34 C
Phnom Penh

លោក ហ៊ុន សែន ផ្ដល់​ដី​ឧទ្យាន​ជាតិ​បុទុមសាគរ​ជិត ១​ម៉ឺន​ហិកតារ​ឱ្យ​ក្រុមហ៊ុន​អ្នកឧកញ៉ា គិត ម៉េង

ដោយ ឌឹ ខេមបូឌា ដេលី

បទវិភាគ

នាយករដ្ឋមន្ត្រី​ចាំ​ផ្ទះ គឺ​លោក ហ៊ុន សែន សម្រេច​ផ្ដល់​ដី​ឧទ្យាន​ជាតិ​បុទុមសាគរ​នៅ​ខេត្ត​កោះកុង ជិត ១​ម៉ឺន​ហិកតារ​ឲ្យ​ក្រុមហ៊ុន រ៉ូយ៉ាល់ គ្រុប របស់​អ្នកឧកញ៉ា គិត ម៉េង ស្ថិត​នៅ​ក្រោម​ស្លាក​វិនិយោគ។

នៅ​ក្នុង​អនុក្រឹត្យ​ចុះ​ថ្ងៃទី​២៥ ខែ​មករា ឆ្នាំ​២០២៣ ដែល​សារព័ត៌មាន ឌឹ ខេមបូឌា ដេលី ទើប​ទទួល​បាន ឲ្យ​ដឹង​ថា បុរស​ខ្លាំង​ក្រាញ​អំណាច​ជិត ៤០​ឆ្នាំ​នៅ​កម្ពុជា លោក ហ៊ុន សែន បាន​កាត់​ដី​ក្នុង​តំបន់​ឧទ្យាន​ជាតិ​បុទុមសាគរ​ទំហំ ៩៩៦៩​ហិកតារ ស្ថិត​នៅ​ភូមិសាស្ត្រ​ស្រុក​បុទុមសាគរ ខេត្ត​កោះកុង ឲ្យ​ក្រុមហ៊ុន រ៉ូយ៉ាល់ គ្រុប ចាប់ពី​ថ្ងៃ​ចេញ​អនុក្រឹត្យ​នេះ​តទៅ។

ការ​សម្រេច​កាត់​ដី​ក្នុង​តំបន់​ឧទ្យាន​ជាតិ​បុទុមសាគរ ឲ្យ​អ្នកឧកញ៉ា គិត ម៉េង នេះ គឺ​ដើម្បី​ទុក​សម្រាប់​ធ្វើ​ការ​វិនិយោគ។

បើ​តាម​អនុក្រឹត្យ​មួយ​ចេញ​ដោយ​លោក ហ៊ុន សែន កាលពី​ថ្ងៃទី​៦ ខែ​សីហា ឆ្នាំ​២០២០ ឲ្យ​ដឹង​ថា ក្រុមហ៊ុន រ៉ូយ៉ាល់ គ្រុប កន្លង​មក​ក៏​បាន​ទទួល​បាន​ផ្ទៃដី​ទំហំ​ជាង ១៦០​ហិកតារ​ក្នុង​ឧទ្យាន​ជាតិ​បុទុមសាគរ​ផង​ដែរ ដើម្បី​ធ្វើការ​អភិវឌ្ឍ​រោងចក្រ​អគ្គិសនី​ដុត​ធ្យូងថ្ម។

អ្នកឧកញ៉ា គិត ម៉េង មិន​មែន​ទទួល​បាន​ដី​តែ​នៅ​ខេត្ត​កោះកុង នោះ​ទេ អ្នកជំនួញ​ដែល​ស្និទ្ធ​នឹង​គ្រួសារ​លោក ហ៊ុន សែន រូប​នេះ​ក៏​ទទួល​បាន​ដី​នៅ​ខេត្ត​ផ្សេង​ផង​ដែរ​ដែរ។

ក្រៅពី​ក្រុមហ៊ុន​អ្នកឧកញ៉ា គិត ម៉េង នោះ លោក ហ៊ុន សែន ក៏​បាន​ចេញ​អនុក្រឹត្យ​មួយ​កាលពី​ថ្ងៃទី​១១ ខែ​មករា ឆ្នាំ​២០២៣ ដោយ​កាត់​ដី​ទំហំ ៦២៣៤​ហិកតារ ស្ថិត​ក្នុង​ឧទ្យាន​ជាតិ​បុទុមសាគរ ខេត្ត​កោះកុង ឲ្យ​ទៅ​ក្រុមហ៊ុន​ឯកជន​ឈ្មោះ កោះកុង រ៉ាប់ប៊ើរ ភ្លែនថេសិន (Koh Kong Rubber Plantation) របស់​កូន​បង្កើត​អ្នកឧកញ៉ា លី យ៉ុងផាត់ គឺ​លោក លី ភួនរ៉ាត់ ដើម្បី​ធ្វើការ​វិនិយោគ។

កាលពី​ថ្ងៃទី​១ ខែ​វិច្ឆិកា ឆ្នាំ​១៩៩៣ ព្រះករុណា​ព្រះបាទ​សម្តេច ព្រះ​នរោត្តម សីហនុ បាន​ចេញ​អនុក្រឹត្យ​បង្កើត​តំបន់​ឧទ្យាន​ជាតិ​បុទុមសាគរ មាន​ផ្ទៃដី ១​សែន ៨​ម៉ឺន ៣៤០៨​ហិកតារ (១៨៣៤០៨​ហិកតារ) ទុក​ជា​តំបន់​ធម្មជាតិ និង​ជា​ដែន​ជម្រក​សត្វព្រៃ និង​មច្ឆជាតិ​គ្រប់​ប្រភេទ ដែល​ស្ថិត​នៅ​ស្រុក​បុទុមសាគរ ខេត្ត​កោះកុង ប៉ុន្តែ​ឧទ្យាន​ជាតិ​មួយ​នេះ​ត្រូវ​បាន​លោក​នាយករដ្ឋមន្ត្រី​កាត់​ឆ្វៀល​ឱ្យ​ទៅ​ក្រុមហ៊ុន​ឯកជន​ជា​បន្តបន្ទាប់​រហូត​មក ដែល​ជា​ហេតុ​ធ្វើ​ឱ្យ​ធនធាន​ធម្មជាតិ​នៅ​តំបន់​នោះ​រង​នូវ​ការ​បំផ្លិចបំផ្លាញ​យ៉ាង​ធ្ងន់ធ្ងរ។

ទាក់ទិន​នឹង​ការ​សម្បទាន​ដី​រដ្ឋ​ឲ្យ​បុគ្គល​ឯកជន និង​ក្រុមហ៊ុន​ឯកជន កាលពី​ថ្ងៃទី​៣០ ខែ​វិច្ឆិកា ឆ្នាំ​២០២២ លោក ហ៊ុន សែន បាន​ចុះហត្ថលេខា​លើ​អនុក្រឹត្យ​មួយ​ដោយ​កំណត់​ដី​សាធារណៈ​របស់​រដ្ឋ​ជិត ១​លាន​ហិកតារ​នៅ​ក្នុង​តំបន់​ការពារ​ធម្មជាតិ​ក្នុង​ខេត្ត​ចំនួន​១៥ នៃ​ប្រទេស​កម្ពុជា។

ខេត្ត​ទាំង ១៥ ក្នុង​នោះ​មាន​ខេត្ត​មណ្ឌលគិរី រតនគិរី ស្ទឹងត្រែង និង​ខេត្ត​ព្រះវិហារ ជាដើម ដើម្បី​ត្រៀម​ធ្វើ​អនុបយោគ និង​បែងចែក​ជា​កម្មសិទ្ធិ​ឱ្យ​ទៅ​ក្រុមហ៊ុន​ឯកជន​នានា​ដើម្បី​ធ្វើការ​អភិវឌ្ឍ ខណៈ​ខេត្ត​ដែល​មិន​ជាប់​ក្នុង​អនុក្រឹត្យ​នេះ ក៏​ត្រូវ​រង​នូវ​ការ​បែងចែក​ឱ្យ​ទៅ​ក្រុមហ៊ុន​ឯកជន​កាន់កាប់​ធ្វើ​ជា​កម្មសិទ្ធិ​ជា​បន្តបន្ទាប់​ផង​ដែរ៕

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស