31 C
Phnom Penh

ព្រឹទ្ធសភា​អនុម័ត​ទាំងស្រុង​លើ​សេចក្ដី​ព្រាង​ច្បាប់​ស្ដីពី​ការ​ធ្វើ​វិសោធនកម្ម​ច្បាប់​បោះឆ្នោត​តាម​បញ្ជា​លោក ហ៊ុន សែន

ដោយ ឌឹ ខេមបូឌា ដេលី

បទវិភាគ

ព្រឹទ្ធសភា​របស់​គណបក្ស​ប្រជាជន​កម្ពុជា បាន​អនុម័ត​ទាំងស្រុង​លើ​សេចក្ដី​ព្រាងច្បាប់​ស្ដីពី​ការ​ធ្វើ​វិសោធនកម្ម​ច្បាប់​បោះឆ្នោត បន្ទាប់ពី​បុរស​ខ្លាំង​ក្រាញ​អំណាច​ត​ពូជ​នៅ​កម្ពុជា​លោក ហ៊ុន សែន បាន​បញ្ជា​ឲ្យ​ពន្លឿន​ការ​អនុម័ត​វិសោធនកម្ម​ច្បាប់​បោះឆ្នោត​ដើម្បី​បិទ​ផ្លូវ​បក្ស​ប្រឆាំង។

ការ​សម្រេច​នេះ បន្ទាប់ពី​ព្រឹទ្ធសភា​បាន​បើក​កិច្ចប្រជុំ​បង្គ្រប់កិច្ច​រយៈពេល ២​ថ្ងៃ ដើម្បី​ពិនិត្យ​លើ​សេចក្ដី​ព្រាងច្បាប់​ស្ដីពី​ការ​ធ្វើ​វិសោធនកម្ម​ច្បាប់​បោះឆ្នោត។ កិច្ចប្រជុំ​នៅ​ព្រឹក​ថ្ងៃទី​២៩ ខែ​មិថុនា នេះ ដឹកនាំ​ដោយ​លោក សាយ ឈុំ ហើយ​មាន​សមាជិក​ចូលរួម​ចំនួន ៥៩​រូប។

បើ​តាម​សេចក្ដី​ប្រកាស​ព័ត៌មាន​ស្ដីពី​លទ្ធផល​កិច្ចប្រជុំ​លើក​ទី​១០ ព្រឹទ្ធសភា​នីតិកាល​ទី​៤ នា​ថ្ងៃទី​២៩ ខែ​មិថុនា ឲ្យ​ដឹង​ថា អង្គប្រជុំ​បាន​សម្រេច​ឯកភាព​ទាំងស្រុង​លើ​សេចក្តី​ព្រាងច្បាប់​ស្ដីពី​ការ​ធ្វើ​វិសោធនកម្ម​ច្បាប់​បោះឆ្នោត ហើយ​ចាត់ទុក​ការ​អនុម័ត​នេះ​ជា​ការ​ប្រញាប់​ដោយ​ចំនួន ៥៩​សំឡេង​នៃ​ចំនួន​សមាជិក​ព្រឹទ្ធសភា​ទាំងមូល។

ប្រភព​ដដែល​ថា ការ​អនុម័ត​នេះ​ក្រោយពី​សមាជិក​ព្រឹទ្ធសភា ០២​រូប​បាន​ផ្ដល់​យោបល់ ហើយ​រដ្ឋមន្ត្រី​ក្រសួង​យុត្តិធម៌ លោក កើត រិទ្ធ ឡើង​បំភ្លឺ​ក្នុង​អង្គប្រជុំ​ព្រឹទ្ធសភា។ ព្រឹទ្ធសភា​ឯក​បក្ស​បញ្ជាក់​ក្នុង​សេចក្ដី​ប្រកាស​ព័ត៌មាន​ថា សេចក្តី​ព្រាងច្បាប់​នេះ​តាក់តែង​ឡើង​មាន​គោលបំណង​ដើម្បី​លើក​ស្ទួយ​គុណតម្លៃ​នៃ​លទ្ធិប្រជាធិបតេយ្យ​សេរី​ពហុបក្ស​ដូច​បាន​ចារឹក​នៅ​ក្នុង​រដ្ឋធម្មនុញ្ញ​កម្ពុជា។

ព្រឹទ្ធសភា​ក៏​បាន​ការពារ​ទៀត​ថា ការ​អនុម័ត​នេះ​ក៏​ដើម្បី​ពង្រឹង និង​លើក​កម្ពស់​ដំណើរការ​ប្រជាធិបតេយ្យ​នៅ​កម្ពុជា ជាពិសេស​ដើម្បី​ឲ្យ​អនាគត​អ្នក​ដឹកនាំ​នយោបាយ​ដែល​មាន​បំណង​ចង់​ឈរឈ្មោះ​ឲ្យ​គេ​បោះឆ្នោត​តាម​បែប​ប្រជាធិបតេយ្យ​សេរី​ពហុបក្ស ទាំង​នៅ​ថ្នាក់​ជាតិ និង​ទាំង​នៅ​ថ្នាក់​ក្រោម​ជាតិ មាន​ការ​ទទួល​ខុសត្រូវ​ក្នុង​នាម​ជា​ពលរដ្ឋ​ល្អ​ចំពោះ​ជាតិ និង​ប្រជាជន ដោយ​ចាប់ផ្តើម​ពី​ការ​អនុវត្ត​ឲ្យ​បាន​ខ្ជាប់ខ្ជួន​នូវ​សិទ្ធិ​បោះឆ្នោត​ដែល​ជា​ករណីយកិច្ច​របស់​ពលរដ្ឋ​គ្រប់​រូប​ចំពោះ​ប្រទេស​ជាតិ​នៅ​ក្នុង​សង្គម​ប្រជាធិបតេយ្យ។

មួយ​វិញ​ទៀត សេចក្តី​ព្រាងច្បាប់​នេះ​រៀបចំ​ឡើង​ដើម្បី​បើក​ផ្លូវ​ឲ្យ​គណៈកម្មាធិការ​ជាតិ​រៀបចំ​ការ​បោះឆ្នោត​រៀបចំ ចាត់ចែង និង​គ្រប់គ្រង​ដំណើរការ​បោះឆ្នោត​ជ្រើសតាំង​តំណាងរាស្ត្រ ការ​បោះឆ្នោត​ជ្រើសរើស​ក្រុមប្រឹក្សា​ឃុំ-សង្កាត់ ការ​បោះឆ្នោត​ជ្រើសតាំង​សមាជិក​ព្រឹទ្ធសភា និង​ការ​បោះឆ្នោត​ជ្រើសរើស​ក្រុមប្រឹក្សា​រាជធានី ក្រុមប្រឹក្សា​ខេត្ត ក្រុមប្រឹក្សា​ក្រុង ក្រុមប្រឹក្សា​ស្រុក ក្រុមប្រឹក្សា​ខណ្ឌ ក្រោម​ហេតុផល​ថា ដើម្បី​ពង្រឹង​ដំណើរការ​នៃ​ការ​អនុវត្ត​លទ្ធិប្រជាធិបតេយ្យ និង​ពង្រឹង​នីតិរដ្ឋ​ឲ្យ​កាន់​តែ​មាន​ប្រសិទ្ធភាព និង​និរន្តរភាព។

ការ​អនុម័ត​របស់​ព្រឹទ្ធសភា​លើ​សេចក្ដី​ព្រាងច្បាប់​ស្ដីពី​ការ​ធ្វើ​វិសោធនកម្ម​ច្បាប់​បោះឆ្នោត​ភ្លាមៗ​នេះ ធ្វើឡើង​ទៅ​តាម​បញ្ជា​របស់​លោក ហ៊ុន សែន។ បុរស​ខ្លាំង​កាន់​អំណាច​ជិត ៤០​ឆ្នាំ​នៅ​កម្ពុជា លោក ហ៊ុន សែន បញ្ជា​ឲ្យ​ស្ថាប័ន​ពាក់ព័ន្ធ​ធ្វើ​វិសោធនកម្ម​ច្បាប់​បោះឆ្នោត​នេះ ដើម្បី​បិទ​ផ្លូវ​ថ្នាក់​ដឹកនាំ និង​សកម្មជន​បក្ស​ប្រឆាំង។

ជុំវិញ​រឿង​នេះ បក្ស​ភ្លើង​ទៀន​ដែល​ត្រូវ​គណៈកម្មាធិការ​ជាតិ​រៀបចំ​ការ​បោះឆ្នោត​មិន​អនុញ្ញាត​ឲ្យ​ចូលរួម​ការ​បោះឆ្នោត​នៅ​ខែ​កក្កដា ខាងមុខ ក៏​បាន​ចេញ​សេចក្ដី​ថ្លែងការណ៍​មួយ​កាលពី​ថ្ងៃទី​២៧ ខែ​មិថុនា ដោយ​ស្នើសុំ​ទៅ​ព្រឹទ្ធសភា​ពិចារណា​លើ​ការ​អនុម័ត​សេចក្ដី​ព្រាងច្បាប់​ស្ដីពី​ការ​ធ្វើ​វិសោធនកម្ម​ច្បាប់​បោះឆ្នោត​នេះ។

ចំណែក​អង្គការ​ក្រៅ​រដ្ឋាភិបាល​ជាង ២០​ស្ថាប័ន ក៏​បាន​ស្នើ​ទៅ​ព្រឹទ្ធសភា និង​ក្រុមប្រឹក្សា​ធម្មនុញ្ញ​ឲ្យ​ពន្យារ​ពេល​ធ្វើ​វិសោធនកម្ម​ច្បាប់​បោះឆ្នោត​ដែល​រដ្ឋសភា​ឯក​បក្ស​បាន​អនុម័ត​កាលពី​ពេល​ថ្មីៗ​នេះ រហូត​ដល់​បោះឆ្នោត​ជាតិ​ឆ្នាំ​២០២៣ ចប់​រួចរាល់ ដើម្បី​ធានា​ថា​សេចក្តី​ព្រាងច្បាប់​នេះ​នឹង​មិន​ប៉ះពាល់​ដល់​ប្រជាធិបតេយ្យ សេរីភាព​នៃ​ការ​បញ្ចេញមតិ សិទ្ធិ​បោះឆ្នោត និង​សិទ្ធិ​ឈរឈ្មោះ​ឲ្យ​គេ​បោះឆ្នោត​ផង​ដែរ។

បើ​តាម​ខ្លឹមសារ​សំខាន់​បំផុត​នៃ​ច្បាប់​ដែល​ត្រូវ​ធ្វើ​វិសោធនកម្ម​នេះ បាន​កំណត់​ថា ពលរដ្ឋ​ខ្មែរ​ដែល​មាន​សិទ្ធិ​បោះឆ្នោត និង​មាន​បំណង​ឈរឈ្មោះ​បោះឆ្នោត​ជា​បេក្ខជន​តំណាងរាស្ត្រ ត្រូវតែ​អនុវត្ត​សិទ្ធិ​បោះឆ្នោត​ដោយ​បាន​បោះឆ្នោត​សម្រាប់​ការ​បោះឆ្នោត​ជា​សកល​ចំនួន​ពីរ​លើក​ចុងក្រោយ​ជាប់​គ្នា​ជាដាច់ខាត បើ​មិន​ដូច្នោះ​ទេ ពួកគេ​នឹង​បាត់បង់​សិទ្ធិ​ឈរឈ្មោះ​ឱ្យ​គេ​បោះឆ្នោត​ដោយ​ស្វ័យប្រវត្តិ។

ទាក់ទិន​នឹង​បញ្ហា​នេះ ឧត្តម​ស្នងការ​ទទួល​បន្ទុក​សិទ្ធិមនុស្ស​របស់​អង្គការ​សហប្រជាជាតិ លោក Volker Turk បាន​លើកឡើង​កាលពី​ថ្ងៃទី​១៦ ខែ​មិថុនា ឆ្នាំ​២០២៣ ថា លោក​មាន​ការ​ព្រួយបារម្ភ​យ៉ាង​ខ្លាំង​ចំពោះ​ការ​កាត់បន្ថយ​លំហ​សិទ្ធិ​ពលរដ្ឋ​មុន​ពេល​ការ​បោះឆ្នោត​ជាតិ​នៅ​កម្ពុជា​ក្នុង​ឆ្នាំ​២០២៣ នេះ។

ជាង​នេះ​ទៀត ការ​ព្រមាន​ធ្វើ​វិសោធនកម្ម​ច្បាប់​បោះឆ្នោត​នៅ​ពេលនេះ នឹង​ក្លាយ​ជា​ការ​រឹតត្បិត​លើ​សិទ្ធិ​សេរីភាព​នៃ​ការ​បញ្ចេញមតិ និង​ការ​រំលោភ​សិទ្ធិ​របស់​ពលរដ្ឋ​ទាំងអស់​ក្នុង​ការ​ឈរឈ្មោះ​បោះឆ្នោត ដែល​ធានា​ដោយ​រដ្ឋធម្មនុញ្ញ​នៃ​ប្រទេស​កម្ពុជា និង​ឧបករណ៍​សិទ្ធិមនុស្ស​អន្តរជាតិ​ដទៃ​ទៀត​យ៉ាង​ធ្ងន់ធ្ងរ។

មាត្រា​៣៤​ថ្មី​នៃ​រដ្ឋធម្មនុញ្ញ បាន​បញ្ញត្តិ​ថា ពលរដ្ឋ​ទាំង​ពីរ​ភេទ​មាន​សិទ្ធិ​បោះឆ្នោត និង​អាច​ឈរឈ្មោះ​ឱ្យ​គេ​បោះឆ្នោត ខណៈ​ខ្លឹមសារ​នៃ​សេចក្តី​ព្រាងច្បាប់​ស្ដីពី​វិសោធនកម្ម​ច្បាប់​បោះឆ្នោត​ដែល​ធ្វើឡើង​នៅ​ពេលនេះ មាន​ខ្លឹមសារ​បង្ខំ​ឱ្យ​ពលរដ្ឋ​ទៅ​បោះឆ្នោត ដែល​ផ្ទុយ​ពី​មាត្រា​នៃ​រដ្ឋធម្មនុញ្ញ​ដែល​ចែង​អំពី​សិទ្ធិ​បោះឆ្នោត​របស់​ពលរដ្ឋ​ទាំងស្រុង៕

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស