29 C
Phnom Penh

ក្រុម​តស៊ូ​មតិ៖ លោក ហ៊ុន សែន គំរាម​លោក ស ឡុងដេត ដើម្បី​ទប់ស្កាត់​ការ​តវ៉ា​មុន​ការ​បោះឆ្នោត

ដោយ ឌឹ ខេមបូឌា ដេលី

បទវិភាគ

ក្រុម​អ្នក​តស៊ូ​មតិ​នៅ​ក្រៅ​ស្រុក លើកឡើង​ថា ការ​គំរាមកំហែង​របស់​លោក ហ៊ុន សែន លើ​មន្ត្រី​ជាន់ខ្ពស់​គណបក្ស​ភ្លើង​ទៀន លោក ស ឡុងដេត គឺ​ដើម្បី​ទប់ស្កាត់​ការ​ងើប​ឡើង​តវ៉ា​ពី​គណបក្ស​ភ្លើង​ទៀន​នៅ​មុន​ការ​បោះឆ្នោត។

អនុប្រធាន​វេទិកា​ពលរដ្ឋ លោក ម៉ែន ណាត ប្រាប់​សារព័ត៌មាន The Cambodia Daily នៅ​ថ្ងៃទី​១២ មិថុនា នេះ​ថា ការ​គំរាម​របស់​លោក ហ៊ុន សែន ដែល​បាន​ប្រព្រឹត្ត​លើ​គណបក្ស​ភ្លើង​ទៀន​ក្នុង​រយៈពេល​ចុងក្រោយ​នេះ គឺជា​ទង្វើ​ទុច្ចរិត​ហួសហេតុ​មិន​អាច​ទទួល​យក​បាន ដែល​សូម្បីតែ​ពួកគេ​បើក​កិច្ចប្រជុំ​សមាជិក​ផ្ទៃក្នុង ក៏​លោក ហ៊ុន សែន ដាក់​បណ្ដាញ​ស៊ើប​ការណ៍​តាមដាន និង​យក​ខ្លឹមសារ​នៃ​កិច្ចប្រជុំ​ផ្ទៃក្នុង​នោះ​មក​គំរាមកំហែង​ដែរ ដែល​ទង្វើ​បែប​នេះ​បង្ហាញ​យ៉ាង​ច្បាស់​អំពី​ការ​ប្រើ​អំណាច​របស់​គាត់​ដើម្បី​គាបសង្កត់​គណបក្ស​ក្រៅ​រដ្ឋាភិបាល។

លោក ម៉ែន ណាត លើកឡើង​ថា មេដឹកនាំ​បក្ស​កាន់​អំណាច​នឹង​ប្រើ​ល្បិច​នយោបាយ​ទុច្ចរិត​គាបសង្កត់​គណបក្ស​ភ្លើង​ទៀន​មិន​ឱ្យ​ធ្វើ​សកម្មភាព​នយោបាយ​អ្វី​ទាំងអស់​រហូត​ដល់​ការ​បោះឆ្នោត​ជ្រើសរើស​ក្រុមប្រឹក្សា​រាជធានី-ខេត្ត​ត្រូវ​បាន​បញ្ចប់ ព្រោះ​ថា​លោក ហ៊ុន សែន កំពុង​រៀបចំ​ឱ្យ​មាន​សុវត្ថិភាព​នយោបាយ​ជាទីបំផុត​ក្នុង​ផែនការ​ផ្ទេរ​អំណាច​ទៅ​ឱ្យ​កូនប្រុស​របស់​គាត់​នៅ​ពេល​ខាងមុខ​នេះ។

បញ្ញវន្ត​ខ្មែរ​ក្រៅ​ស្រុក​រូប​នេះ​អំពាវនាវ​ឱ្យ​ក្រុម​អ្នក​ប្រជាធិបតេយ្យ​ងើប​ឡើង​សហការ​គ្នា​តស៊ូ​ទប់ទល់​នឹង​អំណាច​របស់​លោក ហ៊ុន សែន ដែល​កំពុងតែ​បំផ្លាញ​ប្រជាធិបតេយ្យ​នៅ​កម្ពុជា​សព្វថ្ងៃ​នេះ ព្រោះ​ថា​បើ​បណ្តែតបណ្តោយ​ឱ្យ​លោក ហ៊ុន សែន កម្ទេច​ក្រុម​ប្រឆាំង​ម្តង​មួយៗ​បែប​នេះ អំណាច​សន្តតិវង្ស​របស់​គាត់​នឹង​ចាក់​ឫស​កាន់តែ​ជ្រៅ​ជាមិនខាន ហើយ​ដល់​ពេល​នោះ សិទ្ធិមនុស្ស និង​សេរីភាព​នានា​ប្រាកដជា​ត្រូវ​បំផ្លាញ​ទាំងស្រុង​ជាមិនខាន។

កាលពី​ថ្ងៃទី​១០ ខែ​មិថុនា ឆ្នាំ​២០២៣ មេដឹកនាំ​បក្ស​កាន់​អំណាច​លោក ហ៊ុន សែន បាន​ព្រមាន​មន្ត្រី​ជាន់ខ្ពស់​គណបក្ស​ភ្លើង​ទៀន​លោក ស ឡុងដេត ថា​ការ​ជំរុញ​ឲ្យ​ឱ្យ​បង្កើត​ឃុំ​មួយ​ជា​របស់​បក្ស​ប្រជាជន​កម្ពុជា និង​ឃុំ​មួយ​ទៀត​ជា​របស់​ភ្លើង​ទៀន​ពី​មន្ត្រី​ជាន់ខ្ពស់​គណបក្ស​ភ្លើង​ទៀន​រូប​នេះ គឺជា​អំពើ​ញុះញង់​ដែល​ត្រូវតែ​ទប់ស្កាត់ ក្នុង​នោះ លោក ហ៊ុន សែន បាន​អំពាវនាវ​កុំ​ឲ្យ​សមាជិក​ក្រុមប្រឹក្សា​ឃុំ-សង្កាត់​របស់​បក្ស​ភ្លើង​ទៀន​ជឿ​លើ​ការ​ញុះញង់​របស់​លោក ស ឡុងដេត ឱ្យ​សោះ។

ការ​ព្រមាន​នេះ ធ្វើឡើង​បន្ទាប់ពី​លោក ស ឡុងដេត កាលពី​ថ្ងៃទី​៩ ខែ​មិថុនា ឆ្នាំ​២០២៣ បាន​ដឹកនាំ​កិច្ចប្រជុំ​មួយ​ជាមួយ​ក្រុមប្រឹក្សា​ឃុំ-សង្កាត់​ជាប់​ឆ្នោត​ឆ្នាំ​២០២២ របស់​គណបក្ស​ភ្លើង​ទៀន ឲ្យ​រក្សា​ជំហរ​របស់​ខ្លួន​ឲ្យ​បាន​រឹងមាំ ព្រោះ​ថា​ទោះបី​គណបក្ស​ភ្លើង​ទៀន​ត្រូវ​បាន​ហាមប្រាម​មិន​ឲ្យ​ចូលរួម​បោះឆ្នោត​ជាតិ​នៅ​ខែ​កក្កដា ខាងមុខ​នេះ​ក៏ដោយ ក៏​គណបក្ស​ភ្លើង​ទៀន​នៅ​មាន​ឱកាស​ដណ្តើម​យក​ក្រុមប្រឹក្សា​រាជធានី-ខេត្ត​ក្នុង​ការ​បោះឆ្នោត​ជ្រើសរើស​ក្រុមប្រឹក្សា​រាជធានី​ខេត្ត​ក្រុង ដែល​នឹង​ធ្វើឡើង​នៅ​ឆ្នាំ​២០២៤ ក្រោយ​ការ​បោះឆ្នោត​ជាតិ​ឆ្នាំ​២០២៣ ខាងមុខ​នេះ​ដែរ។

ក្នុង​កិច្ចប្រជុំ​នោះ លោក ស ឡុងដេត លើកឡើង​ថា មូលហេតុ​ដែល​គណៈកម្មាធិការ​ជាតិ​រៀបចំ​ការ​បោះឆ្នោត (គ.ជ.ប) រារាំង​មិន​ឱ្យ​គណបក្ស​ភ្លើង​ទៀន​ចូលរួម​ការ​បោះឆ្នោត​នៅ​ខែ​កក្កដា ខាងមុខ​នេះ គឺ​ដោយសារ​គណបក្ស​ប្រជាជន​កម្ពុជា​បាន​ធ្វើ​ការ​ស្ទង់មតិ​ដឹង​ថា គណបក្ស​ភ្លើង​ទៀន​នឹង​ទទួល​បាន​អាសនៈ​ក្នុង​រដ្ឋសភា​រហូត​ដល់​ទៅ​ជាង ៦០​អាសនៈ​ឯណោះ ដែល​ជា​ហេតុ​ធ្វើ​ឱ្យ​បក្ស​កាន់​អំណាច​របស់​លោក ហ៊ុន សែន ត្រូវតែ​បិទ​ផ្លូវ​គណបក្ស​ភ្លើង​ទៀន​បែប​នេះ។

យ៉ាងណា​ក៏ដោយ មេដឹកនាំ​បក្ស​កាន់​អំណាច​លោក ហ៊ុន សែន ធ្លាប់​បាន​លើកឡើង​កាលពី​ពេល​ថ្មីៗ​នេះ​ថា ការ​ដែល​គណបក្ស​ភ្លើង​ទៀន​មិន​អាច​ចូលរួម​ការ​បោះឆ្នោត​បាន គឺជា​ចេតនា​របស់​ក្រុម​ប្រឆាំង​លាក់​ទុក​ឯកសារ ដើម្បី​រុញ​ឲ្យ​សហគមន៍​អន្តរជាតិ​ដាក់​សម្ពាធ​លើ​រដ្ឋាភិបាល​របស់​លោក​ប៉ុណ្ណោះ៕

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស