32 C
Phnom Penh

លោក ហ៊ុន សែន ចោទ​លោក សម រង្ស៊ី មួលបង្កាច់​រដ្ឋាភិបាល​កម្ពុជា​និង​បោកប្រាស់​រដ្ឋាភិបាល​បារាំង

ដោយ ឌឹ ខេមបូឌា ដេលី

បទវិភាគ

មេដឹកនាំ​បក្ស​កាន់​អំណាច​ដែល​ប្ដេជ្ញា​តាម​កម្ទេច​ក្រុម​ប្រឆាំង​ឲ្យ​ដល់​ទីបំផុត គឺ​លោក ហ៊ុន សែន បញ្ជា​ឱ្យ​ក្រសួង​ការបរទេស​កម្ពុជា​បំភ្លឺ​ទៅ​កាន់​រដ្ឋាភិបាល​បារាំង ដោយ​ចោទ​ថា អតីត​មេដឹកនាំ​បក្ស​ប្រឆាំង​លោក សម រង្ស៊ី កំពុង​មួលបង្កាច់​រាជរដ្ឋាភិបាល​កម្ពុជា​ថា​បាន​គាបសង្កត់​សិទ្ធិ​សេរីភាព​ពលរដ្ឋ ហើយ​ក៏​កំពុង​បោកប្រាស់​រដ្ឋាភិបាល​បារាំង​ជុំវិញ​ការ​ធានា​អតីត​សមាជិក​របស់​ខ្លួន​ម្នាក់​ឱ្យ​ទទួល​បាន​សិទ្ធិ​ជ្រកកោន​នយោបាយ​នៅ​ប្រទេស​បារាំង រហូត​ដល់​សព្វថ្ងៃ​នេះ​ផង​ដែរ។

លោក ហ៊ុន សែន បាន​សរសេរ​លើ​បណ្ដាញ​ទំនាក់ទំនង​តេឡេក្រាម​របស់​ខ្លួន​កាលពី​ថ្ងៃទី​១១ មិថុនា នេះ ដោយ​បញ្ជា​ឱ្យ​អ្នក​ច្បាប់​សិក្សា​អំពី​ផ្លូវច្បាប់​នូវ​លិខិត​របស់​គណបក្ស​ភ្លើង​ទៀន ដែល​ចុះហត្ថលេខា​ដោយ​លោក ទាវ វណ្ណុល ដែល​ជា​ប្រធាន​គណបក្ស​ភ្លើង​ទៀន ជាមួយ​នឹង​លិខិត​របស់​អតីត​គណបក្ស​សង្គ្រោះ​ជាតិ ដែល​ចុះហត្ថលេខា​ដោយ​អតីត​មេដឹកនាំ​បក្ស​ប្រឆាំង​លោក សម រង្ស៊ី ជុំវិញ​ការ​ធានា​ឱ្យ​អតីត​សមាជិក​បក្ស​ប្រឆាំង​ម្នាក់​ទទួល​បាន​សិទ្ធិ​រស់នៅ​ប្រទេស​បារាំង កាលពី​កន្លងទៅ ថា​តើ​លិខិត​ទាំង​ពីរ​នេះ​មាន​ទំនាក់ទំនង​នឹង​គ្នា​ដូចម្តេច​ខ្លះ?

បុរស​ខ្លាំង​រូប​នេះ​បញ្ជាក់​ថា រឿង​បោកប្រាស់​ដូច​ករណី​បែប​នេះ​បាន​កើតឡើង​ជាច្រើន​លើក​ច្រើនសា​រួច​មក​ហើយ ដែល​ពួកគេ​តែង​ចោទ​រដ្ឋាភិបាល​កម្ពុជា​បែប​នេះ ខណៈ​រដ្ឋាភិបាល​បរទេស​ក៏​ចាញ់​បោក​ក្រុម​នេះ​ជាច្រើន​គ្រា​មក​ហើយ​ដែរ។

មេដឹកនាំ​បក្ស​កាន់​អំណាច​លោក ហ៊ុន សែន បាន​បញ្ចេញ​វីដេអូ​អតីត​សមាជិក​គណបក្ស​សង្គ្រោះ​ជាតិ​ម្នាក់ គឺ​អ្នកស្រី ញ៉ែម សាវ៉ាត ដែល​ក្នុង​វីដេអូ​នោះ អ្នកស្រី​រៀបរាប់​ថា អ្នកស្រី​បាន​ចេញ​មក​រស់នៅ​ប្រទេស​បារាំង​នេះ​ដោយសារតែ​ចាញ់​ឃោសនា​របស់​ក្រុម​ប្រឆាំង​ប៉ុណ្ណោះ។

ដើម្បី​ឱ្យ​កាន់តែ​ច្បាស់ អ្នកស្រី​បាន​បង្ហាញ​លិខិត​ពីរ​ច្បាប់ គឺ​ទី​១ លិខិត​របស់​គណបក្ស​ភ្លើង​ទៀន​ដែល​ចុះហត្ថលេខា​ដោយ​លោក ទាវ វណ្ណុល កាលពី​ថ្ងៃទី​១៨ ខែ​វិច្ឆិកា ឆ្នាំ​២០២២ ដោយ​បញ្ជាក់​ថា អ្នកស្រី ញ៉ែម សាវ៉ាត បាន​ទទួល​រង​នូវ​ការ​គំរាមកំហែង​ផ្នែក​នយោបាយ​បន្ទាប់ពី​អ្នកស្រី​បាន​ចូលរួម​បាតុកម្ម​ជាមួយ​គណបក្ស​សង្គ្រោះ​ជាតិ​កាលពី​ពេល​កន្លងទៅ។ ចំណែក​លិខិត​ទី​២ អតីត​មេដឹកនាំ​បក្ស​ប្រឆាំង​លោក សម រង្ស៊ី បាន​ចុះហត្ថលេខា​នៅ​ថ្ងៃទី​២៥ ខែ​វិច្ឆិកា ឆ្នាំ​២០២២ ដោយ​បញ្ជាក់​ថា អ្នកស្រី ញ៉ែម សាវ៉ាត គឺជា​សមាជិក​គណបក្ស​សង្គ្រោះ​ជាតិ​តាំងពី​ឆ្នាំ​២០១៣ មក ដែល​ជា​សកម្មជន​ក្នុង​ជួរ​គណបក្ស​សង្គ្រោះ​ជាតិ​ក្នុង​រាជធានី​ភ្នំពេញ។

លិខិត​ដដែល​បញ្ជាក់​ថា ប្រសិនបើ​គាត់​ត្រឡប់​ទៅ​ប្រទេស​កម្ពុជា​វិញ គាត់​ប្រាកដជា​ត្រូវ​រង​នូវ​វិធានការ​គាបសង្កត់ ដែល​សូម្បីតែ​ជីវិត​របស់​គាត់​ក៏​ស្ថិត​ក្នុង​គ្រោះថ្នាក់​ដែរ។

អ្នកស្រី ញ៉ែម សាវ៉ាត បាន​រៀបរាប់​ក្នុង​វីដេអូ​នោះ​ថា ពេល​មក​ដល់​ទឹកដី​បារាំង និង​រស់នៅ​ទីនេះ ទើប​អ្នកស្រី​ដឹង​ថា​វេទនា​ប៉ុនណា ព្រោះ​អ្នកស្រី​ត្រូវ​រស់នៅ​ក្រោម​សម្ពាធ​គ្រប់​បែប​យ៉ាង​ពី​មន្ត្រី​បក្ស​ប្រឆាំង សូម្បីតែ​ឯកសារ​ផ្សេង​របស់​អ្នកស្រី ដូចជា​លិខិត​ឆ្លងដែន ជាដើម ក៏​ត្រូវ​ថ្នាក់លើ​របស់​ខ្លួន​ដកហូត​ទុក​ដែរ។ ជាង​នេះ​ទៀត អ្នកស្រី​ត្រូវ​ចំណាយ​លុយ​អស់​រាប់​ពាន់​ដុល្លារ​អាមេរិក​ថែម​ទៀត​នៅ​ពេល​ដែល​អ្នក​ទាំងនោះ​ត្រូវ​រត់ការ​លិខិត​ស្នាម​ម្តងៗ ដើម្បី​ឱ្យ​អ្នកស្រី​មាន​សិទ្ធិ​ជ្រកកោន​នៅ​ប្រទេស​បារាំង​នេះ។

អតីត​សមាជិក​គណបក្ស​សង្គ្រោះ​ជាតិ​រូប​នេះ​បញ្ជាក់​ថា អ្នកស្រី​បាន​សម្រេច​ចិត្ត​ថា អ្នកស្រី​នឹង​មិន​រស់នៅ​ប្រទេស​បារាំង​បន្ត​ទៀត​ទេ ហើយ​នឹង​វិលត្រឡប់​ទៅ​រស់នៅ​ស្រុក​ខ្មែរ​វិញ​ក្នុង​ពេល​ដ៏​ឆាប់​ខាងមុខ​នេះ ព្រោះ​ថា​កូនៗ និង​បងប្អូន​របស់​អ្នកស្រី​ដែល​រស់នៅ​ស្រុក​ខ្មែរ​សព្វថ្ងៃ​នេះ មិន​មាន​អ្វី​កើតឡើង​ដូច​ដែល​ក្រុម​ប្រឆាំង​បាន​ប្រាប់​អ្នកស្រី​មុន​ពេល​ដែល​អ្នកស្រី​ចាកចេញ​មក​នៅ​ប្រទេស​បារាំង​នោះ​ឡើយ។

ក្នុង​រយៈពេល​ចុងក្រោយ​នេះ មន្ត្រី​បក្ស​ប្រឆាំង​ទាំង​អ្នក​ដែល​នៅ​ក្រៅ​ស្រុក និង​អ្នក​នៅ​ក្នុង​ស្រុក រួម​ទាំង​មន្ត្រី​គណបក្ស​ភ្លើង​ទៀន ដែល​គេ​សង្ស័យ​ថា​មាន​ក្រុម​មន្ត្រី​បក្ស​ប្រឆាំង​ភាគី​លោក សម រង្ស៊ី នៅ​ពីក្រោយ​ផង​នោះ បាន​នាំគ្នា​ចុះចូល​ជាមួយ​បក្ស​កាន់​អំណាច​របស់​លោក ហ៊ុន សែន ជា​បន្តបន្ទាប់ ដែល​អ្នក​ខ្លះ​ត្រូវ​អាជ្ញាធរ​ចាប់​ដាក់​គុក​ជាច្រើន​ខែ និង​អ្នក​ខ្លះ​នាំគ្នា​ចុះចូល​ព្រោះតែ​ដើម្បី​បុណ្យ​ស័ក្តិ ខណៈ​អ្នក​ខ្លះ​ទៀត​ព្រោះតែ​ទទួល​រង​នូវ​ការ​គំរាមកំហែង ជាដើម។

ទាក់ទិន​នឹង​បញ្ហា​នេះ សារព័ត៌មាន The Cambodia Daily នៅ​មិនទាន់​អាច​ទាក់ទង​លោក ទាវ វណ្ណុល ប្រធាន​គណបក្ស​ភ្លើង​ទៀន ដើម្បី​សុំ​ការ​បំភ្លឺ​ជុំវិញ​ការ​ចេញ​លិខិត​ស្នាម​លើ​ករណី​នេះ​បាន​នៅឡើយ​ទេ​រហូត​ដល់​ម៉ោង​ផ្សាយ​នេះ៕

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស