30 C
Phnom Penh

អាកាសយានដ្ឋាន​ថ្មី​នៅ​សៀមរាប​ដែល​ចិន​គ្រប់គ្រង នឹង​ដំណើរការ​នៅ​ពាក់កណ្តាល​ខែ​តុលា​នេះ

ដោយ ឌឹ ខេមបូឌា ដេលី

បទវិភាគ

មន្ត្រី​ជាន់ខ្ពស់​នៃ​រដ្ឋាភិបាល​កម្ពុជា​ផ្នែក​អាកាសចរ​ស៊ីវិល អះអាង​ថា អាកាសយានដ្ឋាន​អន្តរជាតិ​ថ្មី​លើ​ទឹកដី​ខេត្ត​សៀមរាប ដែល​ត្រូវ​ប្រគល់​ឱ្យ​ចិន​គ្រប់គ្រង​ជាង​កន្លះ​សតវត្ស នឹង​ដាក់​ឱ្យ​ដំណើរការ​នៅ​ពាក់កណ្តាល​ខែ​តុលា ឆ្នាំ​២០២៣ បន្ទាប់ពី​សាងសង់​អស់​រយៈពេល​ជាង ៣​ឆ្នាំ​ក្នុង​ទំហំ​ទឹកប្រាក់​កម្ចី​ពី​រដ្ឋាភិបាល​ចិន​ជាង ១​ពាន់​លាន​ដុល្លារ​អាមេរិក។

អនុរដ្ឋលេខាធិការ និង​ជា​អ្នក​នាំពាក្យ​អាកាសចរ​ស៊ីវិល លោក ស៊ីន ចាន់សិរីវុត្ថា លើកឡើង​ក្នុង​ពេល​ដែល​សមាគម​ទេសចរណ៍​កម្ពុជា​ទៅ​ចូលរួម​ទស្សនា​អាកាសយានដ្ឋាន​អន្តរជាតិ​សៀមរាប​អង្គរ (SAI) កាលពី​ថ្ងៃទី​១៧ ខែ​កក្កដា ឆ្នាំ​២០២៣ ថា អាកាសយានដ្ឋាន​អន្តរជាតិ​សៀមរាប​អង្គរ​ថ្មី​នេះ​នឹង​ចូលរួម​ចំណែក​យ៉ាង​សំខាន់​ដល់​កំណើន​សេដ្ឋកិច្ច​កម្ពុជា​រយៈពេល​វែង ប្រកប​ដោយ​ចីរភាព ជាពិសេស​នឹង​ជួយ​បង្កើន​សមត្ថភាព​ប្រកួតប្រជែង​របស់​កម្ពុជា ក្នុង​បរិការណ៍​នៃ​សមាហរណកម្ម​សេដ្ឋកិច្ច​តំបន់​អាស៊ាន និង​ពិភពលោក។

លោក ស៊ីន ចាន់សិរីវុត្ថា លើកឡើង​ថា អាកាសយានដ្ឋាន​អន្តជាតិ​នេះ​នឹង​ជួយ​ពង្រីក​សេវាកម្ម​ដឹកជញ្ជូន​អ្នក​ដំណើរ និង​ទំនិញ​តាម​ផ្លូវ​អាកាស​ពី​ប្រទេស​កម្ពុជា​ទៅ​កាន់​តំបន់​ឆ្ងាយៗ និង​ក្នុង​តំបន់​តាមរយៈ​ការ​អនុញ្ញាត​ឱ្យ​អាកាសយាន​ធុន​មធ្យម និង​ធុន​ធំ ដូចជា Airbus 350, Airbus 330 ឬ Boing 787-900 ជាដើម។

មន្ត្រី​អាកាសចរ​ស៊ីវិល​រូប​នេះ​បញ្ជាក់​ថា អាកាសយានដ្ឋាន​ថ្មី​នេះ​មាន​ចំណត​សម្រាប់​ចត​អាកាសយាន​ចំនួន ៣៨​ចំណត និង​អាច​ទទួល​អ្នក​ដំណើរ​តាម​ផ្លូវ​អាកាស​បាន ៧​លាន​នាក់​ក្នុង​មួយ​ឆ្នាំ​សម្រាប់​ឆ្នាំ​២០២៣ និង​ឈាន​ទៅ​ទទួល​អ្នក​ដំណើរ​បាន ១២​លាន​នាក់​ក្នុង​មួយ​ឆ្នាំ​ចាប់ពី​ឆ្នាំ​២០៤០។

របាយការណ៍​អាកាសចរ​ស៊ីវិល បង្ហាញ​ថា អាកាសយានដ្ឋាន​អន្តរជាតិ​សៀមរាប​អង្គរ (SAI) អាច​ផ្ទុក​ទំនិញ​តាម​ផ្លូវ​អាកាស​ចំនួន ១​ម៉ឺន​តោន​ក្នុង​មួយ​ឆ្នាំ​ចាប់ពី​ឆ្នាំ​២០២៣ និង ២​ម៉ឺន ៦​ពាន់​តោន​ក្នុង​មួយ​ឆ្នាំ​ចាប់ពី​ឆ្នាំ​២០៤០ ព្រមទាំង​អាច​ទទួល​ជើង​ហោះហើរ​បាន​ពី ៦៥៨០០​ជើង​ក្នុង​មួយ​ឆ្នាំ​ចាប់ពី​ឆ្នាំ​២០២៣ ទៅ ១១២៧០០​ជើង​ក្នុង​មួយ​ឆ្នាំ​ចាប់ពី​ឆ្នាំ​២០៤០។

ទាក់ទិន​នឹង​បញ្ហា​នេះ ក្នុង​ពិធី​ចុះ​ត្រួតពិនិត្យ​សំណង់​អាកាសយានដ្ឋាន​អន្តរជាតិ​ខេត្ត​សៀមរាប កាលពី​ថ្ងៃទី​៣ ខែ​មេសា ឆ្នាំ​២០២២ លោក ហ៊ុន សែន ធ្លាប់​បាន​អះអាង​ថា ការ​វិនិយោគ​លើ​ព្រលាន​យន្តហោះ​ថ្មី​នៅ​ខេត្ត​សៀមរាប នេះ គឺជា​ការ​វិនិយោគ​ទាំងស្រុង​ដោយ​ក្រុមហ៊ុន​ចិន ដែល​មាន​ទុន​ជាង ១​ពាន់​លាន​ដុល្លារ​អាមេរិក ប៉ុន្តែ​ចិន​ត្រូវ​គ្រប់គ្រង​រយៈពេល ៥៥​ឆ្នាំ ទើប​កម្ពុជា​ក្លាយ​ជា​ម្ចាស់​កម្មសិទ្ធិ​វិញ​ម្តង។

លោក ហ៊ុន សែន ដែល​ពលរដ្ឋ​ខ្មែរ​ចាត់ទុក​ថា​ជា​មេដឹកនាំ​ចូលចិត្ត​ខ្ចី​លុយ​បរទេស បាន​អះអាង​ថា ការ​វិនិយោគ​ជាមួយ​ចិន​ក្នុង​ការ​សាងសង់​ព្រលាន​យន្តហោះ​អន្តរជាតិ​ថ្មី​នេះ គឺ​ប្រៀប​ដូចជា​ចិន​មាន​ម្សៅ​ស្ទើរតែ​ទាំងស្រុង​សម្រាប់​ធ្វើ​នំ​ឲ្យ​ខ្មែរ​ហូប ខណៈ​កម្ពុជា​មាន​ត្រឹមតែ​ដី​សម្រាប់​សាងសង់​ព្រលាន​យន្តហោះ​នេះ​តែប៉ុណ្ណោះ។

យ៉ាងណា​ក៏ដោយ នាយក​ប្រតិបត្តិ​មជ្ឈមណ្ឌល​សម្ព័ន្ធភាព​ការងារ និង​សិទ្ធិមនុស្ស (សង់ត្រាល់) លោក មឿន តុលា ធ្លាប់​បាន​សំដែង​ការ​ព្រួយបារម្ភ​ថា ប្រសិនបើ​ការ​សាងសង់​ព្រលាន​យន្តហោះ​អន្តរជាតិ​ថ្មី​នេះ​ជា​ប្រាក់កម្ចី​របស់​ចិន ហើយ​ផ្តល់​សិទ្ធិ​ឱ្យ​ចិន​កាន់កាប់​ប្រមូល​ផល​ប្រយោជន៍​តាម​ចិត្ត​នៅ​ពេល​ដាក់​ដំណើរការ​នោះ គឺ​មាន​ន័យ​ថា ចិន​កំពុង​ធ្វើ​ស្រែ​លើ​ខ្នង​ខ្មែរ​យ៉ាង​ពិតប្រាកដ។

ក្រុម​អ្នក​សង្កេតការណ៍​លើកឡើង​ថា ការ​ដាក់​វិនិយោគ​របស់​ចិន លើ​ព្រលាន​យន្តហោះ​ថ្មី​នេះ​មិន​បាន​ផ្តល់​ផលប្រយោជន៍​សម្រាប់​កម្ពុជា និង​ពលរដ្ឋ​ខ្មែរ​នោះ​ទេ ព្រោះ​ថា​បើ​គិត​លើ​ចំណូល​របស់​ពលរដ្ឋ​ខ្មែរ​ដែល​ទទួល​បាន​ពី​ការ​ធ្វើ​កម្មករ និង​ការ​លក់ដូរ​អីវ៉ាន់​បន្តិចបន្តួច​នៅ​ក្នុង​ព្រលាន​យន្តហោះ​ថ្មី​នេះ គឺ​ទទួល​បាន​ផល​តិចតួច​ណាស់ បើ​ធៀប​ទៅ​នឹង​ក្រុមហ៊ុន​ចិន​ដែល​ត្រូវ​ប្រមូល​លុយ​ពី​សេវាកម្ម​ទេសចរណ៍​ដែល​ចូល​មក​ព្រលាន​នេះ​ក្នុង​រយៈពេល ៥៥​ឆ្នាំ​នោះ ខណៈ​អ្នក​ប្រកប​អាជីវកម្ម​ធំៗ គឺ​សុទ្ធសឹងតែ​ជា​ឈ្មួញ​របស់​ចិន​ទាំងអស់។

អាកាសយានដ្ឋាន​អន្តរជាតិ​សៀមរាប-អង្គរ​ថ្មី បាន​ចាប់ផ្តើម​សាងសង់​កាលពី​ខែ​មីនា ឆ្នាំ​២០២០ ដោយ​ក្រុមហ៊ុន Angkor International Airport Investment (Cambodia) Co,Ltd (AIAI) លើ​ផ្ទៃដី​ប្រមាណ​ជា ៧០០​ហិកតារ ស្ថិត​នៅ​ក្នុង​ភូមិ​ក្រៀលពង ឃុំ​ពពេល និង​ភូមិ​ប្រវ៉ាល ឃុំ​តាយ៉ែក ស្រុក​សូទ្រនិគម ខេត្ត​សៀមរាប ដែល​មាន​ចម្ងាយ​ប្រមាណ ៥០​គីឡូម៉ែត្រ​ពី​ទីប្រជុំជន​ក្រុង​សៀមរាប និង​មាន​ចម្ងាយ ៤០​គីឡូម៉ែត្រ​ពី​រមណីយដ្ឋាន​អង្គរ ហើយ​ព្រលាន​យន្តហោះ​ថ្មី​នេះ​បាន​សាងសង់​រួចរាល់​បាន ៩៨% ហើយ​នៅ​ពេលនេះ៕

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស