31 C
Phnom Penh

លោក ហ៊ុន សែន ទទួល​យក​លោក គង់ រ៉ៃយ៉ា ជា​សមាជិក​​បក្ស​ប្រជាជន​កម្ពុជា

ដោយ ឌឹ ខេមបូឌា ដេលី

បទវិភាគ

មេដឹកនាំ​បក្ស​កាន់​អំណាច​លោក ហ៊ុន សែន ប្រកាស​ទទួល​យក​អតីត​ជំទប់​ឃុំ​ជាប់​ឆ្នោត​ខេត្ត​កំពង់ចាម និង​ជា​បេក្ខជន​តំណាងរាស្ត្រ​មណ្ឌល​ភ្នំពេញ​របស់​គណបក្ស​ភ្លើង​ទៀន លោក គង់ រ៉ៃយ៉ា ជា​សមាជិក​គណបក្ស​ប្រជាជន​កម្ពុជា បន្ទាប់ពី​សមាជិក​គណៈកម្មាធិការ​នាយក​នៃ​គណបក្ស​ភ្លើង​ទៀន​រូប​នេះ​ប្រកាស​ចុះចូល​ជាមួយ​បក្ស​កាន់​អំណាច​នៅ​ថ្ងៃ​នេះ។

លោក ហ៊ុន សែន បាន​សរសេរ​លើ​បណ្ដាញ​ទំនាក់ទំនង​តេឡេក្រាម​របស់​ខ្លួន​នៅ​ថ្ងៃទី​១៦ មិថុនា នេះ​ថា ក្នុង​នាម​គណបក្ស​ប្រជាជន​កម្ពុជា លោក​សូម​ស្វាគមន៍​យ៉ាង​កក់ក្តៅ​ចំពោះ​សមាជិក​គណៈកម្មាធិការ​នាយក​គណបក្ស​ភ្លើង​ទៀន លោក គង់ រ៉ៃយ៉ា ដើម្បី​ចូលរួម​ជីវភាព​នយោបាយ​ជាមួយ​គណបក្ស​ប្រជាជន​កម្ពុជា។

នៅ​ថ្ងៃទី​១៦ ខែ​មិថុនា ឆ្នាំ​២០២៣ នេះ អតីត​ជំទប់​ទី​២ ឃុំ​ស្ដៅ ស្រុក​កងមាស ខេត្ត​កំពង់ចាម របស់​គណបក្ស​ភ្លើង​ទៀន លោក គង់ រ៉ៃយ៉ា បាន​ធ្វើ​លិខិត និង​ចេញ​ជា​វីដេអូ​សុំ​ចូលរួម​ជីវភាព​នយោបាយ​ជាមួយ​គណបក្ស​ប្រជាជន​កម្ពុជា ក្រោម​ហេតុផល​ថា លោក​បាន​មើល​ឃើញ​ពី​កម្សោយ​នៃ​ការ​ដឹកនាំ និង​ភាព​ព្រងើយ​កន្តើយ​របស់​មន្ត្រី​បក្ស​ភ្លើង​ទៀន ទើប​លោក​ត្រូវ​ចាកចេញ។

លោក​បន្ថែម​ថា ស្រប​ពេល​ជាមួយ​គ្នា​នេះ លោក​ក៏​បាន​មើល​ឃើញ​ពី​ការ​ដឹកនាំ​ដ៏​ត្រឹមត្រូវ​របស់​មេ​បក្ស​កាន់​អំណាច​លោក ហ៊ុន សែន ដែល​ធ្វើ​ឱ្យ​កម្ពុជា​ទទួល​បាន​នូវ​សុខ​សន្តិភាព និង​ពលរដ្ឋ​រស់នៅ​ដោយ​សុខសាន្ត​ដែរ ទើប​លោក​សម្រេច​ចិត្ត​ចុះចូល​ជាមួយ​បក្ស​កាន់​អំណាច​នៅ​ពេលនេះ​តែម្តង។

ក្នុង​ថ្ងៃ​ដដែល​នេះ លោក គង់ រ៉ៃយ៉ា ក៏​បាន​ដាក់​ពាក្យ​លាឈប់​ពី​សមាជិក​គណបក្ស​ភ្លើង​ទៀន ផង​ដែរ ដោយ​សុំ​លាឈប់​ពី​តួនាទី​ទាំងអស់​របស់​ខ្លួន​ដែល​មាន​នៅ​ក្នុង​គណបក្ស​នេះ ដោយ​លោក​ពុំ​បាន​បញ្ជាក់​ពី​មូលហេតុ​នៃ​ការ​លាឈប់​របស់​ខ្លួន​លើ​លិខិត​នេះ​ទេ។

លោក គង់ រ៉ៃយ៉ា គឺជា​អ្នក​ចូលរួម​យ៉ាង​សកម្ម​ជាមួយ​គណបក្ស​ប្រឆាំង​នា​ពេល​កន្លងមក ហើយ​លោក​ក៏​ធ្លាប់​ត្រូវ​អាជ្ញាធរ​របស់​លោក ហ៊ុន សែន ចាប់​ខ្លួន​ដាក់​ពន្ធនាគារ​ផង​ដែរ។ ជាក់ស្តែង លោក​ត្រូវ​បាន​សមត្ថកិច្ច​ចាប់​ខ្លួន​លើកដំបូង​ក្នុង​ឆ្នាំ​២០១៥ ជុំវិញ​ការ​បង្ហោះ​សារ​តាម​បណ្ដាញ​សង្គម​ហ្វេសប៊ុក​អំពាវនាវ​ឱ្យ​មាន «បដិវត្តន៍​ពណ៌»។

ចំពោះ​ករណី​នោះ លោក គង់ រ៉ៃយ៉ា ត្រូវ​បាន​រក​ឃើញ​ថា​មាន​ទោស​នៅ​ឆ្នាំ​២០១៦ ហើយ​ត្រូវ​បាន​កាត់ទោស​ឱ្យ​ជាប់​ពន្ធនាគារ​រយៈពេល ១៨​ខែ​ពី​បទ​ញុះញង់។ ជាង​នេះ​ទៀត លោក​ក៏​ត្រូវ​បាន​តុលាការ​ក្រុង​ភ្នំពេញ​ផ្ដន្ទាទោស​ជា​លើក​ទី​២ នៅ​ខែ​មិថុនា ឆ្នាំ​២០២០ និង​បាន​កាត់ទោស​ឱ្យ​លោក​ជាប់​គុក​រយៈពេល ២​ឆ្នាំ​ផង​ដែរ ពី​បទ​ញុះញង់​ចំពោះ​ការ​លក់​អាវយឺត​ដែល​មាន​រូបភាព​នៃ​ការ​បាញ់​សម្លាប់​អ្នក​ស្រាវជ្រាវ​ការ​អភិវឌ្ឍ​សង្គម​បណ្ឌិត កែម ឡី។

ក្រោយពី​ចេញពី​ពន្ធនាគារ លោក គង់ រ៉ៃយ៉ា បាន​បន្ត​ចូលរួម​សកម្មភាព​នយោបាយ​ជាមួយ​គណបក្ស​ភ្លើង​ទៀន​បន្ត​ទៀត រហូត​បាន​ជាប់​ជា​ជំទប់​ទី​២ ឃុំ​ស្ដៅ ស្រុក​កងមាស ខេត្ត​កំពង់ចាម កាលពី​ខែ​មិថុនា ឆ្នាំ​២០២២ កន្លងទៅ ប៉ុន្តែ​ក្រោយ​បម្រើ​ការងារ​បាន​ជាង ៤​ខែ គឺ​នៅ​អំឡុង​ខែ​តុលា ឆ្នាំ​២០២២ ដដែល លោក​បាន​សម្រេច​ចិត្ដ​លាលែង​ពី​តំណែង ក្រោម​ហេតុផល​ថា ដោយសារតែ​កត្តា​ជីវភាព និង​សុវត្ថិភាព ព្រមទាំង​កត្តា​ការងារ​ដែល​មិន​ទទួល​បាន​កិច្ចសហការ​ពី​មេឃុំ ក៏ដូចជា​ក្រុមប្រឹក្សា​ឃុំ​របស់​បក្ស​ប្រជាជន​កម្ពុជា​នៅ​ក្នុង​ឃុំ​ស្ដៅ នោះ។

ជុំវិញ​បញ្ហា​នេះ អនុប្រធាន​គណបក្ស​ភ្លើង​ទៀន លោក ចេប គឹមអ៊ាង ធ្លាប់​បាន​ត្អូញត្អែរ​ថា មាន​ករណី​ជាច្រើន​បាន​កើត​លើ​មន្ត្រី​បក្ស​ភ្លើង​ទៀន ជាពិសេស​ការ​ធ្វើ​ទុក្ខបុកម្នេញ​នានា​ដែល​សុទ្ធសឹងតែ​ជា​បញ្ហា​ធ្វើ​ឱ្យ​មន្ត្រី​គណបក្ស​ភ្លើង​ទៀន​ពិបាក​ធ្វើការ។

យ៉ាងណា​ក៏ដោយ ក្នុង​រយៈពេល​ចុងក្រោយ​នេះ បន្ទាប់ពី​គណបក្ស​ភ្លើង​ទៀន​ត្រូវ​បាន គ.ជ.ប រារាំង​មិន​ឱ្យ​ចូលរួម​ឈរឈ្មោះ​បោះឆ្នោត​សម្រាប់​ការ​បោះឆ្នោត​ជាតិ​នៅ​ខែ​កក្កដា ខាង​មុខ​នេះ និង​មាន​ការ​គំរាម​ពី​លោក ហ៊ុន សែន ជា​បន្តបន្ទាប់​ផង​នេះ សកម្មជន និង​សមាជិក​គណបក្ស​ភ្លើង​ទៀន​បាន​នាំគ្នា​ចុះចូល​គណបក្ស​ប្រជាជន​កម្ពុជា​របស់​លោក ហ៊ុន សែន ជា​បន្តបន្ទាប់​នៅ​ពេលនេះ ក្នុង​នោះ​មន្ត្រី​ជាន់ខ្ពស់​របស់​បក្ស​នេះ​បាន​ចុះចូល​ជាមួយ​បក្ស​កាន់​អំណាច​អស់ ៣​នាក់​ហើយ ដូចជា​លោក កែត ឃី លោក ស ឡុងដេត និង​លោក គង់ រ៉ៃយ៉ា នេះ​តែម្តង៕

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស