38 C
Phnom Penh

លោក ហ៊ុន សែន អំពាវនាវ​ទៅ​បក្ស​នយោបាយ​ជួយ​ពន្យល់​ពលរដ្ឋ​ពី​របៀប​គូស​សន្លឹកឆ្នោត​ឱ្យ​បាន​ត្រឹមត្រូវ

ដោយ ឌឹ ខេមបូឌា ដេលី

បទវិភាគ

បុរស​ខ្លាំង​កាន់​អំណាច​ជិត ៤០​ឆ្នាំ​នៅ​កម្ពុជា លោក ហ៊ុន សែន បាន​អំពាវនាវ​ទៅ​គណបក្ស​នយោបាយ​ដែល​ចូលរួម​ការ​បោះឆ្នោត ឲ្យ​ជួយ​ពន្យល់​ទៅ​ប្រជាពលរដ្ឋ​ពី​របៀប​គូស​សន្លឹកឆ្នោត​ឲ្យ​បាន​ត្រឹមត្រូវ ដើម្បី​ឲ្យ​ការ​បោះឆ្នោត​ខាងមុខ​នេះ​ប្រព្រឹត្ត​ទៅ​រលូន និង​ទទួល​ជោគជ័យ។

ការ​អំពាវនាវ​របស់​លោក ហ៊ុន សែន នេះ​ធ្វើឡើង​ស្រប​ពេល​ដែល​មេដឹកនាំ និង​សកម្មជន​បក្ស​ប្រឆាំង ព្រមទាំង​សកម្មជន​សង្គម​ដែល​កំពុង​និរទេស​ខ្លួន​នៅ​ក្រៅ​ប្រទេស បាន​បន្ត​អំពាវនាវ​ទៅ​ប្រជាពលរដ្ឋ​ខ្មែរ​ឲ្យ​គូស​ខ្វែង​សន្លឹកឆ្នោត​ចោល នៅ​ពេល​ពួកគាត់​ទៅ​បោះឆ្នោត​នៅ​ថ្ងៃទី​២៣ ខែ​កក្កដា ឆ្នាំ​២០២៣ ខាងមុខ​នេះ។

តាមរយៈ​សារ​សំឡេង​ជាង ៥​នាទី​កាលពី​យប់​ថ្ងៃទី​០៤ ខែ​កក្កដា ឆ្នាំ​២០២៣ លោក ហ៊ុន សែន បាន​បញ្ជា​ទៅ​ក្រសួង​ប្រៃសនីយ៍ និង​ទូរគមនាគមន៍ ឲ្យ​ធ្វើការ​ស្រាវជ្រាវ​អ្នក​ដែល​បង្រៀន​គូស​សន្លឹកឆ្នោត​តាម​អនឡាញ និង​ចាប់​ខ្លួន​អ្នក​ដែល​លោក​ចោទ​ថា​តាំងខ្លួន​ជា​អ្នកគាំទ្រ​គណបក្ស​ប្រជាជន​កម្ពុជា ហើយ​ទៅ​បង្រៀន​ប្រជាជន​ឲ្យ​គូស​សន្លឹកឆ្នោត​ខុស។

លោក ហ៊ុន សែន ដែល​ជា​មេដឹកនាំ​ហិង្សា បាន​ចាត់ទុក​ការ​ចាប់​ខ្លួន​អ្នក​ទាំងនោះ​ថា​ជា​ការ​ជួយ​ទៅ​ដល់​គណៈកម្មាធិការ​ជាតិ​រៀបចំ​ការ​បោះឆ្នោត ហើយ​ជួយ​ទៅ​ដល់​សមត្ថកិច្ច​ដែល​ទាក់ទង​ទៅ​ដល់​ការ​បោះឆ្នោត ឲ្យ​អនុវត្ត​បាន​ត្រឹមត្រូវ​នូវ​កិច្ចការ​ដែល​ពួកគេ​ត្រូវ​ធ្វើ។

ក្រៅពី​បញ្ជា​ទៅ​ក្រសួង​ប្រៃសនីយ៍ បុរស​ខ្លាំង​កាន់​អំណាច​ត​ពូជ​នៅ​កម្ពុជា ក៏​បាន​អំពាវនាវ​ទៅ​គណបក្ស​នយោបាយ​ដែល​ចូលរួម​ការ​បោះឆ្នោត ឲ្យ​ជួយ​ពន្យល់​ទៅ​ប្រជាពលរដ្ឋ​ពី​របៀប​គូស​សន្លឹកឆ្នោត​ឲ្យ​បាន​ត្រឹមត្រូវ ដើម្បី​ឲ្យ​ការ​បោះឆ្នោត​ខាងមុខ​នេះ​ប្រព្រឹត្ត​ទៅ​រលូន និង​ទទួល​ជោគជ័យ។

លោក ហ៊ុន សែន លើកឡើង​ថា លោក​សូម​អំពាវនាវ​ដល់​មន្ត្រី​គណបក្ស​ប្រជាជន​កម្ពុជា​គ្រប់​ថ្នាក់ ក៏ដូចជា​គណបក្ស​ដទៃ​ទៀត​ដែល​ចូលរួម​ធ្វើការ​បោះឆ្នោត​ដោយ​សុចរិត គឺ​មេត្តា​ណែនាំ​ប្រជាជន​ឱ្យ​គូស​សន្លឹកឆ្នោត​ឱ្យ​បាន​ត្រឹមត្រូវ ចៀសវាង​ការ​គូស​ដែល​ធ្វើ​ឱ្យ​ខូច​សន្លឹកឆ្នោត ហើយ​ជា​សន្លឹកឆ្នោត​មិន​បាន​ការ តាមរយៈ​ការ​ពន្យល់​ថា គេ​ស្រឡាញ់​គណបក្ស​នេះ ស្រឡាញ់​គណបក្ស​នោះ ត្រូវ​គូស​ពីរ ឬ​បី​ដង ហើយ​មាន​កន្លែង​ខ្លះ​បង្រៀន​ឱ្យ​សរសេរ​លេខ​ពី​ខាងលើ​ក្រដាស​នោះ​នៅ​លើ​សន្លឹកឆ្នោត​គំរូ​នេះ​តែម្ដង។

ការ​បញ្ជា​របស់​លោក ហ៊ុន សែន នា​ពេលនេះ បន្ទាប់ពី​លោក សម រង្ស៊ី និង​មន្ត្រី​សកម្មជន​គណបក្ស​ប្រឆាំង រួម​ទាំង​សកម្មជន​សង្គម បាន​បន្ត​អំពាវនាវ​ទៅ​ប្រជាពលរដ្ឋ និង​សកម្មជន​បក្ស​ភ្លើង​ទៀន​ឲ្យ​ទៅ​ចូលរួម​បោះឆ្នោត​នៅ​ថ្ងៃទី​២៣ ខែ​កក្កដា នេះ ដោយ​ការ​គូស​ខ្វែង​សន្លឹកឆ្នោត​ចោល។

អ្នក​ឃ្លាំមើល​បញ្ហា​សង្គម និង​មេដឹកនាំ​បក្ស​ប្រឆាំង អះអាង​ថា ការ​គូស​ខ្វែង​សន្លឹកឆ្នោត​ចោល​ដើម្បី​ប្រឆាំង​នឹង​អំពើ​អយុត្តិធម៌​នៅ​ក្នុង​សង្គម​កម្ពុជា និង​ជា​ការ​បង្ហាញ​ឲ្យ​សហគមន៍​អន្តរជាតិ​បាន​ឃើញ​ចំពោះ​ការ​មិន​ពេញ​ចិត្ត​របប​ដឹកនាំ​បច្ចុប្បន្ន ខណៈ​ការ​បោះឆ្នោត​ថ្ងៃទី​២៣ ខែ​កក្កដា នេះ លោក ហ៊ុន សែន បាន​បិទ​ខ្ទប់​មិន​ឲ្យ​គណបក្ស​ភ្លើង​ទៀន​ចូលរួម​ប្រកួតប្រជែង​ផង​ដែរ។

កម្ពុជា​នឹង​រៀបចំ​ការ​បោះឆ្នោត​ជ្រើសតាំង​តំណាងរាស្ត្រ​នីតិកាល​ទី​៧ នៅ​ថ្ងៃទី​២៣ ខែ​កក្កដា ឆ្នាំ​២០២៣ នេះ ដោយ​មាន​គណបក្ស​នយោបាយ​ចូលរួម​ចំនួន ១៨​គណបក្ស ប៉ុន្តែ​គណបក្ស​ទាំង ១៨ នេះ មិន​មាន​វត្តមាន​គណបក្ស​ភ្លើង​ទៀន​ចូលរួម​ឡើយ ខណៈ​បណ្ដា​ប្រទេស​លោក​សេរី ក្នុង​នោះ​មាន​ប្រទេស​អូស្ត្រាលី អាមេរិក បារាំង និង​ជប៉ុន ជាដើម មិន​បាន​ដាក់​អ្នក​សង្កេតការណ៍​បោះឆ្នោត​ឡើយ៕

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស