ភរិយា និងកូនប្រុសច្បងអ្នកឧកញ៉ា គិត ម៉េង ទទួលបានគោរមងារជា «អ្នកឧកញ៉ា» និង «ឧកញ៉ា» បន្ទាប់ពីបុរសខ្លាំងកាន់អំណាចជិត ៤០ឆ្នាំនៅកម្ពុជា លោក ហ៊ុន សែន ទូលថ្វាយទៅព្រះមហាក្សត្រ។
បើតាមសារព័ត៌មានក្នុងស្រុកចុះផ្សាយនៅថ្ងៃចន្ទ ទី១០ កក្កដា នេះថា កូនប្រុសច្បងអ្នកឧកញ៉ា គិត ម៉េង ដែលទទួលបានគោរមងារជា «ឧកញ៉ា» នោះឈ្មោះលោក គិត ស៊ូឡា ខណៈភរិយារបស់លោក គឺអ្នកស្រី ម៉ៅ ចំណាន ទទួលបានគោរមងារជា «អ្នកឧកញ៉ា»។
ព្រះករុណាព្រះបាទ សម្ដេចព្រះបរមនាថ នរោត្តម សីហមុនី ព្រះមហាក្សត្រនៃកម្ពុជាបានចេញព្រះរាជក្រឹត្យត្រាស់បង្គាប់ផ្ដល់គោរមងារដល់ភរិយា និងកូនប្រុសច្បងរបស់អ្នកឧកញ៉ា គិត ម៉េង ជា «អ្នកឧកញ៉ា» និង «ឧកញ៉ា» បន្ទាប់ពីលោកនាយករដ្ឋមន្ត្រី ហ៊ុន សែន បានទូលថ្វាយព្រះអង្គនាពេលថ្មីៗនេះ។
លោក ហ៊ុន សែន មិនមែនទូលថ្វាយទៅព្រះមហាក្សត្រដើម្បីស្នើសុំផ្ដល់គោរមងារតែភរិយា និងកូនរបស់អ្នកឧកញ៉ានោះទេ នៅឆ្នាំ២០២២ កន្លងទៅ បុរសខ្លាំងក្រាញអំណាចជិត ៤០ឆ្នាំនៅកម្ពុជាក៏បានទូលថ្វាយទៅព្រះមហាក្សត្រឲ្យត្រាស់បង្គាប់ផ្ដល់គោរមងារកូនប្រុសរបស់អ្នកឧកញ៉ា ម៉ុង ឬទ្ធី ឈ្មោះ ម៉ុង ចាន់ថន ជា «ឧកញ៉ា» នៅខែសីហា ឆ្នាំ២០២២ ផងដែរ។
ក្រៅពីកូនឧកញ៉ា ម៉ុង ឬទ្ធី ក៏មានកូនប្រុសរបស់អ្នកឧកញ៉ា លី យ៉ុងផាត់ គឺឈ្មោះ លី ភូនរ៉ាត់ ក៏ទទួលបានគោរមងារជា «ឧកញ៉ា» ដែរ។ លោក លី ភូនរ៉ាត់ បានបរិច្ចាគថវិកាចំនួន ១០ម៉ឺនដុល្លារសម្រាប់ការសាងសង់អគារសិក្សាមួយកន្លែងនៅរាជធានីភ្នំពេញ។
អ្នកឧកញ៉ា គិត ម៉េង បច្ចុប្បន្នជាប្រធានសភាពាណិជ្ជកម្មកម្ពុជា និងរាជធានីភ្នំពេញ។ ក្រៅពីជាប្រធានសភាពាណិជ្ជកម្មហើយ ក៏ជាអ្នកជំនួញដ៏ល្បីល្បាញនៅកម្ពុជា ដែលបច្ចុប្បន្នលោកជាប្រធានអគ្គនាយកបណ្ដុំក្រុមហ៊ុន រ៉ូយ៉ាល់ ហ្គ្រុប (Royal Group of Companies (RGC)) ដែលមានក្រុមហ៊ុនចំណុះជាច្រើន ដូចជាក្រុមហ៊ុនទូរសព្ទចល័ត ខាំ ជីអេសអឹម (Cam GSM Co.) ទូរទស្សន៍ខ្សែកាប ស៊ីធីអិន (Cambodia Television Network=CTN) ក្រុមហ៊ុន ភ្នាល់បាល់ទាត់ Cambo Six European Soccer Betting ក្រុមហ៊ុនចាក់លេខឆ្នោត (CamLot Lottery Co.) ក្រុមហ៊ុនចែកចាយផ្ដាច់មុខផលិតផលជប៉ុន កាណុង (Canon Products) សាលារៀនអន្តរជាតិ North bridge និងសណ្ឋាគារ Cambodiana។
អ្នកឧកញ៉ា គិត ម៉េង ចូលហ៊ុនជាមួយធនាគារអូស្ត្រាលី ANZ មានហ៊ុន ៤៥% ហើយដាក់ឈ្មោះថា ANZ Royal Bank នៅឆ្នាំ២០០៥។ បន្ទាប់មក អ្នកឧកញ៉ា គិត ម៉េង បើកក្រុមហ៊ុនធានារ៉ាប់រងឈ្មោះ Infinity General Insurance ចូលហ៊ុននឹងក្រុមហ៊ុនម៉ាឡេស៊ី នៅក្រុងកូឡាឡាំពួរ Infinity Financial Solutions។ ប៉ុន្មានឆ្នាំមុននេះ អ្នកឧកញ៉ា គិត ម៉េង មានឈ្មោះផ្សាយក្នុងកាសែតថា មានទាក់ទងនឹងរឿងរកស៊ីកាប់ឈើ ទិញឈើ ដឹកឈើ។
គោរមងារជា «ឧកញ៉ា» ត្រូវបានផ្ដល់ជូនដល់បណ្ដាសប្បុរសជនដែលបានធ្វើអំណោយជូនរដ្ឋជាថវិកា ឬសម្ភារៈលើសពី ៥០ម៉ឺនដុល្លារ។ គោរមងារមួយនេះទៀតសោត ក៏ត្រូវបានផ្ដល់ជូនដល់អ្នកជំនួញដ៏លេចធ្លោ និងមានឥទ្ធិពលជាច្រើននៅក្នុងប្រទេស រួមទាំងក្រុមគ្រួសាររបស់ពួកគេដែលវាក៏មានការជាប់ពាក់ព័ន្ធទៅនឹងការជួយឧបត្ថម្ភដល់រដ្ឋ និងនិទ្ទណ្ឌភាពស្របច្បាប់ផងដែរ៕