មេដឹកនាំបក្សកាន់អំណាច លោក ហ៊ុន សែន ទាមទារឱ្យគណបក្សភ្លើងទៀនទទួលខុសត្រូវលើការអំពាវនាវរបស់ខ្លួនឱ្យប្រជាពលរដ្ឋគូសខ្វែងសន្លឹកឆ្នោតចោលតាមការបង្គាប់បញ្ជារបស់អតីតមេដឹកនាំបក្សប្រឆាំងលោក សម រង្ស៊ី ដែលជាអ្នកនៅពីក្រោយ។
បុរសខ្លាំងខាងរំលោភច្បាប់បិទសំឡេងក្រុមប្រឆាំងលោក ហ៊ុន សែន បានសរសេរលើបណ្ដាញទំនាក់ទំនងតេឡេក្រាមរបស់ខ្លួនកាលពីយប់ថ្ងៃទី១៦ កក្កដា ថា គណបក្សភ្លើងទៀនទើបនឹងចេញសេចក្តីថ្លែងការណ៍ ខណៈសមាជិកដែលបានប្រព្រឹត្តខុស ក៏ទើបនឹងសារភាពកំហុស និងបានបញ្ជាក់ពីការធ្វើខុសរបស់ពួកគេដែរ។
មេដឹកនាំខ្មែរដែលកំពុងដឹកនាំប្រទេសតាមបែបផ្ដាច់ការលោក ហ៊ុន សែន អះអាងថា អ្នកដែលសារភាពកំហុសទាំងនោះបានបញ្ជាក់ថា អ្វីៗដែលពួកគេបានអនុវត្ត គឺធ្វើតាមតែបទបញ្ជារបស់អតីតមេដឹកនាំបក្សប្រឆាំងលោក សម រង្ស៊ី ដែលជាទណ្ឌិតគ្រប់បែបយ៉ាងប៉ុណ្ណោះ ដូច្នេះបញ្ហាគឺនៅត្រង់ថា តើគណបក្សភ្លើងទៀនត្រូវទទួលខុសត្រូវបែបណាចំពោះរឿងនេះ។
ការអះអាងនេះ ធ្វើឡើងបន្ទាប់ពីសមាជិកគណបក្សភ្លើងទៀនត្រូវបានអាជ្ញាធរចាប់ឃុំខ្លួនដោយចោទប្រកាន់ពីបទ ញុះញង់ឱ្យប្រជាពលរដ្ឋគូសបំផ្លាញសន្លឹកឆ្នោតចោល កាលពីពេលថ្មីៗនេះ។
កាលពីថ្ងៃទី១៤ ខែកក្កដា ឆ្នាំ២០២៣ ស្នងការដ្ឋាននគរបាលរាជធានីភ្នំពេញ បានចាប់ខ្លួនសមាជិកគណបក្សភ្លើងទៀន ២នាក់ គឺលោក លី រី ដែលជាសមាជិកគណៈកម្មាធិការនាយក និងលោក ប៊ុន ខេត ជាប្រធានស្ដីទីប្រតិបត្តិរាជធានីភ្នំពេញ ក្រោមបទចោទប្រកាន់ថាពួកគេបានញុះញង់ឱ្យប្រជាពលរដ្ឋគូសខ្វែងសន្លឹកឆ្នោតចោលនៅថ្ងៃបោះឆ្នោត។
ក្រោយពីចាប់ខ្លួន សាលាដំបូងក្រុងភ្នំពេញបានសម្រេចចោទប្រកាន់លើសមាជិកគណបក្សភ្លើងទៀនទាំង ២នាក់នេះពីបទ ញុះញង់បង្កភាពវឹកវរធ្ងន់ធ្ងរដល់សន្តិសុខសង្គម តាមមាត្រា៤៩៤ និង ៤៩៥ នៃក្រមព្រហ្មទណ្ឌ ព្រមទាំងចេញដីកាបង្គាប់ឱ្យឃុំខ្លួនពួកគេភ្លាមៗផងដែរ។
បន្ទាប់ពីតុលាការសម្រេចឃុំខ្លួនពីបទចោទខាងលើ លោក ប៊ុន ខេត ដែលជាប្រធានប្រតិបត្តិស្តីទីគណបក្សភ្លើងទៀន បានចេញវីដេអូសុំទោសមេដឹកនាំបក្សកាន់អំណាចលោក ហ៊ុន សែន ដោយអះអាងថា អ្វីៗដែលលោកបានធ្វើ គឺអនុវត្តតាមតែបញ្ជារបស់អតីតមេដឹកនាំបក្សប្រឆាំងលោក សម រង្ស៊ី ដែលបាននាំឱ្យលោកផ្សព្វផ្សាយទៅកាន់ប្រជាពលរដ្ឋឱ្យគូសខ្វែងសន្លឹកឆ្នោតនៅថ្ងៃបោះឆ្នោតតែប៉ុណ្ណោះ។
យ៉ាងណាក៏ដោយ បន្ទាប់ពីលោក ប៊ុន ខេត ចេញវីដេអូសារភាពកំហុស គណបក្សភ្លើងទៀនក៏បានចេញសេចក្តីថ្លែងការណ៍កាលពីថ្ងៃទី១៦ កក្កដា ផងដែរ ដោយបញ្ជាក់ថា ការចាប់ខ្លួនលោក លី រី ដែលជាសមាជិកគណៈកម្មាធិការនាយក និងលោក ប៊ុន ខេត ជាប្រធានស្ដីទីប្រតិបត្តិរាជធានីភ្នំពេញកាលពីថ្ងៃទី១៤ ខែកក្កដា ឆ្នាំ២០២៣ កន្លងទៅ គឺជារឿងអយុត្តិធម៌បំផុត។
គណបក្សភ្លើងទៀនបញ្ជាក់ថា ខ្លួនតែងប្រកាន់ខ្ជាប់នូវគោលការណ៍អហិង្សា និងសន្តិវិធីក្នុងការធ្វើសកម្មភាពនយោបាយស្របតាមស្មារតីនៃរដ្ឋធម្មនុញ្ញ និងច្បាប់ជាធរមាននានាជានិច្ច ជាពិសេសគឺច្បាប់ស្ដីពីគណបក្សនយោបាយ ដូច្នេះអាជ្ញាធរមានសមត្ថកិច្ចគួរតែដោះលែងសមាជិកគណបក្សភ្លើងទៀនទាំងពីរនាក់នេះឱ្យមានសេរីភាពឡើងវិញនៅពេលនេះ។
ច្បាប់ស្ដីពីការបោះឆ្នោតដែលទើបនឹងកែប្រែនៅមុនការបោះឆ្នោតនេះ ត្រង់មាត្រា១៤២ ចែងថា ជនណាដែលគូសបំផ្លាញសន្លឹកឆ្នោត ដូចជាគូសខ្វែងសន្លឹកឆ្នោត ជាដើម ត្រូវផាកពិន័យពី ៥លានរៀលទៅ ២០លានរៀលដោយមិនទាន់គិតពីទោសព្រហ្មទណ្ឌផ្សេងទៀតឡើយ។
ដំណើរការនៃការបោះឆ្នោតជាតិនាខែកក្កដា ឆ្នាំ២០២៣ នេះ ត្រូវគេមើលឃើញថា ប្រជាពលរដ្ឋជាង ១លាន ៦សែននាក់បានបាត់បង់គណបក្សដែលពួកគេស្រឡាញ់គាំទ្រទាំងស្រុង នោះគឺគណបក្សភ្លើងទៀន ដោយសារតែគណបក្សនេះត្រូវបានមេដឹកនាំបក្សកាន់អំណាចលោក ហ៊ុន សែន ប្រើល្បិចរាំងខ្ទប់មិនឱ្យចូលរួមឈរឈ្មោះក្នុងដំណើរការនៃការបោះឆ្នោតនេះ ក្រោមលេសថា គណបក្សនេះគ្មានលិខិតបញ្ជាក់កំណើត បើទោះបីជាក្រសួងមហាផ្ទៃបានចេញលិខិតបញ្ជក់ថា គណបក្សនេះបានចុះបញ្ជីនៅក្រសួងមហាផ្ទៃដោយស្របច្បាប់ហើយក៏ដោយ។
ចាប់តាំងពីដើមឆ្នាំ២០២៣ មក ត្រូវគេមើលឃើញថា មេដឹកនាំបក្សកាន់អំណាចលោក ហ៊ុន សែន បានប្រើល្បិចនយោបាយគាបសង្កត់បក្សក្រៅរដ្ឋាភិបាលជាបន្តបន្ទាប់ ជាពិសេសគឺគាបសង្កត់ទៅលើមន្ត្រីជាន់ខ្ពស់គណបក្សភ្លើងទៀនយ៉ាងខ្លាំង ក្នុងនោះលោក ថាច់ សេដ្ឋា ត្រូវចាប់ឃុំខ្លួនក្នុងពន្ធនាគារ លោក សុន ឆ័យ ត្រូវរងនូវបណ្តឹង និងរងនូវការរឹបអូសទ្រព្យសម្បត្តិថែមទៀត ដែលធ្វើឱ្យលទ្ធិប្រជាធិបតេយ្យនៅកម្ពុជាធ្លាក់ចុះយ៉ាងធ្ងន់ធ្ងរនៅមុនការបោះឆ្នោតជាតិឆ្នាំ២០២៣ នេះ។
ក្រៅពីរារាំងគណបក្សសង្គ្រោះជាតិ មេដឹកនាំបក្សប្រឆាំងទាំងលោក កឹម សុខា និងលោក សម រង្ស៊ី រួមទាំងគណបក្សភ្លើងទៀនមិនឱ្យចូលរួមការបោះឆ្នោតជាតិនាខែកក្កដា ខាងមុខនេះ មេដឹកនាំបក្សកាន់អំណាចលោក ហ៊ុន សែន បានធ្វើវិសោធនកម្មច្បាប់បោះឆ្នោតដើម្បីគាបសង្កត់មន្ត្រីបក្សក្រៅរដ្ឋាភិបាលឱ្យទៅបោះឆ្នោតផងដែរ ទាំងដែលមេដឹកនាំបក្សកាន់អំណាចរូបនេះបានរារាំងមិនឱ្យគណបក្សរបស់ពួកគេចូលរួមការបោះឆ្នោតផងនោះ៕