ពលរដ្ឋស្ទើរតែមិនដែលស្គាល់មុខមន្ត្រីរដ្ឋាភិបាលដែលជាសមាជិករបស់បក្សកាន់អំណាចក្នុងរយៈពេល ៥ឆ្នាំកន្លងមកនេះ ស្របពេលដែលពួកគេបាននាំគ្នាចុះបង្រៀនពលរដ្ឋឱ្យរៀនគូសសញ្ញានៅលើសន្លឹកឆ្នោតអំឡុងពេលឃោសនាបោះឆ្នោត។
អតីតបក្សកុម្មុយនីស្តដែលកំពុងដឹកនាំដោយលោក ហ៊ុន សែន សព្វថ្ងៃនេះ កំពុងផ្សព្វផ្សាយពីសកម្មភាពឃោសនាបក្សនយោបាយរបស់ខ្លួននៅតាមបណ្តាខេត្តនានារាល់ថ្ងៃអំឡុងពេលយុទ្ធនាការនៃការឃោសនាបោះឆ្នោតនៅពេលនេះ ក្នុងនោះសកម្មភាពដែលសមាជិកបក្សនេះយកចិត្តទុកដាក់បំផុតនោះ គឺការបង្រៀនឱ្យពលរដ្ឋចេះគូសសញ្ញានៅលើសន្លឹកឆ្នោតឱ្យបានគ្រប់ៗគ្នា។
បុរសខ្លាំងក្រាញអំណាចលោក ហ៊ុន សែន តែងផ្សព្វផ្សាយពីសកម្មភាពឃោសនារបស់គណបក្សប្រជាជនកម្ពុជារាល់ថ្ងៃនៅក្នុងបណ្ដាញទំនាក់ទំនងតេឡេក្រាមផ្លូវការរបស់លោក ជុំវិញសកម្មភាពដែលសមាជិករបស់ខ្លួនកំពុងធ្វើនៅតាមបណ្តាខេត្ត ក្នុងនោះមន្ត្រីបក្សនេះដែលមិនធ្លាប់ទៅជួបពលរដ្ឋនៅតាមមូលដ្ឋាន ក៏បានចេញមុខទៅណែនាំឱ្យពលរដ្ឋរៀនគូសសញ្ញានៅលើសន្លឹកឆ្នោតដែរ។
គណបក្សប្រជាជនកម្ពុជារបស់លោក ហ៊ុន សែន កំពុងធ្វើយុទ្ធនាការឃោសនារកសំឡេងយ៉ាងសកម្មនៅទូទាំងប្រទេស ស្របពេលដែលគណបក្សដែលមានសក្ដានុពលអាចប្រកួតប្រជែងជាមួយខ្លួន គឺបក្សសង្គ្រោះជាតិ ឬគណបក្សភ្លើងទៀន ត្រូវបានលោក ហ៊ុន សែន រារាំងមិនឱ្យចូលរួមការបោះឆ្នោតនេះឡើយ ដែលជាហេតុធ្វើឱ្យការបោះឆ្នោតនៅកម្ពុជានាចុងខែកក្កដា នេះ ត្រូវគេរិះគន់ថាជាយុទ្ធនាការលួចប្លន់លទ្ធផលនៃការបោះឆ្នោតនេះទៅវិញ។
យុទ្ធនាការនៃការឃោសនាបោះឆ្នោត ធ្វើឡើងរយៈពេល ២១ថ្ងៃគិតចាប់ពីថ្ងៃទី១ រហូតដល់ថ្ងៃទី២១ ខែកក្កដា ឆ្នាំ២០២៣ ប៉ុន្តែការរិះគន់នានាក៏បានលេចឡើងព្រោងព្រាតផងដែរជុំវិញការឃោសនានយោបាយរបស់គណបក្សប្រជាជនកម្ពុជា ដែលនាំគ្នាបង្រៀនពលរដ្ឋឱ្យចេះគូសសញ្ញាលើសន្លឹកឆ្នោតនៅពេលនេះ។
ជាក់ស្តែង នាយកមជ្ឈមណ្ឌលសម្ព័ន្ធភាពការងារ និងសិទ្ធិមនុស្ស (សង់ត្រាល់) លោក មឿន តុលា សរសេរលើគណនីហ្វេសប៊ុករបស់លោកនៅថ្ងៃទី១២ កក្កដា នេះថា បើមន្ត្រីរដ្ឋាភិបាលដែលជាសមាជិកគណបក្សប្រជាជនកម្ពុជានាំគ្នាចុះបង្រៀនកសិករឱ្យចេះធ្វើកសិកម្មដូចដែលពួកគេចុះបង្រៀនពលរដ្ឋឱ្យរៀនគូសសញ្ញានៅលើសន្លឹកឆ្នោតដូចពេលនេះ ម្ល៉េះកសិករមិនធ្វើចំណាកស្រុកដូចសព្វថ្ងៃនេះទេ។
ចំណែកសកម្មជនបរិស្ថានលោក សាន់ ម៉ាឡា ក៏បានសរសេរលើគណនីហ្វេសប៊ុករបស់លោកនៅថ្ងៃទី១២ កក្កដា នេះដែរថា បើលោកជាអ្នកនយោបាយ ក៏លោកចុះបង្រៀនពលរដ្ឋដល់ផ្ទះដែរ តែបង្រៀនពួកគាត់ឲ្យចេះធ្វើកសិកម្មតាមបែបទំនើប និងបង្រៀនឲ្យដឹងអំពីតម្លៃទីផ្សារកសិកម្មប៉ុណ្ណោះ ព្រោះនេះទើបជាតម្រូវការពិតប្រាកដរបស់ពលរដ្ឋនៅមូលដ្ឋាន ដែលទំនងជាលោកចង់សំដៅថា លោកនឹងមិនចុះទៅបង្រៀនពលរដ្ឋឱ្យគូសសញ្ញានៅលើសន្លឹកឆ្នោតនោះទេ។
ដោយឡែកមន្ត្រីជាន់ខ្ពស់សង្គមស៊ីវិលទទួលបន្ទុកសិទ្ធិមនុស្ស លោក ស៊ឹង សែនករុណា លើកឡើងនៅថ្ងៃទី១២ កក្កដា នេះដែរថា លោកពិតជាមិននឹកស្មានថា ការបោះឆ្នោតនៅកម្ពុជានៅពេលនេះត្រូវគណបក្សនយោបាយខ្វល់ខ្វាយដល់កម្រិត សូម្បីតែគូសសញ្ញានៅលើសន្លឹកឆ្នោតក៏ត្រូវពួកគេនាំគ្នាគិតគូរដែរ។
លោក ស៊ឹង សែនករុណា លើកឡើងបែបចំអកទៅកាន់គណបក្សនយោបាយមួយចំនួនថា លោកអាណិតតែពលរដ្ឋទេដែលត្រូវគណបក្សនយោបាយខ្វល់ខ្វាយយកចិត្តទុកដាក់ដល់ថ្នាក់នេះ ដែលសូម្បីតែគូសសញ្ញានៅលើសន្លឹកឆ្នោតក៏ត្រូវគេចុះទៅបង្រៀនដែរនោះ។
នៅថ្ងៃទី១១ ខែកក្កដា ឆ្នាំ២០២៣ ប្រធានក្រុមការងាររបស់បក្សប្រជាជនកម្ពុជា បាននាំគ្នាចុះជួយមូលដ្ឋានឃុំសណ្តែក ស្រុកបាធាយ ខេត្តកំពង់ចាម ចុះផ្សព្វផ្សាយគោលនយោបាយរបស់គណបក្សប្រជាជនកម្ពុជា និងពន្យល់ពីរបៀបគូសសញ្ញានៅលើសន្លឹកឆ្នោតពីផ្ទះមួយទៅផ្ទះមួយ ខណៈក្រុមការងារផ្សេងទៀតរបស់គណបក្សនេះ ក៏បានអនុវត្តសកម្មភាពដូចៗគ្នាបែបនេះដែរ។
ក្រុមអ្នកសង្កេតការណ៍លើកឡើងថា ទង្វើដែលគណបក្សប្រជាជនកម្ពុជាធ្វើនៅមុនការបោះឆ្នោតនេះ ដូចជាការចែកអំណោយ ការសួរសុខទុក្ខពលរដ្ឋ និងការចុះជួយពលរដ្ឋគ្រប់រូបភាពទាំងអស់ គឺគ្រាន់តែជាល្បិចបោកប្រាស់ដើម្បីឱ្យពលរដ្ឋបោះឆ្នោតឱ្យពួកគេប៉ុណ្ណោះ មិនមែនពួកគេស្រឡាញ់ពលរដ្ឋនោះទេ។ ជាក់ស្តែង ទាល់តែដល់ថ្ងៃបោះឆ្នោត ទើបពួកគេនាំគ្នាមកជួបប្រជាពលរដ្ឋ ក្នុងនោះតំណាងរាស្ត្របក្សប្រជាជនកម្ពុជាស្ទើរតែទាំងអស់មិនដែលមកជួបពលរដ្ឋនោះទេក្នុងរយៈពេល ៥ឆ្នាំកន្លងទៅនេះ។
ចំណែកអតីតមេដឹកនាំបក្សប្រឆាំងលោក សម រង្ស៊ី អះអាងថា ប្រសិនបើពលរដ្ឋខ្មែរចង់ដកមេដឹកនាំខ្មែរដែលវៀតណាមលើកបន្តុប លោក ហ៊ុន សែន លែងឱ្យត្រួតត្រាប្រទេសកម្ពុជាដោយស្ងាត់ៗ ហើយមានសុវត្ថិភាពនោះ គឺគ្រាន់តែនាំគ្នាគូសខ្វែងសន្លឹកឆ្នោតដោយសម្ងាត់នោះ លោក ហ៊ុន សែន នឹងអស់អំណាចត្រួតត្រាពលរដ្ឋខ្មែរដោយស្វ័យប្រវត្តិ។
បុរសដែលតែងប្រកាសចាប់ខ្លួនលោក ហ៊ុន សែន ពីចម្ងាយរូបនេះបានចេញវីដេអូអំពាវនាវទៅកាន់ពលរដ្ឋខ្មែរគ្រប់និន្នាការទាំងអស់នៅថ្ងៃទី១២ កក្កដា នេះថា សូមពលរដ្ឋខ្មែរគ្រប់និន្នាការ ទាំងអ្នកដែលគាំទ្របក្សប្រជាជនកម្ពុជា និងអ្នកដែលគាំទ្រគណបក្សដទៃ សហការសាមគ្គីគ្នាទៅគូសខ្វែងសន្លឹកឆ្នោត ដើម្បីជួយឱ្យប្រជាជាតិខ្មែរទាំងមូលរួបរួមសាមគ្គីគ្នាឡើងវិញ ព្រោះថាជាតិខ្មែរបែកបាក់សាមគ្គីសព្វថ្ងៃនេះ គឺមកតែពីលោក ហ៊ុន សែន ម្នាក់គត់។
លោក សម រង្ស៊ី លើកឡើងថា លោក ហ៊ុន សែន ជាមនុស្សសង្គ្រាម ដូច្នេះគាត់អាចបន្តក្តោបក្តាប់អំណាចបាន ទាល់តែប្រទេសកម្ពុជាមានសង្គ្រាម ឬមានការបែកបាក់ផ្ទៃក្នុងជាតិ ជាដើម ម្ល៉ោះហើយលោក ហ៊ុន សែន មិនចង់ឱ្យជាតិខ្មែររួបរួមសាមគ្គីគ្នាទេ ត្បិតនៅពេលដែលខ្មែរសាមគ្គីគ្នានឹងនាំឱ្យលោក ហ៊ុន សែន អស់អំណាច។ ដូច្នេះហើយបានជាគាត់រៀបផែនការឱ្យខ្មែរឈ្លោះគ្នាឯងដើម្បីឱ្យគាត់ងាយស្រួលគ្រប់គ្រងបន្តអំណាចទៅឱ្យកូនគាត់នៅថ្ងៃមុខទៀត។
អតីតមេដឹកនាំបក្សប្រឆាំងរូបនេះបញ្ជាក់ថា ទាំងអ្នកគាំទ្រគណបក្សប្រជាជនកម្ពុជា ទាំងអ្នកគាំទ្រគណបក្សសង្គ្រោះជាតិ សុទ្ធតែជាខ្មែរដូចគ្នា ដូច្នេះមានប្រយោជន៍អ្វីដែលត្រូវឈ្លោះគ្នាដើម្បីជួយការពារអំណាចលោក ហ៊ុន សែន នោះ ព្រោះថាឱ្យតែគ្រួសារលោក ហ៊ុន សែន នៅតែបន្តកាន់អំណាច ជាតិខ្មែរនឹងមិនបានសុខទេ ហើយបើចង់ឱ្យខ្មែរបានសុខសុភមង្គល មានជម្រើសតែមួយគត់ គឺលុបបំបាត់អំណាចគ្រួសារនិយមរបស់លោក ហ៊ុន សែន ចេញពីទឹកដីខ្មែរឱ្យវិនាសសាបសូន្យតែម្តង។
នៅសល់តែ ១១ថ្ងៃទៀតប៉ុណ្ណោះ ដំណើរការនៃការបោះឆ្នោតនឹងចាប់ផ្តើមដំណើរការហើយ ដែលនឹងប្រព្រឹត្តទៅនៅថ្ងៃអាទិត្យ ទី២៣ ខែកក្កដា ខាងមុខនេះ ប៉ុន្តែការបោះឆ្នោតនេះកំពុងស្ថិតក្នុងគោលជំហរតែពីរប៉ុណ្ណោះ គឺគូសសញ្ញាធីកលើសន្លឹកឆ្នោតដើម្បីគាំទ្រការបោះឆ្នោត និងគូសសញ្ញាខ្វែងលើសន្លឹកឆ្នោតដើម្បីបដិសេធការបោះឆ្នោតនេះ ដូច្នេះទាំងលោក សម រង្ស៊ី និងលោក ហ៊ុន សែន កំពុងស្ថិតនៅក្នុងការរង់ចាំអ៊ុតមើលលទ្ធផលនៃការបោះឆ្នោតនេះដូចគ្នា៕