36 C
Phnom Penh

ឧកញ៉ា ឡេង ណាវ៉ាត្រា រង​ការ​ព្រមាន​វិធានការ​ច្បាប់​ពី​ក្មួយស្រី​បង្កើត​របស់​លោក ហ៊ុន សែន

ដោយ ឌឹ ខេមបូឌា ដេលី

បទវិភាគ

អ្នកឧកញ៉ា​វ័យ​ក្មេង​ដែល​ល្បីល្បាញ​ខាង​ការ​លក់​ផ្ទះល្វែង បុរី និង​ដី​ខ្យល់ ឡេង ណាវ៉ាត្រា សម្រេច​លុប​សំណេរ​ដែល​ខ្លួន​បង្ហោះ​លើ​បណ្ដាញ​សង្គម​ហ្វេសប៊ុក​ភ្លាមៗ បន្ទាប់ពី​ឧកញ៉ា​ដ៏​មាន​ឥទ្ធិពល​ម្នាក់ និង​ជា​ក្រុម​មេធាវី HNS Law Group អ្នកស្រី នឹម វណ្ណៈ ព្រមាន​ចាត់​វិធានការ​តាម​ផ្លូវ​ច្បាប់។

កាលពី​ថ្ងៃទី​៣០ ខែ​កក្កដា ឆ្នាំ​២០២៣ អ្នកស្រី​ឧកញ៉ា នឹម វណ្ណៈ ដែល​គេ​ស្គាល់​ថា​ជា​ក្រុម​មេធាវី HNS Law Group និង​ជា​ម្ចាស់​ក្រុមហ៊ុន​យ៉ាង​ច្រើន​នៅ​កម្ពុជា បាន​ចេញ​លិខិត​មួយ​ព្រមាន​ឱ្យ​ឧកញ៉ា ឡេង ណាវ៉ាត្រា លុប​រាល់​សំណេរ​ទាំងអស់​ដែល​គាត់​បាន​សរសេរ​សំដៅ​មក​កាន់​ខ្លួន សូម្បីតែ​ការ​ចែករំលែក (Share) ណា​មួយ​ក៏ដោយ​ក្នុង​រយៈពេល ១២​ម៉ោង ដើម្បី​កុំ​ឱ្យ​មហាជន​មាន​ការ​ភាន់ច្រឡំ​មក​លើ​អ្នកស្រី។

អ្នកស្រី នឹម វណ្ណៈ ជា​កូនស្រី​បង្កើត​របស់​លោក នឹម ចាន់តារា និង​អ្នកស្រី ហ៊ុន ស៊ីណាត ជា​ប្អូនស្រី​បង្កើត​របស់​លោក ហ៊ុន សែន បុរស​ខ្លាំង​ដែល​ល្បី​ខាង​ក្រាញ​អំណាច​ត​ត្រកូល​ផ្ដាច់ការ​នៅ​កម្ពុជា។

អ្នកស្រី នឹម វណ្ណៈ បាន​រៀបរាប់​នៅ​ក្នុង​លិខិត​នោះ​ថា ឧកញ៉ា ឡេង ណាវ៉ាត្រា បាន​ថត​ផ្ទាំង​សំណេរ​របស់​អ្នកស្រី​ទៅ​បង្ហោះ​កាលពី​ថ្ងៃទី​២៨ ខែ​កក្កដា កន្លងទៅ បន្ទាប់ពី​អ្នកស្រី​បាន​បង្ហោះ​លើ​បណ្ដាញ​សង្គម​ហ្វេសប៊ុក​តែ​ប៉ុន្មាន​ម៉ោង​ប៉ុណ្ណោះ។

អ្នកស្រី​បន្ថែម​ថា ក្នុង​ការ​បង្ហោះ​នោះ ឧកញ៉ា ឡេង ណាវ៉ាត្រា បាន​សរសេរ​បំផ្លើស​ទម្លាក់​កំហុស និង​ចោទប្រកាន់​ដោយ​គ្មាន​មូលដ្ឋាន​ថា សំណេរ​របស់​អ្នកស្រី​បាន​សំដៅ​ទៅ​លើ​រូប​គាត់ ខណៈ​សំណេរ​នោះ​មិន​បាន​បញ្ជាក់​ឈ្មោះ​ឧកញ៉ា ឡេង ណាវ៉ាត្រា នោះ​ទេ គ្រាន់តែ​មាន​ពាក្យ​ថា «ឧកញ៉ាៗ​ដែល​បាន​សាងសង់​បុរី​នានា» តែប៉ុណ្ណោះ។

ឧកញ៉ា នឹម វណ្ណៈ លើក​ជា​សំណួរ​ថា នៅ​កម្ពុជា​មាន​ឧកញ៉ា​ជាង ១៣០០​នាក់ ហើយ​ក៏​មាន​ឧកញ៉ា​ជាច្រើន​ដែរ​ដែល​បាន​វិនិយោគ​លើ​អចលនទ្រព្យ ដូចជា​ការ​សាងសង់​បុរី ជាដើម ហេតុ​អ្វី​ពួកគេ​មិន​មាន​ប្រតិកម្ម​លើ​សំណេរ​របស់​អ្នកស្រី តែ​បែរ​ជា​មាន​តែ​ឧកញ៉ា ឡេង ណាវ៉ាត្រា តែ​ម្នាក់​ដែល​ស្កៀបរមាស់​នឹង​សំណេរ​នេះ​ទៅវិញ ឬ​មកពី​ឧកញ៉ា​រូប​នេះ​ពិត​ជា​បាន​កិបកេង​កម្លាំង​ញើស​ឈាម​ពលរដ្ឋ និង​បាន​កាប់​បំផ្លាញ​ព្រៃឈើ​ដូច​អ្នកស្រី​បាន​លើកឡើង​ក្នុង​សំណេរ​នោះ​មែន?

អ្នកស្រី​បញ្ជាក់​ថា សំណេរ​របស់​អ្នកស្រី​មិន​បាន​ធ្វើ​ឱ្យ​ប៉ះពាល់​ដល់​កិត្តិយស​របស់​ឧកញ៉ា ឡេង ណាវ៉ាត្រា នោះ​ទេ ប៉ុន្តែ​ការ​យក​សំណេរ​របស់​អ្នកស្រី​ទៅ​បង្ហោះ និង​ចែករំលែក​បន្ត​របស់​ឧកញ៉ា​រូប​នេះ​ទៅវិញ​ទេ​ដែល​ធ្វើ​ឱ្យ​មាន​ការ​វាយប្រហារ និង​បង្កើត​ជា​ការ​ញុះញង់​មក​លើ​អ្នកស្រី ព្រោះ​ថា​ក្នុង​នោះ​ក៏​មាន​បុគ្គលិក​របស់​ឧកញ៉ា ឡេង ណាវ៉ាត្រា ជាច្រើន​នាក់​ដែរ​ដែល​បាន​ប្រើ​ពាក្យ​អសុរោះ​ជេរប្រមាថ​មក​លើ​អ្នកស្រី រហូត​យក​រូបថត​ក្រុម​គ្រួសារ​របស់​អ្នកស្រី​មក​បង្ហោះ​ថែម​ទៀត ដែល​ជា​ហេតុ​ធ្វើ​ឱ្យ​ប៉ះពាល់​កិត្តិយស​របស់​អ្នកស្រី​យ៉ាង​ធ្ងន់ធ្ងរ។

ការ​ព្រមាន​ចាត់​វិធានការ​ច្បាប់​លើ​ឧកញ៉ា ឡេង ណាវ៉ាត្រា នេះ ធ្វើឡើង​បន្ទាប់ពី​ឧកញ៉ា ឡេង ណាវ៉ាត្រា បាន​រិះគន់ និង​បើក​ដៃ​ឱ្យ​បុគ្គលិក​របស់​ខ្លួន​ជេរប្រមាថ​ទៅ​លើ​ឧកញ៉ា នឹម វណ្ណៈ យ៉ាង​ចាស់ដៃ​កាលពី​ពេល​ថ្មីៗ​នេះ។

កាលពី​ថ្ងៃទី​២៨ ខែ​កក្កដា ឆ្នាំ​២០២៣ ម្ចាស់​គណនី​ហ្វេសប៊ុក​ឈ្មោះ នឹម វណ្ណៈ បាន​បង្ហោះ​រូបថត​ដាំ​កូនឈើ​ប្រមាណ​ជិត ១០​សន្លឹក​ដោយ​ភ្ជាប់​នឹង​សំណេរ​ថា «អ្នក​ខ្លះ​ដាំ​ដើមឈើ​មិន​សូវ​ចេះ​ទេ តែ​ជំនាញ​ខាង​កាប់​បំផ្លាញ​ទៅវិញ»

សំណេរ​នោះ​បន្ត​ថា «ឆ្នាំ​២០២៣ ទៅ​ហើយ សូម​កុំ​ធ្វើ​បាប និង​បោកប្រាស់​ពលរដ្ឋ​ដែល​គាត់​ខំ​ទុកចិត្ត និង​បង់​ថវិកា​ឱ្យ​ឧកញ៉ាៗ​ដែល​បាន​សាងសង់​បុរី​នានា​ទៀត​អី តែ​ឧកញ៉ាៗ​ទាំងនោះ​គួរតែ​ដោះស្រាយ​បញ្ហា​ជូន​ពួកគាត់​វិញ​ទើប​ជា​រឿង​ល្អ»

សំណេរ​ខាងលើ​រៀបរាប់​ថា «MMO អស់​ប្រសិទ្ធភាព​ក្នុង​ការ​រួម​កម្លាំង​គ្នា​ហើយ ដូច្នេះ​ទោះ​ដាក់​ប៉ុន្មាន​លាន​នាក់​មក Comment ក៏​កាន់តែ​ខ្មាស​គេ​ដែរ ប៉ុន្តែ​វិធី​ល្អ គឺ​មាន​តែ​ដោះស្រាយ​បញ្ហា​ជូន​ពលរដ្ឋ​ប៉ុណ្ណោះ ទើប​អាច​មាន​សង្ឃឹម​ស្ដារ​កិត្តិយស​មក​វិញ​ខ្លះ បើ​មិន​ដូច្នេះ​ទេ នោះ​អំពើ​ទុច្ចរិត​នានា​របស់​ឧកញ៉ា​មួយ​ចំនួន​ក៏​កំពុងតែ​កំណត់​ជោគវាសនា​របស់​ឧកញ៉ាៗ​ទាំងនោះ​ដែរ»

បន្ទាប់ពី​ម្ចាស់​គណនី​ហ្វេសប៊ុក​ឈ្មោះ នឹម វណ្ណៈ បង្ហោះ​បាន​តែ​ប៉ុន្មាន​ម៉ោង ស្រាប់តែ​ឧកញ៉ា ឡេង ណាវ៉ាត្រា ថត​ស្គ្រីន​យក​សំណេរ​នោះ​មក​បង្ហោះ​លើ​ទំព័រ​ហ្វេសប៊ុក​ផ្លូវការ​របស់​ខ្លួន ដោយ​រៀបរាប់​នូវ​ពាក្យ​សម្ដី​ជាច្រើន​ដែល​ខ្លួន​ធ្លាប់​ត្រូវ​មហាជន​រិះគន់​កន្លង​មក​ជុំវិញ​ការ​មិន​អនុវត្ត​តាម​កិច្ចសន្យា​ក្នុង​ការ​ប្រគល់​ផ្ទះល្វែង បុរី និង​ដី ដែល​អតិថិជន​បាន​ទិញ​អស់​រយៈពេល​ជាច្រើន​ឆ្នាំ​កន្លងមក​នោះ។

ជាង​នេះ​ទៀត ឧកញ៉ា ឡេង ណាវ៉ាត្រា បាន​បដិសេធ​ថា ការ​ចោទ​ថា​រូបលោក​បាន​កាប់​បំផ្លាញ​ព្រៃឈើ​នោះ គឺ​មិនមែន​ជា​ការ​លើកឡើង​ដោយ​ត្រឹមត្រូវ​នោះ​ដែរ។

ភាព​រអៀស​ខ្លួន​របស់​ឧកញ៉ា ឡេង ណាវ៉ាត្រា ហាក់​ត្រូវ​នឹង​សុភាសិត​បុរាណ​ខ្មែរ​មួយ​ពោល​ថា គោ​ដំបៅ​ខ្នង ក្អែក​ហើរ​រំលង​រំសាយ​កន្ទុយ ព្រោះ​ថា​ក្នុង​ពេល​ចុងក្រោយ​នេះ ឧកញ៉ា ឡេង ណាវ៉ាត្រា បាន​ញាំញី​ទៅ​ដោយ​រឿងអាស្រូវ​ជាច្រើន​ទាំង​ការ​កាប់​បំផ្លាញ​ព្រៃឈើ​នៅ​ឧទ្យាន​ភ្នំ​តាម៉ៅ និង​ការ​រំលោភ​កិច្ចសន្យា​មិន​ប្រគល់​ផ្ទះល្វែង បុរី និង​ដី​ជូន​អតិថិជន ជាដើម ដែល​នាំ​ឱ្យ​មាន​ការ​តវ៉ា និង​ការ​រិះគន់​ពី​អតិថិជន​ដែល​ទិញ​បុរី ផ្ទះល្វែង និង​ដី​ពី​ក្រុមហ៊ុន​របស់​លោក​ជា​បន្តបន្ទាប់ រហូត​មក​ទល់​ពេលនេះ។

ទាក់ទិន​នឹង​បញ្ហា​នេះ មួយ​រយៈ​ចុងក្រោយ​នេះ គេ​សង្កេត​ឃើញ​ថា អតិថិជន​ដែល​ជា​ម្ចាស់​ផ្ទះ​ដល់​កុងត្រា​ហើយ តែ​នៅ​មិន​ទាន់​ឃើញ​ផ្ទះ និង​ភ្នាក់ងារ​លក់​ផ្ទះ​របស់​ឧកញ៉ា ឡេង ណាវ៉ាត្រា នៅតែ​បន្ត​នាំគ្នា​ទាមទារ​នៅ​លើ​បណ្ដាញ​សង្គម​ហ្វេសប៊ុក​ឲ្យ​ក្រុមហ៊ុន ឡេង ណាវ៉ាត្រា ប្រគល់​ផ្ទះ​ឲ្យ​ពួកគេ ព្រមទាំង​បើក​ប្រាក់​កម្រៃ​ជើងសា​តាម​កិច្ចសន្យា​ដល់​បុគ្គលិក​ផ្នែក​លក់​ផង​ដែរ ទោះ​ឧកញ៉ា​រូប​នេះ​ធ្លាប់​អះអាង​ថា ខ្លួន​បាន​ដោះស្រាយ​បញ្ហា​ទាំងនោះ​ហើយ​ក៏ដោយ។

លោក ឡេង ណាវ៉ាត្រា ដែល​អ្នក​លេង​បណ្ដាញ​សង្គម​ហ្វេសប៊ុក​ដាក់​ងារ​ឱ្យ​ថា​ជា «ឧកញ៉ា​ស្ទើរ​ភ្លើង ឬ​ឧកញ៉ា​សេះ​ហោះ» កំពុង​រង​នូវ​ការ​ចោទប្រកាន់​ពាក់ព័ន្ធ​នឹង​ករណី​ខុស​ច្បាប់​ជាច្រើន ដូចជា​ការ​លាង​លុយ​កខ្វក់​ឱ្យ​គ្រួសារ​ត្រកូល​ហ៊ុន ការ​កាប់​បំផ្លាញ​ព្រៃឈើ​នៅ​ឧទ្យាន​ភ្នំ​តាម៉ៅ លក់​ផ្ទះល្វែង បុរី និង​លក់​ដី​ខ្យល់​ឱ្យ​អតិថិជន ជាដើម ដែល​ជា​ហេតុ​ធ្វើ​ឱ្យ​គាត់​រអៀស​ខ្លួន​នៅ​ពេល​ដែល​មាន​ការ​លើកឡើង​ណា​មួយ​ដែល​ពាក់ព័ន្ធ​នឹង​ករណី​ខាងលើ​នេះ៕

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស