អតីតសមាជិកគណបក្សសង្គ្រោះជាតិប្រចាំខេត្តស្វាយរៀង លោក គង់ ម៉ាស់ ត្រូវបានគណៈអចិន្ត្រៃយ៍របស់គណបក្សប្រជាជនកម្ពុជាប្រចាំខេត្តស្វាយរៀង តែងតាំងជាប្រធានសាខាបក្សចំណុះឲ្យគណៈកម្មាធិការគណបក្សខេត្តស្វាយរៀង បន្ទាប់ពីលោកបានចុះចូលជាមួយបក្សកាន់អំណាច។
គណៈអចិន្ត្រៃយ៍គណៈកម្មាធិការគណបក្សខេត្តរបស់បក្សប្រជាជនកម្ពុជាប្រចាំខេត្តស្វាយរៀង បានចេញសេចក្តីសម្រេចកាលពីថ្ងៃទី៣០ ខែឧសភា ឆ្នាំ២០២៣ ដោយសម្រេចតែងតាំងអតីតសមាជិកគណបក្សសង្គ្រោះជាតិប្រចាំខេត្តស្វាយរៀង លោក គង់ ម៉ាស់ ជាប្រធានសាខាបក្សរបស់បក្សប្រជាជនកម្ពុជាដែលដឹកនាំសមាជិកចំនួន ៧រូប ដូចជាលោក ញ៉ែម វាន ជាអនុប្រធាន និងលោក សុន មករា ជាសមាជិក ជាដើម។
ការសម្រេចតែងតាំងនេះ ធ្វើឡើងបន្ទាប់ពីអតីតសមាជិកគណបក្សសង្គ្រោះជាតិប្រចាំខេត្តស្វាយរៀងរូបនេះបានចុះចូលជាមួយគណបក្សប្រជាជនកម្ពុជា ដើម្បីរួចផុតពីការផ្ដន្ទាទោសដែលលោកត្រូវបានឃុំខ្លួនក្នុងពន្ធនាគារនាពេលកន្លងមក។
លោក គង់ ម៉ាស់ ត្រូវបានសមត្ថកិច្ចចាប់ឃុំខ្លួនកាលពីថ្ងៃទី៣១ ខែធ្នូ ឆ្នាំ២០២០ និងបានបញ្ជូនទៅតុលាការក្រុងភ្នំពេញពីបទ «រួមគំនិតក្បត់»។
ក្រោយឃុំខ្លួនអស់រយៈពេលប្រមាណជា ២ឆ្នាំ នៅចុងខែធ្នូ ឆ្នាំ២០២២ លោក គង់ ម៉ាស់ ត្រូវបានតុលាការក្រុងភ្នំពេញសម្រេចផ្ដន្ទាទោសដាក់ពន្ធនាគាររយៈពេល ៥ឆ្នាំពីបទរួមគំនិតក្បត់ ជុំវិញការចូលរួមមាតុភូមិនិវត្តន៍របស់លោក សម រង្ស៊ី កាលពីអំឡុងឆ្នាំ២០១៩។
យ៉ាងណាក៏ដោយ កាលពីថ្ងៃទី០៦ ខែឧសភា ឆ្នាំ២០២៣ សកម្មជនគណបក្សសង្គ្រោះជាតិចំនួន ១០នាក់ រួមទាំងលោក គង់ ម៉ាស់ ផងដែលកំពុងជាប់ឃុំនៅក្នុងពន្ធនាគារ បានចេញវីដេអូទទួលកំហុស និងធ្វើលិខិតសុំទោសលោក ហ៊ុន សែន ដោយសំណូមពរឱ្យពួកគេបានរស់នៅក្រៅឃុំជាបណ្ដោះអាសន្ន។
ក្រោយចេញវីដេអូសុំទោសលោក ហ៊ុន សែន នៅថ្ងៃទី០៦ ខែឧសភា ឆ្នាំ២០២៣ ដដែលនោះ ព្រះករុណាព្រះបាទ សម្តេចព្រះនរោត្តម សីហមុនី ក៏បានចេញព្រះរាជក្រឹត្យលើកលែងទោសឱ្យលោក គង់ ម៉ាស់ រួចផុតពីការចោទប្រកាន់ក្នុងសំណុំរឿងព្រហ្មទណ្ឌរបស់សាលាដំបូងរាជធានីភ្នំពេញផងដែរ។
បន្ទាប់ពីមានការអន្តរាគមន៍ពីលោក ហ៊ុន សែន ឲ្យនៅក្រៅឃុំជាបណ្ដោះអាសន្ន នៅថ្ងៃទី១០ ខែឧសភា ឆ្នាំ២០២៣ លោក គង់ ម៉ាស់ បានចេញលិខិតសុំចូលរួមជីវភាពនយោបាយជាមួយបក្សប្រជាជនកម្ពុជា ដោយបញ្ជាក់ថា រយៈពេលជាង ១០ឆ្នាំហើយដែលលោកដើរតាមមនោគមន៍វិជ្ជានយោបាយរបស់មេដឹកនាំបក្សប្រឆាំង ដែលមិនបានចូលរួមធ្វើកិច្ចការដើម្បីបម្រើសង្គមជាតិ គឺមានតែនាំឲ្យមានភាពវឹកវរដល់សង្គមជាតិប៉ុណ្ណោះ។
រយៈពេលចុងក្រោយនេះ គេសង្កេតឃើញថា សកម្មជន សមាជិក និងមន្ត្រីបក្សប្រឆាំងទាំងភាគីលោក កឹម សុខា និងភាគីលោក សម រង្ស៊ី បានសម្រុកចុះចូលជាមួយគណបក្សប្រជាជនកម្ពុជា និងរដ្ឋាភិបាលឯកបក្សរបស់លោក ហ៊ុន សែន ជាបន្តបន្ទាប់ ក្នុងនោះលោក ហ៊ុន សែន បានតែងតាំងអ្នកចុះចូលទាំងនោះឲ្យទទួលតំណែងក្នុងគណបក្ស និងទទួលតំណែងក្នុងជួររដ្ឋាភិបាលរបស់លោកផងដែរ។
អ្នកស្រាវជ្រាវការអភិវឌ្ឍសង្គម បណ្ឌិត មាស នី បានលើកឡើងក្នុងកម្មវិធី Idea Talk នៃសារព័ត៌មាន The Cambodia Daily កាលពីពេលថ្មីៗនេះថា ស្ថានភាពនយោបាយនៅកម្ពុជានឹងមានការរឹតបន្តឹងចាប់ពីពេលនេះតទៅរហូតដល់ក្រោយការបោះឆ្នោត ហើយស្ថានភាពបែបនេះតែងតែកើតឡើងជារៀងរាល់អាណត្តិនៅមុនពេលបោះឆ្នោតមកដល់ម្តងៗ៕