នៅសល់តែប៉ុន្មានថ្ងៃប៉ុណ្ណោះ រាជាណាចក្រថៃ នឹងចាប់ផ្ដើមបោះឆ្នោតសភាអាណត្តិថ្មី។ ការបោះឆ្នោតនេះ នឹងប្រព្រឹត្តទៅនៅថ្ងៃទី១៤ ខែឧសភា។
ព្រឹត្តិការណ៍នោះនឹងជាការវិវឌ្ឍមួយដ៏សំខាន់នៃចលនាប្រជាធិបតេយ្យក្នុងតំបន់អាស៊ីអាគ្នេយ៍ ដែលអ្នកសង្កេតការណ៍ថា បើក្រុមអ្នកប្រជាធិបតេយ្យឈ្នះបានដឹកនាំរដ្ឋាភិបាល មានន័យថានៅក្នុងសមាគមអាស៊ាននេះ ដង្ហើមប្រជាធិបតេយ្យចាប់រស់ឡើងវិញហើយ។
ក្រុមអ្នកសង្កេតការណ៍និយាយថា ការបោះឆ្នោតសភាក្នុងប្រទេសថៃ នៅខែក្រោយនេះ ក៏អាចជាការត្រួសត្រាយផ្លូវសម្រាប់ប្រជាធិបតេយ្យនៅប្រទេសផ្សេងទៀតដែលកំពុងដើរថយក្រោយ មានដូចជាប្រទេសកម្ពុជា ជាដើម តែគេមិនបាននិយាយដល់ប្រទេសភូមា ដែលធ្លាក់ក្នុងរបបសឹកទៅហើយនោះទេ។
នៅក្នុងប្រទេសថៃ ការឃោសនាបោះឆ្នោតកំពុងប្រព្រឹត្តយ៉ាងសកម្ម។ គណបក្សនយោបាយ ទាំងបក្សមាននិន្នាការទៅរកពួកយោធា និងគណបក្សនៃកម្លាំងអ្នកប្រជាធិបតេយ្យ កំពុងបង្ហាញគោលនយោបាយដឹកនាំរដ្ឋាភិបាល ដោយមានរបៀបវារៈជាច្រើន ដែលក្នុងនោះមានទាំងការធ្វើឱ្យមានកំណើនសេដ្ឋកិច្ចឡើងវិញ និងការបង្កើនប្រាក់ម៉ោងពលកម្មរបស់កម្មករ ទាំងកម្មករក្នុងវិស័យកាត់ដេរ កម្មករក្នុងវិស័យសំណង់ និងកម្មករក្នុងវិស័យពហុជំនាញផ្សេងៗទៀត។
ប៉ុន្តែក្រុមគណបក្សដែលមាននិន្នាការប្រជាធិបតេយ្យ ក្រៅពីលើកឡើងអំពីគោលនយោបាយទាំងនេះ ពួកគេបានលើកឡើងអំពីសេរីភាពនយោបាយ និងសិទ្ធិមនុស្ស ដែលកន្លងមកពួកយោធាមិនបានបើកចំហឱ្យទូលំទូលាយនោះទេ។
នៅថ្ងៃនេះ សារព័ត៌មាន Asia One បានសម្រង់សម្ដីរបស់មេដឹកនាំបក្សប្រឆាំងធំទី២ មកពីគណបក្សចលនាទៅមុខ ដែលបានប្រាប់ទីភ្នាក់ងារសារព័ត៌មាន Reuters កាលពីថ្ងៃទី២២ មេសា ថា សម្ព័ន្ធភាពគណបក្សប្រឆាំងនៃកម្លាំងអ្នកប្រជាធិបតេយ្យ បានឈានទៅដល់ការរួមកម្លាំងគ្នានៅក្នុងសភាក្នុងការបង្កើតរដ្ឋាភិបាលចម្រុះ បន្ទាប់ពីការបោះឆ្នោតនៅថ្ងៃទី១៤ ឧសភា។
