26 C
Phnom Penh

តុលាការ​កំពូល​មិន​អនុញ្ញាត​ឱ្យ​កញ្ញា ឈឹម ស៊ីថរ នៅ​ក្រៅ​ឃុំ​បណ្ដោះអាសន្ន

ដោយ ឌឹ ខេមបូឌា ដេលី

បទវិភាគ

តុលាការ​កំពូល​សម្រេច​បន្ត​ឃុំ​ខ្លួន​មេដឹកនាំ​សហជីព​ណាហ្គា​វើលដ៍ កញ្ញា ឈឹម ស៊ីថរ ក្នុង​ពន្ធនាគារ​ដូច​សាលាដំបូង និង​សាលា​ឧទ្ធរណ៍​ភ្នំពេញ​សម្រេច​ដដែល​ថា​ជា​រឿង​ត្រឹមត្រូវ។

ការ​ប្រកាស​សាលដីកា​នា​ថ្ងៃ​សុក្រ ទី​២៤ ខែ​មីនា នេះ បន្ទាប់ពី​ប្រធាន​ក្រុមប្រឹក្សា​ជំនុំជម្រះ​លោក គង់ ស្រ៊ីម បាន​បើក​សវនាការ​កាលពី​ថ្ងៃទី​១៤ ខែ​កុម្ភៈ ឆ្នាំ​២០២៣ កន្លង​ទៅ​លើ​បណ្ដឹង​សារទុក្ខ​របស់​កញ្ញា ឈឹម ស៊ីថរ ដែល​ប្ដឹង​មិន​សុខចិត្ត​ចំពោះ​ការ​សម្រេច​របស់​សាលា​ឧទ្ធរណ៍​ដែល​បន្ត​ឃុំ​ខ្លួន​កញ្ញា​នៅ​ពន្ធនាគារ​ដដែល។

តែ​យ៉ាងណា នៅ​ថ្ងៃ​សុក្រ​នេះ ប្រធាន​ក្រុមប្រឹក្សា​តុលាការ​កំពូល លោក គង់ ស្រ៊ីម ប្រកាស​សាលដីកា​ច្រានចោល​បណ្ដឹង​សុំ​នៅ​ក្រៅ​ឃុំ​របស់​កញ្ញា ឈឹម ស៊ីថរ ដោយ​ចាត់ទុក​ការ​សម្រេច​របស់​តុលាការ​ថ្នាក់ក្រោម​ជា​រឿង​ត្រឹមត្រូវ។

កាលពី​ថ្ងៃទី​១៤ ខែ​កុម្ភៈ ឆ្នាំ​២០២៣ សាលា​ឧទ្ធរណ៍​រាជធានី​ភ្នំពេញ​បាន​បដិសេធ​បណ្ដឹង​សុំ​នៅ​ក្រៅ​ឃុំ​របស់​កញ្ញា ឈឹម ស៊ីថរ ក្រោម​ហេតុផល​ថា​រក្សា​កញ្ញា​ទុក​ជូន​តុលាការ ខណៈ​សំណុំរឿង​នេះ​ត្រូវ​បាន​បញ្ជូន​ទៅ​ជម្រះ​ហើយ។

ជុំវិញ​ការ​សម្រេច​បែប​នេះ កន្លងមក អ្នក​ឃ្លាំមើល​លើកឡើង​ថា បើ​សាលាដំបូង និង​សាលា​ឧទ្ធរណ៍​ភ្នំពេញ​សម្រេច​បែប​ណា​ហើយ គឺ​តុលាការ​កំពូល​ក៏​សម្រេច​បែប​នោះ​ដែរ ជាពិសេស​ក្នុង​សំណុំរឿង​នយោបាយ អ្នក​ការពារ​សិទ្ធិមនុស្ស បរិស្ថាន និង​រឿង​មេដឹកនាំ​សហជីព​កញ្ញា ឈឹម ស៊ីថរ ជាដើម។

ក្រុម​កូដករ​ក៏​បាន​នាំគ្នា​ទៅ​ឈរ​លើក​រូបថត​ដោយ​ភ្ជាប់​ជាមួយ​សារ​ទាមទារ​ឲ្យ​ដោះលែង​មេដឹកនាំ​សហជីព កញ្ញា ឈឹម ស៊ីថរ ផង​នោះ បាន​បង្ហាញ​ការ​សោកស្ដាយ​ដោយ​ចាត់ទុក​ការ​សម្រេច​របស់​តុលាការ​ជាន់ខ្ពស់​នេះ​ជា​រឿង​អយុត្តិធម៌​ចំពោះ​កញ្ញា ស៊ីថរ និង​ពួកគេ​ដែល​ជា​កូដករ។

ក្រៅពី​បង្ហាញ​ការ​សោកស្ដាយ​ហើយ ពួកគេ​ក៏​បាន​ផ្ដល់​កម្លាំង​ចិត្ត​ដល់​មេដឹកនាំ​សហជីព កញ្ញា ឈឹម ស៊ីថរ និង​បន្ត​ទាមទារ​ឲ្យ​ដោះលែង ព្រមទាំង​ទម្លាក់​ចោល​បទ​ចោទប្រកាន់​លើ​កញ្ញា និង​អ្នក​ផ្សេង​ទៀត​ផង​ដែរ។

ការ​ទាមទារ​នេះ បន្ទាប់ពី​ថ្នាក់​ដឹកនាំ និង​សកម្មជន​សហជីព​ទ្រទ្រង់​សិទ្ធិ​ការងារ​កម្មករ​ខ្មែរ​នៃ​ក្រុមហ៊ុន​ណាហ្គា​វើលដ៍​ចំនួន ៩​រូប ក្នុង​នោះ​មាន​ប្រធាន​ទ្រទ្រង់​សិទ្ធិ​ការងារ​កម្មករ​ខ្មែរ កញ្ញា ឈឹម ស៊ីថរ ថ្នាក់​ដឹកនាំ​សហជីព កញ្ញា ឈឹម សុខន សកម្មជន​សហជីព​អ្នកស្រី រី សុវណ្ណឌី ជាដើម ពី​បទ​ចោទ «ញុះញង់​បង្ក​ឲ្យ​មាន​ភាព​វឹកវរ​ធ្ងន់ធ្ងរ​ដល់​សន្តិសុខ​សង្គម» ដោយ​គ្រាន់តែ​ធ្វើ​កូដកម្ម​ទាមទារ​ឲ្យ​ថៅកែ​ក្រុមហ៊ុន​ណាហ្គា​វើលដ៍​ដោះស្រាយ​វិវាទ​ការងារ​ជាមួយ​ខ្លួន​ដែល​បាន​អូស​បន្លាយ​ពេល​ជាង ១​ឆ្នាំ​មក​នេះ។

ត្បិត​តែ​តុលាការ​កម្ពុជា​ក្រោម​ការ​បញ្ជា​របស់​លោក ហ៊ុន សែន បាន​ចោទប្រកាន់ និង​ឃុំ​ខ្លួន​កញ្ញា ឈឹម ស៊ីថរ ប៉ុន្តែ​ប្រធាន​សហជីព​កម្មករ​ណាហ្គា​វើលដ៍ កញ្ញា ឈឹម ស៊ីថរ ត្រូវ​បាន​វេទិកា​ប្រវត្តិសាស្ត្រ​រស់ (The Living History Forum) នៅ​ប្រទេស​ស៊ុយអែត ចេញ​លិខិត​ជ្រើស​តាំង​ជា​បេក្ខជន​សម្រាប់​ទទួល​ពានរង្វាន់​អន្តរជាតិ ឌឹ ភើ អេងងើ (The Per Anger Prize) របស់​រដ្ឋាភិបាល​ស៊ុយអែត (Sweden)។

មិនមែន​តែ​ប្រទេស​ស៊ុយអែត ទេ កាលពី​ថ្ងៃទី​២ ខែ​កុម្ភៈ ឆ្នាំ​២០២៣ ក្រសួង​ការបរទេស​សហរដ្ឋ​អាមេរិក បាន​ផ្ដល់​ពាន​អ្នក​ការពារ​សិទ្ធិមនុស្ស​សកល​ប្រចាំ​ឆ្នាំ​២០២២ ដល់​បុគ្គល​ឆ្នើម​ចំនួន ១០​រូប​នៃ​បណ្តា​ប្រទេស​លើ​សកលលោក។ ពាន​នេះ​ជា​ការ​ទទួលស្គាល់​ភាព​ជា​មេដឹកនាំ​ក្លាហាន ក្នុង​ការ​តស៊ូ​មតិ​ដើម្បី​លើក​កម្ពស់ និង​ការពារ​សិទ្ធិមនុស្ស​ដែល​គេ​ទទួលស្គាល់​ជា​សកល។

កញ្ញា ឈឹម ស៊ីថរ ត្រូវ​បាន​អាជ្ញាធរ​ចាប់​ខ្លួន និង​បញ្ជូន​ទៅ​ឃុំ​ខ្លួន​ជា​បណ្ដោះអាសន្ន​នៅ​ពន្ធនាគារ​ព្រៃស រាជធានី​ភ្នំពេញ​ជា​ថ្មី​ទៀត​នៅ​ក្នុង​ខែ​វិច្ឆិកា ឆ្នាំ​២០២២ ដោយ​តុលាការ​លើក​ហេតុផល​ថា «ល្មើស​បម្រាម ឬ​គេចវេះ​ពី​ការ​ត្រួតពិនិត្យ​របស់​តុលាការ» ក្រោយ​ពេល​កញ្ញា​បាន​ធ្វើ​ដំណើរ​ត្រឡប់​មកពី​ប្រជុំ​នៅ​ប្រទេស​អូស្ត្រាលី វិញ​កាលពី​ថ្ងៃទី​២៦ ខែ​វិច្ឆិកា ឆ្នាំ​២០២២។

បើ​តាម​កញ្ញា​បញ្ជាក់​អំឡុង​សវនាការ​ថា ចាប់តាំងពី​អាជ្ញាធរ​បាន​ដោះលែង​កញ្ញា ស៊ីថរ កាលពី​ខែ​មីនា ឆ្នាំ​២០២២ មក ពួកគាត់​មិន​ដែល​ទទួល​បាន​ដីកា​ពី​តុលាការ​ដែល​ដាក់​បម្រាម​មិន​ឲ្យ​ពួកគាត់​ចេញ​ទៅ​ក្រៅ​ប្រទេស​ឡើយ ខណៈ​ការ​ចេញ​ទៅ​ក្រៅ​ប្រទេស​នេះ បើ​សរុប​ទាំង​ទៅ​ប្រទេស​អូស្ត្រាលី មាន​ចំនួន ៣​លើក ដោយ​ក្នុង​នោះ​កញ្ញា​បាន​ទៅ​ថៃ ចំនួន ២​លើក៕

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស