31 C
Phnom Penh

សមត្ថកិច្ច​បញ្ជូន​អ្នកឧកញ៉ា ហ៊ី គឹមហុង និង​អង្គរក្ស​១៣​នាក់​ទៅ​សាលាដំបូង​រាជធានី​ភ្នំពេញ​ដើម្បី​បន្ត​នីតិវិធី​ច្បាប់

ដោយ ឌឹ ខេមបូឌា ដេលី

បទវិភាគ

សមត្ថកិច្ច​បញ្ជូន​ខ្លួន​ឧកញ៉ា ហ៊ី គឹមហុង អគ្គនាយក​ក្រុមហ៊ុន ពិភព​ដី​មាស និង​អង្គរក្ស​ចំនួន ១៣​នាក់​ទៅ​សាលាដំបូង​រាជធានី​ភ្នំពេញ ដើម្បី​បន្ត​នីតិវិធី​ច្បាប់​ក្រោយពី​មាន​ករណី​ប្រើ​ហិង្សា​ទៅ​លើ​ពលរដ្ឋ។

សមត្ថកិច្ច​បាន​ឈាន​ទៅ​ដល់​ការ​ចាប់​ខ្លួន​អ្នកឧកញ៉ា និង​អង្គរក្ស​ចំនួន ១៣​នាក់ បន្ទាប់ពី​អ្នកឧកញ៉ា​រូប​នេះ​ទាមទារ​ឲ្យ​ពលរដ្ឋ​ដែល​ទិញ​អចលនទ្រព្យ​របស់​លោក ត្រូវ​បង់​ប្រាក់​ឲ្យ​គ្រប់​ចំនួន​ដោយ​មិន​ត្រូវ​បង់ ១៥០​ដុល្លារ​មក​ក្រុមហ៊ុន​ទៀត​ឡើយ​ចាប់ពី​ថ្ងៃទី​១៧ ខែ​សីហា តទៅ។

ការ​ទាមទារ​ប្រាក់​បន្ថែម​ពី​សំណាក់​អ្នកឧកញ៉ា ហ៊ី គឹមហុង បាន​ធ្វើ​ឲ្យ​ពលរដ្ឋ​ជាច្រើន​នាក់​ផ្ទុះ​ការ​តវ៉ា និង​បាន​នាំគ្នា​សម្រុក​ទៅ​រក​អ្នកឧកញ៉ា​រូប​នេះ​ដើម្បី​ទាមទារ​ឲ្យ​សង​ប្រាក់​ដល់​ពួកគេ​វិញ។

ក្រុម​ប្រជាពលរដ្ឋ​អះអាង​ថា ប្រាក់​ដែល​ពួកគាត់​យក​ទៅ​ទិញ​អចលនទ្រព្យ និង​វិនិយោគ​ជាមួយ​អ្នកឧកញ៉ា ហ៊ី គឹមហុង នោះ វា​គឺជា​កម្លាំង​ញើស​ឈាម​របស់​ពួកគាត់។ ពួកគេ​អះអាង​ថា អ្នកឧកញ៉ា​រូប​នេះ​មិន​គោរព​តាម​កិច្ចសន្យា​របស់​ខ្លួន ដោយ​ឆបោក​ប្រាក់​របស់​ពួកគេ ហើយ​បែរ​ជា​មក​ទាមទារ​ប្រាក់​បន្ថែម និង​បាន​ដាក់​លក្ខខណ្ឌ​លើ​ពួកគាត់​ថែម​ទៀត។

តែ​យ៉ាងណា អ្នកឧកញ៉ា ហ៊ី គឹមហុង និង​អង្គរក្ស​ចំនួន ១៣​នាក់​ផ្សេង​ទៀត ត្រូវ​បាន​សមត្ថកិច្ច​ចូល​ចាប់​ខ្លួន​ភ្លាមៗ និង​បញ្ជូន​មក​កាន់​សាលាដំបូង​រាជធានី​ភ្នំពេញ​នា​ថ្ងៃ​អង្គារ ទី​៨ សីហា នេះ។

អ្នក​នាំពាក្យ​ស្នងការដ្ឋាន​រាជធានី​ភ្នំពេញ លោក សាន សុខសីហា ប្រាប់​សារព័ត៌មាន​ក្នុង​ស្រុក​ថា សមត្ថកិច្ច​នឹង​បញ្ជូន​ខ្លួន​អ្នកឧកញ៉ា និង​អង្គរក្ស​ទាំង ១៣​នាក់​ករណី​ឆបោក និង​ការ​ញុះញង់​ឲ្យ​ប្រព្រឹត្ត​អំពើ​ប្រឆាំង​អ្នក​រាជការ​សាធារណៈ និង​ការ​សំអាត​ប្រាក់​ជាដើម​មក​កាន់​តុលាការ​ក្រុង​ភ្នំពេញ។

អ្នក​នាំពាក្យ​សមាគម​ការពារ​សិទ្ធិមនុស្ស​អាដហុក លោក ស៊ឹង សែនករុណា ប្រាប់​សារព័ត៌មាន The Cambodia Daily ដោយ​ស្នើ​ទៅ​សមត្ថកិច្ច​ឲ្យ​អនុវត្ត​ច្បាប់​ទៅ​លើ​ឧកញ៉ា​ផ្សេង​ទៀត ដើម្បី​បង្ហាញ​ពី​តម្លាភាព ដោយសារ​ឧកញ៉ា​ដែល​ទទួល​ប្រាក់​ពី​ពលរដ្ឋ​ហើយ​មិន​អនុវត្ត​តាម​កិច្ចសន្យា មិន​មែន​មាន​តែ​ឧកញ៉ា ហ៊ី គឹមហុង នោះ​ទេ។

លោក​បន្ត​ថា បើ​សមត្ថកិច្ច​អនុវត្ត​ច្បាប់​តែ​លើ​ឧកញ៉ា​រូប​នេះ​តែ​ម្នាក់ ប៉ុន្តែ​មិន​ចាត់​វិធានការ​ច្បាប់​លើ​ឧកញ៉ា​ផ្សេង​ទៀត​ដែល​កំពុង​រំលោភ​កិច្ចសន្យា​ជាមួយ​ពលរដ្ឋ​នោះ វា​ជា​ការ​អនុវត្ត​ច្បាប់​មាន​ស្តង់ដារ​ពីរ។

មួយ​វិញ​ទៀត លោក​ថា​វា​ក៏​ជា​ការ​អនុញ្ញាត​ឲ្យ​អ្នក​ប្រព្រឹត្ត​ល្មើស​ច្បាប់​រួច​ខ្លួន ដែល​ធ្វើ​ឲ្យ​ការ​អនុវត្ត​ច្បាប់​នៅ​កម្ពុជា​គ្មាន​ប្រសិទ្ធភាព និង​មិន​យុត្តិធម៌​ឡើយ។

អ្នកឧកញ៉ា ហ៊ី គឹមហុង និង​ឧកញ៉ា ចេង សង្ហាក់ ធ្លាប់​ត្រូវ​បាន​ស្នងការដ្ឋាន​នគរបាល​ខេត្ត​កំពត ចេញ​លិខិត​កោះហៅ​ឲ្យ​ចូល​បំភ្លឺ​នៅ​ស្នងការដ្ឋាន​នគរបាល​ខេត្ត​កាលពី​ថ្ងៃទី​២៦ ខែ​មិថុនា ម្ដង​រួច​មក​ហើយ ក្រោយពី​ទទួល​បាន​ពាក្យបណ្ដឹង​របស់​ពលរដ្ឋ​ចំនួន ៣២៣​ករណី និង​ទឹកប្រាក់​ដាក់​វិនិយោគ​សរុប​ជាង ៦​លាន​ដុល្លារ។

ការ​ចេញ​លិខិត​កោះហៅ​អ្នកឧកញ៉ា និង​ឧកញ៉ា​ទាំង​ពីរ​ឲ្យ​ចូល​បំភ្លឺ​នោះ បន្ទាប់ពី​ពលរដ្ឋ​ជាង ៣០០​គ្រួសារ​រស់នៅ​ខេត្ត​កំពត បាន​ដាក់​ពាក្យ​ប្ដឹង​ក្រុមហ៊ុន ពិភព​ដី​មាស ដែល​មិន​ប្រគល់​ប្រាក់​ភាគលាភ​ប្រចាំ​ខែ​ដល់​ពួកគេ ដែល​ពួកគេ​បាន​ខ្ចី​ប្រាក់​ពី​ធនាគារ​យក​ទៅ​ធ្វើការ​វិនិយោគ​ជាមួយ​ក្រុមហ៊ុន​នេះ។

ក្នុង​ការ​ដាក់​ប្រាក់​វិនិយោគ​ទិញ​ដី​ឡូត៍​នោះ ដោយ​ក្រុមហ៊ុន​បាន​សន្យា​ជាមួយ​ពលរដ្ឋ​ថា​នឹង​ទទួល​បាន​ប្រាក់​ភាគលាភ​ចំនួន ៣% ឬ ៤% នៃ​ទំហំ​ទឹកប្រាក់​ដាក់​វិនិយោគ​ត្រឡប់​ទៅ​វិញ​ជា​រៀងរាល់​ខែ និង​មាន​ថេរវេលា​រយៈពេល ២​ឆ្នាំ បន្ទាប់ពី​ចប់​កុងត្រា ក្រុមហ៊ុន​នឹង​ទទួល​ទិញ​ដី​ឡូត៍​ទាំងនោះ​ក្នុង​តម្លៃ​ដើម​វិញ។ ប៉ុន្តែ​គិត​មក​ដល់​ពេលនេះ បើ​តាម​ក្រុម​ប្រជាពលរដ្ឋ​អះអាង​ថា អ្នកឧកញ៉ា ហ៊ី គឹមហុង មិន​បាន​ធ្វើ​ទៅ​តាម​កិច្ចសន្យា​របស់​ខ្លួន​ឡើយ។

លោក ហ៊ី គឹមហុង ត្រូវ​បាន​ព្រះករុណា​ព្រះបាទ​សម្ដេចព្រះ បរមនាថ នរោត្តម សីហមុនី ព្រះមហាក្សត្រ​នៃ​ព្រះរាជាណាចក្រ​កម្ពុជា​បាន​ចេញ​ព្រះរាជក្រឹត្យ​ផ្ដល់​គោរមងារ​ជា «អ្នកឧកញ៉ា» កាលពី​ថ្ងៃទី​២១ ខែ​តុលា ឆ្នាំ​២០២២។ ការ​ត្រាស់​បង្គាប់​ផ្ដល់​គោរមងារ​នេះ បន្ទាប់ពី​លោក ហ៊ុន សែន ទូល​ថ្វាយ​ដើម្បី​ស្នើសុំ​ពី​ព្រះអង្គ។

តែ​យ៉ាងណា ករណី​អ្នកឧកញ៉ា និង​ឧកញ៉ា​រំលោភ​កិច្ចសន្យា មិនមែន​មាន​តែ​អ្នកឧកញ៉ា ហ៊ី គឹមហុង នោះ​ទេ ក្នុង​នោះ​ក៏​មាន​ឧកញ៉ា ឡេង ណាវ៉ាត់ត្រា ដែរ ប៉ុន្តែ​រហូត​មក​ទល់​ពេលនេះ សមត្ថកិច្ច​កម្ពុជា​នៅ​មិន​ទាន់​ហ៊ាន​ចាត់​វិធានការ​ច្បាប់​លើ​ឧកញ៉ា​រូប​នេះ​នៅឡើយ​ទេ បើ​ទោះបី​ពលរដ្ឋ​បាន​នាំគ្នា​តវ៉ា និង​ប្ដឹង​រូបលោក​ពី​បទ​រកស៊ី​លក់​ផ្ទះល្វែង​ខ្យល់ និង​ការ​បោកប្រាស់​ទំនុកចិត្ត​របស់​ពលរដ្ឋ​រាប់​ពាន់​រាប់​ម៉ឺន​នាក់​ក៏ដោយ៕

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស