ក្នុងព្រះរាជក្រឹត្យដែលឡាយព្រះហស្តលេខាដោយព្រះករុណាព្រះបាទបរមនាថ សម្ដេច នរោត្ដម សីហមុនី កាលពីថ្ងៃទី៧ ខែមេសា ឆ្នាំ២០២៣ បានត្រាស់បង្គាប់ផ្ដល់គោរមងារអ្នកស្រី គឹម ឡេង ដែលជាភរិយារបស់ឧកញ៉ា សុខ គង់ ជាអ្នកឧកញ៉ា។ ព្រះមហាក្សត្រផ្ដល់គោរមងារដល់ភរិយារបស់ឧកញ៉ា សុខ គង់ នេះបន្ទាប់ពីលោក ហ៊ុន សែន បានទូលថ្វាយទៅព្រះអង្គ។
លោក ហ៊ុន សែន ទូលថ្វាយទៅព្រះមហាក្សត្រដើម្បីស្នើសុំផ្ដល់គោរមងារដល់ភរិយាឧកញ៉ា សុខ គង់ ដោយសារឧកញ៉ារូបនេះបានបរិច្ចាគថវិកាចូលកាកបាទក្រហមកម្ពុជាចំនួន ៥ម៉ឺនដុល្លារ អំឡុងខួបទី១៥៩ កាលពីខែឧសភា ឆ្នាំ២០២២ ខណៈឆ្នាំ២០២១ ឧកញ៉ា សុខ គង់ ក៏បានបរិច្ចាគថវិកាចូលកាកបាទក្រហមកម្ពុជា ដែលស្ថិតក្រោមការគ្រប់គ្រងរបស់ភរិយាលោក ហ៊ុន សែន ចំនួន ១០ម៉ឺនដុល្លារផងដែរ។
មិនត្រឹមតែបរិច្ចាគថវិកាចូលកាកបាទក្រហមកម្ពុជាទេ ឧកញ៉ា សុខ គង់ តែងតែជួយឧបត្ថម្ភថវិការាប់ម៉ឺនដុល្លារដើម្បីជួយគាំទ្ររដ្ឋាភិបាលកម្ពុជានៅពេលដែលលោក ហ៊ុន សែន ប្រកាសស្វែងរកជំនួយ៕