ការបោះឆ្នោតសភាអាណត្តិថ្មីនេះ គេសង្កេតឃើញមានប៉ូលនយោបាយធំ២ ដែលប្រជែងគ្នាខ្លាំងរវាងក្រុមសម្ព័ន្ធកម្លាំងអ្នកប្រជាធិបតេយ្យ និងក្រុមបក្សមាននិន្នាការជាមួយនឹងពួកយោធា។
រដ្ឋាភិបាលគណបក្សភឿថៃ និងបក្សចលនាទៅមុខ បានបង្កើតរដ្ឋាភិបាលជាមួយគ្នា តែត្រូវបានពួកយោធាផ្ដួលរំលំតាមរយៈរដ្ឋប្រហារនៅឆ្នាំ២០០៦ និងឆ្នាំ២០១៤។
មេដឹកនាំគណបក្សចលនាទៅមុខ លោក Pita Limjaroenrat អាយុ ៤២ឆ្នាំបានថ្លែងថា៖«វាច្បាស់ណាស់ដែលពេលនេះកម្លាំងអ្នកប្រជាធិបតេយ្យសម្រេចបង្កើតសម្ព័ន្ធភាពក្នុងរដ្ឋសភា ប៉ុន្តែមិនមែនសម្រេចដើម្បីប្រឈមមុខនឹងបក្សរបស់ពួកយោធានោះទេ។»
លោក ប្រាយុទ្ធ ចាន់អូចា ដែលបានលើកខ្លួនជានាយករដ្ឋមន្ត្រីក្រោយពីលោកបានដឹកនាំរដ្ឋប្រហារឆ្នាំ២០១៤ ទម្លាក់រដ្ឋាភិបាលគណបក្សភឿថៃ នៅពេលនេះលោកបន្តឈរឈ្មោះជាបេក្ខជនជាថ្មីម្ដងទៀត តែលោកមិនស្ថិតក្នុងបក្សកំពុងកាន់អំណាចរបស់ពួកយោធាបាល្ល័ង្កប្រាចារ៉ាត នោះទេ។ គណបក្សរបស់លោក ប្រាយុទ្ធ ដែលបង្កើតថ្មីនេះមានឈ្មោះថា គណបក្សថៃរួបរួម។
តាមលទ្ធផលនៃការស្ទង់មតិចុងក្រោយនេះ ធ្វើឡើងដោយវិទ្យាស្ថានជាតិរដ្ឋបាលអភិវឌ្ឍន៍នៃប្រទេសថៃ បានឱ្យដឹងថា ក្នុងចំណោមបក្សនយោបាយចំនួន១១ មានតែបក្សចំនួន៣ ប៉ុណ្ណោះ ដែលមានការគាំទ្រច្រើនជាងគេ។ ប៉ុន្តែបក្សប្រជាធិបតេយ្យធំ២ ជាបក្សប្រឆាំងលេចធ្លោជាងគេនៅថៃ គឺគណបក្សភឿថៃ ដែលជាបក្សគាំទ្រដោយអតីតនាយករដ្ឋមន្ត្រី ថាក់ស៊ីន ស៊ីណាវ៉ាត្រា និងបក្សចលនាទៅមុខ ដឹកនាំដោយលោក Pita Limjaroenrat ទទួលបានសំឡេងគាំទ្រច្រើនជាងគេ។
គណបក្សភឿថៃ អះអាងថា ខ្លួនមានការគាំទ្រជិត ៥០% និងបក្សចលនាទៅមុខ មានការគាំទ្រជិត ២៦ភាគរយ និងបក្សថៃរួបរួម ដឹកនាំដោយលោក ប្រាយុទ្ធ មានការគាំទ្រជិត ១២%។ ក្រៅពីនេះ មានការគាំទ្រពី ៣ភាគរយទៅ ៥ភាគរយ ក្នុងនោះមានគណបក្សប្រជាធិបតេយ្យ និងគណបក្សរបស់ពួកយោធាបាល្ល័ង្កប្រាចារ៉ាត។ បច្ចុប្បន្ន សម្ព័ន្ធភាពនៃរដ្ឋាភិបាលចម្រុះរបស់បក្សបាល័ង្កប្រាចារ៉ាត បានបែកបាក់គ្នាអស់ហើយ ក្នុងនោះលោក ប្រាយុទ្ធ ទៅបង្កើតបក្សថ្មី គឺបក្សថៃរួបរួម។
អតីតនាយករដ្ឋមន្ត្រី ថាក់ស៊ីន ស៊ីណាវ៉ាត្រា ដែលកំពុងរស់នៅក្រៅប្រទេស បានប្រកាសថា លោកនឹងវិលចូលប្រទេសថៃ វិញ ក្រោយពីបក្សភឿថៃ បង្កើតរដ្ឋាភិបាលចម្រុះ។ លោកបញ្ជាក់ថា កូនស្រីរបស់លោកដែលជាបេក្ខភាពមួយរូបនៃគណបក្សភឿថៃ អ្នកស្រី ផែតុងតាន ស៊ីណាវ៉ាត្រា (Paetongtarn “Ing” Shinawatra) នឹងដឹកនាំបក្សភឿថៃ ឈ្នះក្នុងការបោះឆ្នោតនេះយ៉ាងតិចបាន ២៥០អាសនៈនៃអាសនៈសភាចំនួន៥០០។
តែលោកសង្ឃឹមថា បក្សភឿថៃ នឹងរួមគ្នាបង្កើតរដ្ឋាភិបាលចម្រុះមួយដ៏ធំ ហើយសូម្បីពួកយោធាក៏អាចចូលរួមនឹងរដ្ឋាភិបាលនេះដែរ។ លោកសន្យាថា លោកនឹងវិលចូលប្រទេសថៃវិញ ក៏មិនមែនលោកសុំឱ្យមានការលើកលែងទោសពីរដ្ឋាភិបាលភឿថៃ ដែរ គឺលោកមកទោះជាអាជ្ញាធរថៃចាប់ខ្លួនលោកក៏ដោយ។
លោកថា លោកចាស់ណាស់ទៅហើយដែលលោកមិនចង់ចាកចេញពីប្រទេសកំណើតរបស់លោកនោះទេ។ ទោះជាយ៉ាងណា មានការពិបាកព្យាករទុកជាមុនថា បេក្ខជនណាមួយនឹងអាចក្លាយជានាយករដ្ឋមន្ត្រីថៃ លើកក្រោយនេះ ព្រោះការបោះឆ្នោតសភាតែទៅលើសមាជិកសភា ៥០០រូប តែសមាជិកព្រឹទ្ធសភា ២៥០រូបមិនត្រូវបានប្រជាជនបោះឆ្នោតនោះទេ។
ស្ថាប័នព្រឹទ្ធសភានេះត្រូវបានបង្កើតឡើងក្នុងក្របខ័ណ្ឌនៃរដ្ឋធម្មនុញ្ញឆ្នាំ២០១៧ ដែលសមាជិកព្រឹទ្ធសភាភាគច្រើនមានទំនោរទៅរកពួកយោធា ហើយបានកំណត់ថា ការបោះឆ្នោតបេក្ខភាពនាយករដ្ឋមន្ត្រី បើមិនមានសំឡេង ៣ភាគ៤ នៃសមាជិកសភា ៥០០រូបជាការចាំបាច់ត្រូវសមាជិកព្រឹទ្ធសភា ២៥០ទៅចូលរួមបោះឆ្នោត ប៉ុន្តែរដ្ឋធម្មនុញ្ញក៏បើកទ្វារចំហផងដែរ។ ការបើកទ្វារចំហត្រង់ថា បើបក្សណារកបានសំឡេង ៣៧៦សំឡេង ឬ ៣ភាគ៤ នៃសមាជិកសភា ៥០០រូប គឺមិនចាំបាច់ឆ្លងកាត់ការបោះឆ្នោតរបស់សមាជិកព្រឹទ្ធសភាទៅចូលរួមបោះឆ្នោតជាមួយនឹងសមាជិកសភានោះទេ។
តែអ្នកសង្កេតការណ៍ថាជារឿងកម្រនឹងរកបានសំឡេងលើសលប់នេះ លើកលែងបក្សភឿថៃ និងបក្សចលនាទៅមុខ បូកនឹងគណបក្សផ្សេងទៀតរកបានសំឡេងអាសនៈរួមគ្នានៃសមាជិកសភាបានលើស ៣៧៦សំឡេង៕