31 C
Phnom Penh

លោក ស ខេង ថា​គ្រឿងញៀន​កំពុង​បំផ្លាញ​ធនធាន​យុវជន​ក្នុង​ការ​ចូលរួម​ការពារ​បូរណភាព​ទឹកដី

ដោយ ឌឹ ខេមបូឌា ដេលី

បទវិភាគ

លោក ស ខេង ថ្លែង​ថា បច្ចុប្បន្ន គ្រឿងញៀន​កំពុង​បំផ្លាញ​ធនធាន​យុវជន​នៅ​កម្ពុជា​ក្នុង​ការ​ចូលរួម​ការពារ​ឯករាជ្យ បូរណភាព​ទឹកដី អធិបតេយ្យភាព និង​ការ​អភិវឌ្ឍ​ប្រទេស​ជាតិ ស្រប​ពេល​បទល្មើស​ជួញដូរ ចែកចាយ និង​ចរាចរ​គ្រឿងញៀន​នៅ​កម្ពុជា​មិន​ថយ​ចុះ។

ក្នុង​ពិធី​បើក​ព្រឹត្តិការណ៍​សង្ក្រាន្ត​ខេត្ត​បាត់ដំបង នា​ថ្ងៃទី​១២ ខែ​មេសា រដ្ឋមន្ត្រី​ក្រសួង​មហាផ្ទៃ លោក ស ខេង បាន​ណែនាំ​ទៅ​អាជ្ញាធរ​ឲ្យ​ពង្រឹង​ការ​ទប់ស្កាត់ និង​ប្រយុទ្ធ​ប្រឆាំង​អំពើ​ភេរវកម្ម និង​បទល្មើស​លួច ឆក់ ប្លន់​គ្រប់​ប្រភេទ ព្រមទាំង​ប្រឆាំង​នឹង​ការ​ជួញដូរ ចែកចាយ និង​ចរាចរ​គ្រឿងញៀន​ឲ្យ​ខ្លាំងក្លា​ជាង​មុន។

លោក​បញ្ជាក់​ថា មូលហេតុ​ដែល​លោក​ជំរុញ​ម្ដង​ហើយ​ម្ដង​ទៀត​បែប​នេះ ព្រោះ​គ្រឿងញៀន​កំពុង​ជា​ឧបសគ្គ​ដល់​ការ​អភិវឌ្ឍ​ធនធាន​មនុស្ស​នៅ​កម្ពុជា។ មិន​ត្រឹមតែ​ប៉ុណ្ណោះ លោក​ថា​គ្រឿងញៀន​ក៏​ជា​ឧបសគ្គ​ដល់​ការ​ការពារ​នូវ​ឯករាជ្យ បូរណភាព​ទឹកដី អធិបតេយ្យភាព និង​ការ​អភិវឌ្ឍ​របស់​ប្រទេស​ជាតិ​ផង​ដែរ ដោយសារ​គ្រឿងញៀន​គឺជា​ប្រភព​បង្កើត​ឲ្យ​មាន​បទល្មើស​ផ្សេងៗ​ទៀត​នៅ​កម្ពុជា។

លោក ស ខេង ថា​បើសិនជា​អាជ្ញាធរ​រដ្ឋាភិបាល​មិន​យកចិត្ត​ទុកដាក់​ទប់ស្កាត់​ឲ្យ​មាន​ប្រសិទ្ធភាព​ទេ​នោះ គ្រឿងញៀន​នឹង​បំផ្លាញ​ធនធាន​យុវជន​ជំនាន់​ក្រោយ​ដែល​ជា​ទំពាំង​ស្នង​ឫស្សី​ក្នុង​ការ​ចូលរួម​កសាង និង​អភិវឌ្ឍ​ជាតិ។

ការ​ជំរុញ និង​ណែនាំ​របស់​លោក ស ខេង ម្ដង​ហើយ​ម្ដង​ទៀត​បន្ទាប់ពី​ឆ្នាំ​២០២២ អាជ្ញាធរ​បាន​បង្ក្រាប និង​រឹបអូស​គ្រឿងញៀន​កើន​ជាង ៣០០% ដែល​ជា​ចំនួន​ច្រើន​លើសលប់​បើ​ធៀប​នឹង​ឆ្នាំ​២០២១ កន្លងទៅ។ ក្រៅពី​បង្ក្រាប និង​រឹបអូស​គ្រឿងញៀន​បាន​ជាង ១៤​តោន​ហើយ នៅ​ឆ្នាំ​២០២២ អាជ្ញាធរ​ក៏​បាន​ឃាត់​ខ្លួន​អ្នក​ប្រើប្រាស់​គ្រឿងញៀន​បាន​ជាង ២​ម៉ឺន ២​ពាន់​នាក់ ដោយ​បាន​កើន​ជាង ៥​ពាន់​នាក់ បើ​ធៀប​នឹង​ឆ្នាំ​២០២១។

បើ​តាម​អ្នក​នាំពាក្យ​ក្រសួង​មហាផ្ទៃ លោក ខៀវ សុភ័គ ប្រាប់​សារព័ត៌មាន​ស្និទ្ធ​នឹង​រដ្ឋាភិបាល Fresh News ថា អាជ្ញាធរ​ឃាត់​ជនសង្ស័យ​ពាក់ព័ន្ធ​នឹង​បទល្មើស​គ្រឿងញៀន​ក្នុង​មួយ​ថ្ងៃ​ចន្លោះ​ពី ៣០ ទៅ ៧០​នាក់​ទូទាំង​ប្រទេស​កម្ពុជា ដែល​ភាគច្រើន​ទាំង​អ្នក​ប្រើប្រាស់ និង​ជួញដូរ ចែកចាយ​គ្រឿងញៀន​ជា​យុវជន។

បញ្ហា​គ្រឿងញៀន​កាលពី​ឆ្នាំ​២០១៧ រដ្ឋាភិបាល​ដឹកនាំ​ដោយ​លោក ហ៊ុន សែន បាន​ប្រកាស​ក្ដែងៗ​ដោយ​ធ្វើ​យុទ្ធនាការ​បង្ក្រាប និង​ទប់ស្កាត់ ប៉ុន្តែ​ប្រយុទ្ធ​ប្រឆាំង​រយៈពេល​ជាច្រើន​ឆ្នាំ​មក​នេះ​បរាជ័យ ដោយសារ​បទល្មើស​គ្រឿងញៀន​នៅ​កម្ពុជា​បាន​កើនឡើង​ទ្វេដង។

បើ​តាម​អង្គការ​សហប្រជាជាតិ​ស្ដីពី​ឧក្រិដ្ឋកម្ម និង​គ្រឿងញៀន (UNODC) អំឡុង​ខែ​មិថុនា ឆ្នាំ​២០២១ បាន​បង្ហាញ​របាយការណ៍​ថ្មី​មួយ​រក​ឃើញ​ថា ប្រទេស​កម្ពុជា​ជា​គោលដៅ​ចម្បង​នៃ​ក្រុម​ឧក្រិដ្ឋជន​គ្រឿងញៀន​ប្រើប្រាស់​ជា​ទីតាំង​សម្រាប់​ការ​ចរាចរ​គ្រឿងញៀន ផលិត កែច្នៃ និង​ចែកចាយ​បន្ត ដែល​ថា​ក្រុម​ឧក្រិដ្ឋជន​គ្រឿងញៀន​ទាំងនោះ​ភាគច្រើន​ជា​ជនជាតិ​ចិន និង​ចិន​តៃវ៉ាន់៕

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស