និយ័តករទូរគមនាគមន៍កម្ពុជាបានបញ្ជាទៅក្រុមហ៊ុនចាត់វិធានការបិទវេបសាយសារព័ត៌មាន The Cambodia Daily, RFA និងវេបសាយ kamnotra ចេញដោយ CCIM នាពេលថ្មីៗនេះ ក្រោមលេសថា អង្គភាពសារព័ត៌មានទាំងនេះផ្សាយប៉ះពាល់ដល់កិត្តិយស និងកិត្យានុភាពរបស់រាជរដ្ឋាភិបាលដែលដឹកនាំដោយលោក ហ៊ុន សែន។
ក្នុងសេចក្ដីជូនដំណឹងចុះថ្ងៃទី១២ ខែកក្កដា ឆ្នាំ២០២៣ ឲ្យដឹងថា និយ័តករទូរគមនាគមន៍កម្ពុជាបានតម្រូវឲ្យក្រុមហ៊ុនចាត់វិធានការបិទខ្ទប់ឈ្មោះដែនរបស់អង្គភាពសារព័ត៌មាន ក្នុងនោះមាន៖
- https://www.instagram.com/cambodiadailykhmer
- https://www.youtube.com/@TheCambodiaDailyTM
- https://kamnotra.io/
- https://www.rfa.org/khmer
- https://www.rfa.org/english
- https://t.me/withoutfearorfavorkh
ក្រៅពីវេបសាយខាងលើ បណ្ដាញសង្គម twitter ក៏ត្រូវបាននិយ័តករទូរគមនាគមន៍កម្ពុជាបញ្ជាឲ្យបិទខ្ចប់ដែរ ក្នុងនោះមាន៖
- https://twitter.com/RadioFreeAsiaKH
- https://twitter.com/kamnotra
- https://twitter.com/cambodiadaily ។
សេចក្ដីជូនដំណឹងដដែលថា ការដែលនិយ័តករទូរគមនាគមន៍កម្ពុជាបញ្ជាឲ្យក្រុមហ៊ុន បិទ ឬប្លុកនេះ ក្រោមលេសថាអង្គភាពសារព័ត៌មានផ្សព្វផ្សាយព័ត៌មានធ្វើឱ្យមានការភាន់ច្រឡំ ប៉ះពាល់ដល់កិត្តិយស និងកិត្យានុភាពរបស់រាជរដ្ឋាភិបាល និងមិនបានបំពេញលក្ខខណ្ឌក្នុងការធ្វើអាជីវកម្មនៅក្រសួងព័ត៌មាន។
ការបញ្ជាឲ្យក្រុមហ៊ុនប្លុក ឬបិទវេបសាយព័ត៌មាននេះ ធ្វើឡើងបន្ទាប់ពីស្ថាប័នព័ត៌មាន ឌឹ ខេមបូដា ដេលី និងអាស៊ីសេរី បានផ្សាយព័ត៌មានពីចំណុចខ្វះចន្លោះរបស់រដ្ឋាភិបាលកម្ពុជា ក្រោមការដឹកនាំរយៈពេលជិត ៤០ឆ្នាំ និងការដឹកនាំបែបផ្ដាច់ការតពូជរបស់លោក ហ៊ុន សែន និងបក្ខពួកនាពេលបច្ចុប្បន្នផងដែរ។
ចំណែកការប្លុកវេបសាយកំណត់ត្រា ដែលចេញដោយមជ្ឈមណ្ឌលកម្ពុជាដើម្បីប្រព័ន្ធផ្សព្វផ្សាយឯករាជ្យ (CCIM) ធ្វើឡើងបន្ទាប់ពីវេបសាយនេះបានលាតត្រដាងអំពីការកាត់ដីបឹង និងដែនជម្រកសត្វព្រៃ ព្រមទាំងឧទ្យានជាតិផ្សេងៗពីសំណាក់រដ្ឋាភិបាលប្រគល់ទៅឲ្យសាច់ញាតិ និងគ្រួសាររបស់លោក ហ៊ុន សែន និងឧកញ៉ាដែលស្និទ្ធគ្រួសារត្រកូលហ៊ុន។
លើសពីនេះ ថ្មីៗនេះ វេបសាយកំណត់ត្រា ក៏បានបង្ហាញអំពីទិន្នន័យដែលខ្លួនរកឃើញថា ៨០ភាគរយនៃអ្នកសង្កេតការណ៍បោះឆ្នោតនៅថ្ងៃទី២៣ ខែកក្កដា ឆ្នាំ២០២៣ ខាងមុខនេះមានទំនាក់ទំនងជាមួយគណបក្សកាន់អំណាចផងដែរ។
លើសពីនេះ ការបិទ ឬប្លុកវេបសាយព័ត៌មាន ឌឹ ខេមបូឌា ដេលី និងអាស៊ីសេរី ដែលផ្សាយពីក្រៅប្រទេសនេះ ខណៈបុរសខ្លាំងកាន់អំណាចជិត ៤០ឆ្នាំនៅកម្ពុជាលោក ហ៊ុន សែន បានបិទសារព័ត៌មានឯករាជ្យវីអូឌី (VOD) កាលពីខែកុម្ភៈ ឆ្នាំ២០២៣។
កាលពីខែឧសភា ឆ្នាំ២០២៣ អង្គការអ្នកសារព័ត៌មានគ្មានព្រំដែន (Reporters Without Border) រកឃើញថា សេរីភាពសារព័ត៌មាននៅកម្ពុជាបន្តស្ថិតក្នុងស្ថានភាពអាក្រក់ ដោយសារការធ្វើទុក្ខបុកម្នេញរបស់រដ្ឋាភិបាលកម្ពុជាមកលើប្រព័ន្ធផ្សព្វផ្សាយឯករាជ្យកើនឡើង។
បើតាមសន្ទស្សន៍សេរីភាពសារព័ត៌មានពិភពលោកឆ្នាំ២០២៣ ដែលបានវាយតម្លៃស្ថានភាពសារព័ត៌មានក្នុង ១៨០ប្រទេស ចេញផ្សាយក្នុងទិវាសេរីភាពសារព័ត៌មានពិភពលោកថ្ងៃទី៣ ឧសភា នេះ កម្ពុជាស្ថិតនៅលំដាប់លេខរៀងទី១៤៧ លើ ១៨០ប្រទេសនៅឆ្នាំ២០២៣ ដែលថយពីលេខរៀងទី១៤២ លើ ១៨០ប្រទេសកាលពីឆ្នាំមុន។ កម្ពុជាថយចុះ ១ពិន្ទុ គឺបានតែ ៤២ពិន្ទុនៅឆ្នាំ២០២៣ ធៀបនឹង ៤៣ពិន្ទុនៅឆ្នាំ២០២២៕