 គ្មានប្រភពជាច្រើនគ្រឿង ដែលបានហោះចូលទឹកដីកម្ពុជាជាប់ព្រំដែនវៀតណាម នៅភូមិភាគឦសានក្នុងខេត្តរតនគិរី ក្នុងរយៈពេលប៉ុន្មានយប់ចុងក្រោយនេះ។){kind=link}
បុរសខ្លាំងកម្ពុជា លោក ហ៊ុន សែន បញ្ជាឱ្យមន្ត្រីជាន់ខ្ពស់នៃកងកម្លាំងប្រដាប់អាវុធសំខាន់ៗត្រៀមកាំភ្លើងសម្រាប់បាញ់យន្តហោះយ៉ាងតិចឱ្យបាន ១០០គ្រឿង ដើម្បីត្រៀមបាញ់ទម្លាក់យន្តហោះបញ្ជាដ្រូន (Drone) គ្មានប្រភពជាច្រើនគ្រឿង ដែលបានហោះចូលទឹកដីកម្ពុជាជាប់ព្រំដែនវៀតណាម នៅភូមិភាគឦសានក្នុងខេត្តរតនគិរី ក្នុងរយៈពេលប៉ុន្មានយប់ចុងក្រោយនេះ។
លោក ហ៊ុន សែន បានបញ្ចេញសារសំឡេងតាមប្រព័ន្ធទំនាក់ទំនងតេឡេក្រាមនៅថ្ងៃទី២៧ មិថុនា នេះ ដោយបញ្ជាឱ្យរដ្ឋមន្ត្រីការពារជាតិលោក ទៀ បាញ់ អគ្គមេបញ្ជាការនៃកងយោធពលខេមរភូមិន្ទលោក វង្ស ពិសេន និងមេបញ្ជាការដ្ឋានកងអង្គរក្សលោក ហ៊ីង ប៊ុនហៀង បញ្ចេញអាវុធបាញ់យន្តហោះជាបន្ទាន់ និងឱ្យបានច្រើនជាទីបំផុត ដើម្បីផ្គុំបាញ់ទម្លាក់យន្តហោះគ្មានមនុស្សបើក ឬដ្រូន (Drone) ដែលបានហោះចូលទឹកដីកម្ពុជាដោយគ្មានប្រភពកាលពីពេលថ្មីៗនេះ។
មេដឹកនាំខ្មែរ លោក ហ៊ុន សែន ចាត់ទុកដ្រូន (Drone) ដែលបានហោះចូលទឹកដីកម្ពុជាទាំងនោះថាជាឧបករណ៍ស៊ើបការណ៍របស់បច្ចាមិត្តដែលបំពានលើដែនអធិបតេយ្យរបស់កម្ពុជា បន្ទាប់ពីរដ្ឋាភិបាលវៀតណាមបានបដិសេធពីវត្តមានរបស់ដ្រូន (Drone) ទាំងនោះ ក្រោយការសាកសួរពីភាគីខាងកម្ពុជារួចមក។
មេដឹកនាំរដ្ឋាភិបាលក្រុងភ្នំពេញ លោក ហ៊ុន សែន សង្កត់ធ្ងន់ថា ត្រូវតែបាញ់ទម្លាក់ដ្រូន (Drone)នេះឱ្យខាងតែបាន ដើម្បីឱ្យដឹងថាយន្តហោះគ្មានមនុស្សបើកទាំងនោះជារបស់អ្នកណា។
លោក ហ៊ុន សែន គូសបញ្ជាក់ថា អាវុធដែលត្រូវបញ្ចេញនៅពេលនេះ គឺជាអាវុធទំនើបរបស់កម្ពុជាដែលមានសមត្ថភាពអាចបាញ់ទម្លាក់យន្តហោះបាន ដូច្នេះកងកម្លាំងប្រដាប់អាវុធទាំងនោះត្រូវបាញ់ទម្លាក់ដ្រូនទាំងនោះឱ្យបាន ប្រសិនបើយន្តហោះគ្មានមនុស្សបើកទាំងនោះហោះមកចូលទឹកដីកម្ពុជាម្តងទៀត។
ក្រោយបញ្ជារបស់លោក ហ៊ុន សែន នៅរសៀលថ្ងៃទី២៧ ខែមិថុនា ឆ្នាំ២០២៣ នេះ លោក ហ៊ីង ប៊ុនហៀង អគ្គមេបញ្ជាការរង និងជាមេបញ្ជាការបញ្ជាការដ្ឋានអង្គរក្ស បានបញ្ចេញកម្លាំងទ័ពចំនួន ៥០០នាក់ រួមជាមួយអាវុធ ២០០ដើមទៅកាន់តំបន់ព្រំដែនក្នុងខេត្តរតនគិរី ជាប់ព្រំដែនវៀតណាម ភ្លាមៗ ដើម្បីបាញ់កម្ទេចយន្តហោះគ្មានមនុស្សបើកដែលហោះចូលមកទឹកដីនៃប្រទេសកម្ពុជានោះ។
កាលពី ២សប្តាហ៍កន្លងទៅមានក្រុមបះបោរដែលលោកសំដៅទៅលើជនជាតិភាគតិចម៉ុងតាញ៉ាវៀតណាម បានបើកការវាយលុកទៅលើសាលាឃុំចំនួនពីររបស់វៀតណាម ស្ថិតនៅជាប់គ្នានឹងខេត្តរតនគិរី ក្នុងពេលតែមួយ ដែលបណ្តាលឲ្យមេឃុំ លេខាបក្សឃុំ ប៉ូលិស និងពលរដ្ឋមួយចំនួនត្រូវបានសម្លាប់។
ទាក់ទិនទៅនឹងបញ្ហានេះ បុរសខ្លាំងក្រាញអំណាច លោក ហ៊ុន សែន ក៏បានចេញបទបញ្ជាយ៉ាងម៉ឺងម៉ាត់ផងដែរទៅកាន់កម្លាំងប្រដាប់អាវុធកម្ពុជា ជាពិសេសនៅតាមព្រំដែនកម្ពុជា-វៀតណាម ក្នុងទឹកដីខេត្តរតនគិរី និងខេត្តមណ្ឌលគិរី ដែលត្រូវបង្កើនការប្រុងប្រយ័ត្នខ្ពស់ត្រៀមទប់ស្កាត់ក្រុមបះបោរជនជាតិភាគតិចនៃប្រទេសវៀតណាម ដែលមានបំណងរត់ចូលក្នុងទឹកដីកម្ពុជា។
សារព័ត៌មាន The Cambodia Daily នៅមិនទាន់អាចទាក់ទងរដ្ឋមន្ត្រីការពារជាតិកម្ពុជា លោក ទៀ បាញ់ ដើម្បីសុំការបំភ្លឺជុំវិញករណីនេះបាននៅឡើយទេ រហូតដល់ម៉ោងផ្សាយនេះ ហើយក៏មិនទាន់មានហេតុការណ៍ណាមួយផ្ទុះឡើងជុំវិញករណីនេះនៅឡើយដែរ៕