29 C
Phnom Penh

សមត្ថកិច្ច​ចាប់​ឃុំ​ខ្លួន​ពលរដ្ឋ​ជិត ៥០​នាក់ ពី​បទ​ញុះញង់​ឱ្យ​បំផ្លាញ​ការ​បោះឆ្នោត

ដោយ ឌឹ ខេមបូឌា ដេលី

បទវិភាគ

សមត្ថកិច្ច​អះអាង​ថា បាន​ចាប់​ឃុំ​ខ្លួន​ពលរដ្ឋ​ជិត ៥០​នាក់​នៅ​ថ្ងៃទី​២៤ កក្កដា ពី​បទ​ញុះញង់​ឱ្យ​បំផ្លាញ​ការ​បោះឆ្នោត ខណៈ​មេដឹកនាំ​បក្ស​កាន់​អំណាច​លោក ហ៊ុន សែន ព្រមាន​អនុវត្ត​វិធានការ​ច្បាប់ ប្រសិនបើ​ពួកគេ​មិន​សារភាព​កំហុស។

សមត្ថកិច្ច​កម្ពុជា​បាន​បង្ហាញ​ពី​លទ្ធផល​ប្រតិបត្តិការ​បន្ទាប់ពី​ខ្លួន​បាន​ដាក់​កម្លាំង​ចុះ​ស្រាវជ្រាវ​កាលពី​ថ្ងៃទី​២៣ ខែ​កក្កដា ឆ្នាំ​២០២៣ នេះ​ថា អ្នក​ដែល​ត្រូវ​ចាប់​ខ្លួន​ពី​បទ​ញុះញង់​ឱ្យ​មាន​ការ​បំផ្លាញ​ការ​បោះឆ្នោត ដែល​ពួកគេ​បាន​ធ្វើ​សកម្មភាព​ញុះញង់​តាម​ប្រព័ន្ធ​ទំនាក់ទំនង​តេឡេក្រាម​ដែល​មាន​ឈ្មោះ​ថា «Sabai សប្បាយ» នោះ បាន​កើនឡើង​ដល់ ៤៤​នាក់​ហើយ​នៅ​ថ្ងៃ​ចន្ទ​ដើម​សប្តាហ៍​នេះ។

អាជ្ញាធរ​កម្ពុជា​បញ្ជាក់​ថា ពួកគេ​បាន​ធ្វើ​សកម្មភាព​ញុះញង់​ឱ្យ​មាន​ការ​បំផ្លាញ​ការ​បោះឆ្នោត​នៅ​ថ្ងៃ​បោះឆ្នោត​ដែល​រៀបចំ​ដោយ​អតីត​មេដឹកនាំ​បក្ស​ប្រឆាំង​លោក សម រង្ស៊ី ខណៈ​អ្នក​ដែល​ត្រូវ​បាន​ចាប់​ខ្លួន​នៅ​នឹង​កន្លែង​បោះឆ្នោត​ដោយសារ​ពួកគេ​មាន​ចេតនា​បំផ្លាញ​សន្លឹកឆ្នោត ត្រូវ​សមត្ថកិច្ច​ចាប់​ឃុំ​ខ្លួន​ចំនួន ៣​នាក់​ដែរ ដូចជា​នៅ​ខេត្ត​ត្បូងឃ្មុំ និង​នៅ​រាជធានី​ភ្នំពេញ ជាដើម។

កាលពី​ថ្ងៃទី​២៣ ខែ​កក្កដា ក្រោយ​ដំណើរការ​នៃ​ការ​បោះឆ្នោត​ត្រូវ​បាន​បញ្ចប់​ភ្លាមៗ មេដឹកនាំ​បក្ស​កាន់​អំណាច​លោក ហ៊ុន សែន បាន​ចេញ​ខ្សែអាត់​សំឡេង​ប្រវែង​ជាង ១០​នាទី ព្រមាន​ទៅ​កាន់​អ្នក​ដែល​បាន​គូស​ខ្វែង​សន្លឹកឆ្នោត និង​អ្នក​ដែល​រង​នូវ​ការ​ចោទប្រកាន់​តាម​ប្រព័ន្ធ​តេឡេក្រាម​ថា​បាន​ញុះញង់​ឱ្យ​បំផ្លាញ​ការ​បោះឆ្នោត​ថា លោក​បាន​ស្គាល់​អត្តសញ្ញាណ​អ្នក​ដែល​ញុះញង់​ឱ្យ​បំផ្លាញ​ការ​បោះឆ្នោត​តាម​ប្រព័ន្ធ​ទំនាក់ទំនង​តេឡេក្រាម​ទាំងនោះ​អស់​ហើយ ប៉ុន្តែ​ពួកគេ​ក៏​មិន​ចាំបាច់​ភ័យ​ស្លន់ស្លោ​រត់​ចេញពី​កម្ពុជា​នោះ​ដែរ។

លោក ហ៊ុន សែន បញ្ជាក់​ថា បើ​ពួកគេ​ចូល​ខ្លួន​មក​សុំទោស​នូវ​ទង្វើ​ដែល​ខ្លួន​បាន​ធ្វើ នោះ​ពួកគេ​នឹង​ទទួល​បាន​ការ​លើកលែង​ទោស ប៉ុន្តែ​បើ​ពួកគេ​មិន​សារភាព​កំហុស​ទេ ការ​អនុវត្ត​ច្បាប់​នឹង​ត្រូវតែ​ធ្វើឡើង​ដោយ​គ្មាន​ករណី​លើកលែង​ចំពោះ​បុគ្គល​ណា​មួយ​ឡើយ។

ជុំវិញ​បញ្ហា​នេះ អគ្គលេខាធិការ​គណៈកម្មាធិការ​ជាតិ​រៀបចំ​ការ​បោះឆ្នោត លោក ទេព នីថា បាន​លើកឡើង​កាលពី​ថ្ងៃទី​២៣ កក្កដា ថា ការ​គូស​បំផ្លាញ​សន្លឹកឆ្នោត​មិនមែន​ជា​កំហុស​ទេ ប៉ុន្តែ​កំហុស​គឺ​នៅ​ត្រង់​ថា ពួកគេ​បាន​យក​សន្លឹកឆ្នោត​ទាំងនោះ​ទៅ​បង្ហោះ​ជា​សាធារណៈ ដែល​បំផ្លាញ​ដល់​ការណ៍​សម្ងាត់​នៃ​ការ​បោះឆ្នោត​ប៉ុណ្ណោះ។

ចំណែក​ប្រធាន​ក្រុម​មេធាវី​របស់​គណបក្ស​ប្រជាជន​កម្ពុជា លោក គី តិច បាន​ស្នើ​ដល់​ក្រុម​មេធាវី​ទាំងអស់​ឱ្យ​សហការ​ពិនិត្យ ស្រាវជ្រាវ​តាម​បណ្ដាញ​សង្គម​នានា ប្រមូល​យក​ភស្តុតាង​ដែល​បញ្ជាក់​ចំពោះ​បុគ្គល​ទាំងឡាយ​ណា​ដែល​បាន​ថត​ផ្សាយ​អំពី​ការ​គូស​សញ្ញា​ខ្វែង​លើ​សន្លឹកឆ្នោត ឬ​ធ្វើ​ឲ្យ​ខូច​សន្លឹកឆ្នោត ឬ​បំផុស​ឲ្យ​អ្នកដទៃ​ប្រព្រឹត្ត​អំពើ​បំពាន​ច្បាប់ ដើម្បី​រៀបចំ​បណ្តឹង​តាម​វិធានការ​ច្បាប់។

ដោយឡែក​អ្នក​នាំពាក្យ​ក្រសួង​យុត្តិធម៌ លោក គឹម សន្តិភាព ព្រមាន​កាលពី​ថ្ងៃទី​២៣ កក្កដា ថា សមត្ថកិច្ច​កំពុង​ស៊ើបអង្កេត​ស្រាវជ្រាវ​ដើម្បី​ប្រមូល​ភស្តុតាង​ចំពោះ​បុគ្គល​ណា​ដែល​ថត​ផ្សាយ​អំពី​ការ​គូស​ខ្វែង​លើ​សន្លឹកឆ្នោត ឬ​ធ្វើ​ឲ្យ​ខូច​សន្លឹកឆ្នោត ឬ​បំផុស​ឲ្យ​អ្នកដទៃ​ប្រព្រឹត្ត​អំពើ​បំពាន​ច្បាប់​បោះឆ្នោត ជាដើម តាម​បណ្ដាញ​សង្គម​នានា ដើម្បី​ចាត់​វិធានការ​ច្បាប់​ដោយ​គ្មាន​ការ​លើកលែង​ដាច់ខាត។

ជុំវិញ​ករណី​ផ្សព្វផ្សាយ​សន្លឹកឆ្នោត​ដែល​ត្រូវ​បាន​គូស​ខ្វែង​នេះ អតីត​មេដឹកនាំ​បក្ស​ប្រឆាំង​លោក សម រង្ស៊ី បាន​បង្ហោះ​សន្លឹកឆ្នោត​ដែល​ពលរដ្ឋ​គូស​ខ្វែង​នៅ​ថ្ងៃ​បោះឆ្នោត​ដែល​លោក​ទទួល​បាន​ជាបន្តបន្ទាប់ ហើយ​ក្រៅពី​គូស​សញ្ញា​ខ្វែង​នៅ​លើ​សន្លឹកឆ្នោត ក៏​មាន​សរសេរ​អក្សរ​ផ្សេងៗ​ផង​ដែរ មាន​ដូចជា​ពាក្យ​ថា «កែម ឡី» «ប្រជាធិបតេយ្យ​ក្លែងក្លាយ» «លោក ហ៊ុន សែន» និង «លោក ហ៊ុន ម៉ាណែត ជា​ជន​កំសាក» «ហ៊ុន សែន ក្បត់​ជាតិ» និង​ពាក្យ​ថា «បរាជ័យ​ជន​ផ្ដាច់ការ» ជាដើម។

ទាក់ទិន​នឹង​ការ​គូស​ខ្វែង​បំផ្លាញ​សន្លឹកឆ្នោត​នេះ គ.ជ.ប កាលពី​យប់​ថ្ងៃទី​២៣ កក្កដា បាន​បង្ហាញ​ថា សន្លឹកឆ្នោត​មិន​បាន​ការ​ក្នុង​ការ​បោះឆ្នោត​ជ្រើសតាំង​តំណាងរាស្ត្រ​ឆ្នាំ​២០២៣ នេះ មាន​ចំនួន​តែ​ជាង ៤៤​ម៉ឺន​សន្លឹក​ប៉ុណ្ណោះ​ក្នុង​ចំណោម​សន្លឹកឆ្នោត​ដែល​មាន​អ្នក​ចូលរួម​បោះឆ្នោត​ជាង ៨​លាន​នាក់​នោះ។

ច្បាប់​ស្ដីពី​ការ​បោះឆ្នោត​ដែល​ទើប​នឹង​កែប្រែ​នៅ​មុន​ការ​បោះឆ្នោត​នេះ ត្រង់​មាត្រា​១៤២ ចែង​ថា ជន​ណា​ដែល​គូស​បំផ្លាញ​សន្លឹកឆ្នោត ដូចជា​គូស​ខ្វែង​សន្លឹកឆ្នោត ជាដើម ត្រូវ​ផាក​ពិន័យ​ពី ៥​លាន​រៀល​ទៅ ២០​លាន​រៀល ដោយ​មិន​ទាន់​គិត​ពី​ទោស​ព្រហ្មទណ្ឌ​ផ្សេង​ទៀត​ឡើយ៕

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស