អតីតប្រធានអង្គការតម្លាភាពកម្ពុជា ប្រកាសធ្វើសន្និសីទសារព័ត៌មាននៅថ្ងៃអង្គារនេះ បន្ទាប់ពីមានការរិះគន់ដូចព្យុះសង្ឃរា ក្រោយពេលលោកបានចុះចូលជាមួយបក្សកាន់អំណាច និងទទួលបានការតែងតាំងជាមន្ត្រីជាន់ខ្ពស់ក្នុងជួររាជរដ្ឋាភិបាលកម្ពុជាពីព្រះមហាក្សត្រ តាមការស្នើសុំរបស់លោក ហ៊ុន សែន កាលពីពេលថ្មីៗនេះ។
លោក ព្រាប កុល បានសរសេរលើគណនីហ្វេសប៊ុករបស់លោកកាលពីថ្ងៃទី១៤ ឧសភា ថា លោកនឹងធ្វើសន្និសីទសារព័ត៌មាននៅថ្ងៃទី១៦ ខែឧសភា ឆ្នាំ២០២៣ នេះ ដើម្បីបំភ្លឺជុំវិញការសម្រេចចិត្តរបស់លោកក្នុងការចូលរួមបម្រើជាតិជាមួយរដ្ឋាភិបាលកម្ពុជានៅពេលនេះ។
ការប្រកាសធ្វើសន្និសីទនេះ ធ្វើឡើងបន្ទាប់ពីសកម្មជនសង្គម មន្ត្រីអង្គការក្រៅរដ្ឋាភិបាល អ្នកវិភាគឯករាជ្យ អ្នកឃ្លាំមើលសង្គម និងអ្នកសង្កេតការណ៍ ជាដើម រិះគន់លោកជុំវិញការចុះចូលជាមួយបក្សកាន់អំណាចនៅពេលនេះយ៉ាងចាស់ដៃ។
ប្រធានមជ្ឈមណ្ឌលកម្ពុជាដើម្បីប្រព័ន្ធផ្សព្វផ្សាយឯករាជ្យ (CCIM) លោក ប៉ា ងួនទៀង បានសរសេរលើហ្វេសប៊ុករបស់លោកកាលពីថ្ងៃទី១៤ ឧសភា ដែលទំនងក្នុងន័យរិះគន់លោក ព្រាប កុល និងមនុស្សមួយចំនួនទៀតដែលចុះចូលជាមួយលោក ហ៊ុន សែន ថាសត្វ និងមនុស្សមានតម្រូវការដូចគ្នា ដូចជាអាហារ និងសេចក្តីស្នេហា ជាដើម ប៉ុន្តែសម្រាប់សត្វវិញ គឺមិនចេះខ្មាសអៀននោះទេនៅពេលដែលពួកគេត្រូវការអ្វីមួយ ដូច្នេះនៅពេលដែលមនុស្សប្រឹងប្រែងដើម្បីតែតណ្ហា ឬដើម្បីតែលាភសក្ការៈខ្លួនឯងដោយលែងចេះខ្មាសអៀន នោះគឺមិនខុសពីសត្វឡើយ។
លោក ប៉ា ងួនទៀង បានលើកជាឧទាហរណ៍ថា «ម្សិលមិញបុរសម្នាក់បានអប់រំ និងណែនាំឲ្យពលរដ្ឋខ្មែរយល់ដឹងពីអំពើពុករលួយដែលកើតមានឡើងនៅក្នុងប្រទេសកម្ពុជា ដោយជំរុញ និងប្រាប់ទៅពលរដ្ឋឲ្យចៀសវាងនូវការប្រព្រឹត្តអំពើនេះ ព្រោះវាជាប់ឈ្មោះមិនល្អនៅក្នុងសង្គម ប៉ុន្តែនៅថ្ងៃនេះ បុរសដដែលនោះបែរជាចូលបម្រើការងារកន្លែងដែលខ្លួនធ្លាប់រិះគន់ពីរឿងពាក់ព័ន្ធនឹងការប្រព្រឹត្តអំពើពុករលួយទៅវិញ»។
ចំណែកប្រធានប្រតិបត្តិសហព័ន្ធសហជីពកម្មករចំណីអាហារ និងសេវាកម្មកម្ពុជា លោក ស ម៉ូរ៉ា បានសរសេរលើហ្វេសប៊ុកខ្លួនដែលទំនងសំដៅទៅកាន់លោក ព្រាប កុល និងអ្នកផ្សេងៗទៀតដែរថា «មនុស្សមានសមត្ថភាពច្រើនណាស់នៅក្នុងជួររដ្ឋាភិបាល ប៉ុន្តែទោះបីជាពួកគេមានសមត្ថភាពក៏ដោយ ក៏ពួកគេមិនអាចប្រើសមត្ថភាពខ្លួនជួយជាតិបានឡើយ ដូច្នេះបើត្រឹមតែជាអ្នកចុះចូលជាមួយគណបក្សប្រជាជនកម្ពុជា តើពួកគេអាចជួយ និងធ្វើអ្វីខ្លះបានខ្លះទៅ?»។
ដោយឡែកសមាជិកចលនាយុវជនគណបក្សសង្គ្រោះជាតិប្រចាំប្រទេសកូរ៉េខាងត្បូង លោក យ៉ង់ ស៊ីណេត បានសរសេរចំៗលើគណនីហ្វេសប៊ុករបស់លោកដោយភ្ជាប់លោក ព្រាប កុល ជួបជាមួយក្រុមយុវជននៅប្រទេសកូរ៉េ កាលពីថ្ងៃអាទិត្យ ដោយប្រៀបធៀបថា «នៅលើលោកនេះគ្មានអ្វីទៀងទាត់ទេ សូម្បីតែព្រាប ក៏អាចក្លាយជាសារិកាបានដែរ ហើយឆ្មាក៏ចេះបំប្លែងខ្លួនជារាជសីហ៍ទៀត ខណៈឥន្ទ្រីក៏អាចក្លាយទៅជាសត្វសេករស់នៅក្នុងទ្រុងមាសដែរនោះ»។
លើសពីនេះទៅទៀត អតីតប្រធានចលនានិស្សិតដើម្បីលទ្ធិប្រជាធិបតេយ្យ លោក សារ៉ូ សូវិជ័យ បានត្អូញត្អែរជុំវិញករណីនេះដែរថា ការតស៊ូដើម្បីប្រជាធិបតេយ្យ គឺជាដំណើរដ៏លំបាក និងវែងឆ្ងាយណាស់ ដូច្នេះវាច្បាស់ជាមានអ្នកដែលរួមដំណើរខ្លះបោះបង់គោលដៅជាមិនខានឡើយ ប៉ុន្តែក៏នឹងមានអ្នកថ្មីបន្តចូលរួមក្នុងដំណើរបន្តទៀតដែរ ព្រោះជារឿងធម្មតាទៅហើយចំពោះរឿងនេះ។
លោក សារ៉ូ សូវិជ័យ បញ្ជាក់ថា លោកនៅតែបន្តការតស៊ូធ្វើកិច្ចការនេះបន្តទៅមុខទៀតដោយមិនបោះបង់ឡើយ ហើយកូនរបស់លោកក៏ត្រៀមខ្លួនចូលរួមក្នុងការតស៊ូក្នុងកិច្ចការនេះដូចលោកដែរ។
កាលពីថ្ងៃទី១៣ ខែឧសភា ឆ្នាំ២០២៣ ព្រះករុណា ព្រះបាទសម្តេចព្រះ បរមនាថ នរោត្តម សីហមុនី បានចេញព្រះរាជក្រឹត្យតែងតាំងលោក ព្រាប កុល ជារដ្ឋមន្ត្រីប្រតិភូអមនាយករដ្ឋមន្ត្រីតាមសំណើទូលថ្វាយរបស់មេដឹកនាំបក្សកាន់អំណាចលោក ហ៊ុន សែន។
ក្រោយទទួលបានការតែងតាំងពីព្រះមហាក្សត្រ នៅថ្ងៃទី១៣ ខែឧសភា លោក ព្រាប កុល បានសរសេរលើហ្វេសប៊ុករបស់លោកដោយថ្លែងអំណរគុណដល់ព្រះមហាក្សត្រ និងលោកនាយករដ្ឋមន្ត្រី ហ៊ុន សែន ដែលបានផ្តល់នូវសេចក្តីទុកចិត្ត និងផ្តល់ឱកាសដល់រូបលោកឲ្យចូលរួមបម្រើជាតិតាមរយៈរាជរដ្ឋាភិបាលកម្ពុជា ដែលស្ថិតនៅក្រោមការដឹកនាំរបស់គណបក្សប្រជាជនកម្ពុជាសព្វថ្ងៃនេះ។
លោក ព្រាប កុល បានប្ដេជ្ញាថា លោកនឹងបន្តបេសកកម្មបម្រើឧត្តមប្រយោជន៍ជាតិ មាតុភូមិ និងប្រជាពលរដ្ឋខ្មែរ ដោយប្រើប្រាស់ចំណេះដឹង ជំនាញ និងបទពិសោធន៍ដែលខ្លួនមានកន្លងមកតទៅថ្ងៃមុខ។
លោក ព្រាប កុល បានបញ្ចប់អាណត្តិជានាយកប្រតិបត្តិអង្គការតម្លាភាពកម្ពុជា កាលពីថ្ងៃទី១២ ខែមេសា ឆ្នាំ២០២០ បន្ទាប់ពីលោកបានដឹកនាំអង្គការមួយនេះដោយធ្វើការផ្ដោតទៅលើការប្រយុទ្ធប្រឆាំងនឹងអំពើពុករលួយ និងបញ្ហាសង្គមផ្សេងៗអស់រយៈពេលជាច្រើនឆ្នាំកន្លងមក។
យ៉ាងណាក៏ដោយ ក្រោយពីចប់អាណត្តិជាប្រធានអង្គការតម្លាភាពរួចមក លោក ព្រាប កុល ក៏បានចាប់ផ្ដើមធ្វើជំនួញខាងផ្នែកអចលនទ្រព្យនៅក្នុងប្រទេសកម្ពុជា៕