កាលពីថ្ងៃអាទិត្យ ទី២៥ មិថុនា នាវាដឹកយន្តហោះចម្បាំងអាមេរិក USS Ronald Reagan ដែលមានកងទ័ពជាង ៥ពាន់នាក់ និងអមដំណើរដោយនាវាពីរគ្រឿងទៀតឈ្មោះ USS Antietam និង USS Robert Smalls បានទៅដល់កំពង់ផែក្រុងដាណាង ប្រទេសវៀតណាម។
វត្តមានរបស់កងនាវាសហរដ្ឋអាមេរិក ដើម្បីចូលរួមអបអរសាទរទំនាក់ទំនងរវាងវៀតណាម និងអាមេរិក ដែលអតីតគូសត្រូវនឹងគ្នាប្រារព្ធខួប ១០ឆ្នាំនៃដៃគូយុទ្ធសាស្ត្រទ្វេភាគី។
បន្ថែមលើសពីនេះ គឺជាការរឹតចំណងទាក់ទងរវាងប្រទេសទាំងពីរឱ្យកាន់តែស៊ីជម្រៅសំដៅប្រឈមនឹងកំណើនឥទ្ធិពលរបស់ចិន នៅក្នុងសមុទ្រចិនខាងត្បូង ដែលវៀតណាមទើបតែថ្កោលទោសចិនថ្មីៗនេះចំពោះក្រុងប៉េកាំង ដែលបញ្ជូននាវាខួងប្រេង និងនាវាល្បាតចូលក្នុងដែនទឹកតំបន់សេដ្ឋកិច្ចពិសេសរបស់វៀតណាម កាលពីថ្ងៃទី២៦ ខែឧសភា ឆ្នាំ២០២៣។
សេចក្ដីថ្កោលទោសរបស់វៀតណាម ក៏បានទាមទារឱ្យចិនគោរពអធិបតេយ្យភាពរបស់វៀតណាម ដោយអនុលោមតាមច្បាប់សមុទ្រអន្តរជាតិឆ្នាំ១៩៨២។
តែយ៉ាងណា មិនមែនជាលើកដំបូងទេដែលវៀតណាម ថ្កោលទោសចិនករណីបំពានដែនទឹកវៀតណាម គឺច្រើនសិបដងទៅហើយរហូតនាវាល្បាតប្រទេសទាំងពីរប៉ះទង្គិចគ្នាទៀតផង។
ទង្វើរបស់មហាយក្សចិនដូចនេះហើយមើលទៅដែលបានរុញឱ្យវៀតណាម កាន់តែខិតទៅរកសហរដ្ឋអាមេរិក រហូតប្រទេសទាំងពីរបានដោះដូរទស្សនកិច្ចមន្ត្រីកំពូលៗជាមួយគ្នាញឹកញាប់ទៀតផង។
ទាំងនៅក្នុងរដ្ឋការលោក ដូណាល់ ត្រាំ និងលោក ចូ បៃដិន សុទ្ធតែបញ្ជូនរដ្ឋមន្ត្រីការបរទេស និងរដ្ឋមន្ត្រីការពារជាតិទៅកាន់ក្រុងហាណូយ។ ក្នុងជំនួបរបស់ពួកគេ បានឈានដល់កិច្ចព្រមព្រៀងជាច្រើន ក្នុងនោះមានទាំងវិស័យសន្តិសុខសមុទ្ររបស់វៀតណាមទៀតផង។
ចុងក្រោយនេះ វៀតណាមបើកផ្លូវឱ្យអាមេរិកបញ្ជូនក្រុមនាវាដឹកយន្តហោះចម្បាំង USS Ronald Reagan មកបណ្ដែតខ្លួនយ៉ាងសង្ហាលើដែនសមុទ្រវៀតណាម ស្ថិតក្នុងសមុទ្រចិនខាងត្បូងដែលចិនអះអាងថាក្រុងប៉េកាំងមានកម្មសិទ្ធិប្រមាណ ៩០ភាគរយនៃផ្ទៃសមុទ្រទាំងមូល ៣លាន ៥សែនគីឡូម៉ែត្រក្រឡា។
ការពិត ប្រទេសចំនួន ៥ យ៉ាងតិចក្នុងសមាគមអាស៊ាន មានដូចជាវៀតណាម ហ្វីលីពីន ឥណ្ឌូនេស៊ី ម៉ាឡេស៊ី និងប្រ៊ុយណេ សុទ្ធតែចិនចោទថាបានជ្រៀតចូលដែនទឹករបស់ខ្លួន។
តែជាការកត់សម្គាល់របស់អ្នកវិភាគចំពោះលោក ស៊ី ជីនពីង ដែលលើកឡើងនៅចំពោះនាយករដ្ឋមន្ត្រីវៀតណាម Pham Minh Chinh នៅទីក្រុងប៉េកាំង ដែលលោកប្រើពាក្យថា សហប្រតិបត្តិការឈ្នះៗ គួរតែបន្តពង្រឹងឱ្យកាន់តែរឹងមាំថែមទៀតរវាងប្រទេសទាំងពីរ។
វត្តមានរបស់នាយករដ្ឋមន្ត្រីវៀតណាមនៅទីក្រុងប៉េកាំង រយៈពេល ៤ថ្ងៃ ហើយបិទបញ្ចប់នៅថ្ងៃទី២៨ មិថុនា នេះ តាមការអញ្ជើញរបស់សមភាគីចិន Li Qiang។ ក្នុងជំនួបនោះ លោក ស៊ី មើលឃើញវៀតណាមជាប្រទេសជិតខាងដ៏មានអាទិភាពជាមួយចិន ទាំងសក្ដានុពលសេដ្ឋកិច្ច និងសន្តិសុខតំបន់សំដៅអភិវឌ្ឍរួមគ្នាក្នុងនាមប្រទេសជិតខាង។ លោក ស៊ី ក៏បានទទូចឱ្យមានការយោគយល់ និងអត់ធ្មត់ជាមួយគ្នាឱ្យខ្ពស់បំផុតជាមួយនឹងការអនុវត្តនយោបាយសហប្រតិបត្តិការឈ្នះៗរួមគ្នា។
យ៉ាងណា ស្របពេលដែលលោក ស៊ី កំពុងជួបលោក Pham Minh Chinh នៅទីក្រុងប៉េកាំង លោករដ្ឋមន្ត្រីការពារជាតិចិន លោក Li Shangfu ក៏បានជួបនឹងសមភាគីវៀតណាម Phan Van Giang ផងដែរ។
លោក Li Shangfu បាននិយាយថា ចិនមានឆន្ទៈធ្វើការជាមួយវៀតណាម ដើម្បីពង្រឹងការទំនាក់ទំនងកម្រិតខ្ពស់ និងកិច្ចសហប្រតិបត្តិការរវាងយោធាទាំងពីរ។ នេះបើតាមការចេញផ្សាយដោយទីភ្នាក់ងារព័ត៌មាន AFP នៅថ្ងៃអង្គារ ទី២៧ ខែមិថុនា នេះ។
ជំនួបរបស់អ្នកទាំងពីរ ក៏ធ្វើឡើងនៅឯទីក្រុងប៉េកាំង ផងដែរ។ លោករដ្ឋមន្ត្រីការពារជាតិចិន បានលើកឡើងថា ស្ថានការណ៍អន្តរជាតិកំពុងស្ថិតនៅក្នុងភាពច្របូកច្របល់ ហើយសន្តិសុខនៃតំបន់អាស៊ីប៉ាស៊ីហ្វិកកំពុងតែជួបបញ្ហាប្រឈម។
លោក Li បានប្រាប់លោក Phan Van Giang រដ្ឋមន្ត្រីការពារជាតិវៀតណាម ថា៖ ចិននិងវៀតណាមគួរតែបន្តធ្វើការងារឱ្យកាន់តែជិតស្និទ្ធ និងរួមសាមគ្គីក្នុងដំណើរឆ្ពោះទៅមុខថ្មីនៃរបបសង្គមនិយមដូចគ្នា ហើយរក្សាការពារផលប្រយោជន៍យុទ្ធសាស្ត្ររួមនៃប្រទេសទាំងពីរ ព្រមទាំងផ្តល់ការចូលរួមចំណែកវិជ្ជមានទៅក្នុងសុខសន្តិភាព និងស្ថិរភាពតំបន់។
បើតាមរដ្ឋមន្ត្រីការពារជាតិចិន ទំនាក់ទំនងរវាងយោធាទាំងពីរបានអភិវឌ្ឍទៅមុខយ៉ាងល្អប្រសើរ ហើយខាងយោធាចិន មានឆន្ទៈជំរុញទំនាក់ទំនងឱ្យដល់កម្រិតថ្មីមួយផ្សេងទៀត។
តែយ៉ាងណា វត្តមានរបស់នាវាដឹកយន្តហោះចម្បាំង USS Ronald Reagan នៅលើលំហសមុទ្រវៀតណាម ក៏ចំពេលភាពតានតឹងកាន់តែកើនឡើងរវាងចិន និងសហរដ្ឋអាមេរិក នៅតំបន់សមុទ្រចិនខាងត្បូង ហើយក៏ចំពេលវៀតណាមកំពុងស្រែកហៅរកមិត្តដែលមានឥទ្ធិពលលើចិន ឱ្យមកជួយការពារដែនទឹករបស់ខ្លួនផងដែរ។
លោក Nguyen The Phuong អ្នកឯកទេសខាងសន្តិសុខដែនសមុទ្រនៃសាកលវិទ្យាល័យអូស្ត្រាលី បានហៅវត្តមាននៃកងនាវាដឹកយន្តហោះចម្បាំងរបស់សហរដ្ឋអាមេរិក USS Ronald Reagan ជាសក្ខីកម្មមួយបង្ហាញថា វៀតណាមបន្តទប់ទល់នឹងឥទ្ធិពលរបស់ចិនដោយធ្វើឱ្យចំណងទាក់ទងទ្វេភាគីលើវិស័យសន្តិសុខតំបន់កាន់តែប្រសើរឡើងជាមួយសហរដ្ឋអាមេរិក ដែលជាមហាអំណាចក្រៅតំបន់៕