 កាន់កាប់កោះទទឹង ក្នុងខេត្តកោះកុង ដោយចំណាយទុនវិនិយោគប្រមាណ ៣០លានដុល្លារ និងឧកញ៉ា ទៀ វិចិត្រ នៅក្នុងសង្កាត់កោះរ៉ុងសន្លឹម ក្រុងកោះរ៉ុង ខេត្តព្រះសីហនុ បន្ទាប់ពីអភិបាលខេត្តកោះកុង អ្នកស្រី មិថុនា ភូថង លុបចោលប័ណ្ណកម្មសិទ្ធិដីធ្លីទាំងអស់នៅលើកោះនោះ។){kind=link}
រដ្ឋាភិបាលកម្ពុជាសម្រេចផ្តល់សិទ្ធិអភិវឌ្ឍន៍ដល់ក្រុមហ៊ុនឯកជន «ដែននគរ» (DEN NOKOR CAMBODIA INVESTMENT CO., LTD) កាន់កាប់កោះទទឹង ក្នុងខេត្តកោះកុង ដោយចំណាយទុនវិនិយោគប្រមាណ ៣០លានដុល្លារ និងឧកញ៉ា ទៀ វិចិត្រ នៅក្នុងសង្កាត់កោះរ៉ុងសន្លឹម ក្រុងកោះរ៉ុង ខេត្តព្រះសីហនុ បន្ទាប់ពីអភិបាលខេត្តកោះកុង អ្នកស្រី មិថុនា ភូថង លុបចោលប័ណ្ណកម្មសិទ្ធិដីធ្លីទាំងអស់នៅលើកោះនោះ។
គណៈកម្មាធិការវិនិយោគនៃក្រុមប្រឹក្សាអភិវឌ្ឍន៍កម្ពុជា បានអះអាងកាលពីពេលថ្មីៗនេះថា ខ្លួនបានសម្រេចចេញវិញ្ញាបនបត្រចុះបញ្ជីគម្រោងវិនិយោគឲ្យក្រុមហ៊ុនឯកជន ដែននគរ (DEN NOKOR) ដែលមានលោក ហួ កុលវ័ន្ត ជានាយកប្រតិបត្តិរបស់ក្រុមហ៊ុន និងលោក ជូ សុខលីន ជានាយកបច្ចេកទេសសម្រាប់ធ្វើការអភិវឌ្ឍនៅលើកោះនេះកាលពីចុងសប្តាហ៍កន្លងទៅ។
ក្រុមប្រឹក្សាអភិវឌ្ឍន៍កម្ពុជា អះអាងថា ការអភិវឌ្ឍកោះទទឹងនេះនឹងត្រូវចំណាយទុនវិនិយោគប្រមាណ ៣០លានដុល្លារ ហើយក្នុងពេលជាមួយគ្នានេះ រដ្ឋាភិបាលកម្ពុជាក៏បានផ្តល់សិទ្ធិអភិវឌ្ឍន៍ដល់ក្រុមហ៊ុន G.T.V.C IMPORT EXPORT CO., LTD របស់ឧកញ៉ា ទៀ វិចិត្រ សម្រាប់វិនិយោគលើកោះមួយដែលមានទីតាំងស្ថិតនៅសង្កាត់កោះរ៉ុងសន្លឹម ក្រុងកោះរ៉ុង ខេត្តព្រះសីហនុ ក្នុងទុនវិនិយោគប្រមាណជា ៧,៧លានដុល្លារផងដែរ។
កោះទទឹង គឺជាកោះមួយក្នុងចំណោមកោះជាង ៣០ផ្សេងទៀតនៅខេត្តកោះកុង ដែលមានទំហំប្រមាណជិត ១គីឡូម៉ែត្រក្រឡាស្ថិតនៅក្នុងស្រុកគីរីសាគរ ខេត្តកោះកុង ក្នុងនោះក្រុមហ៊ុន DEN NOKOR (CAMBODIA) INVESTMENT CO., LTD បានដាក់ពាក្យស្នើសុំរដ្ឋបាលខេត្តកោះកុង ធ្វើការវិនិយោគអភិវឌ្ឍកោះនេះឱ្យទៅជារមណីយដ្ឋានអេកូទេសចរណ៍កម្សាន្តលំដាប់ពិភពលោកកាលពីដើមឆ្នាំ២០២៣ កន្លងទៅនេះផងដែរ។
កាលពីចុងខែមករា ឆ្នាំ២០២៣ អភិបាលខេត្តកោះកុង អ្នកស្រី មិថុនា ភូថង បានអះអាងថា ខេត្តកោះកុង មានកោះសរុបចំនួន ៣៥ ក្នុងនោះកោះចំនួន១៧ បានទទួលគម្រោងវិនិយោគរបស់ក្រុមហ៊ុនឯកជនរួចហើយ។
ជុំវិញបញ្ហានេះ សារព័ត៌មានកម្ពុជា ខេមបូចា បានលាតត្រដាងកាលពីចុងឆ្នាំ២០២២ ថា កាលពីអំឡុងខែវិច្ឆិកា ឆ្នាំ២០២២ ព្រៃដ៏ច្រើនសន្ធឹកសន្ធាប់របស់កោះទទឹង ត្រូវបានកាប់បំផ្លាញយ៉ាងឆាប់រហ័ស ដោយកម្មករនៅលើកោះនោះអះអាងថា ពួកគេគ្រាន់តែដឹងថាកោះនេះនឹងប្រែក្លាយជារីស្សត ហើយកម្មករទាំងនោះត្រូវបានគ្រប់គ្រងដោយផ្ទាល់ពីកងកម្លាំងប្រដាប់អាវុធនៃកងយោធពលខេមរភូមិន្ទខេត្តកោះកុង។
សារព័ត៌មានកម្ពុជាលើកឡើងថា ជាប្រវត្តិសាស្ត្រ អ្នកជំនួញធំៗរបស់កម្ពុជាដែលគេស្គាល់ថាជាឧកញ៉ា អាចជួលអង្គភាពកងយោធពលខេមរភូមិន្ទ និងកងវរសេនាតូច ជាដើម ដើម្បីការពារទីតាំងដែលពួកគេវិនិយោគរហូតមក។
សារព័ត៌មានខេមបូចា បញ្ជាក់ថា ការទិញកោះសម្រាប់ទុកយកចំណេញ បានផ្ទុះឡើងខ្លាំងអំឡុងពេលឧស្សាហកម្មទេសចរណ៍របស់កម្ពុជាមានការរីកលូតលាស់ ដោយមានការទិញ និងលក់កោះជាបន្តបន្ទាប់ក្នុងអំឡុងទសវត្សរ៍ឆ្នាំ២០១០ ប៉ុន្តែត្រូវថយចុះទៅវិញនៅអំឡុងជំងឺកូវីដ-១៩។ យ៉ាងណាក៏ជំនួញនេះបានងើបឡើងខ្លាំងជាបន្តបន្ទាប់ក្រោយជំងឺកូវីដ-១៩ ត្រូវបានទប់ស្កាត់។
ទាក់ទិននឹងបញ្ហានេះ ប្រធានកម្មវិធីផ្នែកស្រាវជ្រាវនៃសមាគមបណ្ដាញយុវជនកម្ពុជា (CYN) លោក ហេង គឹមហុង ធ្លាប់បានលើកឡើងកាលពីពេលថ្មីៗនេះថា កោះទាំងនោះប្រសិនជាមានការអភិវឌ្ឍក្នុងទម្រង់អេកូទេសចរណ៍ វាជារឿងល្អ ប៉ុន្តែប្រសិនបើមានការកាន់កាប់ដោយការលាក់កំបាំង ឬកាន់កាប់ដោយមិនមានតម្លាភាព នោះជារឿងគ្រោះថ្នាក់ដែលរដ្ឋត្រូវតែធ្វើការត្រួតពិនិត្យជាបន្ទាន់។
តាមរបាយការណ៍ឆ្នាំ២០២០ របស់អង្គការសត្វព្រៃ និងរុក្ខជាតិអន្តរជាតិ (Fauna & Flora International-Cambodia-FFI) បានពណ៌នាអំពីកោះទទឹង ដែលស្ថិតក្នុងចង្កោមកោះស្តេចថា «កោះទាំងនោះជាជម្រកសមុទ្រដ៏ធំទូលាយ ជាកោះដែលគ្របដណ្តប់ដោយព្រៃទឹកភ្លៀង និងព័ទ្ធជុំវិញដោយថ្មប៉ប្រះទឹក ផ្កាថ្មចម្រុះ វាលស្មៅសមុទ្រដែលជាលំនៅសម្រាប់ប្រភេទសត្វសេះសមុទ្រនៅតំបន់នោះ ប៉ុន្តែជីវចម្រុះទាំងនោះកំពុងរងនូវការគំរាមកំហែងយ៉ាងខ្លាំងពីការអភិវឌ្ឍរបស់ក្រុមហ៊ុនឯកជន»។
ក្រុមអ្នកឃ្លាំមើលព្រៃឈើកម្ពុជាត្អូញត្អែរថា ក្រៅពីទេសភាពដ៏គួរឲ្យទាក់ទាញ កោះទទឹងបានក្លាយទៅជាទីកន្លែងសម្រាប់មហាសេដ្ឋី អ្នកជំនួញទេសចរណ៍ដែលមានអំណាច និងឥទ្ធិពល ក៏ដូចជាឧក្រិដ្ឋជន រួមទាំងមន្ត្រីរដ្ឋាភិបាល បានឃុបឃិតគ្នារៀបផែនការកើបលុយពីសក្ដានុពលនៃកោះនេះយ៉ាងច្រើនសន្ធឹកសន្ធាប់ ដោយបំផ្លាញជីវចម្រុះក្នុងសមុទ្ររាប់លានជំពូកពីផែនការរបស់ពួកគេសព្វថ្ងៃនេះ៕