30 C
Phnom Penh

ការ​វិវឌ្ឍ​ចុងក្រោយ​នៅ​ច្រក​សមុទ្រ​តៃវ៉ាន់​កំពុង​ទាញ​ភ្លើង​សង្គ្រាម​មក​ដល់​មាត់ច្រាំង​កោះ​តៃវ៉ាន់

ដោយ ឌឹ ខេមបូឌា ដេលី

បទវិភាគ

នៅ​ពេល​ដែល​អ្នកស្រី សាយ អ៊ឹងវិន ចេញ​ដំណើរ​ទៅ​ក្រៅ​ប្រទេស​ដែល​មាន​គោលដៅ​ជួប​ប្រធាន​សភា​អាមេរិក មហា​យក្ស​ចិន​អន្ទះសា​ជា​ខ្លាំង​គំរាម​តៃវ៉ាន់​ដោយ​ពាក្យ​សម្ដី​ផង បញ្ចេញ​សព្វាវុធ និង​ទ័ព​ធ្វើ​សកម្មភាព​គំរាម​ផង។

ចិន​ក៏​បាន​បញ្ចេញ​យន្តហោះ​ចម្បាំង​ពី ៤០ ទៅ ៧០​គ្រឿង​ឱ្យ​ហោះ​ចូល​ដែនអាកាស​តៃវ៉ាន់។ ចំណែក​ទ័ព​ជើងទឹក​របស់​ចិន ក៏​បាន​បញ្ចេញ​នាវាចម្បាំង​ធំៗ​យ៉ាងតិច​ជាង ១០​គ្រឿង រួម​ទាំង​នាវា​ផ្ទុក​យន្តហោះ​ទៀត​ផង ឱ្យ​ធ្វើ​សមយុទ្ធ​អម​ដោយ​នាវា​ពិឃាត​ជាច្រើន​នៅ​ច្រក​សមុទ្រ​តៃវ៉ាន់។

ចន្លោះ​ពី​ចិនដីគោក​ទៅ​ចិន​ដី​កោះ ឬ​តៃវ៉ាន់ មាន​រយៈ​ចម្ងាយ​តែ ១៦០​គីឡូម៉ែត្រ ដោយ​ឆ្លងកាត់​ច្រក​សមុទ្រ​តៃវ៉ាន់។ រដ្ឋាភិបាល​ក្រុង​ប៉េកាំង ព្រមាន​ថា ប្រសិនបើ​ជំនួប​នោះ​កើតឡើង​មែន គឺ​ក្រុង​ប៉េកាំង នឹង​មាន​វិធានការ​សងសឹក​តៃវ៉ាន់ និង​សហរដ្ឋ​អាមេរិក។

ក្រោយពី​អ្នកស្រី សាយ បាន​ជួប​ជាមួយ​នឹង​ប្រធាន​រដ្ឋសភា​អាមេរិក លោក Kevin McCarthy នៅ​លើ​ទឹកដី​រដ្ឋ​កាលីហ្វ័រញ៉ា សហរដ្ឋ​អាមេរិក ចិន​ក៏​ចាប់ផ្ដើម​បង្ហាញ​សកម្មភាព​ទ័ព​គំរាម​តៃវ៉ាន់​យ៉ាង​ខ្លាំង​ដោយ​បញ្ជា​ឱ្យ​ទ័ព​ត្រៀម​គ្រប់​ស្ថានការណ៍​ទាំងអស់។

នៅ​ថ្ងៃ​ចន្ទ ទី​១០ ខែ​មេសា នេះ ជា​ថ្ងៃទី​៣ នៃ​ការ​ធ្វើ​សមយុទ្ធ​របស់​ទ័ព​ចិន។ បើ​តាម​សេចក្ដី​រាយការណ៍​របស់​ភ្នាក់ងារ​សារព័ត៌មាន Reuters បាន​ឲ្យ​ដឹង​ថា ការ​ធ្វើ​សមយុទ្ធ​ទ័ព​ជើងទឹក​របស់​ចិន​បាញ់​គ្រាប់​ពិត​ដោយ​ធ្លាក់​នៅ​ក្បែរ​កោះ​តៃវ៉ាន់​តែម្ដង។ ព្រឹត្តិការណ៍​នេះ​ជា​ការ​ឆ្លើយតប​ទៅ​នឹង​ដំណើរ​ទស្សនកិច្ច​របស់​មេដឹកនាំ​តៃវ៉ាន់ អ្នកស្រី សាយ នៅ​លើ​ទឹកដី​សហរដ្ឋ​អាមេរិក ដោយ​បាន​ជួប​ជាមួយ​នឹង​ប្រធាន​រដ្ឋសភា​អាមេរិកាំង​កាលពី​ពេល​ថ្មីៗ​នេះ។

កាលពី​ថ្ងៃ​អាទិត្យ យន្តហោះ​ចម្បាំង​ចិន និង​នាវាចម្បាំង​ចិន បាន​ដឹកនាំ​ការ​ធ្វើ​សមយុទ្ធ​បង្ហាញ​ការ​វាយប្រហារ​លើ​តៃវ៉ាន់។ បើ​តាម​ក្រសួង​ការពារ​ជាតិ​តៃវ៉ាន់ នៅ​ថ្ងៃ​ចន្ទ​នេះ​បាន​ឲ្យ​ដឹង​ថា យន្តហោះ​ចម្បាំង ៧០​គ្រឿង និង​នាវាចម្បាំង ១១​គ្រឿង​របស់​ចិន បាន​ធ្វើ​សកម្មភាព​នៅ​ក្បែរ​ដែន​កោះ​តៃវ៉ាន់ ហើយ​ក្នុង​នោះ​មាន​យន្តហោះ​ចម្បាំង ៣៥​គ្រឿង​បាន​ហោះ​ឆ្លងកាត់​ខ្សែបន្ទាត់​កណ្ដាល​នៃ​តំបន់​ច្រក​សមុទ្រ​តៃវ៉ាន់ និង​បាន​ហោះ​ចូល​ក្នុង​តំបន់​ដែន​កំណត់​អត្តសញ្ញាណ​ការពារ​ដែនអាកាស​តៃវ៉ាន់​ទៀត​ផង។

បើ​តាម​ប្រព័ន្ធ​ផ្សព្វផ្សាយ​រដ្ឋ​ចិន សមយុទ្ធ​នេះ​បាន​ចាប់ផ្ដើម​កាលពី​ថ្ងៃ​សៅរ៍​ចុង​សប្ដាហ៍​កន្លងទៅ គឺ​មាន​គោលដៅ​ឡោមព័ទ្ធ​កោះ​តៃវ៉ាន់ និង​ផ្ដោត​ជា​សំខាន់​លើ​គោលដៅ​វាយប្រហារ​សំខាន់​នៅ​លើ​កោះ​មួយ​នេះ ដែល​ចិន​ចាត់ទុក​ថា​ជា​ផ្នែក​មួយ​នៃ​ទឹកដី​របស់​ខ្លួន។

ស្រប​ពេល​នេះ​ដែរ ក្រសួង​ការពារ​ជាតិ​តៃវ៉ាន់ បាន​ឱ្យ​ដឹង​ថា ប្រព័ន្ធ​ចាប់​សញ្ញា​យន្តហោះ​បាន​ប្រទះ​ឃើញ​យន្តហោះ ៥៨​គ្រឿង និង​នាវា​ចិន​ចំនួន ៩​គ្រឿង ធ្វើ​សកម្មភាព​នៅ​ក្បែរ​ដែន​កោះ​របស់​ខ្លួន។

ក្រសួង​ការពារ​ជាតិ​តៃវ៉ាន់ បាន​និយាយ​ថា កងកម្លាំង​ប្រព័ន្ធ​រ៉ាដា​កំពុង​តាមដាន​សកម្មភាព​យោធា​ចិន​តាមរយៈ​ប្រព័ន្ធ​ឈ្លប​ការណ៍ និង​ការ​ឃ្លាំមើល​ការណ៍​សម្ងាត់ ហើយ​ជាពិសេស​ការ​ឃ្លាំមើល​ទៅ​លើ​កងទ័ព​រំដោះ​ប្រជាជន​ដែល​ទទួល​បន្ទុក​ប្រព័ន្ធ​បាញ់​មីស៊ីល​បាញ់​ចេញពី​ដី​គោក​របស់​ប្រទេស​ចិន។

ចំណែកឯ​យន្តហោះ​ចិន​ជិត ៦០​គ្រឿង​ដែល​រ៉ាដា​របស់​តៃវ៉ាន់​ចាប់​សញ្ញា​ឃើញ បង្ហាញ​ថា ចិន​បាន​ប្រើ​យន្តហោះ​ចម្បាំង Su-30 របស់​រុស្ស៊ី និង​យន្តហោះ​ទម្លាក់​គ្រាប់បែក​របស់​ចិន H-6។

ចិន​ដែល​ចាត់ទុក​តៃវ៉ាន់​ជា​ផ្នែក​មួយ​ក្នុង​ដែន​អធិបតេយ្យ​របស់​ខ្លួន មិន​ដែល​បោះបង់​ចោល​ជម្រើស​បង្រួបបង្រួម​ជាមួយ​ដែន​កោះ​នេះ​ទេ តែ​ចិន​ព្រមាន​ថា បើ​ដល់​ពេលវេលា គឺ​ការ​ប្រើប្រាស់​កម្លាំង​ទ័ព​ដែល​ជា​ការ​ចាំបាច់​ក្នុង​វាយ​កាន់កាប់​ដែន​កោះ​មួយ​នេះ​ឱ្យ​មក​ស្ថិត​ក្នុង​ចំណុះ​របស់​ក្រុង​ប៉េកាំង។

តែ​យ៉ាងណា គេ​ដឹង​ថា ប្រទេស​ដែល​នៅ​ពីក្រោយ​តៃវ៉ាន់ ហើយ​ធ្វើ​ឱ្យ​ដែន​កោះ​ដ៏​តូច​មួយ​នេះ​ចេះ​តែ​ហ៊ាន​ប្រឈមមុខ​នឹង​មហា​យក្ស​ចិន គឺ​សហរដ្ឋ​អាមេរិក។

យោង​តាម​កិច្ចព្រមព្រៀង​ឆ្នាំ​១៩៧៩ អាមេរិក​គឺ​គ្រប់​រដ្ឋការ​ទាំងអស់​ត្រូវតែ​ជួយ​តៃវ៉ាន់ ទាំង​ការ​ជួយ​ការ​ផ្គត់ផ្គង់​សព្វាវុធ និង​រហូត​ដល់​អន្តរាគមន៍​ដោយ​ការ​បញ្ជូន​ទ័ព​ទៅ​តៃវ៉ាន់​ទៀត​ផង។

សមាជិក​សភា​ជាន់ខ្ពស់​ម្នាក់​របស់​សហរដ្ឋ​អាមេរិក កាលពី​ថ្ងៃ​សៅរ៍ ទី​៨ ខែ​មេសា បាន​សន្យា​ថា​នឹង​ជួយ​ផ្ដល់​ការ​បណ្ដុះបណ្ដាល​សម្រាប់​កងកម្លាំង​ប្រដាប់​អាវុធ​តៃវ៉ាន់ និង​ពន្លឿន​ការ​ផ្គត់ផ្គង់​អាវុធ។

ថ្លែង​នៅ​ឯ​ពិធី​មួយ​ក្នុង​ទីក្រុង​តៃប៉ិ​ជាមួយ​អ្នកស្រី សាយ លោក Michael McCaul បាន​បញ្ជាក់​ថា៖ «ក្នុង​នាម​លោក​ជា​ប្រធាន​គណៈកម្មាធិការ​កិច្ចការ​បរទេស​នៃ​សភា​តំណាងរាស្ត្រ​អាមេរិក លោក​គឺជា​អ្នក​ចុះហត្ថលេខា​លើ​ការ​លក់​អាវុធ​ឱ្យ​បរទេស ឬ​ជំនួយ​អាវុធ​សម្រាប់​តៃវ៉ាន់។ ដូចនេះ អាមេរិក​នឹង​ផ្គត់ផ្គង់​អាវុធ​បន្ថែម​ទៀត​តាម​ការ​ស្នើ​ទិញ​ពី​តៃវ៉ាន់។»

ចំណែក​ជំនួប​កំពូល​រវាង​អ្នកស្រី សាយ និង​ប្រធាន​រដ្ឋសភា​អាមេរិក នៅ​លើ​ទឹកដី​រដ្ឋ​កាលីហ្វ័រញ៉ា សហរដ្ឋ​អាមេរិក កាលពី​ថ្ងៃ​ពុធ ទី​៥ ខែ​មេសា ថ្មីៗ​នេះ លោក Kevin McCarthy ក៏​បាន​ប្ដេជ្ញា​ចិត្ត​ថា​ការ​បញ្ជូន​សព្វាវុធ​ថែម​ទៀត​ទៅ​ឱ្យ​កោះ​តៃវ៉ាន់ ត្រូវ​ទទួល​បាន​ការ​អនុម័ត​ពី​សមាជិក​សភា​ដែល​លោក​ចាត់ទុក​ថា តៃវ៉ាន់​ជា​ដែន​កោះ​ប្រជាធិបតេយ្យ​មួយ​ដ៏​រឹងមាំ​នៅ​អាស៊ី​ប៉ាស៊ីហ្វិក។

លោក​ព្រមាន​ថា ការ​ប្រើ​កម្លាំង​ទ័ព​ណា​មួយ​របស់​ប្រទេស​ចិន បើ​មាន​ទៅ​លើ​តៃវ៉ាន់ គឺជា​ការ​បំផ្លាញ និង​ជា​ការ​ឈ្លានពាន​ដែន​អធិបតេយ្យ​នៃ​រដ្ឋ​ប្រជាធិបតេយ្យ​មួយ។

ចំណែក​អ្នកស្រី សាយ បាន​ទទូច​សុំ​ឱ្យ​សហរដ្ឋ​អាមេរិក​កុំ​បោះបង់​ចោល​តៃវ៉ាន់​ឱ្យ​សោះ។ អ្នកស្រី​ថា សហរដ្ឋ​អាមេរិក​នេះ​ហើយ​ធ្វើ​ឱ្យ​ប្រទេស​ដែល​ប្រកាន់​របប​ប្រជាធិបតេយ្យ​បាន​រួម​សាមគ្គី​ទប់ទល់​នឹង​អំណាច​ផ្ដាច់ការ និង​របប​កុម្មុយនីស្ត។

នៅ​ក្នុង​ស្ថានការណ៍​ដ៏​ផុយ​ស្រួយ​នេះ​ដែល​ចិន​បន្ត​ធ្វើ​សមយុទ្ធ​ឡោមព័ទ្ធ​កោះ​តៃវ៉ាន់ អ្នកស្រី​ប្រធានាធិបតី​តៃវ៉ាន់ បាន​បញ្ជា​ទៅ​ក្រសួង​ការពារ​ជាតិ និង​មេទ័ព​តៃវ៉ាន់ ត្រូវ​ប្រុងប្រយ័ត្ន​គ្រប់​ស្ថានការណ៍​ទាំងអស់ ហើយ​បើ​ចាំបាច់​ត្រូវ​ធ្វើ​ការ​ឆ្លើយតប៕

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស