34 C
Phnom Penh

លោក សម រង្ស៊ី ថា​លោក ហ៊ុន សែន មិន​ហ៊ាន​ឱ្យ​បក្ស​ភ្លើង​ទៀន​ចូល​ប្រកួត​ព្រោះ​ខ្លាច​ចាញ់

ដោយ ឌឹ ខេមបូឌា ដេលី

បទវិភាគ

អតីត​មេដឹកនាំ​បក្ស​ប្រឆាំង លោក សម រង្ស៊ី លើកឡើង​ថា មេដឹកនាំ​បក្ស​កាន់​អំណាច លោក ហ៊ុន សែន មិន​ហ៊ាន​ឲ្យ​គណបក្ស​ភ្លើង​ទៀន​ចូល​ប្រកួត​ក្នុង​ការ​បោះឆ្នោត​ឆ្នាំ​២០២៣ នេះ​ទេ ពីព្រោះ​តែ​គាត់​ខ្លាច​ចាញ់​គណបក្ស​ភ្លើង​ទៀន​ក្នុង​ការ​បោះឆ្នោត​នេះ។

អតីត​មេដឹកនាំ​បក្ស​ប្រឆាំង លោក សម រង្ស៊ី សរសេរ​លើ​ទំព័រ​ហ្វេសប៊ុក​របស់​លោក​កាលពី​ថ្ងៃទី​១៦ ឧសភា ថា ក្នុង​ការ​បោះឆ្នោត​ឆ្នាំ​២០២៣ នេះ លោក ហ៊ុន សែន បាន​ចាត់តាំង​ឲ្យ​កូនប្រុស​របស់​គាត់ គឺ​លោក ហ៊ុន ម៉ាណែត ឈរ​ជា​បេក្ខជន​លេខ​រៀង​ទី​១ នៅ​មណ្ឌល​រាជធានី​ភ្នំពេញ ដូច្នេះ​បើ​លោក ហ៊ុន ម៉ាណែត ចាញ់​បេក្ខជន​លេខ​រៀង​ទី​១ របស់​គណបក្ស​ភ្លើង​ទៀន សម្រាប់​រាជធានី​ភ្នំពេញ ក្នុង​ការ​បោះឆ្នោត​ឆ្នាំ​២០២៣ នេះ លោក ហ៊ុន ម៉ាណែត នឹង​មិន​អាច​ធ្វើ​ជា​នាយករដ្ឋមន្ត្រី​ស្នង​មរតក​អំណាច​ពី​លោក ហ៊ុន សែន បាន​ទេ។

អតីត​មេដឹកនាំ​បក្ស​ប្រឆាំង​រូប​នេះ​លើកឡើង​ថា នៅ​មណ្ឌល​រាជធានី​ភ្នំពេញ គណបក្ស​ប្រជាជន​កម្ពុជា​ធ្លាប់​ចាញ់​គណបក្ស សម រង្ស៊ី ក្នុង​ការ​បោះឆ្នោត​ជាតិ​ឆ្នាំ​២០០៣ និង​ចាញ់​គណបក្ស​សង្គ្រោះ​ជាតិ ក្នុង​ការ​បោះឆ្នោត​ជាតិ​ឆ្នាំ​២០១៣ ពីរ​លើក​រួច​មក​ហើយ ដូច្នេះ​ដើម្បី​ធានា​នូវ​ផែនការ​ផ្ទេរ​អំណាច​ជា​នាយករដ្ឋមន្ត្រី​ឱ្យ​កូនប្រុស​របស់​គាត់​បន្ត​ទៅ​ថ្ងៃ​មុខ គឺ​មាន​តែ​បិទ​វត្តមាន​គណបក្ស​ភ្លើង​ទៀន​ទាំង​បំពាន​ច្បាប់​ប៉ុណ្ណោះ។

ក្នុង​ការ​បោះឆ្នោត​ឆ្នាំ​២០០៣ គណបក្ស សម រង្ស៊ី បាន​ទទួល ៦​អាសនៈ​ក្នុង​រដ្ឋសភា ក្នុង​ចំណោម ១២​អាសនៈ​សម្រាប់​មណ្ឌល​រាជធានី​ភ្នំពេញ ចំណែក​គណបក្ស​ប្រជាជន​កម្ពុជា​បាន​ទទួល​តែ ៤​អាសនៈ​ប៉ុណ្ណោះ ក្នុង​នោះ​គណបក្ស​ហ៊្វុនស៊ិនប៉ិច បាន​ទទួល ២​អាសនៈ​ផង​ដែរ។

ដោយឡែក​ការ​បោះឆ្នោត​ឆ្នាំ​២០១៣ គណបក្ស​សង្គ្រោះ​ជាតិ​បាន​ទទួល ៧​អាសនៈ​ក្នុង​រដ្ឋសភា ក្នុង​ចំណោម ១២​អាសនៈ​សម្រាប់​មណ្ឌល​រាជធានី​ភ្នំពេញ ខណៈ​គណបក្ស​ប្រជាជន​កម្ពុជា បាន​ទទួល​តែ ៥​អាសនៈ​ប៉ុណ្ណោះ គឺ​ចាញ់​គណបក្ស​សង្គ្រោះ​ជាតិ​ចំនួន ២​អាសនៈ​នៅ​ពេល​នោះ។

កាលពី​ថ្ងៃទី​១៥ ខែ​ឧសភា ឆ្នាំ​២០២៣ គណៈកម្មាធិការ​ជាតិ​រៀបចំ​ការ​បោះឆ្នោត បាន​ចេញ​សេចក្តី​សម្រេច​ស្ដីពី​ការ​បដិសេធ​ការ​ចុះបញ្ជី​គណបក្ស​នយោបាយ​ឈរ​ឈ្មោះ​បោះឆ្នោត​ជ្រើសតាំង​តំណាងរាស្ត្រ​នៅ​ខែ​កក្កដា ខាងមុខ​នេះ ក្រោម​ហេតុផល​ថា គណបក្ស​នេះ​មិន​បាន​ភ្ជាប់​មក​ជាមួយ​នូវ​ប្រកាស​ស្ដីពី​ការ​ចុះបញ្ជី​គណបក្ស​នយោបាយ​នៅ​ក្រសួង​មហាផ្ទៃ ដែល​មាន​បញ្ជាក់​នីត្យានុកូលកម្ម​ដោយ​រដ្ឋបាល​រាជធានី​ខេត្ត ក្រុង ស្រុក​ខណ្ឌ។

ជុំវិញ​បញ្ហា​នេះ អតីត​មន្ត្រី​ជាន់ខ្ពស់​គណបក្ស​សង្គ្រោះ​ជាតិ លោក អ៊ុំ សំអាន សរសេរ​លើ​គណនី​ហ្វេសប៊ុក​របស់​ខ្លួន​នៅ​ថ្ងៃទី​១៧ ឧសភា នេះ​ថា «បក្ស​ប្រជាជន​បដិវត្តន៍​កម្ពុជា ដែល​ប្តូរ​ឈ្មោះ​មក​ជា​គណបក្ស​ប្រជាជន​កម្ពុជា​សព្វថ្ងៃ​នេះ មាន​ឯកសារ​ដើម​តម្កល់​នៅ​ទីក្រុង​ហាណូយ ព្រោះ​បក្ស​នេះ​បង្កើត​ឡើង​ដោយ ហូ ជី មិញ ក្នុង​ឆ្នាំ​១៩៥១ ដូច្នេះ​លោក ហ៊ុន សែន ត្រូវតែ​ទៅ​យក​ឯកសារ​ដើម​ពី​ខ្មោច ហូ ជី មិញ ដើម្បី​ដាក់​ទៅ គ..ប មុន​នឹង​ចូលរួម​បោះឆ្នោត​នេះ»

លោក អ៊ុំ សំអាន លើកឡើង​ថា បើ​គណបក្ស​ប្រជាជន​កម្ពុជា​មិន​អាច​យក​ឯកសារ​នោះ​បាន​ទេ គ.ជ.ប ត្រូវ​ដក​គណបក្ស​ប្រជាជន​ចេញពី​បញ្ជី​ឈរ​ឈ្មោះ​បោះឆ្នោត​ដែរ ប៉ុន្តែ​លោក​ជឿជាក់​ថា បក្ស​ប្រជាជន​បដិវត្តន៍​កម្ពុជា​គ្មាន​ឯកសារ​ដើម​នោះ​ទេ ព្រោះ​ឯកសារ​ដើម​តាំងពី​ឆ្នាំ​១៩៥១ នោះ ប្រាកដជា​បាត់បង់​អស់​ហើយ។

ទាក់ទិន​នឹង​បញ្ហា​នេះ សកម្មជន​សហគមន៍​ខ្មែរ​ក្នុង​ទីក្រុង​ឡងប៊ិច លោក មួង ណារ៉េត លើកឡើង​ថា រលក​យក្ស​ស៊ូណាមិ​នៃ​នយោបាយ​កខ្វក់​កំពុង​បោកបក់​បញ្ឆេះ​ភ្លើង​គំនុំ និង​ការ​សងសឹក ព្រោះ​ថា​ការ​ផាត់​ចោល​គណបក្ស​ភ្លើង​ទៀន​ដែល​ជា​គណបក្ស​ប្រឆាំង​ចុងក្រោយ ដែល​ប្រែ​ក្លាយ​មកពី​គណបក្ស​សង្គ្រោះ​ជាតិ ទោះ​ក្នុង​ហេតុផល​ណា​ក៏ដោយ ក៏​ត្រូវ​គេ​មើល​ឃើញ​ថា គឺ​ប្រៀប​ដូចជា​ការ​បង្កាត់​ភ្លើង​គំនុំ​ដែល​កំពុង​ឆេះ​ងុំ​ក្នុង​ដួងចិត្ត​អ្នក​រង​ភាព​អយុត្តិធម៌​ខាង​នយោបាយ​នេះ​ដែរ។

លោក មួង ណារ៉េត លើកឡើង​ថា តាម​សាវតារ​ខ្មែរ និង​មេរៀន​ពី​ទិដ្ឋភាព​នយោបាយ​នៅ​ប្រទេស​ថៃ នា​ពេល​ថ្មីៗ​នេះ បង្ហាញ​ថា ការ​ធ្វើ​ទុក្ខបុកម្នេញ​លើ​គណបក្ស​ប្រឆាំង​មិន​ធ្វើ​ឱ្យ​គណបក្ស​កាន់​អំណាច​ខ្លាំង ឬ​ជោគជ័យ​នោះ​ទេ។ ផ្ទុយទៅវិញ វា​គឺ​ជា​ការ​បញ្ឆេះ​កំហឹង និង​កម្លាំង​តស៊ូ​ដើម្បី​ប្រជាធិបតេយ្យ​ឱ្យ​កាន់តែ​ពុះពោរ និង​រឹងមាំ​ជាង​មុន​តែប៉ុណ្ណោះ ព្រោះ​មនុស្ស​ស្អប់​អំពើ​អយុត្តិធម៌ និង​អំពើ​ផ្ដាច់ការ មិន​ថា​នៅ​ទីណា​នោះ​ឡើយ ត្រូវតែ​មាន​ការ​រើ​បម្រះ​នៅ​ពេល​ដែល​មាន​ការ​គាបសង្កត់។

សកម្មជន​សហគមន៍​ខ្មែរ​ក្នុង​ទីក្រុង​ឡងប៊ិច​រូប​នេះ​បញ្ជាក់​ថា ដោយសារ​រដ្ឋធម្មនុញ្ញ​កម្ពុជា​តម្រូវ​ឱ្យ​ប្រទេស​កម្សត់​មួយ​នេះ​ប្រកាន់​យក​របប​ប្រជាធិបតេយ្យ សេរី​ពហុបក្ស ដើម្បី​បញ្ចប់​គំនុំ និង​ការ​សងសឹក គឺ​មាន​តែ​រៀបចំ​ឱ្យ​មាន​ការ​បោះឆ្នោត​មួយ​ដែល​មាន​ភាព​សេរី ត្រឹមត្រូវ និង​យុត្តិធម៌ ដោយ​ការ​សម្របសម្រួល​ឱ្យ​គ្រប់​គណបក្ស​នយោបាយ​ទាំងអស់​អាច​ចូលរួម​ប្រកួតប្រជែង​ដោយ​ស្មើ​មុខ​គ្នា និង​ដោយ​គ្មាន​ភាព​ភ័យខ្លាច គ្មាន​ការ​គំរាមកំហែង គ្មាន​ការ​បំភិតបំភ័យ និង​គ្មាន​ការ​ធ្វើ​ទុក្ខបុកម្នេញ​ប៉ុណ្ណោះ។

ក្រុម​អ្នក​សង្កេតការណ៍​លើកឡើង​ថា បើ​ផ្អែក​តាម​សំឡេង​គាំទ្រ​របស់​ពលរដ្ឋ​កាលពី​បោះឆ្នោត​ក្រុមប្រឹក្សា​ឃុំ-សង្កាត់ ដែល​បក្ស​ភ្លើង​ទៀន​ទទួល​បាន​ការ​គាំទ្រ ២១៩៨​អាសនៈ​នោះ បាន​បង្ហាញ​ឱ្យ​ឃើញ​ថា គណបក្ស​ក្រៅ​រដ្ឋាភិបាល​មួយ​នេះ​អាច​នឹង​ក្លាយ​ជា​កម្លាំង​ប្រកួតប្រជែង​ដ៏​ធំ​ជាមួយ​នឹង​គណបក្ស​កាន់​អំណាច​នៅ​ថ្ងៃ​បោះឆ្នោត​ជាតិ​ខាងមុខ​នេះ ដូច្នេះ​ហើយ​បាន​ជា​គណបក្ស​នេះ​តែង​រង​នូវ​ការ​ធ្វើ​ទុក្ខបុកម្នេញ​គ្រប់​រូបភាព រហូត​ដល់​មន្ត្រី​ជាន់ខ្ពស់​មួយ​ចំនួន​រង​នូវ​ការ​គំរាមកំហែង រង​នូវ​បណ្តឹង រង​នូវ​ការ​រឹបអូស​ផ្ទះសម្បែង និង​រង​នូវ​ការ​ចាប់​ឃុំ​ខ្លួន​ទាំង​អយុត្តិធម៌​សព្វថ្ងៃ​នេះ​ថែម​ទៀត៕

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស