34 C
Phnom Penh

លោក ហ៊ុន ម៉ាណែត៖ អ្វី​ដែល​បក្ស​ប្រជាជន​ចង់​បាន​គឺ​កាត់បន្ថយ​ចរន្ត​ប្រឆាំង​បង្វែរ​ទៅ​ជា​ចរន្ត​គាំទ្រ​ខ្លួន​វិញ

ដោយ ឌឹ ខេមបូឌា ដេលី

បទវិភាគ

បេក្ខជន​នាយករដ្ឋមន្ត្រី​ដែល​ត្រៀម​ឡើង​កាន់​អំណាច​តាម​ជើងខោ​ឪពុក លោក ហ៊ុន ម៉ាណែត លើកឡើង​ថា បើ​គណបក្ស​ប្រជាជន​កម្ពុជា​អាច​កាត់បន្ថយ​ចរន្ត​ប្រឆាំង​នឹង​ខ្លួន​បាន​ដោយ​បង្វែរ​ទៅ​ជា​ចរន្ត​គាំទ្រ​វិញ​នោះ គឺជា​ជ័យជម្នះ​យូរ​អង្វែង​ទៅ​ថ្ងៃ​មុខ។

កូនប្រុស​ច្បង​របស់​លោក ហ៊ុន សែន ដែល​កំពុង​ត្រៀម​ស្នង​មរតក​អំណាច​បន្ត​ត្រកូល គឺ​លោក ហ៊ុន ម៉ាណែត បង្ហោះ​វីដេអូ​លើ​ទំព័រ​ហ្វេសប៊ុក​របស់​ខ្លួន​នៅ​ថ្ងៃទី​៥ កក្កដា នេះ​ថា ប្រសិនបើ​ចរន្ត​ប្រឆាំង ឬ​ចរន្ត​មិន​សប្បាយ​ចិត្ត​ជាមួយ​គណបក្ស​ប្រជាជន​កម្ពុជា​មាន​កម្រិត​ទាប បក្ស​ប្រឆាំង​ទាំងអស់​នៅ​កម្ពុជា​មិន​អាច​រក​សំឡេង​គាំទ្រ​ពី​ប្រជាពលរដ្ឋ​បាន​ទេ ប៉ុន្តែ​បើ​ចរន្ត​ប្រឆាំង​មាន​ការ​កើនឡើង នោះ​ប្រទេស​ជាតិ​ប្រាកដ​ជា​ដួល​រលំ​ដោយ​អំណាច​ប្រជាពលរដ្ឋ​នៅ​ថ្ងៃ​ណា​មួយ​ជាមិនខាន។

បេក្ខជន​អនាគត​នាយករដ្ឋមន្ត្រី​ដែល​ពួន​ក្រោយ​ខ្នង​ឪពុក លោក ហ៊ុន ម៉ាណែត លើកឡើង​ថា ចរន្ត​ប្រឆាំង​មិន​សំដៅ​ដល់​បក្ស​ប្រឆាំង​នោះ​ទេ គឺ​សំដៅ​ដល់​ការ​មិន​សប្បាយ​ចិត្ត​របស់​ប្រជាពលរដ្ឋ ដូច្នេះ​សមាជិក​គណបក្ស​ប្រជាជន​កម្ពុជា​ត្រូវតែ​នាំគ្នា​ពង្រីក​ចរន្ត​គាំទ្រ​គណបក្ស​ឲ្យ​កាន់តែ​ច្រើន តាមរយៈ​នៃ​ការ​រំលេច​នូវ​អ្វី​ដែល​គណបក្ស​ប្រជាជន​កម្ពុជា​មាន ដើម្បី​ឱ្យ​ប្រជាពលរដ្ឋ​មាន​ភាព​កក់ក្តៅ​ជាមួយ​គណបក្ស​បន្ត​ទៀត។

កូនប្រុស​មេដឹកនាំ​ក្រាញ​អំណាច​ត​ត្រកូល លោក ហ៊ុន ម៉ាណែត បញ្ជាក់​ថា ដរាបណា​គណបក្ស​ប្រជាជន​កម្ពុជា​នៅតែ​ដឹកនាំ​ប្រទេស គឺ​គណបក្ស​នៅតែ​អាច​រក្សា​សន្តិភាព ស្ថិរភាព​នយោបាយ និង​ការ​អភិវឌ្ឍ​ដើម្បី​ប្រជាជន​ទាំងអស់​គ្នា​ទៅ​ថ្ងៃ​អនាគត​ជាមិនខាន។

សកម្មជន​កិច្ចព្រមព្រៀង​សន្តិភាព​ទីក្រុង​ប៉ារីស លោក ស្រ៊ុន ស្រ៊ន បាន​លើកឡើង​ក្នុង​កម្មវិធី Idea Talk នៃ​សារព័ត៌មាន The Cambodia Daily កាលពី​ពេល​ថ្មីៗ​នេះ​ថា ប្រសិនបើ​ចង់​ឱ្យ​មាន​ការ​គាំទ្រ​ពី​ប្រជាពលរដ្ឋ​ចំពោះ​គណបក្ស​ប្រជាជន​កម្ពុជា កិច្ចការ​ទី​១ ដែល​គណបក្ស​នេះ​ត្រូវ​ធ្វើ គឺ​ការ​អនុវត្ត​ច្បាប់​ឲ្យ​បាន​ត្រឹមត្រូវ ដូចជា​រដ្ឋធម្មនុញ្ញ កិច្ចព្រមព្រៀង​សន្តិភាព​ទីក្រុង​ប៉ារីស និង​ច្បាប់​របស់​ប្រទេស​កម្ពុជា​ដែល​មាន​ចែង​ដទៃ​ទៀត។

លោក ស្រ៊ុន ស្រ៊ន លើកឡើង​ថា សម្រាប់​ប្រទេស​កម្ពុជា​ទាល់តែ​មេដឹកនាំ​ធានា​បាន​នូវ​ការ​អនុវត្ត​ច្បាប់ លើកស្ទួយ​សិទ្ធិមនុស្ស អនុវត្ត​តាម​គន្លង​លទ្ធិប្រជាធិបតេយ្យ​សេរី​ពហុបក្ស និង​បើក​ឲ្យ​មាន​សេរីភាព​បញ្ចេញមតិ ជាដើម ទើប​អាច​បញ្ចប់​នូវ​ចរន្ត​ប្រឆាំង​បាន ព្រោះ​ថា​បើ​គ្មាន​ការ​អនុវត្ត​ច្បាប់​ឲ្យ​បាន​ត្រឹមត្រូវ​ទេ យុត្តិធម៌​សង្គម​ក៏​មិន​អាច​កើតមាន​ដែរ ហើយ​ពលរដ្ឋ​ទូទាំង​ប្រទេស​ក៏​មិន​អាច​គាំទ្រ​ការ​ដឹកនាំ​ដោយ​ការ​រំលោភ​ច្បាប់​បែប​នេះ​ឡើយ។

កម្ពុជា​ក្រោម​ការ​ដឹកនាំ​របស់​មេដឹកនាំ​បក្ស​កាន់​អំណាច​លោក ហ៊ុន សែន ត្រូវ​គេ​មើល​ឃើញ​ថា បាន​រំលោភ​ច្បាប់ រំលោភ​សិទ្ធិមនុស្ស រំលាយ​សារព័ត៌មាន​ឯករាជ្យ រំលោភ​ព្រះមហាក្សត្រ រំលាយ​បក្ស​ប្រឆាំង បង្កើត​ឲ្យ​មាន​អំពើពុករលួយ បង្កើត​ឲ្យ​មាន​ការ​សម្លាប់​ក្រៅ​ប្រព័ន្ធ​ច្បាប់ រំលោភ​ដីធ្លី កាត់​ដី​ឲ្យ​បរទេស​ឈ្លានពាន លួច​លក់​ធនធាន​ធម្មជាតិ​កម្ពុជា និង​បង្ក្រាប​ពលរដ្ឋ​ដែល​ទាមទារ​សិទ្ធិ​សេរីភាព​រហូត​ចាប់​ខ្លួន​ដាក់​គុក ជាដើម។

ជាក់ស្តែង សព្វថ្ងៃ​នេះ សកម្មជន​នយោបាយ សកម្មជន​សង្គម មន្ត្រី​បក្ស​ក្រៅ​រដ្ឋាភិបាល និង​អ្នក​សារព័ត៌មាន កំពុង​រង​នូវ​ការ​គំរាមកំហែង​ពី​លោក ហ៊ុន សែន យ៉ាង​ខ្លាំង ដែល​នឹង​ត្រូវ​ចាប់​ខ្លួន​ភ្លាមៗ​ប្រសិនបើ​ពួកគេ​ហ៊ាន​ចេញ​មុខ​តវ៉ា ឬ​រិះគន់​ការ​ដឹកនាំ​របស់​លោក ក្រោម​លេស​ថា​អ្នក​ទាំងនោះ​បង្ក​ការ​ញុះញង់​ដែល​នាំ​ឱ្យ​ចលាចល​ដល់​សន្តិសុខ​សង្គម។

ជា​ឧទាហរណ៍​ជាក់ស្តែង សកម្មជន​នយោបាយ សកម្មជន​សង្គម និង​មន្ត្រី​បក្ស​ក្រៅ​រដ្ឋាភិបាល​មិន​តិច​ទេ​ដែល​ត្រូវ​បាន​ចាប់​ឃុំ​ខ្លួន​ក្នុង​ពន្ធនាគារ នៅ​ពេល​ដែល​ពួកគេ​ចេញ​តវ៉ា​ដើម្បី​សិទ្ធិ​សេរីភាព និង​រិះគន់​ការ​ដឹកនាំ​របស់​លោក ហ៊ុន សែន នា​ពេល​កន្លងមក​នោះ។

អង្គការ Freedom House បាន​ចេញ​របាយការណ៍​របស់​ខ្លួន​កាលពី​ចុង​ឆ្នាំ​២០២២ ថា ប្រព័ន្ធ​នយោបាយ​របស់​ប្រទេស​កម្ពុជា ត្រូវ​បាន​លោក ហ៊ុន សែន និង​គណបក្ស​ប្រជាជន​កម្ពុជា​គ្រប់គ្រង​អស់​រយៈពេល​ជាង ៣​ទសវត្សរ៍​មក​ហើយ ខណៈ​គណបក្ស​ប្រឆាំង បណ្ដាញ​សារព័ត៌មាន​ឯករាជ្យ និង​អ្នក​តវ៉ា​ទាមទារ​សិទ្ធិ​សេរីភាព តែងតែ​រង​នូវ​ការ​ធ្វើ​ទុក្ខបុកម្នេញ​ជា​ប្រចាំ ដោយ​ការ​បំភិតបំភ័យ ការ​កាត់ទោស​ក្រោម​ហេតុផល​នយោបាយ និង​អំពើ​ហិង្សា ដែល​ធ្វើ​ឱ្យ​ពលរដ្ឋ​ខ្មែរ​រស់នៅ​ក្នុង​បរិយាកាស​នៃ​ការ​គាបសង្កត់ និង​ការ​ភ័យខ្លាច​យ៉ាង​ខ្លាំង​ក្នុង​ពេល​បច្ចុប្បន្ន​នេះ៕

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស