29 C
Phnom Penh

វៀតណាម​អបអរ​ជ័យជម្នះ​របស់​គណបក្ស​ប្រជាជន​កម្ពុជា​ក្នុង​ការ​បោះឆ្នោត​ជាតិ​ឆ្នាំ​២០២៣

ដោយ ឌឹ ខេមបូឌា ដេលី

បទវិភាគ

អគ្គលេខាធិការ​គណៈកម្មាធិការ​មជ្ឈិម​បក្ស​កុម្មុយនីស្ត​វៀតណាម អបអរ​សាទរ​គណបក្ស​ប្រជាជន​កម្ពុជា ដែល​បាន​ទទួល​ជ័យជម្នះ​ក្នុង​ការ​បោះឆ្នោត​ជាតិ​ឆ្នាំ​២០២៣ នេះ និង​សូម​ឱ្យ​ទំនាក់ទំនង​ក្នុង​ភាព​ជា​អ្នក​ជិតខាង​ល្អ មិត្តភាព​ជា​ប្រពៃណី កិច្ច​សហប្រតិបត្តិការ​គ្រប់​ជ្រុងជ្រោយ បន្ត​រឹងមាំ​យូរ​អង្វែង​រវាង​វៀតណាម និង​កម្ពុជា​ទៅ​ថ្ងៃ​អនាគត។

អគ្គលេខាធិការ​គណៈកម្មាធិការ​មជ្ឈិម​បក្ស​កុម្មុយនីស្ត​វៀតណាម លោក ង្វៀន ភូជុង (Nguyen Phu Trung) បាន​ចេញ​លិខិត​អបអរ​សាទរ​មួយ​ទៅ​កាន់​លោក ហ៊ុន សែន ក្នុង​នាម​ជា​សមមិត្ត​របស់​ខ្លួន​កាលពី​ថ្ងៃទី​២៥ ខែ​កក្កដា ដែល​ត្រូវ​បាន​ផ្សព្វផ្សាយ​នៅ​ថ្ងៃទី​២ សីហា នេះ​ថា «ជាមួយ​ស្មារតី​សមមិត្ត​ដែល​ផ្សារភ្ជាប់​យ៉ាង​ជិតស្និទ្ធ​រហូត​មក លោក​សូម​ផ្តល់​ជូន​នូវ​មនោសញ្ចេតនា​ដ៏​ជិតស្និទ្ធ​ជាទីបំផុត​ចំពោះ​កិត្យានុភាព​របស់​គណបក្ស​ប្រជាជន​កម្ពុជា ក្រោម​ការ​ដឹកនាំ​របស់​លោក ហ៊ុន សែន រយៈពេល​កន្លងមក»

មន្ត្រី​ជាន់ខ្ពស់​របស់​បក្ស​កុម្មុយនីស្ត​វៀតណាម​រូប​នេះ​លើកឡើង​ថា លោក​ជឿជាក់​ថា ការ​គាំទ្រ​ដ៏​ច្រើន​លើសលប់​ពី​សំណាក់​ប្រជាជន​កម្ពុជា រដ្ឋសភា និង​រដ្ឋាភិបាល​ថ្មី​នៅ​កម្ពុជា​ដែល​ដឹកនាំ​ដោយ​គណបក្ស​ប្រជាជន​កម្ពុជា នឹង​ត្រូវ​បាន​បង្កើត​ឡើង​ក្នុង​ពេល​ដ៏​ឆាប់ ហើយ​បន្ត​សម្រេច​បាន​សមិទ្ធផល​ថ្មីៗ និង​ធំធេង​បន្ថែម​ទៀត​ក្នុង​បុព្វហេតុ​ការពារ កសាង និង​អភិវឌ្ឍ​មាតុភូមិ​កម្ពុជា​ក្នុង​សន្តិភាព ស្ថិរភាព អភិវឌ្ឍន៍ និង​វិបុលភាព​ទៅ​ថ្ងៃ​មុខ។

អគ្គលេខាធិការ​គណៈកម្មាធិការ​មជ្ឈិម​បក្ស​កុម្មុយនីស្ត​វៀតណាម លោក ង្វៀន ភូជុង បញ្ជាក់​ថា លោក​គាំទ្រ​យ៉ាង​ពេញ​ទំហឹង​ចំពោះ​បុព្វហេតុ​កសាង និង​អភិវឌ្ឍ​មាតុភូមិ​កម្ពុជា និង​ធ្វើ​អស់​ពី​កម្លាំង​កាយ​ចិត្ត​ជាមួយ​កម្ពុជា ដើម្បី​ថែរក្សា ពូន​ជ្រំ និង​ផ្តល់​ទៅ​ឲ្យ​អ្នក​ជំនាន់​ក្រោយ​នូវ​ទំនាក់ទំនង​ដ៏​ល្អ​ប្រសើរ​រវាង​បក្ស​ទាំង​ពីរ រដ្ឋ​ទាំង​ពីរ និង​ប្រជាជន​នៃ​ប្រទេស​ទាំង​ពីរ​ផង​ដែរ។

ក្រោយ​ការ​បោះឆ្នោត​នៅ​កម្ពុជា​កាលពី​ចុង​ខែ​កក្កដា បាន​បញ្ចប់ បក្ស​ប្រជាជន​កម្ពុជា​បាន​អះអាង​ថា ខ្លួន​បាន​ឈ្នះ​ឆ្នោត​ភ្លូកទឹក​ភ្លូកដី ប៉ុន្តែ​ប្រទេស​សេរី​ប្រជាធិបតេយ្យ​ជាច្រើន ដូចជា​អាល្លឺម៉ង់ បារាំង អង់គ្លេស និង​អូស្ត្រាលី ជាដើម បាន​សម្ដែង​ការ​ខកចិត្ត​យ៉ាង​ខ្លាំង ដោយ​ពួកគេ​ចាត់ទុក​ថា​ការ​បោះឆ្នោត​នេះ​ប្រព្រឹត្ត​ទៅ​ដោយ​គ្មាន​វត្តមាន​គណបក្ស​ប្រឆាំង ដែល​ធ្វើ​ឱ្យ​ប៉ះពាល់​ដល់​ពហុ​និយម​នៃ​ដំណើរការ​នៃ​ការ​បោះឆ្នោត​នេះ ខណៈ​សហរដ្ឋ​អាមេរិក​ក៏​បាន​ចេញ​មុខ​ប្រកាស​ដាក់​ទណ្ឌកម្ម​លើ​កម្ពុជា​ផង​ដែរ។

ទាក់ទិន​នឹង​ការ​បោះឆ្នោត​ជាតិ​នៅ​កម្ពុជា ឆ្នាំ​២០២៣ នេះ សារព័ត៌មាន​បរទេស​ដែល​មាន​ឈ្មោះ​ថា NIKEI ASIA បាន​ចុះផ្សាយ​កាលពី​ថ្ងៃទី​២៦ កក្កដា ថា ការ​បោះឆ្នោត​ដែល​គណបក្ស​ប្រជាជន​កម្ពុជា​ទទួល​ជ័យជម្នះ​ភ្លូកទឹក​ភ្លូកដី​កាលពី​ថ្ងៃ​ទី​២៣ ខែ​កក្កដា កន្លងទៅ គឺជា​ដំណើរការ​មួយ​ដែល​នៅ​ឆ្ងាយ​ពី​លទ្ធិប្រជាធិបតេយ្យ​យ៉ាង​ខ្លាំង ដោយសារតែ​បក្ស​ប្រឆាំង​ដ៏​ធំ​បំផុត​ត្រូវ​បាន​ដកហូត​សិទ្ធិ​មិន​ឱ្យ​ចូលរួម ដូច្នេះ​ដំណើរការ​ទាំងមូល​ជុំវិញ​ការ​បោះឆ្នោត​នេះ គ្មាន​អ្វី​ក្រៅពី​ការ​រំលោភ​អំណាច​ដើម្បី​បំផ្លាញ​លទ្ធិប្រជាធិបតេយ្យ​នោះ​ឡើយ។

ចំណែក​ឧត្ដមស្នងការ​អង្គការ​សហប្រជាជាតិ​ទទួល​បន្ទុក​សិទ្ធិមនុស្ស លោក Volker Türk បាន​សម្ដែង​ការ​សោកស្ដាយ​យ៉ាង​ខ្លាំង​ចំពោះ​ការ​បោះឆ្នោត​នៅ​កម្ពុជា កាលពី​ថ្ងៃទី​២៦ ខែ​កក្កដា ឆ្នាំ​២០២៣ ថា ច្បាប់ និង​គោលនយោបាយ​នានា​ជុំវិញ​ការ​បោះឆ្នោត​នេះ បាន​រឹត​បន្តឹង រារាំង​ដល់​ការ​ចុះឈ្មោះ​របស់​គណបក្ស​នយោបាយ និង​បេក្ខជន​នយោបាយ​យ៉ាង​ធ្ងន់ធ្ងរ ខណៈ​គណបក្ស​ប្រឆាំង សហជីព អង្គការ​ក្រៅ​រដ្ឋាភិបាល និង​ប្រព័ន្ធ​ផ្សព្វផ្សាយ​ឯករាជ្យ បាន​រង​នូវ​ការ​គំរាមកំហែង បំភិតបំភ័យ​ផង​ដែរ។

លោក​បន្ត​ថា ប្រទេស​កម្ពុជា​កំពុង​ធ្លាក់​ចុះ​លំហ​ប្រជាធិបតេយ្យ​យ៉ាង​គំហុក​នៅ​ពេលនេះ ដែល​នាំ​ទៅ​ដល់​ការ​បំផ្លាញ​សេរីភាព​ជា​មូលដ្ឋាន និង​សិទ្ធិ​ក្នុង​ការ​ចូលរួម​ក្នុង​កិច្ចការ​សាធារណៈ​របស់​ពលរដ្ឋ​កាន់តែ​ខ្លាំង ព្រោះ​ថា​ភស្តុតាង​ជាក់ស្តែង គឺ​គណបក្ស​ប្រឆាំង ប្រព័ន្ធ​ផ្សព្វផ្សាយ​ឯករាជ្យ​កំពុង​ប្រឈមមុខ​នឹង​ការ​រឹត​បន្តឹង និង​ការ​សងសឹក​គ្រប់​បែប​យ៉ាង ដែល​គេ​មើល​ឃើញ​ថា​ជា​ការ​រារាំង​នូវ​ការ​អនុវត្ត​សិទ្ធិ​សេរីភាព​មូលដ្ឋាន​ដែល​ជា​កត្តា​ចាំបាច់​សម្រាប់​ការ​បោះឆ្នោត​ដោយ​សេរី ត្រឹមត្រូវ និង​យុត្តិធម៌៕

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស