32 C
Phnom Penh

សារព័ត៌មាន​អន្តរជាតិ​ធំៗ​ហៅ​ជ័យជម្នះ​របស់ CPP ដូច​នឹង​សេះ​មាន​តែ​មួយ​ក្បាល​រត់​ប្រណាំង​លើ​ទីលាន​ប្រកួត

ដោយ ឌឹ ខេមបូឌា ដេលី

បទវិភាគ

រាជាណាចក្រ​កម្ពុជា ដែល​ស្ថិត​នៅ​ក្នុង​តំបន់​អាស៊ី​អាគ្នេយ៍ បាន​ធ្វើ​ឲ្យ​ភ្ញាក់ផ្អើល​ដល់​ប្រទេស​ជាច្រើន​នៅ​ក្នុង​តំបន់ និង​ក្នុង​ពិភពលោក ការ​ដែល​ប្រទេស​មួយ​នេះ​បាន​ឆ្លងកាត់​ការ​បោះឆ្នោត​សភា​ជា​ថ្មី​ទៀត​ជាមួយ​នឹង​ការ​ផ្ដួល​គូប្រកួត​មួយ​ដ៏​ខ្លាំង​មិន​ឲ្យ​ឡើង​សង្វៀន​ប្រកួត។

គេ​អាច​និយាយ​បាន​ថា ការ​បោះឆ្នោត​ថ្ងៃទី​២៣ កក្កដា ទោះ​ជា​មាន​គណបក្ស​ផ្សេងៗ​ទៀត​ដល់​ទៅ ១៧ ចូលរួម​ប្រកួត​ក៏ដោយ តែ​គ្មាន​គណបក្ស​ណា​មួយ​អាច​មាន​កម្លាំង​ប្រកួត​ស្មើ​នឹង​គណបក្ស​កំពុង​កាន់​អំណាច​របស់​លោក​នាយករដ្ឋមន្ត្រី ហ៊ុន សែន នោះ​ទេ។

គណបក្ស​ទាំង ១៧ នោះ​ត្រូវ​គេ​ប្រៀប​បាន​នឹង​សេះ​ដែល​គ្មាន​កម្លាំង​ថាមពល​មាំមួន ដើម្បី​រត់​លើ​ទីលាន​ប្រកួត​ដ៏​ស្វិតស្វាញ​ជាមួយ​នឹង​បក្ស​ប្រជាជន​កម្ពុជា​នោះ​ទេ។

បក្ស​មួយ​ដែល​ត្រូវ​បាន​ចាត់ទុក​ថា​មាន​កម្លាំង​ប្រហាក់ប្រហែល​នឹង​គណបក្ស​ប្រជាជន​កម្ពុជា គឺ​គណបក្ស​ភ្លើង​ទៀន​របស់​អ្នក​ប្រជាធិបតេយ្យ​មាន​និន្នាការ​ទៅ​រក​ពួក​បស្ចិម​ប្រទេស ត្រូវ​បាន​ផ្ដួល​រំលំ​មុន​ការ​ប្រកួត​ចូល​មក​ដល់។

បក្ស​នេះ​គេ​អាច​ប្រដូច​ទៅ​នឹង​សេះ​មួយ​ក្បាល​ដែល​មាន​កម្លាំង​មាំមួន​ស្វាហាប់​ប្រាជ្ញា​វាងវៃ អាច​ប្រកួត​លើ​ទីលាន​ជាមួយ​នឹង​គណបក្ស​ប្រជាជន​កម្ពុជា ដែល​ប្រដូច​បាន​នឹង​សេះ​មួយ​ក្បាល​មាន​ថាមពល​ដ៏​ខ្លាំង​បំផុត។ ការ​ប្រកួត​រយៈពេល​មួយ​ខែ​លើ​ទីលាន​ប្រកួត​ដែល​មិន​មាន​ការ​ជក់​ចិត្ត​ពី​ទស្សនិកជន និង​អ្នក​តាមដាន ទីបំផុត​មាន​សេះ​តែ​មួយ​ក្បាល​គត់ គឺ​គណបក្ស​ប្រជាជន​កម្ពុជា​រត់​ដល់​គោលដៅ ហើយ​ដណ្ដើម​បាន​ពានរង្វាន់​សឹងតែ​ម្នាក់​ឯង។

ចំណែក​បក្ស ១៧ ទៀត គ្មាន​កម្លាំង​ប្រយុទ្ធ​ទាល់តែសោះ គឺ​គ្មាន​កម្លាំង​រត់​ទាល់តែសោះ។

ដូច្នេះ បក្ស​កាន់​អំណាច​រត់​ទៅ​អង្គុយ​កៅអី​សភា​បាន​មុន គឺ​បាន ១២០​អាសនៈ ហើយ​ទុក​តែ ៥​កៅអី​ប៉ុណ្ណោះ​ឲ្យ​គណបក្ស​រាជា​និយម​មួយ​ដែល​ធ្លាប់​ឈ្នះ​ឆ្នោត​ឆ្នាំ​១៩៩៣ ចូល​ទៅ​អង្គុយ​កៅអី​ក្នុង​រដ្ឋសភា​អាណត្តិ​ថ្មី​នេះ។ គេ​ថា​វត្តមាន​បក្ស​រាជា​និយម​នៅ​ក្នុង​រដ្ឋសភា គឺជា​ការ​កំដរ​បរិយាកាស​នយោបាយ​ដែល​មិន​ពេញ​ភ្នែក​របស់​អ្នក​ទស្សនា។

ជ័យជម្នះ​របស់​គណបក្ស​ប្រជាជន​កម្ពុជា​ប្រៀប​បាន​សេះ​មួយ​ក្បាល​រត់​លើ​ទីលាន​ប្រណាំង​តែ​ម្នាក់​ឯង​នេះ គឺ​ការពិត ការ​ប្រកួត​នេះ​មិន​បាន​ផ្ដល់​បរិយាកាស​ឲ្យ​អ្នក​តាមដាន​មើល​ពេញ​ភ្នែក​នោះ​ទេ ដែល​គេ​ថា​ការ​បោះឆ្នោត​នេះ​មិន​ប្រព្រឹត្ត​ទៅ​ដោយ​សេរី​នយោបាយ​បើក​ចំ​ត្រឹមត្រូវ​តម្លាភាព​នោះ​ទេ ខណៈ​បក្ស​ដ៏​ខ្លាំង​មួយ​ត្រូវ​បាន​ផ្ដួល​មុន​ការ​ប្រកួត។

ដូច​នេះ​ហើយ បាន​ជា​បណ្ដាញ​ផ្សាយ​ព័ត៌មាន​ធំៗ​មាន​ដូចជា​បណ្ដាញ​ផ្សាយ​ព័ត៌មាន BBC, Aljazeera, CNN, CNA, ABC, បណ្ដាញ​ផ្សាយ​ព័ត៌មាន​ជប៉ុន ដូចជា ASIA TIMES, NIKKEI REVIEW, ASIA SHIMBUN ទីភ្នាក់ងារ​សារព័ត៌មាន​រ៉យទ័រ, AP, UPI, The New York Times ជាដើម សុទ្ធតែ​បាន​លើកឡើង​អំពី​សេរីភាព​នយោបាយ​នៅ​កម្ពុជា​ក្រោម​ប្រព័ន្ធ​បោះឆ្នោត​មួយ​ដែល​ពលរដ្ឋ​ភ័យ​ខ្លាច។

បណ្ដាញ​ព័ត៌មាន​ទាំងនេះ​បាន​ធ្វើ​អត្ថាធិប្បាយ និង​ធ្វើការ​វិភាគ​អំពី​បរិបទ​នយោបាយ​នៅ​កម្ពុជា​តាមរយៈ​ព្រឹត្តិការណ៍​នៃ​ការ​បោះឆ្នោត​ថ្ងៃទី​២៣ កក្កដា ដែល​គូប្រកួត​មួយ​ត្រូវ​បាន​ផ្ដួល​រលំ​មុន មិន​ឲ្យ​ចូលរួម​ប្រកួត ហើយ​ទីបំផុត​គណបក្ស​កាន់​អំណាច​ឈ្នះ​ឆ្នោត​ភ្លូកទឹក​ភ្លូកដី​ដូច​នឹង​ការ​ឈ្នះ​ឆ្នោត​ឆ្នាំ​២០១៨ ដែល​គណបក្ស​ប្រឆាំង​ធំ​បំផុត គឺ​គណបក្ស​សង្គ្រោះ​ជាតិ​ត្រូវ​បាន​រំលាយ។

ឥឡូវ​នេះ ពេលវេលា​ដែល​ធ្វើ​ឲ្យ​អ្នក​សង្កេតការណ៍​តាមដាន​បន្ដ​ទៀត​នោះ គឺ​ការ​ផ្ទេរ​តំណែង​នាយករដ្ឋមន្ត្រី​ពី​លោក ហ៊ុន សែន ទៅ​ឲ្យ​កូនប្រុស​របស់​លោក គឺ​ឧត្តមសេនីយ៍ ហ៊ុន ម៉ាណែត។

តាម​ព័ត៌មាន និង​ការ​បង្ហើប​ព័ត៌មាន គណៈរដ្ឋមន្ដ្រី​របស់​លោក ហ៊ុន ម៉ាណែត បាន​អនុម័ត​ហើយ​ដោយ​គណបក្ស​ប្រជាជន​កម្ពុជា គឺ​នៅ​សល់​តែ​ការ​ប្រកាស​សមាសភាព​តែប៉ុណ្ណោះ​ជាមួយ​នឹង​ការ​ដែល​លោក ហ៊ុន ម៉ាណែត ត្រូវ​ចូល​ខ្លួន​ទៅ​រដ្ឋសភា ដើម្បី​បោះឆ្នោត​ឲ្យ​បង្កើត​រដ្ឋាភិបាល​ដោយ​គេ​រំពឹង​ជាស្រេច​ថា ព្រះមហាក្សត្រ​របស់​រាជាណាចក្រ​កម្ពុជា នឹង​តែងតាំង​អ្នក​នយោបាយ​វ័យ​ក្មេង​ដែល​មាន​ការ​សិក្សា​ជាន់ខ្ពស់​ពី​សហរដ្ឋ​អាមេរិក ឲ្យ​ចូល​កាន់​តំណែង​ជំនួស​ឪពុក​របស់​ខ្លួន គឺ​លោក ហ៊ុន សែន ដែល​បាន​កាន់​អំណាច ៤២​ឆ្នាំ​បើ​រាប់​ពី​ឆ្នាំ​១៩៨៥ មក​ថា​ឋានៈ​ជា​នាយករដ្ឋមន្ត្រី ប៉ុន្តែ​លោក​កាន់​អំណាច​នៅ​ក្នុង​ភាព​ចម្រូងចម្រាស​នៃ​ការ​បោះឆ្នោត ៦​លើក​មក​ហើយ។ ចំណែក​ការ​បោះឆ្នោត​សភា​អាណត្តិ​ទី​៧ នេះ ក៏​ស្ថិត​ក្នុង​ភាព​ចម្រូងចម្រាស​កាន់តែ​ធ្ងន់ និង​អាក្រក់​ដូច​ឆ្នាំ​២០១៨។

គេហទំព័រ​កាសែត The Guardian បាន​ស្រង់​សម្ដី​លោក Phil Robertson តំណាង​អង្គការ Human Rights Watch ប្រចាំ​តំបន់​អាស៊ី ដែល​បាន​លើកឡើង​ថា លោក ហ៊ុន សែន បាន​ផ្តួល​រំលំ​ចោល​ទាំងស្រុង និង​ជា​រៀង​ដរាប​នូវ​សសរ​គ្រឹះ​ប្រជាធិបតេយ្យ​នៅ​កម្ពុជា ដោយ​ដាក់​ជំនួស​មក​វិញ​នូវ​របប​ដឹកនាំ​ផ្ដាច់ការ អំណាច​ត​ពូជ ដូចជា​ការ​ចម្លង​តាម​ទាំងស្រុង​ពី​កំពូល​រដ្ឋ​ផ្ដាច់ការ​នៅ​កូរ៉េខាងជើង៕

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស