37 C
Phnom Penh

លោក ហ៊ុន ម៉ាណែត ថា​បក្ស​ប្រជាជន​ផ្ដល់​ជូន​ពលរដ្ឋ​នូវ​សុភមង្គល​និង​មោទកភាព​ជាតិ​តាំង​ពី​ថ្ងៃ​បង្កើត​បក្ស

ដោយ ឌឹ ខេមបូឌា ដេលី

បទវិភាគ

បេក្ខជន​អនាគត​នាយករដ្ឋមន្ត្រី​ដ៏​មាន​ចម្រូងចម្រាស​របស់​គណបក្ស​កាន់​អំណាច ដែល​ត្រូវ​ជា​កូនប្រុស​របស់​លោក ហ៊ុន សែន លើកឡើង​ថា ចាប់តាំងពី​ថ្ងៃ​ដែល​គណបក្ស​ប្រជាជន​កម្ពុជា​បាន​បង្កើត​ឡើង​រហូត​ដល់​សព្វថ្ងៃ​នេះ បាន​ផ្តល់​ជូន​ប្រជាជន​កម្ពុជា​នូវ​សិទ្ធិ​សេរីភាព ការ​អភិវឌ្ឍ សេចក្តី​ថ្លៃថ្នូរ សុភមង្គល និង​មោទនភាព​ជាតិ​យ៉ាង​ធំធេង។

កូនប្រុស​មេដឹកនាំ​ខ្មែរ​ដែល​ត្រៀម​ស្នង​អំណាច​ពី​ឪពុក លោក ហ៊ុន ម៉ាណែត លើកឡើង​ក្នុង​ពិធី​ជួប​ជាមួយ​ក្រុម​ការងារ​យុវជន​គណបក្ស​ប្រជាជន​កម្ពុជា​ខេត្ត​ព្រៃវែង កាលពី​ថ្ងៃទី​៨ ខែ​មិថុនា ឆ្នាំ​២០២៣ នេះ​ថា ប្រទេស​កម្ពុជា​សព្វថ្ងៃ​នេះ​ត្រូវ​បាន​ប្រជាជន​ចាត់ទុក​ជា​ផ្ទះ​ដ៏​សុខសាន្ត ដែល​អាច​រស់នៅ​ប្រកប​ដោយ​សេចក្តី​ថ្លៃថ្នូរ សុភមង្គល និង​មោទនភាព។

លោក​បន្ថែម​ថា ទាំងអស់​នេះ គឺជា​សមិទ្ធផល​នៃ​ចក្ខុវិស័យ និង​ជា​គោល​នយោបាយ​របស់​គណបក្ស​ប្រជាជន​កម្ពុជា​រហូត​មក។

បេក្ខជន​អនាគត​នាយករដ្ឋមន្ត្រី​ដែល​កើត​ចេញពី​ការ​ប្លន់​អំណាច លោក ហ៊ុន ម៉ាណែត អះអាង​ថា ដោយសារ​មាន​គណបក្ស​ប្រជាជន​កម្ពុជា សិទ្ធិ​សេរីភាព​ត្រូវ​បាន​ផ្តល់​ជូន​ប្រជាជន​កម្ពុជា​ឡើងវិញ​ក្រោយ​ពេល​រំដោះ​ប្រទេស​ជាតិ​ចេញពី​របប​ប្រល័យ​ពូជសាសន៍ ប៉ុល ពត ហើយ​បក្ស​កាន់​អំណាច​តែង​ប្រកាន់​គោលជំហរ​រឹងមាំ និង​រក្សា​ជានិច្ច​នូវ​បុព្វហេតុ​បម្រើ​ជាតិ និង​ប្រជាជន​ដោយ​ឥត​ងាករេ។

លោក ហ៊ុន ម៉ាណែត បញ្ជាក់​ថា គណបក្ស​ប្រជាជន​កម្ពុជា​បាន​ជួយ​សង្គ្រោះ​អាយុជីវិត​ប្រជាជន​ខ្មែរ​ក្នុង​គ្រោះថ្នាក់​ធំៗ​ជាច្រើន​លើក គឺ​ការ​សង្គ្រោះ​ជីវិត​ប្រជាជន​ពី​ការ​កាប់​សម្លាប់​ក្នុង​របប ប៉ុល ពត ការ​សង្គ្រោះ​អាយុជីវិត​ប្រជាជន​ពី​ការ​ស្លាប់​ដោយសារ​សង្គ្រាម​ស៊ីវិល និង​ការ​សង្គ្រោះ​ជីវិត​ប្រជាជន​ពី​មាត់ជ្រោះ​មរណៈ​នៃ​ជំងឺ​កូវីដ-១៩ ជាដើម។

គណបក្ស​ប្រជាជន​កម្ពុជា​ដែល​មាន​ឈ្មោះ​ដើម​ថា បក្ស​ប្រជាជន​បដិវត្តន៍​កម្ពុជា ត្រូវ​បាន​បង្កើត​ឡើង​ដោយ​លោក សឺន ង៉ុក មិញ ហៅ​អាចារ្យ មៀន កាលពី​ថ្ងៃទី​២៨ ខែ​មិថុនា ឆ្នាំ​១៩៥១។ លោក សឺន ង៉ុក មិញ ដែល​មាន​ឈ្មោះ​ជា​ភាសា​វៀតណាម​ថា ផាម យ៉ាំងហួ (Phạm Văn Hua) គឺជា​អតីត​សមាជិក​បក្ស​កុម្មុយនីស្ត​ឥណ្ឌូចិន ដែល​ត្រូវ​បាន​បង្កើត​ឡើង​ដោយ​លោក ហូ ជី មិញ (Ho Chi Minh) តាំងពី​ឆ្នាំ​១៩៣០ មក។ ចំណែក​នាយករដ្ឋមន្ត្រី​ខ្មែរ​បច្ចុប្បន្ន លោក ហ៊ុន សែន ក៏​ជា​មេដឹកនាំ​ដែល​កងទ័ព​វៀតណាម​លើក​បន្តុប​កាលពី​ឆ្នាំ​១៩៨៥ ដែរ។

ជុំវិញ​ប្រវត្តិ​នៃ​ការ​កកើត​គណបក្ស​ប្រជាជន​កម្ពុជា​នេះ ត្រូវ​គេ​ដឹង​ថា ដោយសារតែ​គណបក្ស​នេះ​មាន​ដើមកំណើត​ពី​បក្ស​កុម្មុយនីស្ត​វៀតណាម ហើយ​លោក ហ៊ុន សែន ក៏​ជា​មេដឹកនាំ​ដែល​កងទ័ព​វៀតណាម​លើក​បន្តុប ដូច្នេះ​ហើយ​បាន​ជា​មេដឹកនាំ​ខ្មែរ​រូប​នេះ​តែងតែ​ចុះ​កិច្ចព្រមព្រៀង​ខុស​ច្បាប់​កាត់​ទឹកដី​កម្ពុជា​ឱ្យ​រដ្ឋាភិបាល​វៀតណាម​ជា​បន្តបន្ទាប់​រហូត​មក។

ជាក់ស្តែង នៅ​ឆ្នាំ​១៩៨២ លោក ហ៊ុន សែន បាន​ចុះហត្ថលេខា​លើ​សន្ធិសញ្ញា​ខុស​ច្បាប់​កំណត់​ព្រំដែន​ទឹកជា​មួយ​វៀតណាម និង​នៅ​ឆ្នាំ​១៩៨៥ លោក ហ៊ុន សែន ក៏​បាន​ចុះហត្ថលេខា​លើ​សន្ធិសញ្ញា​ខុស​ច្បាប់​កំណត់​ព្រំដែន​រដ្ឋ​ជាមួយ​វៀតណាម​ដែរ។ ជាង​នេះ​ទៀត នៅ​ឆ្នាំ​១៩៨៦ លោក ហ៊ុន សែន បាន​ចុះហត្ថលេខា​លើ​សារាចរ​ខុស​ច្បាប់​អនុញ្ញាត​ឱ្យ​ជនជាតិ​វៀតណាម​ចូល​មក​រស់នៅ​លើ​ទឹកដី​កម្ពុជា ព្រមទាំង​សន្ធិសញ្ញា​ខុស​ច្បាប់​ជាច្រើន​ទៀត​ដែល​មាន​សុពលភាព​រហូត​ដល់​សព្វថ្ងៃ​នេះ។

ទាក់ទិន​នឹង​បញ្ហា​នេះ អ្នក​តាមដាន​ស្ថានការណ៍​កម្ពុជា លោក សុខ សុគន្ធ បាន​លើកឡើង​ក្នុង​កម្មវិធី Idea Talk នៃ​សារព័ត៌មាន The Cambodia Daily កាលពី​ពេល​កន្លងទៅ​ថា បក្ស​ប្រជាជន​កម្ពុជា​ដែល​ជា​អតីត​បក្ស​កុម្មុយនីស្ត​វៀតណាម បាន​ធ្វើ​ឱ្យ​កម្ពុជា​ធ្លាក់​ចូល​ទៅ​ក្នុង​ការ​គ្រប់គ្រង​របស់​បរទេស​ឈ្លានពាន​បន្តិច​ម្តងៗ តាមរយៈ​នៃ​ការ​ផ្តល់​ឯកសារ​ខុស​ច្បាប់​នានា​ដែល​មាន​ការ​ចុះ​កិច្ចព្រមព្រៀង​រវាង​មេដឹកនាំ​ខ្មែរ​លោក ហ៊ុន សែន ដែល​វៀតណាម​បាន​លើក​បន្តុប និង​រដ្ឋាភិបាល​វៀតណាម​តាំងពី​ទសវត្ស​ឆ្នាំ​១៩៨០ រហូត​ដល់​សព្វថ្ងៃ​នេះ។

ជាក់ស្តែង កាលពី​ខែ​កក្កដា ឆ្នាំ​២០២០ អគ្គលេខាធិការ​មជ្ឈិម​បក្ស​វៀតណាម និង​ជា​ប្រធាន​រដ្ឋ​វៀតណាម លោក ង្វៀន ភូទ្រង់ ធ្លាប់​បាន​ជំរុញ​ឲ្យ​លោក ហ៊ុន សែន បន្ត​អនុវត្ត​កិច្ចសន្យា​រវាង​កម្ពុជា-វៀតណាម ឲ្យ​បាន​ល្អ​បន្ត​ទៀត ខណៈ​មេដឹកនាំ​ខ្មែរ​លោក ហ៊ុន សែន មិន​បាន​បដិសេធ​នឹង​សំណើ​របស់​មេដឹកនាំ​វៀតណាម​នោះ​ឡើយ។

ទាក់ទិន​នឹង​បញ្ហា​នេះ កាលពី​ថ្ងៃទី​៣០ ខែ​មេសា ឆ្នាំ​២០២៣ អ្នកជំនាញ​ភូមិសាស្ត្រ​នយោបាយ បណ្ឌិត ឌី ការ៉េត លើកឡើង​ថា ផែនការ​របស់​វៀតណាម​ក្នុង​ការ​គ្រប់គ្រង​ខ្មែរ គឺជា​ផែនការ​សម្ងាត់​របស់​លោក​នាយករដ្ឋមន្ត្រី ហ៊ុន សែន ជាមួយ​នឹង​វៀតណាម ហើយ​ផែនការ​នេះ​កំពុង​អនុវត្ត​ម្តង​មួយ​ជំហានៗ​តាមរយៈ​នៃ​ការ​បង្កើត​ឱ្យ​មាន​តំបន់​ត្រីកោណ​អភិវឌ្ឍន៍​ជាមួយ​ឡាវ និង​វៀតណាម សព្វថ្ងៃ​នេះ ហើយ​នេះ​ក៏​ជា​ការ​រៀបចំ​របស់​វៀតណាម​ដែរ ដើម្បី​គ្រប់គ្រង​ទឹកដី​ខ្មែរ​ជា​ជំហានៗ​ដោយ​ផ្តើម​ចេញពី​តំបន់​នោះ​ទៅ​ថ្ងៃ​អនាគត៕

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស