26 C
Phnom Penh

អាមេរិក​សម្រេច​បញ្ជូន​គ្រាប់បែក​ចង្កោម​ទៅ​ឱ្យ​អ៊ុយក្រែន ខណៈ​បើក​ការ​វាយបក​រំដោះ​ទឹកដី​រុស្ស៊ី​វិញ​ជិត​មួយ​ខែ​ហើយ

ដោយ ឌឹ ខេមបូឌា ដេលី

បទវិភាគ

សហរដ្ឋ​អាមេរិក​កំពុង​រៀបចំ​កញ្ចប់​ជំនួយ​យោធា​ថ្មី​ក្នុង​ទំហំ​ទឹកប្រាក់ ៨០០​លាន​ដុល្លារ​បន្ថែម​ទៀត​ដល់​អ៊ុយក្រែន ដែល​ក្នុង​នោះ​មាន​គ្រាប់បែក​ចង្កោម​ដែល​ប្រទេស​ជាង ១២០ បាន​ចុះ​កិច្ចព្រមព្រៀង​រួម​គ្នា​បង្កើត​ជា​ច្បាប់​អន្តរជាតិ​ហាម​ប្រើប្រាស់​អាវុធ​ប្រភេទ​នេះ។

តាម​សារព័ត៌មាន​អាមេរិក New York Times បាន​ឲ្យ​ដឹង​ថា ជំនួយ​យោធា​ថ្មី​ដែល​អាមេរិក​ត្រៀម​បញ្ជូន​ទៅ​ឱ្យ​អ៊ុយក្រែន​នេះ គឺ​ដើម្បី​ជួយ​បង្កើន​ប្រសិទ្ធភាព​វាយបក​របស់​កងទ័ព​អ៊ុយក្រែន ដែល​ចូល​ដល់ ២៦​ថ្ងៃ​ហើយ​នៃ​យុទ្ធនាការ​វាយបក។

គ្រាប់បែក​ចង្កោម គឺជា​អាវុធ​ដែល​ប្រទេស​ជាង ១២០ បាន​ហាមឃាត់​ការ​ប្រើប្រាស់ ប៉ុន្តែ​សហរដ្ឋ​អាមេរិក និង​អ៊ុយក្រែន ទាំង​រុស្ស៊ី ពុំ​បាន​ចុះហត្ថលេខា​លើ​ច្បាប់​អន្តរជាតិ​នេះ​ទេ។ គ្រាប់បែក​ចង្កោម​ដែល​សហរដ្ឋ​អាមេរិក​ត្រៀម​ផ្តល់​ដល់​អ៊ុយក្រែន ត្រូវ​គេ​រំពឹង​ថា​នឹង​ប្រកាស​នៅ​ថ្ងៃ​សុក្រ ទី​៧ ខែ​កក្កដា។

ជំនួយ​យោធា​ទាំងនេះ​នឹង​ត្រូវ​បញ្ចេញ​ពី​ឃ្លាំង​ស្តុក​របស់​ក្រសួង​ការពារ​ជាតិ​អាមេរិក។ ក្នុង​ទំហំ​សាច់ប្រាក់​នេះ ក៏​រួម​មាន​ទាំង​រថពាសដែក​ប្រភេទ Stryker និង Bradley និង​គ្រាប់រំសេវ​ជាច្រើន​ថែម​ទៀត​ដូចជា​គ្រាប់​សម្រាប់​កាំភ្លើង​ផ្លោង Howitzers និង​គ្រាប់​សម្រាប់​អាវុធ HIMARS។

ប៉ុន្តែ​គ្រាប់​មីស៊ីល ATACMS រយៈ​ចម្ងាយ​ឆ្ងាយ សេតវិមាន​នៅតែ​មិន​ទាន់​សម្រេច​ថា​នឹង​បញ្ជូន​ទៅ​ឱ្យ​អ៊ុយក្រែន​តាម​សំណើ​របស់​លោក​ប្រធានាធិបតី ហ្សេឡេនស្គី នៅឡើយ​ទេ។ គ្រាប់​មីស៊ីល​ដែល​មាន​ឈ្មោះ​ថា Army Tacticle Missile System (ATACMS) វា​អាច​បាញ់​រត់​បាន ៣២០​គីឡូម៉ែត្រ។

សហរដ្ឋ​អាមេរិក​នៅតែ​បារម្ភ​ថា អ៊ុយក្រែន​អាច​បាញ់​មីស៊ីល​ធ្លាក់​ខាង​ក្នុង​ទឹកដី​ប្រទេស​រុស្ស៊ី តែ​យ៉ាងណា អ៊ុយក្រែន​កំពុង​ប្រើប្រាស់​ទៅ​ហើយ​មីស៊ីល Storm Shadow របស់​អង់គ្លេស ដែល​វា​រត់​បាន ៣០០​គីឡូម៉ែត្រ។ ចំពោះ​ការ​សម្រេច​ថា​នឹង​បញ្ជូន​គ្រាប់បែក​ចង្កោម​ទៅ​ឱ្យ​អ៊ុយក្រែន ខណៈ​គ្រាប់បែក​ប្រភេទ​នេះ​នៅ​ក្នុង​ឃ្លាំង​ស្តុក​គ្រាប់​អាមេរិក​មាន​ដល់ ៤​លាន ៧​សែន​គ្រាប់។

ប្រធានាធិបតី​អាមេរិក លោក ចូ បៃដិន កាលពី​មុន​ធ្លាប់​បាន​បញ្ជាក់​ថា នឹង​មិន​ផ្តល់​អាវុធ​ដ៏​សាហាវ​នេះ​ទៅ​ឱ្យ​អ៊ុយក្រែន​ទេ ប៉ុន្តែ​នៅ​ពេលនេះ​លោក​បាន​ដូរ​ជំហរ​វិញ។

លេខាធិការ​សារព័ត៌មាន​សម្រាប់​សេតវិមាន អ្នកស្រី Jen Psaki បាន​និយាយ​ក្នុង​សន្និសីទ​សារព័ត៌មាន​ថា ការពិត រុស្ស៊ី​បាន​ប្រើ​អាវុធ​នេះ​រួច​ទៅ​ហើយ​នៅ​ទឹកដី​អ៊ុយក្រែន តែ​អ្នកស្រី​ថា​បើ​ទោះជា​អាមេរិក​ដូរ​ជំហរ ក៏​អាមេរិក​ផ្លាស់ប្ដូរ​ជំហរ​នេះ​វិញ​ដែរ។

សង្គ្រាម​វាយបក​របស់​អ៊ុយក្រែន​បាន​ចាប់ផ្តើម​តាំងពី​ថ្ងៃទី​៤ ខែ​មិថុនា ឆ្នាំ​២០២៣ តែ​ប្រធានាធិបតី ហ្សេឡេនស្គី ប្រកាស​យក​ថ្ងៃទី​១០ មិថុនា ជា​ការ​ប្រកាស​ជា​ផ្លូវការ។

ក្រុម​អ្នកវិភាគ​នៃ​វិទ្យាស្ថាន​សិក្សា​សង្គ្រាម​ដែល​មាន​មូលដ្ឋាន​នៅ​ក្រុង​វ៉ាស៊ីនតោន មើល​ឃើញ​ថា ការ​វាយលុក​ដើម្បី​ដណ្តើម​យក​ទឹកដី​ភាគ​ខាងកើត និង​ភាគ​ខាងត្បូង​ពី​រុស្ស៊ី មក​វិញ ពិត​ជា​មិន​ដូច​ការ​រំពឹង​ទុក​របស់​អ៊ុយក្រែន​ពិត​មែន តែ​មាន​ការ​រីកចម្រើន​ដោយ​ទប់​បាន​ទីតាំង​ខ្លះ ហើយ​វាយ​យក​បាន​ទីតាំង​ខ្លះ​ពី​រុស្ស៊ី។

គ្រាប់បែក​ចង្កោម​ដែល​សហរដ្ឋ​អាមេរិក​ត្រៀម​ផ្តល់​ដល់​អ៊ុយក្រែន ក្នុង​ពេលនេះ គឺជា​អាវុធ​ដែល​អ៊ុយក្រែន ចង់​បាន​ជា​យូរ​មក​ហើយ។

នាយសេនាធិការ​ចម្រុះ​កងទ័ព​ជើងគោក​អាមេរិក លោក​ឧត្តមសេនីយ៍ Mark Milley បាន​ថ្លែង​កាលពី​សប្តាហ៍​មុន​ថា សហរដ្ឋ​អាមេរិក​បាន​គិត​ជា​យូរ​មក​ហើយ​អំពី​ការ​ផ្តល់​គ្រាប់បែក​ចង្កោម​ដល់​អ៊ុយក្រែន។

ចំណែក​ប្រធាន​ទីប្រឹក្សា​សន្តិសុខ​ជាតិ​អ៊ុយក្រែន លោក Oleksiy Danilov បាន​សរសេរ​បង្ហោះ​តាម​បណ្ដាញ​សង្គម​របស់​លោក​នេះ​ថា៖ ក្នុង​ដំណាក់កាល​ប្រយុទ្ធ​ប្រឆាំង​នឹង​សត្រូវ​នា​ពេលនេះ កងកម្លាំង​ការពារ​របស់​អ៊ុយក្រែន​កំពុង​បំពេញ​ភារកិច្ច​របស់​ខ្លួន គឺ​ការ​បំផ្លាញ​ឃ្លាំង​ផ្ទុក​ប្រេងឥន្ធនៈ​យានយន្ត​យោធា ប៉ុស្តិ៍​បញ្ជាការ កាំភ្លើង​ធំ និង​កងកម្លាំង​ការពារ​ដែនអាកាស​របស់​កងទ័ព​រុស្ស៊ី ដែល​លោក​ថា​អ៊ុយក្រែន​ត្រូវការ​អាវុធ​នេះ​គឺជា​រឿង​ចាំបាច់។

គ្រាប់បែក​ចង្កោម​គឺជា​ប្រភេទ​អាវុធ​ដែល​គេ​អាច​បាញ់​ចេញពី​កាំភ្លើង​ធំ​ក៏​បាន ទម្លាក់​ពី​លើ​យន្តហោះ​ក៏​បាន ឬ​បាញ់​ចេញពី​នាវា​ក៏​បាន ដែល​វា​នឹង​បំបែក​ចេញ​ជា​គ្រាប់​តូចៗ​ពី​លើ​ផ្ទៃ​អាកាស​ធ្លាក់​មក​លើ​ដី​រាយប៉ាយ ប៉ុន្តែ​វា​ងាយ​ប៉ះ​ខ្លាំង​ណាស់​ដល់​ជីវិត​មនុស្ស។

រដ្ឋាភិបាល​អ៊ុយក្រែន​ដែល​ដណ្តើម​បាន​ទឹកដី​តិចតួច​ពី​រុស្ស៊ី ក្នុង​សង្គ្រាម​វាយបក​នេះ បាន​ប្រកាស​ស្វែងរក​ជំនួយ​យោធា​ពី​ក្រុម​បស្ចិម​ប្រទេស​ជា​បន្ថែម​ទៀត ដើម្បី​វាយលុក​ក្នុង​យុទ្ធសាស្ត្រ​យក​ប្រៀប​លើ​សមរភូមិ ដើម្បី​បង្ខំ​ឱ្យ​រុស្ស៊ី​ដកថយ​ពី​តំបន់​ភាគ​ខាងកើត និង​ខាងត្បូង។

បើ​តាម​សេចក្ដី​ប្រកាស​ព័ត៌មាន​របស់​អគ្គបញ្ជាការដ្ឋាន​កងទ័ព​អ៊ុយក្រែន ការ​វាយបក​រយៈពេល ២៦​ថ្ងៃ​មក​នេះ​ដោយ​គិត​ត្រឹម​ថ្ងៃទី​៦ កក្កដា អ៊ុយក្រែន វាយ​រំដោះ​ទឹកដី​ពី​រុស្ស៊ី​មក​វិញ​បាន​ជាង ១៦០​គីឡូម៉ែត្រ​ក្រឡា​ទាំង​នៅ​ភាគ​ខាងកើត និង​ខាងត្បូង។

យ៉ាងណា​ចាប់តាំងពី​ខែ​តុលា ឆ្នាំ​២០២២ ដែល​អ៊ុយក្រែន មាន​ប្រៀប​ក្នុង​ការ​ប្រយុទ្ធ​វាយបក​យក​ទឹកដី​មក​វិញ​ពី​រុស្ស៊ី អ៊ុយក្រែន​ប្រកាស​ថា​បាន​រំដោះ​ផ្ទៃដី​បាន​ជាង ១៥០០០​គីឡូម៉ែត្រ​ក្រឡា ហើយ​ចំណែក​រុស្ស៊ី​កំពុង​កាន់កាប់​ជាង ១៧០០០​គីឡូ​ម៉ែត្រ​ក្រឡា។

តែ​នេះ​មិន​បាន​រាប់​បញ្ចូល​ផ្ទៃដី​នៃ​ឧបទ្វីប​គ្រីមៀរ ដែល​មាន​ទំហំ​ជាង ២៧០០០​គីឡូ​ម៉ែត្រ​ក្រឡា​ដែល​រុស្ស៊ី​ក្រោម​ការ​ដឹកនាំ​របស់​លោក ពូទីន យក​បាន​ពី​អ៊ុយក្រែន នៅ​ខែ​មីនា ឆ្នាំ​២០១៤ នោះ​ទេ៕

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស