គណបក្សប្រជាជនកម្ពុជា ចាប់ផ្តើមតែងតាំងបេក្ខជនតំណាងរាស្ត្រសម្រាប់ការចូលរួមបោះឆ្នោតនៅខែកក្កដា ឆ្នាំ២០២៣ ខាងមុខនេះរួចរាល់ហើយ ក្នុងនោះមេដឹកនាំបក្សកាន់អំណាច លោក ហ៊ុន សែន បានសម្រេចឈរឈ្មោះជាបេក្ខជនតំណាងរាស្ត្រលំដាប់លេខរៀងទី១ នៅមណ្ឌលខេត្តកណ្តាល បន្តទៀតក្នុងចំណោមបេក្ខជនពេញសិទ្ធិចំនួន ១០រូបផ្សេងទៀត។
មេដឹកនាំបក្សកាន់អំណាច លោក ហ៊ុន សែន បានចេញសេចក្តីសម្រេចស្ដីពីការតែងតាំងបេក្ខជនឈរឈ្មោះជ្រើសតាំងតំណាងរាស្ត្រកាលពីថ្ងៃទី៣០ ខែមីនា ឆ្នាំ២០២៣ កន្លងទៅ ដោយសម្រេចឱ្យបេក្ខជនតំណាងរាស្ត្រពេញសិទ្ធិចំនួន ១១រូបឈរឈ្មោះនៅមណ្ឌលខេត្តកណ្តាល រួមមានលោក ហ៊ុន សែន ខ្លួនឯងឈរលំដាប់លេខ១ លោក ឃួន សូរីដា ឈរលំដាប់លេខ២ លោក អូន ព័ន្ធមុនីរ័ត្ន ឈរលំដាប់លេខ៣ និងលោក ប្រាក់ សុខុន ឈរលំដាប់លេខ៤ ជាដើម។
លោក ហ៊ុន សែន ក៏បានចេញសេចក្តីសម្រេចស្ដីពីការតែងតាំងបេក្ខជនឈរឈ្មោះជ្រើសតាំងតំណាងរាស្ត្រសម្រាប់មណ្ឌលខេត្តព្រៃវែង កាលពីថ្ងៃទី២៩ ខែមីនា កន្លងទៅផងដែរ ក្នុងនោះលោក ជាម យៀប ឈរលំដាប់លេខរៀងទី១ និងលោក ស សុខា ឈរលំដាប់លេខ២ ផងដែរ។
ការសម្រេចតែងតាំងសមាជិកបក្សកាន់អំណាចឱ្យឈរឈ្មោះតាមមណ្ឌលនីមួយៗនេះ ធ្វើឡើងស្របពេលដែលការបោះឆ្នោតជាតិអាណត្តិទី៧ ឆ្នាំ២០២៣ កាន់តែខិតជិតមកដល់ទៅហើយនោះ។
ដំណើរការនៃការបោះឆ្នោតជាតិអាណត្តិទី៧ ឆ្នាំ២០២៣ នឹងប្រព្រឹត្តទៅនៅថ្ងៃអាទិត្យ ទី២៣ ខែកក្កដា ឆ្នាំ២០២៣ ខាងមុខនេះ ដូច្នេះការបោះឆ្នោតជ្រើសតាំងតំណាងរាស្ត្រសម្រាប់អាណត្តិទី៧ នេះ នៅសល់រយៈពេលតែប្រមាណ ១០០ថ្ងៃទៀតប៉ុណ្ណោះ។
ជុំវិញការតែងតាំងបេក្ខជនឈរឈ្មោះជ្រើសតាំងតំណាងរាស្ត្រនេះ កាលពីថ្ងៃទី៣០ ខែមីនា ឆ្នាំ២០២៣ លោក ហ៊ុន សែន ក៏បានតែងតាំងលោក ហ៊ុន ម៉ាណែត ឱ្យឈរឈ្មោះជាបេក្ខជនតំណាងរាស្ត្រសម្រាប់អាណត្តិទី៧ នេះក្នុងលំដាប់លេខរៀងទី១ នៅមណ្ឌលភ្នំពេញផងដែរ ក្នុងចំណោមបេក្ខជនពេញសិទ្ធិ ១១រូបផ្សេងទៀត ដូចជាលោក ប៉ា សុជាតិវង្ស ស្ថិតក្នុងជួរលេខរៀងទី២ លោក អ៊ិត សំហេង ស្ថិតក្នុងជួរលេខរៀងទី៣ និងលោក ម៉ម ប៊ុនហេង ស្ថិតក្នុងជួរលេខរៀងទី៤ ជាដើម។
អ្នកប្រឹក្សាយោបល់ផ្នែកអភិវឌ្ឍន៍ផ្នត់គំនិត និងការស្រាវជ្រាវ សេក សុជាតិ ធ្លាប់បានប្រាប់សារព័ត៌មាន The Cambodia Daily កាលពីពេលថ្មីៗនេះថា សម្រាប់ការបោះឆ្នោតនៅឆ្នាំ២០២៣ នេះ បើរដ្ឋាភិបាលកម្ពុជានៅតែប្រើប្រាស់សមាសភាពគណៈកម្មាធិការជាតិរៀបចំការបោះឆ្នោតដូចសព្វថ្ងៃនេះបន្តទៀត នោះសហគមន៍អន្តរជាតិក៏នឹងមិនទទួលស្គាល់ការបោះឆ្នោតនេះដែរ។
លោក សេក សុជាតិ អះអាងថា សមាសភាពទាំង ៩រូបរបស់ គ.ជ.ប គឺសុទ្ធតែមកបីបក្សកាន់អំណាចទាំងអស់ ដូច្នេះគឺពិតជាពិបាកឲ្យមជ្ឈដ្ឋានអន្តរជាតិ និងប្រជាពលរដ្ឋម្ចាស់ឆ្នោតទទួលស្គាល់ពីតម្លាភាព និងភាពឯករាជ្យ ថាដំណើរការនៃការបោះឆ្នោតនេះនឹងប្រព្រឹត្តទៅដោយសេរី ត្រឹមត្រូវ និងយុត្តិធម៌ខ្លាំងណាស់។
ចាប់តាំងពីឆ្នាំ១៩៩៣ មក កម្ពុជាបានបោះឆ្នោតជ្រើសតំណាង ៦លើករួចមកហើយ ខណៈការបោះឆ្នោតជ្រើសរើសតំណាងនៅមូលដ្ឋាន ឬជ្រើសរើសក្រុមប្រឹក្សាឃុំ-សង្កាត់បាន ៥លើកផងដែរ ប៉ុន្តែការបោះឆ្នោតជ្រើសរើសក្រុមប្រឹក្សាឃុំ-សង្កាត់អាណត្តិទី៥ ឆ្នាំ២០២២ កន្លងទៅនេះ ត្រូវបានសហគមន៍អន្តរជាតិបដិសេធចោលទាំងស្រុង ដោយចាត់ទុកថាជាការបោះឆ្នោតដែលគ្មានតម្លាភាព សេរី ត្រឹមត្រូវ និងយុត្តិធម៌ទេ៕