អ្នកវិភាគនយោបាយនិយាយថា ការដំឡើងលោក ជីវ កេង ឲ្យធ្វើជាប្រធានតុលាការកំពូល គឺបង្ហាញថា ស្ថាប័នកំពូលៗទាំង ៤ របស់ជាតិ និងប្រទេសកម្ពុជា បានធ្លាក់ចូលក្នុងដៃនៃការគ្រប់គ្រងផ្ដាច់មុខរបស់គ្រួសារត្រកូលហ៊ុន។
ប្រធានវេទិកាពលរដ្ឋលោក គឹម សុខ ប្រាប់សារព័ត៌មាន The Cambodia Daily នៅថ្ងៃទី១៥ សីហា នេះថា លោក ជីវ កេង គឺជាមនុស្សគន្លឹះក្នុងផែនការនយោបាយគ្រប់គ្រងអំណាចពីលោក ហ៊ុន សែន ទៅលោក ហ៊ុន ម៉ាណែត ដែលបានជួយតាក់តែងបំភ្លៃឯកសារខុសច្បាប់នានាក្នុងការរំលាយគណបក្សសង្គ្រោះជាតិកាលពីឆ្នាំ២០១៧ ដែលជាផែនការចម្បងបំផុតក្នុងសេណារីយ៉ូនយោបាយ ជុំវិញការផ្ទេរតំណែងនាយករដ្ឋមន្ត្រីខុសច្បាប់ឲ្យលោក ហ៊ុន ម៉ាណែត នៅពេលនេះ។
លោក គឹម សុខ លើកឡើងថា ការដំឡើងលោក ជីវ កេង ឲ្យធ្វើជាប្រធានតុលាការកំពូលនេះ គឺមានន័យច្បាស់ណាស់ថា ផែនការផ្ទេរតំណែងនាយករដ្ឋមន្ត្រីខុសច្បាប់ពីលោក លោក ហ៊ុន សែន ទៅឲ្យលោក ហ៊ុន ម៉ាណែត គឺចាត់ទុកប្រទេសកម្ពុជាជាប្រទេសផ្ដាច់មុខសម្រាប់តែក្រុមគ្រួសារហ៊ុនប៉ុណ្ណោះ ដែលបង្ហាញឲ្យឃើញថា ការផ្ទេរតំណែងនាយករដ្ឋមន្ត្រីខុសច្បាប់ក្នុងវង្សត្រកូលហ៊ុននេះ កំពុងរុញប្រទេសកម្ពុជាឱ្យវិលទៅរករបបសាធារណរដ្ឋប្រជាមានិតកម្ពុជា និងរបបរដ្ឋកម្ពុជាដូច្នោះដែរ។
លោក គឹម សុខ និយាយថា កម្ពុជាក្រោមស្នាដៃលោក ហ៊ុន ម៉ាណែត អាចនឹងរអិលធ្លាក់ទៅក្នុងរបបដឹកនាំបែបកូរ៉េខាងជើងបន្តិចម្តងៗ ដែលអង្គការរដ្ឋទាំងអស់នឹងស្ថិតក្រោមការចាត់ចែងរបស់បុគ្គលតែម្នាក់ និងបញ្ជាដោយបុគ្គលតែម្នាក់។ លោកបន្តថា របបដឹកនាំបែបនេះបានចាត់ទុកប្រទេសជាតិជាឧបករណ៍ និងចាត់ទុកពលរដ្ឋជាទាសករសម្រាប់ប្រយោជន៍អំណាចរបស់គ្រួសារតែមួយដូច្នោះដែរ។
កាលពីថ្ងៃទី១៤ ខែសីហា ឆ្នាំ២០២៣ រដ្ឋមន្ត្រីក្រសួងយុត្តិធម៌ លោក កើត រិទ្ធ បានចេញលិខិតដំឡើងតួនាទីលោក ជីវ កេង ពីតំណែងអនុប្រធានតុលាការកំពូល មកជាប្រធានស្តីទីតុលាការកំពូលរហូតដល់មានការតែងតាំងប្រធានតុលាការកំពូលថ្មីជាផ្លូវការ។
កាលពីថ្ងៃទី១១ ខែសីហា ឆ្នាំ២០២៣ ព្រះមហាក្សត្រខ្មែរព្រះបរមនាថ នរោត្តម សីហមុនី បានឡាយព្រះហស្តលេខាលើព្រះរាជក្រឹត្យមួយដោយដាក់ឱ្យចូលនិវត្តន៍នូវចៅក្រមចំនួន ៣រូប រួមមានលោក ឌិត មុន្ទី ដែលជាប្រធានតុលាការកំពូល វ័យ ៧៤ឆ្នាំ លោក សោម សិរីវឌ្ឍ ចៅក្រមតុលាការកំពូល វ័យ ៧០ឆ្នាំ និងលោក ទី ណេង ចៅក្រមតុលាការកំពូល វ័យ ៧៩ឆ្នាំ តាមការស្នើសុំរបស់សាមីខ្លួន។
ទាក់ទិននឹងបញ្ហានេះ កាលពីថ្ងៃទី៩ ខែសីហា កន្លងទៅ លោក ហ៊ុន សែន ក៏បានបញ្ជាក់ក្នុងសារសំឡេងជុំវិញករណីដែលលោក ឌិត មុន្ទី បានដាក់លិខិតថ្វាយសុំព្រះមហាក្សត្រចូលនិវត្តន៍កាលពីថ្ងៃទី៣ ខែសីហា កន្លងទៅដែរ ក្រោមហេតុផលថា ដោយសារតែលោក ឌិត មុន្ទី មានវ័យកាន់តែច្រើន និងមានបញ្ហាសុខភាពថែមទៀតនោះ។
ការផ្លាស់ប្ដូរតួនាទី និងសមាសភាពមន្ត្រីរដ្ឋាភិបាលនៅអាណត្តិទី៧ នេះ ត្រូវគេមើលឃើញថា សុទ្ធតែជាការរៀបចំចាត់ចែងរបស់លោក ហ៊ុន សែន ដើម្បីធានាដល់ការគ្រប់គ្រងអំណាចរបស់គាត់ទាំងអស់ ជាពិសេសស្ថាប័នកំពូលៗរបស់ជាតិត្រូវបានមេដឹកនាំក្រាញអំណាចតត្រកូលរូបនេះគ្រប់គ្រងបានទាំងស្រុងទៅហើយនោះ។
ជាក់ស្តែង ស្ថាប័នរដ្ឋាភិបាលត្រូវលោក ហ៊ុន ម៉ាណែត គ្រប់គ្រង ស្ថាប័នរដ្ឋសភាត្រូវអ្នកស្រី ប៊ុន រ៉ានី ជាអ្នកគ្រប់គ្រងតាមរយៈប្រធានរដ្ឋសភាដែលជាមនុស្សជំនិតរបស់គាត់ គឺអ្នកស្រី ឃួន សុដារី ស្ថាប័នព្រឹទ្ធសភាត្រូវបានលោក ហ៊ុន សែន គ្រប់គ្រង ក្នុងនោះលោក ហ៊ុន សែន ក៏នឹងគ្រប់គ្រងគណបក្សប្រជាជនកម្ពុជាក្នុងនាមជាប្រធានបក្សផងដែរ។ លើសពីនេះ លោក ហ៊ុន សែន ក៏មានតួនាទីជាប្រមុខរដ្ឋស្តីទីផងដែររាល់ពេលដែលព្រះមហាក្សត្រអវត្តមាន។
ជុំវិញបញ្ហានេះ អតីតមន្ត្រីនៃគណៈកម្មាធិការជាតិសន្តិសុខលំហសមុទ្រប្រចាំខេត្តកោះកុង លោក មុំ អស្សនី បានលើកឡើងក្នុងកម្មវិធី Idea Talkនៃសារព័ត៌មាន The Cambodia Daily កាលពីរាត្រីថ្ងៃទី១៤ សីហា នេះថា ការរៀបចំផែនការគ្រប់គ្រងអំណាចរបស់លោក ហ៊ុន សែន នៅពេលនេះកំពុងធ្វើឱ្យមន្ត្រីរដ្ឋាភិបាលដែលធ្លាប់ជាសេណារីយ៉ូរបស់លោក ស ខេង អ្នកស្រី ម៉ែន សំអន លោក ហេង សំរិន និងលោក ទៀ បាញ់ ជ្រួលច្របល់នាំគ្នាទៅចុះចូលជាមួយខ្សែបណ្ដាញបក្ខពួករបស់លោក ហ៊ុន សែន និងលោក ហ៊ុន ម៉ាណែត បណ្តើរៗហើយដើម្បីរក្សាតំណែងរបស់ខ្លួន។
លោក មុំ អស្សនី បញ្ជាក់ថា ផែនការរបស់លោក ហ៊ុន សែន ក្នុងការគ្រប់គ្រងអំណាចនៅពេលនេះ មិនមែនដើម្បីតែឱ្យលោក ហ៊ុន សែន មានអំណាចពេញលេញក្នុងនាមជានាយករដ្ឋមន្ត្រីចាត់តាំងទេ គឺគាត់មានផែនការប្រមូលផ្ដុំអំណាចទៅគ្រប់គ្រងប្រទេសទាំងមូលក្នុងដៃគាត់ពីលើព្រះមហាក្សត្រខ្មែរតែម្តង ដូច្នេះប្រសិនបើមន្ត្រីជាន់ខ្ពស់ផ្ទៃក្នុងបក្សកាន់អំណាចនៅតែរក្សាភាពស្ងៀមស្ងាត់បន្តទៀត ពួកគេនឹងចាញ់ល្បិចកលរបស់លោក ហ៊ុន សែន ក្នុងផែនការប្រមូលផ្ដុំអំណាចរបស់គាត់នេះជាមិនខាន៕