38 C
Phnom Penh

តុលាការ​លោក ហ៊ុន សែន ឃុំ​ខ្លួន​ពលរដ្ឋ​២​នាក់​បន្ទាប់ពី​និយាយ​រិះគន់​លោក ហ៊ុន ម៉ាណែត

ដោយ ឌឹ ខេមបូឌា ដេលី

បទវិភាគ

តុលាការ​ក្រោម​បញ្ជា​របស់​លោក ហ៊ុន សែន ចាប់​ខ្លួន​ពលរដ្ឋ ២​នាក់​យក​ទៅ​ឃុំ​ខ្លួន​នៅ​ពន្ធនាគារ​ព្រៃស បន្ទាប់ពី​ពួកគេ​បាន​និយាយ​រិះគន់​លោក ហ៊ុន ម៉ាណែត ដែល​នឹង​ធ្វើ​ជា​នាយករដ្ឋមន្ត្រី​បន្ត​វេន​ពី​ឪពុក​នៅ​ល្ងាច​ថ្ងៃទី​២២ ខែ​សីហា ឆ្នាំ​២០២៣ ខាងមុខ​នេះ។

ក្នុង​ដីកា​បង្គាប់​ឲ្យ​ឃុំ​ខ្លួន​របស់​ចៅក្រម​ស៊ើបសួរ​សាលាដំបូង​រាជធានី​ភ្នំពេញ លោក ហុង ពៅ ចុះ​ថ្ងៃទី​០១ ខែ​សីហា ឆ្នាំ​២០២៣ ឲ្យ​ដឹង​ថា ការ​បង្គាប់​ឲ្យ​សមត្ថកិច្ច​នាំ​ខ្លួន​ស្ត្រី​ម្នាក់​ឈ្មោះ ឌី សូរនាត យក​ទៅ​ឃុំ​ខ្លួន​នៅ​ពន្ធនាគារ​ព្រៃស ក្រោម​ហេតុផល​ថា ស្ត្រី​វ័យ ៣៩​ឆ្នាំ​រូប​នេះ​និយាយ​ប៉ះពាល់​ដល់​លោក ហ៊ុន ម៉ាណែត ដែល​នឹង​ក្លាយ​ជា​នាយករដ្ឋមន្ត្រី​បន្ត​វេន​ពី​លោក ហ៊ុន សែន នា​ខែ​សីហា នេះ។

ការ​បង្គាប់​ឲ្យ​សមត្ថកិច្ច​ចាប់​ខ្លួន​ស្ត្រី​ឈ្មោះ ឌី សូរនាត ធ្វើឡើង​ទោះបីជា​ឪពុក​ម្តាយ​របស់​ស្ត្រី​រូប​នោះ​បាន​ចេញ​វីដេអូ​សូម​អភ័យ​ទោស​ពី​មេដឹកនាំ​បក្ស​កាន់​អំណាច​លោក ហ៊ុន សែន និង​លោក ហ៊ុន ម៉ាណែត ព្រមទាំង​បាន​សន្យា​ថា​នឹង​ប្រដៅ​កូន​មិន​ឲ្យ​និយាយ​ប៉ះពាល់​ដល់​កិត្តិយស​របស់​លោក ហ៊ុន សែន និង​លោក ហ៊ុន ម៉ាណែត បន្ត​ទៀត​ក៏ដោយ។

បើ​តាម​ឪពុក​ម្តាយ​របស់​កញ្ញា ឌី សូរនាត បញ្ជាក់​ថា កូនស្រី​របស់​គាត់​មាន​ជំងឺ​ផ្លូវចិត្ត​ធ្ងន់ធ្ងរ​រយៈពេល ២​ឆ្នាំ​មក​ហើយ។ ជាង​នេះ​ទៀត នាង​មិន​ដែល​រស់នៅ​ចុះសម្រុង​ជាមួយ​ឪពុក​ម្តាយ​នោះ​ឡើយ។

កាលពី​ថ្ងៃទី​៣០ ខែ​កក្កដា ឆ្នាំ​២០២៣ ស្ត្រី​ម្នាក់​ឈ្មោះ ឌី សូរនាត រស់នៅ​ភូមិ​ត្រពាំងក្រសាំង សង្កាត់​ត្រពាំងក្រសាំង ខណ្ឌ​ពោធិ៍សែនជ័យ រាជធានី​ភ្នំពេញ បាន​បង្ហោះ​វីដេអូ​លើ​បណ្ដាញ​សង្គម Tik Tok ដោយ​អះអាង​ខ្លួន​ជា​ព្រះ​ម៉ែ​គង្គា និង​ជា​អ្នក​បង្កើត​លោក ហ៊ុន ម៉ាណែត មក​លើ​ផែនដី​នេះ​ដើម្បី​ឱ្យ​ធ្វើ​អំពើ​ល្អ។

ស្ត្រី​ដែល​មាន​ស្មារតី​មិន​ប្រក្រតី​រូប​នេះ​អះអាង​ថា កន្លងមក​លោក ហ៊ុន ម៉ាណែត បាន​ប្រព្រឹត្ត​អំពើ​អាក្រក់​ច្រើន​ណាស់ ប៉ុន្តែ​បើ​នៅតែ​ប្រព្រឹត្ត​អំពើ​អាក្រក់​ទៀត រូប​នាង​នឹង​យក​លោក ហ៊ុន ម៉ាណែត ទៅ​ដុត​ជាមួយ​ពពួក​បិសាច​មិន​ឱ្យ​មក​រស់នៅ​ឋាន​មនុស្ស​ទៀត​ទេ។

ក្រៅពី​កញ្ញា ឌី សូរនាត នេះ នៅ​ថ្ងៃទី​០១ ខែ​សីហា ដដែល ចៅក្រម​ស៊ើបសួរ​សាលាដំបូង​រាជធានី​ភ្នំពេញ លោក ហុង ពៅ បង្គាប់​ឲ្យ​សមត្ថកិច្ច​ឃុំ​ខ្លួន​យុវជន​ម្នាក់​ទៀត​ឈ្មោះ ភី អ៊ួក នៅ​ពន្ធនាគារ​ដែរ។

ការ​បង្គាប់​ឲ្យ​ឃុំ​ខ្លួន​នេះ ដោយ​តុលាការ​ថា​យុវជន​វ័យ ៣០​ឆ្នាំ​រូប​នេះ​បាន​កាត់ត​រូប និង​សំឡេង​របស់​លោក ហ៊ុន សែន ខុស​ពី​ការពិត នាំ​ឲ្យ​មាន​យល់​ច្រឡំ​យ៉ាង​ធ្ងន់ធ្ងរ។

ពលរដ្ឋ​ទាំង ២​នាក់ ត្រូវ​បាន​តុលាការ​ក្រោម​បញ្ជា​របស់​លោក ហ៊ុន សែន ចាប់​ខ្លួន និង​ចោទប្រកាន់​ពី​បទ «ញុះញង់​បង្ក​ឲ្យ​មាន​ភាព​វឹកវរ​ធ្ងន់ធ្ងរ​ដល់​សន្តិសុខ​សង្គម និង​បទ​ប្រមាថ» បន្ទាប់ពី​ពួកគេ​និយាយ​ប៉ះពាល់​ដល់​លោក ហ៊ុន សែន និង​ប៉ះពាល់​លោក ហ៊ុន ម៉ាណែត។

ការ​បញ្ជា​ទៅ​សមត្ថកិច្ច​ឲ្យ​ចាប់​ខ្លួន​ពលរដ្ឋ​ដែល​បញ្ចេញមតិ និង​រិះគន់​ដាក់​ពន្ធនាគារ​ភ្លាមៗ ធ្វើឡើង​បន្ទាប់ពី​រដ្ឋាភិបាល​ដឹកនាំ​ដោយ​លោក ហ៊ុន សែន កំពុង​រៀបចំ​ផ្ទេរ​តំណែង​ឲ្យ​លោក ហ៊ុន ម៉ាណែត ធ្វើ​ជា​នាយករដ្ឋមន្ត្រី​កម្ពុជា​នៅ​ថ្ងៃទី​២២ ខែ​សីហា ឆ្នាំ​២០២៣ បន្ទាប់ពី​លោក ហ៊ុន សែន ដែល​ជា​ឪពុក​បាន​កាន់​អំណាច​ជិត ៤០​ឆ្នាំ​នៅ​កម្ពុជា។

តំណាងរាស្ត្រ​អតីត​គណបក្ស​សង្គ្រោះ​ជាតិ លោក អ៊ុំ សំអាន ហៅ​ការ​ចាប់​ខ្លួន​ពលរដ្ឋ​ដាក់​ពន្ធនាគារ​ដែល​គ្រាន់តែ​ពួកគេ​រិះគន់​លើ​លោក ហ៊ុន ម៉ាណែត ដែល​កំពុង​ត្រៀម​ឡើង​កាន់​អំណាច​ជា​នាយករដ្ឋមន្ត្រី ថា​ពិត​ជា​មាន​ចរិត​ផ្ដាច់ការ​មិន​ខុស​ពី​ឪពុក​នោះ​ឡើយ៕

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស