37 C
Phnom Penh

លោក ហ៊ុន សែន ព្រមាន​អ្នកស្រី តាំង ហ្គេចលៀង ឱ្យ​បញ្ឈប់​ការ​បញ្ចេញ​មតិយោបល់​រឿង​អ្នកមាន​អ្នកក្រ

ដោយ ឌឹ ខេមបូឌា ដេលី

បទវិភាគ

មេដឹកនាំ​ខ្មែរ​ដែល​ដឹកនាំ​ឱ្យ​មាន​ការ​បែងចែក​វណ្ណៈ​សង្គម លោក ហ៊ុន សែន ព្រមាន​គ្រូ​ជោគជ័យ​អ្នកស្រី តាំង ហ្គេចលៀង ដែល​គេ​ស្គាល់​ថា​ជា​កូនស្រី​បង្កើត​របស់​ឧកញ៉ា តាំង ផេងប៉ោ ថៅកែ​ថ្នាំលាប​ដ៏​ល្បីល្បាញ​នៅ​កម្ពុជា ឱ្យ​បញ្ឈប់​ការ​បញ្ចេញ​មតិ​យោបល់​ជុំវិញ​ការ​លើកឡើង​ពី​អ្នកមាន និង​អ្នកក្រ​បន្ត​ទៀត ដើម្បី​កុំ​ឱ្យ​មាន​ការ​តស៊ូ​ប្រឆាំង​វណ្ណៈ​នៅ​ក្នុង​សង្គម​ដែល​នឹង​អាច​ផ្ទុះ​ឡើង។

លោក ហ៊ុន សែន បាន​ចេញ​ខ្សែអាត់​សំឡេង​ជាង ១១​នាទី​កាលពី​យប់​ថ្ងៃ​ពុធ ទី​៥ មេសា ថា បុគ្គល​ម្នាក់​មិន​អាច​ធ្វើ​ឱ្យ​សង្គម​ជាតិ​ទាំងមូល​រង្គោះរង្គើ​បាន​ទេ ប៉ុន្តែ​បើ​មិន​មាន​ការ​ទប់ស្កាត់​ទេ ការ​ប្រឆាំង​វណ្ណៈ​ដែល​បាន​ផ្តើម​ចេញពី​ទស្សនៈ​ប្រឆាំង​គ្នា​ជុំវិញ​ការ​លើកឡើង​រវាង​អ្នកមាន និង​អ្នកក្រ​នេះ នឹង​បង្ក​ទៅ​ជា​វិបត្តិ​សង្គម​ធ្ងន់ធ្ងរ​ទៅ​ថ្ងៃ​មុខ ដែល​អាច​នឹង​នាំ​ឱ្យ​មាន​ការ​បែងចែក​វណ្ណៈ​ក្នុង​សង្គម​ថែម​ទៀត។

លោក ហ៊ុន សែន លើកឡើង​ថា ពលរដ្ឋ​ខ្មែរ​ទាំង​អ្នកមាន​ជីវភាព​ធូរធារ ជីវភាព​មធ្យម និង​ជីវភាព​ទន់​ខ្សោយ គឺជា​គោលដៅ​ដែល​រដ្ឋាភិបាល​កម្ពុជា​ត្រូវ​យកចិត្ត​ទុកដាក់ ដូច្នេះ​ការ​លើកឡើង​របស់​អ្នកស្រី តាំង ហ្គេចលៀង ដែល​ចាត់ទុក​ពលរដ្ឋ​ដែល​មាន​ជីវភាព​ទន់ខ្សោយ​ថា​មាន​គីឡូ​ស្រាល គឺជា​រឿង​មិន​អាច​ទទួល​យក​បាន​នោះ​ឡើយ។

លោក ហ៊ុន សែន បញ្ជាក់​ថា ការ​ប្រៀបធៀប​ពលរដ្ឋ​ធម្មតា​ថា​ជា​មនុស្ស​ដែល​មាន​គីឡូ​ស្រាល គឺជា​កំហុស​ធ្ងន់​ណាស់ ប៉ុន្តែ​ដោយសារ​អ្នកស្រី តាំង ហ្គេចលៀង ដឹង​កំហុស​របស់​ខ្លួន និង​បាន​ចេញ​សូម​ទោស​ពលរដ្ឋ​ជា​សាធារណៈ ដូច្នេះ​រឿង​នេះ​ក៏​មិន​គួរ​បន្ត​ឱ្យ​វែងឆ្ងាយ​តទៅទៀត​ដែរ។

ការ​ចេញ​ខ្សែអាត់​ព្រមាន​នេះ គឺជា​លើក​ទី​ពីរ​ហើយ​បន្ទាប់ពី​មាន​ការ​ខ្វែង​គំនិត​គ្នា​រវាង​គ្រូ​ជោគជ័យ​អ្នកស្រី តាំង ហ្គេចលៀង ជាមួយ​នឹង​អ្នក​លេង​បណ្ដាញ​សង្គម​ហ្វេសប៊ុក​ជុំវិញ​ការ​លើកឡើង​ពី​អ្នកមាន និង​អ្នកក្រ​កាលពី​ចុង​ខែ​មីនា កន្លង​ទៅ​នោះ។

កាលពី​ថ្ងៃទី​៣០ ខែ​មីនា ឆ្នាំ​២០២៣ គ្រូ​ជោគជ័យ​អ្នកស្រី តាំង ហ្គេចលៀង បាន​លើកឡើង​ក្នុង​កម្មវិធី​ជោគជ័យ​មួយ​របស់​ខ្លួន​ដែល​មាន​សមាជិក​ចូលរួម​ជាច្រើន​នាក់ ក្នុង​នោះ​អ្នកស្រី តាំង ហ្គេចលៀង រិះគន់​ថា អ្នកក្រ​តែងតែ​គិត​រឿង​ថយ​ក្រោយ និង​ដ្រាម៉ា ប៉ុន្តែ​អ្នកមាន​គេ​តែង​គិត​រឿង​ទៅ​មុខ​ជានិច្ច។

បន្ទាប់ពី​ការ​លើកឡើង​បែប​នេះ ធ្វើ​ឱ្យ​មាន​ការ​ប្រតិកម្ម​យ៉ាង​ចាស់ដៃ​ពី​អ្នក​លេង​បណ្ដាញ​សង្គម ក្នុង​នោះ​លោក ហ៊ុន សែន ក៏​បាន​ណែនាំ​ឱ្យ​អ្នកស្រី តាំង ហ្គេចលៀង រៀន​ប្រើ​ពាក្យ​សម្ដី​ឱ្យ​បាន​ត្រឹមត្រូវ​ផង​ដែរ កាលពី​ថ្ងៃទី​១ ខែ​មេសា កន្លងទៅ​នេះ ប៉ុន្តែ​ប៉ុន្មាន​ថ្ងៃ​ក្រោយ​មក​ក៏​មាន​ការ​ទម្លាយ​សំឡេង​អ្នកស្រី តាំង ហ្គេចលៀង ដោយ​លើកឡើង​ថា ការ​រិះគន់​របស់​ពលរដ្ឋ​សាមញ្ញ​ដែល​មាន​គីឡូ​ស្រាល មិន​ធ្វើ​ឱ្យ​ប៉ះពាល់​ដល់​ផ្លូវចិត្ត​របស់​អ្នកស្រី​ឡើយ។ បញ្ហា​នេះ បាន​ធ្វើ​ឱ្យ​ផ្ទុះ​ការ​រិះគន់​លើ​អ្នកស្រី​សាជាថ្មី​ម្តង​ទៀត​រហូត​ដល់​ពេលនេះ។

យ៉ាងណាក៏ដោយ នៅ​ថ្ងៃទី​៦ ខែ​មេសា ឆ្នាំ​២០២៣ នេះ គ្រូ​ជោគជ័យ​អ្នកស្រី តាំង ហ្គេចលៀង និង​ជា​អគ្គនាយិកា​ក្រុមហ៊ុន HL គ្រុប បាន​ចេញ​មុខ​សុំទោស​ជា​សាធារណៈ​នូវ​កំហុស​ឆ្គង​របស់​ខ្លួន​ដែល​បាន​និយាយ​កន្លងមក។

ទាក់ទិន​នឹង​បញ្ហា​នេះ អនុប្រធាន​វេទិកា​ពលរដ្ឋ លោក ម៉ែន ណាត ប្រាប់​សារព័ត៌មាន The Cambodia Daily នៅ​ថ្ងៃទី​៦ មេសា នេះ​ថា ការ​លើកឡើង​របស់​អ្នកស្រី តាំង ហ្គេចលៀង ពិត​មែន​តែ​មាន​ភាព​ឆ្គាំឆ្គង​ខ្លះ ប៉ុន្តែ​មិន​អាច​ឈាន​រហូត​ដល់​ធ្វើ​ឱ្យ​មាន​កំហឹង​វណ្ណៈ​ក្នុង​សង្គម​បាន​នោះ​ទេ ពីព្រោះ​គាត់​គ្រាន់តែ​ជា​ពលរដ្ឋ​សាមញ្ញ​ប៉ុណ្ណោះ។ ផ្ទុយទៅវិញ ការ​ដឹកនាំ​របស់​លោក ហ៊ុន សែន ទៅ​វិញ​ទេ​ដែល​នឹង​ធ្វើ​ឱ្យ​មាន​កំហឹង​វណ្ណៈ​ក្នុង​សង្គម​នោះ។

លោក ម៉ែន ណាត លើកឡើង​ថា ប្រព័ន្ធ​យុត្តិធម៌​នៅ​កម្ពុជា​នរណា​ក៏​គេ​ដឹង​ដែរ​ថា​ត្រូវ​បាន​ប្រើប្រាស់​សម្រាប់​ការពារ​តែ​អ្នកមាន​លុយ និង​អ្នកមាន​អំណាច​តែប៉ុណ្ណោះ ខណៈ​ពលរដ្ឋ​ក្រីក្រ​តែង​ត្រូវ​រង​នូវ​ការ​ចោទប្រកាន់ និង​ចាប់​ឃុំ​ខ្លួន​ទាំង​អយុត្តិធម៌ ដូចជា​មេដឹកនាំ​សហជីព កញ្ញា ឈឹម ស៊ីថរ អ្នក​នយោបាយ​បក្ស​ក្រៅ​រដ្ឋាភិបាល សកម្មជន​សិទ្ធិមនុស្ស សកម្មជន​ដីធ្លី និង​សកម្មជន​បរិស្ថាន ជាដើម។

អនុប្រធាន​វេទិកា​ពលរដ្ឋ​រូប​នេះ​បញ្ជាក់​ថា កំហឹង​វណ្ណៈ និង​ការ​តស៊ូ​វណ្ណៈ​នឹង​ផ្ទុះ​ការ​តវ៉ា​នៅ​ថ្ងៃ​ណា​មួយ​មិន​ខាន ព្រោះ​ថា​ការ​រំលោភ​ដីធ្លី ការ​រំលោភ​សិទ្ធិមនុស្ស និង​ភាព​អយុត្តិធម៌​សង្គម​បាន​កើតឡើង​ព្រោងព្រាត ដែល​លេច​ចេញពី​ការ​ដឹកនាំ​របស់​លោក ហ៊ុន សែន ជិត ៤០​ឆ្នាំ​មក​នេះ៕

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស