31.4 C
Phnom Penh

លោក ហ៊ុន សែន អួត​ថា​គ្មាន​អ្នក​ណា​កាន់​អំណាច​យូរ​ដូច​លោក​ទេ​នៅ​លើ​ពិភពលោក

ដោយ ឌឹ ខេមបូឌា ដេលី

បទវិភាគ

បុរស​ខ្លាំង​ក្រាញ​អំណាច​ត​ពូជ​នៅ​កម្ពុជា បង្ហាញ​មោទកភាព​ថា នៅ​លើ​ពិភពលោក​គ្មាន​មេដឹកនាំ​ប្រទេស​ណា​មួយ​ធ្វើជា​នាយករដ្ឋមន្ត្រី​បាន​យូរ​រហូត​ដល់​ជាង ៣៨​ឆ្នាំ​ដូច​រូបលោក​ឡើយ។

ក្នុង​ពិធី​ប្រគល់​វិញ្ញាបនបត្រ និង​សញ្ញាបត្រ​ជូន​ដល់​សិក្ខាកាម និង​និស្សិត​វិទ្យាស្ថាន​ជាតិ​ពាណិជ្ជសាស្ត្រ នៅ​ថ្ងៃ​ព្រហស្បតិ៍ ទី​៣០ មីនា នេះ លោក ហ៊ុន សែន ថ្លែង​ថា លោក​ជា​អ្នក​បំបែក​ឯកត្តកម្ម​នៅ​លើ​ពិភពលោក ដោយសារ​កាន់​អំណាច​ជា​នាយករដ្ឋមន្ត្រី​យូរ​ជាងគេ​ទាំងអស់។ ក្រៅពី​បង្ហាញ​មោទកភាព​ហើយ លោក​បាន​ទទួលស្គាល់​ថា​លោក​ជា​មេដឹកនាំ​ក្រាញ​អំណាច​ត​ពូជ និង​ត្រកូល​នៅ​កម្ពុជា​ផង​ដែរ។

លោក​ថា កន្លងមក ការ​ប្រឹងប្រែង​ការពារ​អំណាច​ដោយ​កម្ទេច និង​ការ​ធ្វើ​ទុក្ខបុកម្នេញ​លើ​ប្រជាពលរដ្ឋ និង​អ្នក​ចង់​បាន​ប្រជាធិបតេយ្យ​កន្លងមក ព្រោះតែ​ដើម្បី​ការពារ​អំណាច​របស់​លោក ដូច្នេះ​សកម្មភាព​របស់​លោក​ធ្វើ​នោះ​មិន​មាន​អ្វី​ខុស​ឡើយ។

បុរស​ខ្លាំង​កាន់​អំណាច​ជាង ៣៨​ឆ្នាំ​នៅ​កម្ពុជា អះអាង​ទៀត​ថា បើសិនជា​មិន​ឲ្យ​លោក​ការពារ​អំណាច​ទេ តើ​ឲ្យ​លោក​ការពារ​អ្វី​ដែរ ខណៈ​អ្នក​ខ្លះ​ខិតខំ​ដណ្តើម និង​ចង់​បាន​អំណាច​ពី​លោក។

លោក​ថា បើ​កាន់​អំណាច​ហើយ​មិន​ប្រើ​អំណាច​នោះ លោក​ថា​វា​ក៏​មិន​មាន​ន័យ​សម្រាប់​ជីវិត​រូបលោក​ដែរ។

លោក ហ៊ុន សែន ថា​ការ​បកស្រាយ និង​លើក​ឡើង​ដូច្នេះ មិនមែន​ឌឺ​ទៅ​កាន់​អ្នក​រិះគន់ និង​គណបក្ស​ប្រឆាំង​ដែល​តែង​ចោទ​ថា រូបលោក​ក្រាញ​អំណាច​តាំងពី​ឪពុក​រហូត​ទៅ​ដល់​កូន​នោះ​ទេ ប៉ុន្តែ​ផ្ទុយ​មក​វិញ ដោយសារ​កូន​របស់​លោក គឺ​លោក ហ៊ុន ម៉ាណែត ស័ក្តិសម​នឹង​ទទួល​បាន​តំណែង​នាយករដ្ឋមន្ត្រី​នេះ។

មេដឹកនាំ​អំណាច​ត​ពូជ​នៅ​កម្ពុជា បញ្ជាក់​ថា ទោះបីជា​មាន​ការ​លើកឡើង​បែប​ណា​ក៏ដោយ ប៉ុន្តែ​លោក​មិន​ខ្វល់ ដោយ​បន្ត​កាន់​អំណាច​ដដែល ក្រោម​ហេតុផល​ថា ពលរដ្ឋ​នៅ​បន្ត​បោះឆ្នោត​ឲ្យ​គណបក្ស​ប្រជាជន​កម្ពុជា។

ទោះបីជា​លោក ហ៊ុន សែន ប្រកាស​ក្ដែងៗ​លើ​វេទិកា​ថា ពលរដ្ឋ​នៅ​ស្រឡាញ់ និង​បោះឆ្នោត​ឲ្យ​លោក ហ៊ុន សែន ដឹកនាំ​ក្ដី ប៉ុន្តែ​វា​មិន​បាន​ឆ្លុះបញ្ចាំង​ពី​ការពិត​ឡើយ។

មុន​បោះឆ្នោត​ជាតិ​កាលពី​ឆ្នាំ​២០១៨ បុរស​ខ្លាំង​កាន់​អំណាច​ជិត ៤០​ឆ្នាំ បាន​ប្រើប្រាស់​ប្រព័ន្ធ​តុលាការ​រំលាយ​គណបក្ស​សង្គ្រោះ​ជាតិ បន្ទាប់ពី​គណបក្ស​នេះ​ទទួល​បាន​សំឡេង​គាំទ្រ​ពី​ប្រជាពលរដ្ឋ​ប្រហាក់ប្រហែល​គណបក្ស​ប្រជាជន​កម្ពុជា។

ការ​មិន​ហ៊ាន​បើក​ឲ្យ​មាន​ការ​បោះឆ្នោត​ដោយ​ត្រឹមត្រូវ សេរី និង​យុត្តិធម៌​នេះ ដោយសារ​លោក ហ៊ុន សែន ដឹង​ច្បាស់​ថា ប្រជាពលរដ្ឋ​នឹង​មិន​បោះឆ្នោត​ឲ្យ​គណបក្ស​ប្រជាជន​កម្ពុជា​បន្ត​ទៀត​ទេ ព្រោះ​ការ​ដឹកនាំ​ជិត ៤០​ឆ្នាំ​មក​នេះ ពលរដ្ឋ​បាន​រងគ្រោះ​ទូទាំង​ប្រទេស។

ពលរដ្ឋ​រងគ្រោះ​ដោយសារ​គ្រួសារ សាច់ញាតិ និង​មន្ត្រី​ជាន់ខ្ពស់ ព្រមទាំង​ឧកញ៉ា​ដែល​នៅ​ក្នុង​ជួរ​គណបក្ស​ប្រជាជន​កម្ពុជា បាន​រំលោភ​ដីធ្លី និង​បំផ្លាញ​ធនធាន​ធម្មជាតិ​ស្ទើរ​គ្មាន​សល់។

ចំណែក​កសិផល​ដែល​ប្រជាពលរដ្ឋ​ធ្វើ​បាន​ហើយ បែរ​ជា​មិន​មាន​ទីផ្សារ​សម្រាប់​លក់។ ករណី​នេះ ពលរដ្ឋ​ខ្លះ​បាត់បង់​ដី​ហើយ រងគ្រោះ​ដោយ​បំណុល​ធនាគារ​ទៀត ខណៈ​អ្នក​ខ្លះ​បង្ខំ​ចិត្ត​ចំណាកស្រុក​ប្រថុយប្រថាន។

បើ​តាម​អង្គភាព​ស៊ើបអង្កេត​សេដ្ឋកិច្ច (The Economist Intelligence Unit) ហៅ​កាត់​ថា EIU បាន​ចាត់​ចំណាត់ថ្នាក់​កម្ពុជា​ថា​ជា​ប្រទេស​ដឹកនាំ​តាម​បែប​ផ្ដាច់ការ។ ចំណាត់ថ្នាក់​នេះ​ធ្វើ​ឲ្យ​កម្ពុជា​ប្រសើរ​ជាង​ប្រទេស​ឡាវ និង​វៀតណាម ដែល​ជា​ប្រទេស​ប្រកាន់​របប​កុម្មុយនីស្ត និង​ប្រទេស​មីយ៉ាន់ម៉ា ដែល​ដឹកនាំ​ដោយ​ក្រុម​យោធា​ផ្ដាច់ការ៕

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស