹម ស៊ីថរ កាលពី​ថ្ងៃទី​១៤ ខែ​កុម្ភៈ ឆ្នាំ​២០២៣ ក្រោម​ហេតុផល​ថា «រក្សា​កញ្ញា​ទុក​ជូន​តុលាការ ខណៈ​សំណុំរឿង​នេះ​ត្រូវ​បាន​បញ្ជូន​ទៅ​ជម្រះ​ហើយ»។

យ៉ាងណា​ក៏ដោយ ក្រោយ​បើក​សវនាការ​នា​ព្រឹក​ថ្ងៃ​ពុធ នេះ ប្រធាន​ក្រុមប្រឹក្សា​តុលាការ​កំពូល​លោក គង់ ស្រ៊ីម បាន​ប្រកាស​សាលដីកា​បណ្ដឹង​សុំ​នៅ​ក្រៅ​ឃុំ​របស់​កញ្ញា ឈឹម ស៊ីថរ នៅ​ថ្ងៃទី​២៤ ខែ​មីនា ខាងមុខ​នេះ។

អំឡុង​ពេល​តុលាការ​កំពូល​បើក​សវនាការ ក្រុម​កូដករ​ក៏​បាន​នាំគ្នា​ទៅ​តវ៉ា​នៅ​ខាងមុខ ដើម្បី​ផ្ដល់​កម្លាំង​ចិត្ត​ដល់​មេដឹកនាំ​សហជីព​កញ្ញា ឈឹម ស៊ីថរ និង​ទាមទារ​ឲ្យ​តុលាការ​ដោះលែង រួម​ទាំង​ទម្លាក់​ចោល​បទ​ចោទប្រកាន់​លើ​កញ្ញា និង​អ្នក​ផ្សេង​ទៀង​ផង​ដែរ។

អង្គការ​ឃ្លាំមើល​សិទ្ធិមនុស្ស​អន្តរជាតិ យូមែន រ៉ៃតស៍ វ៉ច្ឆ (Human Rights Watch) កាលពី​ថ្ងៃទី​១៤ ខែ​មីនា បាន​ចេញ​សេចក្ដី​ថ្លែងការណ៍​មួយ​ដោយ​អំពាវនាវ​ដល់​អាជ្ញាធរ​កម្ពុជា​ឲ្យ​ដោះលែង​មេដឹកនាំ​សហជីព (Naga World) កញ្ញា ឈឹម ស៊ីថរ និង​ទម្លាក់​ចោល​បទ​ចោទប្រកាន់​លើ​កញ្ញា និង​សមាជិក​សហជីព​ណាហ្គា​វើលដ៍ ៨​នាក់​ផ្សេង​ទៀត។

ចំណែក​ក្រសួង​ការបរទេស​សហរដ្ឋ​អាមេរិក កាលពី​ថ្ងៃទី​២ ខែ​កុម្ភៈ ឆ្នាំ​២០២៣ បាន​ផ្ដល់​ពាន​អ្នក​ការពារ​សិទ្ធិមនុស្ស​សកល​ប្រចាំ​ឆ្នាំ​២០២២ ដល់​បុគ្គល​ឆ្នើម​ចំនួន ១០​រូប​នៃ​បណ្តា​ប្រទេស​លើ​សកល​លោក ក្នុង​នោះ​មាន​ទាំង​ប្រធាន​សហជីព​ក្រុមហ៊ុន​ណាហ្គា​វើលដ៍ កញ្ញា ឈឹម ស៊ីថរ ដែល​ត្រូវ​បាន​តុលាការ​ឃុំ​ខ្លួន​នៅ​ពន្ធនាគារ​ព្រៃស ពាក់ព័ន្ធ​នឹង​ការ​ចេញ​មុខ​ការពារ​សិទ្ធិ​កម្មករ​ដែល​ថៅកែ​បញ្ឈប់​ពី​ការងារ។

ពានរង្វាន់​នេះ គឺជា​ការ​ទទួលស្គាល់​ភាព​ជា​មេដឹកនាំ​ក្លាហាន​ក្នុង​ការ​តស៊ូ​មតិ​ដើម្បី​លើក​កម្ពស់ និង​ការពារ​សិទ្ធិមនុស្ស ដែល​គេ​ទទួលស្គាល់​ជា​សកល។

កញ្ញា ឈឹម ស៊ីថរ ត្រូវ​បាន​អាជ្ញាធរ​ចាប់​ខ្លួន និង​បញ្ជូន​ទៅ​ឃុំ​ខ្លួន​ជា​បណ្ដោះអាសន្ន​នៅ​ពន្ធនាគារ​ព្រៃស រាជធានី​ភ្នំពេញ​ជា​ថ្មី​ទៀត​នៅ​ក្នុង​ខែ​វិច្ឆិកា ឆ្នាំ​២០២២ ដោយ​តុលាការ​លើក​ហេតុផល​ថា «ល្មើស​បម្រាម ឬ​គេចវេះ​ពី​ការ​ត្រួតពិនិត្យ​របស់​តុលាការ» ក្រោយ​ពេល​កញ្ញា​បាន​ធ្វើ​ដំណើរ​ត្រឡប់​មកពី​ប្រជុំ​នៅ​ប្រទេស​អូស្ត្រាលី វិញ កាលពី​ថ្ងៃទី​២៦ ខែ​វិច្ឆិកា ឆ្នាំ​២០២២។

បើ​តាម​កញ្ញា​បញ្ជាក់​អំឡុង​សវនាការ​ថា ចាប់តាំងពី​អាជ្ញាធរ​បាន​ដោះលែង​កញ្ញា ស៊ីថរ កាលពី​ខែ​មីនា ឆ្នាំ​២០២២ មក ពួកគាត់​មិន​ដែល​ទទួល​បាន​ដីកា​ពី​តុលាការ​ដែល​ដាក់​បម្រាម​មិន​ឲ្យ​ពួកគាត់​ចេញ​ទៅ​ក្រៅ​ប្រទេស​ឡើយ ខណៈ​ការ​ចេញ​ទៅ​ក្រៅ​ប្រទេស​នេះ បើ​សរុប​ទាំង​ទៅ​ប្រទេស​អូស្ត្រាលី មាន​ចំនួន ៣​លើក ដោយ​ក្នុង​នោះ​កញ្ញា​បាន​ទៅ​ថៃ ចំនួន ២​លើក៕

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស