អាស៊ីជាទ្វីបមួយដ៏ធំនៃពិភពលោក តែទ្វីបនេះកំពុងស្ថិតនៅលើវិថីទៅរកភ្នក់ភ្លើងសង្គ្រាម ដែលមើលទៅពិបាកជៀសរួចណាស់។ ប្រទេសដែលមានសក្ដានុពលផ្នែកកងទ័ពកំពុងតែគំរាមគ្នាទៅវិញទៅមក។ ប្រទេសធំក្នុងតំបន់ និងក្រៅតំបន់ កំពុងពង្រឹងអនុត្តរភាពរបស់ខ្លួនក្នុងទ្វីបដ៏ធំមួយនេះ។
នៅថ្ងៃនេះ កម្ដៅនៃភ្នក់ភ្លើងសង្គ្រាមនៅអាស៊ីកំពុងស្ថិតលើវិថីដ៏ផុយស្រួយហើយ។ ទីភ្នាក់ងារសារព័ត៌មាន AFP នៅថ្ងៃអង្គារ ទី១៤ ខែមីនា នេះ បានរាយការណ៍មកថា ល្បែងសង្គ្រាមកំពុងប្រព្រឹត្តទៅក្នុងតំបន់អាស៊ីនេះមាននៅសមុទ្រចិនខាងត្បូង និងសមុទ្រចិនខាងកើតនៃឧបទ្វីបកូរ៉េ។
សហរដ្ឋអាមេរិក និងហ្វីលីពីន ចាប់ផ្ដើមធ្វើសមយុទ្ធរួមគ្នាដែលមានរយៈពេល ២១ថ្ងៃនៅសមុទ្រចិនខាងត្បូង ដែលជាល្បែងសង្គ្រាមធ្វើឡើងនៅចំពោះមុខប្រទេសអនុត្តរភាពដ៏ធំក្នុងតំបន់ គឺប្រទេសចិន។
ហ្វីលីពីន និងសហរដ្ឋអាមេរិក បានចាប់ផ្ដើមធ្វើសមយុទ្ធយោធារួមគ្នាមួយដែលផ្ដោតជាសំខាន់លើការពង្រឹងសមត្ថភាពរបស់កងទ័ពហ្វីលីពីន ក្នុងការការពារទឹកដីរបស់សម្ព័ន្ធមិត្តមួយនៅអាស៊ីអាគ្នេយ៍ដែលរងការគំរាមកំហែងពីកម្លាំងដ៏ធំមួយ ដែលមើលទៅគ្មានប្រទេសណាក្រៅពីប្រទេសចិននោះទេ។
សមយុទ្ធយោធារួមគ្នានេះ ធ្វើឡើងបន្ទាប់ពីប្រធានាធិបតីហ្វីលីពីន លោក Ferdinand Marcos Jr កាលពីខែកុម្ភៈ បានអនុញ្ញាតឱ្យអាមេរិកបញ្ជូនកងទ័ពមកដាក់ពង្រាយនៅលើមូលដ្ឋានទ័ពរបស់ខ្លួន។ ការសម្រេចរបស់លោក Marcos Jr បានធ្វើឱ្យទីក្រុងប៉េកាំង ប្រតិកម្ម និងខកចិត្តជាខ្លាំងដែលមេដឹកនាំហ្វីលីពីនជំនាន់ក្រោយនេះដើររំលងបន្ទាន់ក្រហមរបស់ចិន ហើយចិនបានព្រមានក្រុងម៉ានីល ថាកុំបង្កហេតុការណ៍អាក្រក់ណាមួយជាមួយអាមេរិកក្នុងការគំរាមសន្តិសុខក្នុងតំបន់។
សមយុទ្ធយោធាហ្វីលីពីន និងអាមេរិក មានទ័ពចូលរួមជាង ៣ពាន់នាក់។ សមយុទ្ធនេះមានឈ្មោះថា Salaknib មានន័យថា ប្រឆាំងនឹងការបង្កអសន្តិសុខដែលមានរយៈពេល ២១ថ្ងៃចាប់ពីថ្ងៃទី១៣ ខែមីនា នេះ។ ល្បែងសង្គ្រាមនេះមានការហ្វឹកហាត់បាញ់គ្រាប់ពិត ដូចជាកាំភ្លើងធំ និងមីស៊ីល ជាដើម។
មេបញ្ជាការកងទ័ពហ្វីលីពីន ឧត្ដមសេនីយ៍ឯក Romeo Brawner ថ្លែងក្នុងពិធីបើកសមយុទ្ធនេះថា ការធ្វើសមយុទ្ធយោធានេះសំដៅពង្រឹងសមត្ថភាពកងទ័ពហ្វីលីពីន ក្នុងការការពារដែនកោះរបស់ខ្លួនពីកម្លាំងបរទេសឈ្លានពាន ហើយផ្ដោតជាសំខាន់លើប្រតិបត្តិការការពារជាតិ ដូចជាការការពារដែនអាកាស និងការពារតំបន់ឆ្នេរនៃដែនទឹករបស់ហ្វីលីពីន។
នេះជាលើកទីមួយហើយដែលហ្វីលីពីននៅក្រោមការដឹកនាំរបស់លោក Marcos Jr យល់ព្រមឱ្យសហរដ្ឋអាមេរិកដាក់ពង្រាយទ័ពនៅលើមូលដ្ឋានទ័ពរបស់ខ្លួន ៤ទីតាំងបន្ថែមទៀត ដែលធ្វើឱ្យចំនួនមូលដ្ឋានទ័ពអាមេរិកនៅលើទឹកដីហ្វីលីពីនកើនដល់ ៩ទីតាំងហើយ ក្នុងនោះមានមូលដ្ឋានទ័ពជើងទឹកដ៏ធំមួយរបស់ហ្វីលីពីននៅក្បែរកោះតៃវ៉ាន់ ក៏ក្លាយជាមូលដ្ឋានទ័ពអាមេរិកផងដែរ។
កោះតៃវ៉ាន់ដែលចិនចាត់ទុកថាជាដែនដីរបស់ខ្លួន ត្រូវបានការពារដោយសហរដ្ឋអាមេរិក។ ការដែលហ្វីលីពីនអនុញ្ញាតឱ្យអាមេរិកពង្រាយទ័ពក្បែរកោះតៃវ៉ាន់ បានធ្វើឱ្យចិនប្រតិកម្ម ដោយហៅថាជាផ្នែកមួយរបស់អាមេរិកចង់ធ្វើអន្តរាគមន៍ជួយកោះតៃវ៉ាន់ ករណីចិនលើកទ័ពវាយកាន់កាប់ដែនកោះមួយរបស់ខ្លួន។
ដោយឡែកល្បែងសង្គ្រាមមួយដ៏ធំកំពុងប្រព្រឹត្តទៅលើឧបទ្វីបកូរ៉េ និងសមុទ្រចិនខាងកើត គឺសមយុទ្ធយោធារួមគ្នារវាងសហរដ្ឋអាមេរិក និងកូរ៉េខាងត្បូង។ សមយុទ្ធនេះក្រោមឈ្មោះថា Freedom Shield ២០២៣ ប្រែថាខែលការពារសេរីភាពឆ្នាំ២០២៣។
សមយុទ្ធនេះចាប់ផ្តើមតាំងពីថ្ងៃចន្ទ ទី១៣ ខែមីនា រហូតដល់ថ្ងៃទី២៣ ខែមីនា។ ល្បែងសង្គ្រាមសម្ដែងដោយទ័ពអាមេរិក និងកូរ៉េខាងត្បូង ធ្វើឡើងដោយមិនខ្ចីភ្ញាក់ផ្អើលចំពោះកូរ៉េខាងជើងបាញ់មីស៊ីលយុទ្ធសាស្ត្រចំនួន ៤គ្រាប់ចេញពីនាវាមុជទឹកដែលក្រុងព្យុងយ៉ាង គំរាមអាមេរិក និងកូរ៉េខាងត្បូង ឱ្យបញ្ឈប់ល្បែងសង្គ្រាមនេះជាបន្ទាន់។
មុនមួយថ្ងៃនៃការធ្វើសមយុទ្ធរវាងអាមេរិក និងកូរ៉េខាងត្បូង កូរ៉េខាងជើងបានបាញ់មីស៊ីលបាលីស្ទីចរយៈចម្ងាយខ្លី ២គ្រាប់ទៅហើយ។ បើតាមប្រភពរបស់កងទ័ពកូរ៉េខាងត្បូង នៅថ្ងៃអង្គារ ទី១៤ មីនា នេះ កូរ៉េខាងជើងបានបាញ់មីស៊ីលបាលីស្ទីច ២គ្រាប់ទៀត ឆ្ពោះទៅកាន់តំបន់ឆ្នេរភាគខាងកើតនៃប្រទេសរបស់ខ្លួន។
កូរ៉េខាងត្បូង និងសហរដ្ឋអាមេរិក កំពុងដឹកនាំការធ្វើសមយុទ្ធយោធារួមគ្នាទ្រង់ទ្រាយធំមិនធ្លាប់មានចាប់តាំងពីឆ្នាំ២០១៧ មក ដើម្បីទប់ទល់ចំពោះការកើនឡើងនៃការគំរាមកំហែងពីសំណាក់ទីក្រុងព្យុងយ៉ាង។
នៅក្នុងសេចក្ដីថ្លែងការណ៍របស់កងទ័ពកូរ៉េខាងត្បូង បានបញ្ជាក់ថា កងទ័ពបានស្ថិតនៅក្នុងលក្ខណៈប្រុងជើងការខ្ពស់ក្រោមកិច្ចសហប្រតិបត្តិការយ៉ាងជិតស្និទ្ធជាមួយសហរដ្ឋអាមេរិក ទប់ទល់ករណីមានការវាយប្រហារពីសំណាក់កូរ៉េខាងជើង។
មេដឹកនាំកំពូលកូរ៉េខាងជើង គីម ជុងអ៊ុន បានចេញបទបញ្ជាឱ្យកងទ័ពរបស់លោកបង្កើនការធ្វើសមយុទ្ធគំរាមសមយុទ្ធអាមេរិក និងកូរ៉េខាងត្បូង ដែលលោកថាជាការត្រៀមឆ្លើយតបទៅនឹងសង្គ្រាមពីកម្លាំងបច្ចាមិត្ត។
លោក គីម ជុងអ៊ុន ព្រមានថា ក្រុងសេអ៊ូល នឹងក្លាយជាផេះ បើធ្វើឱ្យមានសង្គ្រាមលើឧបទ្វីបផ្ទុះឡើង។ តែចំពោះសហរដ្ឋអាមេរិក ព្រមានតបវិញថា ការបង្កសង្គ្រាមពីកូរ៉េខាងជើងទៅលើកូរ៉េខាងត្បូង ឬទៅលើប្រទេសជប៉ុន វានាំឱ្យរបបកុម្មុយនីស្តផ្ដាច់ការនៅក្រុងព្យុងយ៉ាង ដួលរលំភ្លាម៕