មេដឹកនាំបក្សក្រៅរដ្ឋាភិបាល លោក មាជ សុវណ្ណារ៉ា លើកឡើងថា ការទម្លាក់បទចោទលើអតីតនាយករដ្ឋមន្ត្រីថៃ លោក ថាក់ស៊ីន ស៊ីណាវ៉ាត់ ជុំវិញសំណុំរឿងប្រមាថព្រះមហាក្សត្រថៃ បង្ហាញឱ្យឃើញពីបំណងរបស់ថៃ ក្នុងការប្រមូលផ្ដុំកម្លាំងគ្នាប្រឆាំងនឹងកម្ពុជា។
ប្រធានគណបក្សជំនាន់ថ្មី លោក មាជ សុវណ្ណារ៉ា សរសេរលើទំព័រហ្វេសប៊ុករបស់ខ្លួននៅថ្ងៃទី២២ សីហា នេះថា ដើម្បីផលប្រយោជន៍ជាតិ មេដឹកនាំថៃ បានទុកបញ្ហាទំនាស់បែកបាក់ផ្ទៃក្នុងរបស់ពួកគេមួយឡែកសិន ដើម្បីប្រមូលផ្ដុំកម្លាំងគ្នាប្រឆាំងនឹងកម្ពុជា ជុំវិញជម្លោះព្រំដែននាពេលនេះ។
លោកបន្តថា តុលាការធម្មនុញ្ញថៃ ដែលគាំទ្រដោយអំណាចពួកអភិរក្សនិយម រួមមានយោធា និងស្តេចថៃ ដែលពួកគេតែងតែចិញ្ចឹមចិត្តតាមកម្ចាត់ត្រកូល ស៊ីណាវ៉ាត់ រហូតមកនោះ តែទីបំផុត បែរជាត្រូវលើកលែងទោសឱ្យលោក ថាក់ស៊ីន ពីបទប្រមាថព្រះមហាក្សត្រថៃ ក្នុងពេលនេះទៅវិញ។
លោក មាជ សុវណ្ណារ៉ា លើកឡើងថា តើមេដឹកនាំខ្មែរត្រូវរួបរួមសាមគ្គីដើម្បីឯកភាពជាតិដែរឬទេ ដើម្បីទប់ទល់ជាមួយនឹងសត្រូវឈ្លានពានក្នុងនាមជាជាតិសាសន៍ដ៏ថ្លៃថ្នូរមួយ ដែលមានអរិយធម៌រុងរឿង និងប្រឆាំងដាច់ខាតនូវរាល់អំពើឈ្លានពានរបស់ថៃ មកលើទឹកដីរបស់ខ្លួននោះ។
មេដឹកនាំបក្សប្រឆាំងរូបនេះលើកជាសំណួរថា តើការស្រឡាញ់ប្រទេសជាតិ និងការស្រឡាញ់អំណាចផ្ទាល់ខ្លួននៃនិន្នាការគណបក្ស ឬគំនុំនយោបាយបុគ្គល មួយណាសំខាន់ជាង ដើម្បីជំរុញឱ្យមានការផ្សះផ្សា ការបង្រួបបង្រួម សាមគ្គីភាព និងឯកភាពជាតិនោះ។
លោក មាជ សុវណ្ណារ៉ា បញ្ជាក់ថា ប្រជារាស្ត្រថៃជ្រុលនិយម ជាពិសេសអ្នកដឹកនាំថៃ មានបំណងអាក្រក់មកលើកម្ពុជា ដោយការប្រមាថកាតទាន ជាន់ឈ្លីជាតិសាសន៍ខ្មែរឥតឈប់ឈរជាច្រើនជំនាន់មកហើយ ដូច្នេះការឯកភាពជាតិខ្មែរ គឺជារឿងសំខាន់បំផុតដើម្បីកសាងកម្លាំងការពារជាតិដ៏រឹងមាំសម្រាប់ប្រឆាំងការឈ្លានពានរបស់បរទេសជិតខាងទៅថ្ងៃមុខ។
នៅថ្ងៃទី២២ ខែសីហា ឆ្នាំ២០២៥ នេះ សារព័ត៌មាន ខៅស៊ុត (Khaosod) ចុះផ្សាយថា តុលាការថៃ បានទម្លាក់ចោលបទចោទលើអតីតនាយករដ្ឋមន្ត្រីថៃ លោក ថាក់ស៊ីន ស៊ីណាវ៉ាត់ (Thaksin Shinawatra) ក្នុងសំណុំរឿងប្រមាថព្រះមហាក្សត្រថៃ ដោយសម្រេចឱ្យអតីតនាយករដ្ឋមន្ត្រីរូបនេះរួចផុតពីការចោទប្រកាន់ទាំងអស់។
ជុំវិញបញ្ហានេះ លោក សេង វណ្ណលី អ្នកតាមដានភូមិសាស្ត្រនយោបាយនៅតំបន់អាស៊ី-ប៉ាស៊ីហ្វិក សរសេរលើគណនីហ្វេសប៊ុករបស់ខ្លួននៅថ្ងៃទី២២ សីហា នេះថា នយោបាយថៃ នឹងផ្លាស់ប្ដូរដោយគ្មានរដ្ឋប្រហារ ប៉ុន្តែរបបប្រជាធិបតេយ្យថៃ ស្ថិតក្នុងភាពផុយស្រួយជុំវិញការលើកលែងទោសអតីតនាយករដ្ឋមន្ត្រីថៃ លោក ថាក់ស៊ីន ស៊ីណាវ៉ាត់ នៅពេលនេះ។
លោក សេង វណ្ណលី លើកឡើងថា ការសម្រេចរបស់តុលាការថៃ បែបនេះ បានផ្តល់ឱកាសមាសដល់សម្ព័ន្ធភាពរាជានិយម គឺខាងយោធាក្នុងការវិលមកកាន់អំណាចដោយមិនចាំបាច់ធ្វើរដ្ឋប្រហារដូចពេលមុន៕
© 2025, ឌឹ ខេមបូឌា ដេលី. All rights reserved.