29 C
Phnom Penh

ឪពុក​ជន​រងគ្រោះ​ប្តឹង​អធិការរង​ស្រុក​មង្គលបុរី​ពី​បទ​ប្រើ​ទារុណកម្ម​លើ​ជន​រងគ្រោះ​រហូត​ដល់​ស្លាប់

ដោយ ឌឹ ខេមបូឌា ដេលី

បទវិភាគ

លោក លាន លាង ឪពុក​បង្កើត​ជនរងគ្រោះ​ឈ្មោះ លាង ឡាង ដែល​បាន​ស្លាប់ បាន​ដាក់​ពាក្យ​បណ្តឹង​អធិការរង​ស្រុក​មង្គលបុរី ទទួល​បន្ទុក​ផ្នែក​គ្រឿងញៀន លោក អ៊ុក ប៊ុនថុន និង​គូកន ដោយ​ទាមទារ​សំណង​ជំងឺចិត្ត ១០​ម៉ឺន​ដុល្លារ​អាមេរិក ពី​បទ​ប្រើ​ទារុណកម្ម​រហូត​ដល់​ស្លាប់​នៅ​អធិការដ្ឋាន​ស្រុក​មង្គលបុរី ខេត្ត​បន្ទាយមានជ័យ កាលពី​ពេល​ថ្មីៗ​នេះ។

លោក លាន លាង ដែល​ត្រូវ​ជា​ឪពុក​បង្កើត​ជនរងគ្រោះ​ឈ្មោះ លាង ឡាង ដែល​បាន​ស្លាប់ បាន​សម្រេច​ដាក់​ពាក្យ​បណ្តឹង​ហើយ​កាលពី​ថ្ងៃទី​១៦ ខែ​សីហា ឆ្នាំ​២០២៣ ទៅ​កាន់​សាលាដំបូង​ខេត្ត​បន្ទាយមានជ័យ ដើម្បី​ឱ្យ​តុលាការ​ចាត់​វិធានការ​នីតិវិធី​ច្បាប់​លើ​អធិការរង​ស្រុក​មង្គលបុរី ទទួល​បន្ទុក​ផ្នែក​គ្រឿងញៀន លោក អ៊ុក ប៊ុនថុន និង​គូកន ដែល​ដើមបណ្ដឹង​បាន​ចោទ​ថា មន្ត្រី​នគរបាល​ទាំងនោះ​បាន​ធ្វើ​ទារុណកម្ម​លើ​កូនប្រុស​របស់​លោក​រហូត​ដល់​ស្លាប់​អំឡុង​ពេល​សួរ​ចម្លើយ។

លោក លាន លាង រៀបរាប់​ក្នុង​ពាក្យ​បណ្តឹង​នោះ​ថា កាលពី​ថ្ងៃទី​១១ ខែ​សីហា ឆ្នាំ​២០២៣ វេលា​ម៉ោង ៩:៣០​នាទី​ព្រឹក កូនប្រុស​របស់​គាត់​បាន​ចេញ​ទៅ​ច្រូត​ស្មៅ​គោ​ដូច​សព្វ​មួយ​ដង ប៉ុន្តែ​នៅ​វេលា​ម៉ោង ២ និង ១០​នាទី ប្អូនស្រី​របស់​លោក​ឈ្មោះ សៅ ប៊ុនធា បាន​ទូរសព្ទ​ទាក់ទង​មក​ប្រាប់​ថា លោក លាង ឡាង ត្រូវ​បាន​ប៉ូលិស​ចាប់​ខ្លួន​ហើយ។ នៅ​ពេល​ទទួល​បាន​ដំណឹង លោក​ក៏​បាន​ធ្វើ​ដំណើរ​ទៅ​អធិការដ្ឋាន​ស្រុក​មង្គលបុរី ភ្លាមៗ​តែម្តង។

លោក​បន្ត​ថា នៅ​ពេល​ទៅ​ដល់​អធិការដ្ឋាន​ស្រុក លោក​បាន​ឃើញ​មនុស្ស​ម្នាក់​នៅ​ក្នុង​ឡាន​ស្លៀក​ខោ​ខ្លី​ពណ៌​ក្រហម ព្រមទាំង​ស្រែក​ដោយ​ការ​ឈឺចាប់ ប៉ុន្តែ​លោក​មិន​បាន​ចាប់អារម្មណ៍​ថា​ជា​កូន​របស់​លោក​ទេ ព្រោះ​មើល​មិន​ច្បាស់ តែ​លោក​បាន​សួរ​ទៅ​កាន់​ប៉ូលិស​ប្រចាំការ​នៅ​ទីនោះ​អំពី​រឿង​កូនប្រុស​របស់​គាត់​ដែរ ដោយ​ប៉ូលិស​រូប​នោះ​ប្រាប់​ថា កូន​របស់​គាត់​ត្រូវ​បាន​បញ្ជូន​ទៅ​ថ្នាក់លើ​ហើយ ពេល​លោក​លឺ​ដូច្នេះ លោក​ក៏​បាន​ធ្វើ​ដំណើរ​ទៅ​ផ្ទះ​វិញ ប៉ុន្តែ​ពេល​ប្អូនស្រី​ទាក់ទង​ទៅ​ប៉ូលិស​តាម​ទូរសព្ទ​ម្តង​ទៀត ទើប​ប៉ូលិស​ប្រាប់​ថា​កូន​របស់​គាត់​កំពុង​សម្រាក​នៅ​មន្ទីរពេទ្យ។

សាកសព​បុរស​ឈ្មោះ លាង ឡាង នៅ​ភូមិ​ពោធិ៍រៀង ឃុំ​អូរប្រាសាទ ស្រុក​មង្គលបុរី ខេត្ត​បន្ទាយមានជ័យ ស្លាប់​បន្ទាប់ពី​ត្រូវ​សមត្ថកិច្ច​ស្រុក​មង្គលបុរី បញ្ជូន​ទៅ​ដល់​មន្ទីរពេទ្យ​ក្រោយពី​ចាប់​ខ្លួន​យក​ទៅ​សួរ​ចម្លើយ​ពាក់ព័ន្ធ​នឹង​បញ្ហា​គ្រឿងញៀន កាលពី​ថ្ងៃទី​១១ ខែ​សីហា ឆ្នាំ​២០២៣។ (Screenshot)

ឪពុក​ជនរងគ្រោះ​អះអាង​ថា ពេល​ទទួល​បាន​ដំណឹង​នេះ លោក​ក៏​បាន​ធ្វើ​ដំណើរ​ទៅ​មន្ទីរពេទ្យ​ស្រុក​មង្គលបុរី​ភ្លាមៗ​ផង​ដែរ ប៉ុន្តែ​នៅ​ពេល​ទៅ​ដល់​មន្ទីរពេទ្យ កូន​របស់​គាត់​កំពុង​នៅ​ក្នុង​បន្ទប់​សង្គ្រោះ​បន្ទាន់ ដែល​មាន​អាការៈ​ប្រកាច់​ដក​ចង្កាមាន់​រហូត​ដល់​ស្លាប់​បាត់បង់​ជីវិត​នៅ​ម៉ោង ៥:១៥​នាទី​រសៀល​នៅ​ថ្ងៃទី​១១ ខែ​សីហា ដដែល​នោះ។

លោក លាន លាង បញ្ជាក់​ថា ក្រោយ​ទទួល​បាន​សាកសព គាត់​ពិនិត្យ​ឃើញ​ថា​សាកសព​កូន​របស់​គាត់​មាន​ហូរ​ឈាម​តាម​មាត់ និង​មាន​ស្លាកស្នាម​ជាំ​ខ្មៅ​ត្រង់​ប្រជុំ​ចិញ្ចើម ស្នាម​ជាំ​ខ្មៅ​ក្រោម​ប្រអប់​ទ្រូង​ទាំង​សងខាង ស្នាម​ជាំ​ខ្មៅ​ពីក្រោយ​ខ្នង និង​មាន​ស្នាម​ជាំ​លើ​ប្រអប់​ខ្នងដៃ​ស្ដាំ​ផង​ដែរ។ លោក​បញ្ជាក់​ថា ជនរងគ្រោះ​មិន​ធ្លាប់​មាន​ជំងឺ ឬ​អាការៈ​បែប​នេះ​ទេ​ពី​មុន​មក។

កាលពី​ថ្ងៃទី​១១ ខែ​សីហា ឆ្នាំ​២០២៣ បុរស​ម្នាក់​ឈ្មោះ លាង ឡាង នៅ​ភូមិ​ពោធិ៍រៀង ឃុំ​អូរប្រាសាទ ស្រុក​មង្គលបុរី ខេត្ត​បន្ទាយមានជ័យ ត្រូវ​បាន​សមត្ថកិច្ច​ស្រុក​មង្គលបុរី ចាប់​ខ្លួន​យក​ទៅ​សួរ​ចម្លើយ​ពាក់ព័ន្ធ​នឹង​បញ្ហា​គ្រឿងញៀន អំឡុង​ពេល​ជនរងគ្រោះ​ច្រូត​ស្មៅ​នៅ​វាលស្រែ ប៉ុន្តែ​ក្រោយ​សួរ​ចម្លើយ​ប្រហែល​ជា ៣​ម៉ោង សមត្ថកិច្ច​បាន​បញ្ជូន​ជនរងគ្រោះ​ទៅ​មន្ទីរពេទ្យ​យ៉ាង​តក់ក្រហល់។

ជុំវិញ​បញ្ហា​នេះ កាលពី​ថ្ងៃទី​១៤ ខែ​សីហា ឆ្នាំ​២០២៣ អ្នក​នាំពាក្យ​ស្នងការដ្ឋាន​នគរបាល​ខេត្ត​បន្ទាយមានជ័យ លោក រ៉ើន វីរៈ បាន​ចេញ​សេចក្តី​បំភ្លឺ​ករណី​ចាប់​ខ្លួន​លោក លាង ឡាង ថា​ធ្វើឡើង​បន្ទាប់ពី​មាន​ប្រជាពលរដ្ឋ​ម្នាក់​ឈ្មោះ ងួន ង៉ាន បាន​រាយការណ៍​ប្រាប់​សមត្ថកិច្ច​ថា បុគ្គល​ឈ្មោះ លាង ឡាង បាន​ឲ្យ​ខ្លួន​ទៅ​យក​ថ្នាំញៀន​ដែល​មាន​តម្លៃ ៤​ម៉ឺន​រៀល​នៅ​ចំណុច​វត្ត​ដងរុន ភូមិ​ដងរុន ឃុំ​បន្ទាយនាង ស្រុក​មង្គលបុរី។

លោក រ៉ើន វីរៈ អះអាង​ថា ក្រោយ​ឃាត់​ខ្លួន និង​ត្រួតពិនិត្យ​រក​គ្រឿងញៀន ជន​សង្ស័យ​ឆ្លើយ​ថា​ខ្លួន​បាន​បោះ​ថ្នាំញៀន​ចោល​ហើយ។ បន្ទាប់​មក សមត្ថកិច្ច​ក៏​បាន​នាំ​ខ្លួន​បុរស​រូប​នោះ​មក​អធិការដ្ឋាន​នគរបាល​ស្រុក​មង្គលបុរី ដើម្បី​សាកសួរ​បន្ថែម។ លោក​បន្ត​ថា ពេល​មក​ដល់​អធិការដ្ឋាន ជន​សង្ស័យ​បាន​សុំ​ហូប​បាយ សុំ​ទឹក​ផឹក​អស់​ជាច្រើន​ដប និង​សុំ​ចូល​បន្ទប់ទឹក​ផង​ដែរ ហើយ​ពេល​នោះ​ជន​សង្ស័យ​បាន​យក​ទឹក​ស្រោច​លើ​ខ្លួន ដោយ​ស្រែក​ថា​ក្ដៅ​ណាស់ៗ។ បន្ទាប់​មក ជន​សង្ស័យ​ក៏​មាន​អាការៈ​ប្លែក​ដោយ​បែក​ពពុះ​មាត់ និង​បាន​លូន​ចេញពី​បន្ទប់ទឹក ពេល​នោះ​សមត្ថកិច្ច​សង្ស័យ​ថា​រូប​គេ​បាន​លេប​ថ្នាំញៀន​ចូល​ក្នុង​ពោះ ក៏​បញ្ជូន​ទៅ​កាន់​មន្ទីរពេទ្យ​តែម្តង ហើយ​ពេល​ធ្វើ​តេស្ដ​ទឹកនោម​រក​សារធាតុ​ញៀន​លទ្ធផល​បង្ហាញ​ថា​វិជ្ជមាន​ផង​ដែរ។

អ្នក​នាំពាក្យ​រូប​នេះ​បញ្ជាក់​ថា បន្ទាប់ពី​ជន​សង្ស័យ​បាន​ស្លាប់ ក្រុម​គ្រូពេទ្យ និង​នគរបាល​ជំនាញ​ធ្វើ​កោសល្យវិច័យ​ត្រួតពិនិត្យ​ឃើញ​ថា ជន​សង្ស័យ​ពិត​ជា​ស្លាប់​ដោយសារ​គាំង​បេះដូង​មែន ហើយ​ក្រុម​គ្រួសារ​សព​ក៏​បាន​ទទួលស្គាល់​តាម​ការ​ពិនិត្យ​របស់​ក្រុម​គ្រូពេទ្យ​ថា ការ​ស្លាប់​នេះ​គឺ​ដោយសារ​គាំង​បេះដូង​ដែរ។

លោក រ៉ើន វីរៈ គូស​បញ្ជាក់​ថា ប្រសិនបើ​ក្រុម​គ្រួសារ​សព​បាន​ទទួលស្គាល់​តាម​ការ​ពិនិត្យ​របស់​ក្រុម​គ្រូពេទ្យ​ក្នុង​ករណី​ស្លាប់​នេះ​ថា​កូន​របស់​គាត់​បាន​ស្លាប់​ដោយសារ​គាំង​បេះដូង​ទៅ​ហើយ​នោះ ហេតុ​អ្វី​បាន​ជា​គាត់​ប្តឹង​សមត្ថកិច្ច​ទៅ​វិញ?

ទោះជា​យ៉ាង​នេះ​ក្តី កាលពី​ថ្ងៃទី​១១ ខែ​សីហា ក្រុម​អ្នក​សារព័ត៌មាន​បាន​ទាក់ទង​ទៅ​អធិការដ្ឋាន​ស្រុក​មង្គលបុរី លោក ស៊ីន ស៊ីណារ៉ាក់ ដែរ តែ​លោក​ជំរុញ​ឱ្យ​ទាក់ទង​ទៅ​អ្នក​នាំពាក្យ​ស្នងការដ្ឋាន​នគរបាល​ខេត្ត​បន្ទាយមានជ័យ លោក រ៉ើន វីរៈ វិញ ដើម្បី​ឱ្យ​ដឹង​រឿង​នេះ​កាន់តែ​ច្បាស់ ប៉ុន្តែ​លោក រ៉ើន វីរៈ បាន​ផ្តាច់​ទូរសព្ទ​បិទ​ការ​ទាក់ទង​នៅ​ពេល​លឺ​អ្នក​សារព័ត៌មាន​សាកសួរ​អំពី​បញ្ហា​ខាងលើ​នេះ។

ទាក់ទិន​នឹង​បញ្ហា​នេះ អ្នក​នាំពាក្យ​សមាគម​ការពារ​សិទ្ធិមនុស្ស​អាដហុក (Adhoc) លោក ស៊ឹង សែនករុណា ប្រាប់​សារព័ត៌មាន The Cambodia Daily ថា គ្រួសារ​ជន​រងគ្រោះ​មាន​តែ​ប្តឹង​ទៅ​គណៈកម្មាធិការ​ប្រឆាំង​អំពើ​ទារុណកម្ម និង​ដាក់​ពាក្យ​បណ្តឹង​ជាមួយ​នឹង​អង្គការ​ក្រៅ​រដ្ឋាភិបាល​ដែល​ធ្វើការ​លើ​វិស័យ​សិទ្ធិមនុស្ស​ប៉ុណ្ណោះ ដើម្បី​ជំរុញ​ឱ្យ​មាន​ការ​ស៊ើបអង្កេត និង​ប្រមូល​ភស្តុតាង​លើ​ករណី​នេះ​ឱ្យ​បាន​ច្បាស់ ព្រោះ​ថា​បើ​ពិនិត្យ​តាម​ស្លាកស្នាម​លើ​រូបរាងកាយ​របស់​ជន​រងគ្រោះ គឺ​មាន​មន្ទិល​សង្ស័យ​យ៉ាង​ច្រើន​ជុំវិញ​ករណី​នេះ ដែល​បង្ហាញ​ថា​ជនរងគ្រោះ​មិន​បាន​ស្លាប់​ដោយសារ​ជំងឺ​គាំង​បេះដូង​នោះ​ទេ៕

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស