 បានអបអរសាទរគណបក្សប្រជាជនកម្ពុជាដឹកនាំដោយលោក ហ៊ុន សែន ដែលឈ្នះការបោះឆ្នោតជ្រើសតាំងតំណាងរាស្ត្រនីតិកាលទី៧ ដោយមិនមានគណបក្សប្រឆាំងចូលរួមប្រកួតប្រជែង។){kind=link}
ប្រធានាធិបតីចិន លោក ស៊ី ជីនពីង (Xi Jinping) បានអបអរសាទរគណបក្សប្រជាជនកម្ពុជាដឹកនាំដោយលោក ហ៊ុន សែន ដែលឈ្នះការបោះឆ្នោតជ្រើសតាំងតំណាងរាស្ត្រនីតិកាលទី៧ ដោយមិនមានគណបក្សប្រឆាំងចូលរួមប្រកួតប្រជែង។
លោក ស៊ី ជីនពីង បានចេញលិខិតអបអរសាទរបុរសខ្លាំងក្រាញអំណាចជិត ៤០ឆ្នាំនៅកម្ពុជា លោក ហ៊ុន សែន តាមរយៈស្ថានទូតចិនប្រចាំនៅកម្ពុជា នាព្រឹកថ្ងៃទី២៥ ខែកក្កដា ឆ្នាំ២០២៣។
បើតាមខ្លឹមសារលិខិតរបស់មេដឹកនាំប្រទេសកុម្មុយនីស្ត លោក ស៊ី ជីនពីង (Xi Jinping) បាននិយាយថា ចិននឹងបន្តគាំទ្រដល់កម្ពុជាដើម្បីបន្តជំហានអភិវឌ្ឍប្រទេសដែលស័ក្តិសមនឹងលក្ខខណ្ឌរបស់ជាតិ ដោយចិនមើលឃើញថា ការដឹកនាំរបស់លោក ហ៊ុន សែន នេះសម្រេចបាននូវស្ថិរភាពនយោបាយ សេដ្ឋកិច្ច ការអភិវឌ្ឍ ជីវភាពស្តង់ដារ និងមានកេរ្តិ៍ឈ្មោះទាំងនៅលើឆាកអន្តរជាតិ និងក្នុងតំបន់។
មេដឹកនាំប្រទេសកុម្មុយនីស្តរូបនេះថា ចិនត្រៀមខ្លួនរួចជាស្រេចក្នុងការធ្វើការជាមួយលោក ហ៊ុន សែន ដើម្បីពង្រឹងឲ្យកាន់តែស៊ីជម្រៅនូវការផ្លាស់ប្ដូរ និងកិច្ចសហប្រតិបត្តិការរវាងភាគីទាំងពីរ និងនៅគ្រប់វិស័យ ដោយសំដៅចូលរួមជាមួយគ្នាក្នុងការកសាងសហគមន៍ចិន-កម្ពុជាប្រកបដោយគុណភាពខ្ពស់ កម្រិតខ្ពស់ និងស្តង់ដារខ្ពស់ ដែលភ្ជាប់ជាមួយអនាគតរួមនៅក្នុងយុគសម័យថ្មីដើម្បីផលប្រយោជន៍ប្រទេស និងប្រជាជននៃប្រទេសទាំងពីរ។
លោក ស៊ី ជីនពីង (Xi Jinping) ថា ចិននិងកម្ពុជា គឺជាសហគមន៍មួយដែលមានអនាគតរួម ខណៈគណៈកម្មាធិការមជ្ឈិមនៃគណបក្សកុម្មុយនីស្ដចិន បានផ្សារភ្ជាប់យ៉ាងមានសារសំខាន់នៅក្នុងកិច្ចសហប្រតិបត្តិការប្រកបដោយមិត្តភាពជាមួយគណៈកម្មាធិការកណ្ដាលនៃគណបក្សប្រជាជនកម្ពុជា។
ចំណែកសភាសង្គមស៊ីវិលនៃសហព័ន្ធរុស្ស៊ី ក៏បានចេញសេចក្តីថ្លែងការណ៍រួមកាលពីថ្ងៃទី២៤ ខែកក្កដា ឆ្នាំ២០២៣ ដោយហៅកាត់ការបោះឆ្នោតដែលរៀបចំដោយគណៈកម្មាធិការរៀបចំការបោះឆ្នោតក្រោមបញ្ជារបស់លោក ហ៊ុន សែន ថាធ្វើឡើងប្រកបដោយសុវត្ថិភាព ឯករាជ្យមិនលម្អៀង មានវិជ្ជាជីវៈ តម្លាភាព ស្របតាមស្តង់ដារអន្តរជាតិ បទបញ្ជា និងនីតិវិធីនៃការបោះឆ្នោតនៅកម្ពុជា។ លើសពីនេះ សភាសង្គមស៊ីវិលនៃប្រទេសកុម្មុយនីស្តថានៅថ្ងៃបោះឆ្នោត ខ្លួនមិនឃើញមានអំពើហិង្សា ឬបណ្តឹងតវ៉ាពីអ្នកបោះឆ្នោត បេក្ខជនគណបក្សនយោបាយ ភ្នាក់ងារគណបក្សនយោបាយ អ្នកសង្កេតការណ៍ជាតិ ឬអ្នកសារព័ត៌មានណាមួយឡើយ ខណៈសកម្មភាពបង្ខិតបង្ខំ គំរាមកំហែង ឬទិញសន្លឹកឆ្នោតក៏មិនមានដែរ។
ការចេញលិខិតអបអរសាទរលោក ហ៊ុន សែន ពីសំណាក់ប្រធានាធិបតីចិន និងការការពារដំណើរការបោះឆ្នោតនៅកម្ពុជាថាត្រឹមត្រូវ សេរី និងយុត្តិធម៌ពីសំណាក់សភាសង្គមស៊ីវិលនៃសហព័ន្ធរុស្ស៊ី ធ្វើឡើងខណៈសហរដ្ឋអាមេរិកបង្ហាញការសោកស្ដាយ និងចាត់ទុកការបោះឆ្នោតនៅកម្ពុជានាថ្ងៃទី២៣ ខែកក្កដា ឆ្នាំ២០២៣ នេះ ថាមិនសេរី និងគ្មានយុត្តិធម៌។
មូលហេតុដែលសហរដ្ឋអាមេរិកថាការបោះឆ្នោតនៅកម្ពុជា មិនសេរី និងគ្មានយុត្តិធម៌ ដោយសារនៅមុនការបោះឆ្នោត អាជ្ញាធរកម្ពុជាបានធ្វើការគំរាមកំហែង និងយាយីជាបន្តបន្ទាប់ទៅលើគណបក្សនយោបាយប្រឆាំង ប្រព័ន្ធផ្សព្វផ្សាយ និងសង្គមស៊ីវិលដែលជាការបំផ្លាញដល់ស្មារតីនៃរដ្ឋធម្មនុញ្ញរបស់ប្រទេស និងកាតព្វកិច្ចជាអន្តរជាតិរបស់ប្រទេសកម្ពុជា។ សកម្មភាពទាំងនេះមិនអាចធ្វើឲ្យប្រជាជនកម្ពុជាមានសំឡេង និងជម្រើសក្នុងការកំណត់អនាគតនៃប្រទេសរបស់ពួកគេបាននោះទេ។
លើសពីនេះ អាជ្ញាធរកម្ពុជាកំណត់មុខសញ្ញាមនុស្សជិត ៤០នាក់ដែលគូសខ្វែងសន្លឹកឆ្នោត ហើយសកម្មជនគណបក្សភ្លើងទៀន ២នាក់ត្រូវបានសមត្ថកិច្ចចាប់ខ្លួនក្រោមហេតុផលថា គូសខ្វែងសន្លឹកឆ្នោតចោល។
ឆ្លើយតបនឹងទង្វើរបស់កម្ពុជានេះ សហរដ្ឋអាមេរិកបានប្រកាសការរឹតត្បិតទិដ្ឋាការ ឬវីសាលើមន្ត្រីកម្ពុជាដែលពាក់ព័ន្ធនឹងការបំផ្លាញលទ្ធិប្រជាធិបតេយ្យ ព្រមទាំងផ្អាកជំនួយមួយចំនួនដល់កម្ពុជាផងដែរ៕