ក្រុមសិទ្ធិមនុស្សក្នុងស្រុកអះអាងថា ឪពុកម្តាយ ឬសាច់ញាតិជនរងគ្រោះដែលសង្ស័យថាបានស្លាប់ដោយសារការធ្វើទារុណកម្មពីសំណាក់អាជ្ញាធរស្រុកមង្គលបុរី ខេត្តបន្ទាយមានជ័យ អាចដាក់ពាក្យបណ្តឹងជាមួយនឹងអង្គការក្រៅរដ្ឋាភិបាលដែលធ្វើការលើវិស័យសិទ្ធិមនុស្ស និងប្តឹងទៅគណៈកម្មាធិការប្រឆាំងអំពើទារុណកម្ម ដើម្បីស្វែងរកយុត្តិធម៌ឱ្យជនរងគ្រោះដែលបានបាត់បង់ជីវិត។
អ្នកនាំពាក្យសមាគមការពារសិទ្ធិមនុស្សអាដហុក (Adhoc) លោក ស៊ឹង សែនករុណា បានប្រាប់សារព័ត៌មាន The Cambodia Daily នៅថ្ងៃទី១៦ សីហា នេះថា ការដាក់ពាក្យបណ្តឹងទៅគណៈកម្មាធិការប្រឆាំងអំពើទារុណកម្ម គឺដើម្បីឱ្យគណៈកម្មាធិការមួយនេះបើកការស៊ើបអង្កេតប្រមូលភស្តុតាងលើករណីនេះឱ្យបានច្បាស់ ព្រោះថាបើពិនិត្យតាមស្លាកស្នាមលើរូបរាងកាយរបស់ជនរងគ្រោះ គឺមានមន្ទិលសង្ស័យយ៉ាងច្រើនដែលពាក់ព័ន្ធនឹងការធ្វើទារុណកម្មរហូតដល់ស្លាប់ ដែលមិនមែនបណ្តាលមកពីជំងឺគាំងបេះដូងដូចសមត្ថកិច្ច និងក្រុមគ្រូពេទ្យបានអះអាងនោះទេ។
លោក ស៊ឹង សែនករុណា អំពាវនាវឱ្យសមត្ថកិច្ច និងស្ថាប័នពាក់ព័ន្ធ អនុវត្តច្បាប់ឱ្យបានម៉ឺងម៉ាត់លើករណីនេះ ដើម្បីទប់ស្កាត់កុំឱ្យអំពើល្មើសបែបនេះកើតឡើងបន្តទៀត។
លោកបន្តថា ប្រសិនបើសមត្ថកិច្ចរកឃើញថាការស្លាប់របស់ជនរងគ្រោះបណ្តាលមកពីការធ្វើទារុណកម្ម នោះគេត្រូវតែអនុវត្តនីតិវិធីច្បាប់ទៅលើជនល្មើសជាដាច់ខាត ដើម្បីធានាការពារនូវក្រមសីលធម៌របស់មន្ត្រីអនុវត្តច្បាប់ក្រោយៗទៀតឱ្យបានល្អចំពោះពលរដ្ឋ បើមិនដូច្នោះទេ វានឹងកាន់តែបង្កឱ្យមានអំពើនិទ្ទណ្ឌភាព ហើយពលរដ្ឋក៏កាន់តែអស់ទំនុកចិត្តលើប្រព័ន្ធយុត្តិធម៌ថែមទៀត។
កាលពីថ្ងៃទី១១ ខែសីហា ឆ្នាំ២០២៣ បុរសម្នាក់ឈ្មោះ លាង ឡាង នៅភូមិពោធិ៍រៀង ឃុំអូរប្រាសាទ ស្រុកមង្គលបុរី ខេត្តបន្ទាយមានជ័យ ត្រូវបានសមត្ថកិច្ចស្រុកមង្គលបុរី ចាប់ខ្លួនយកទៅសួរចម្លើយពាក់ព័ន្ធនឹងបញ្ហាគ្រឿងញៀន អំឡុងពេលជនរងគ្រោះច្រូតស្មៅនៅវាលស្រែ ប៉ុន្តែក្រោយសួរចម្លើយប្រហែល ៣ម៉ោង សមត្ថកិច្ចបានបញ្ជូនជនរងគ្រោះទៅមន្ទីរពេទ្យយ៉ាងតក់ក្រហល់។
បន្ទាប់ពីសមត្ថកិច្ចបញ្ជូនជនរងគ្រោះទៅមន្ទីរពេទ្យស្រុកមង្គលបុរី សាច់ញាតិជនរងគ្រោះក៏បានទៅដល់មន្ទីរពេទ្យដែរបន្ទាប់ពីទទួលបានដំណឹងនេះ ប៉ុន្តែនៅពេលទៅដល់ ជនរងគ្រោះបានស្លាប់បាត់បង់ជីវិតទៅហើយ ក្នុងនោះខាងមន្ទីរពេទ្យ និងអធិការស្រុកមង្គលបុរី បានបង្ខំឱ្យឪពុកជនរងគ្រោះផ្ដិតស្នាមមេដៃលើលិខិតបញ្ជាក់លទ្ធផល ដើម្បីទទួលយកសាកសពកូនប្រុសរបស់ខ្លួន។
នៅក្នុងលិខិតបញ្ជាក់នោះ សរសេរថា ជនរងគ្រោះបានស្លាប់ដោយសារជំងឺគាំងបេះដូង ខណៈដងខ្លួនរបស់ជនរងគ្រោះនៅក្រោមប្រអប់ទ្រូងខាងស្តាំមានស្នាមជាំខ្មៅធ្ងន់ធ្ងរ និងហូរឈាមតាមមាត់ថែមទៀត។
ឪពុកជនរងគ្រោះអះអាងថា បើគាត់មិនផ្ដិតស្នាមមេដៃលើលិខិតនោះទេ ខាងមន្ទីរពេទ្យនឹងមិនប្រគល់កូនរបស់គាត់ឱ្យយកមកធ្វើបុណ្យឡើយ ដូច្នេះដើម្បីយកសពកូនមកធ្វើបុណ្យតាមប្រពៃណី គាត់មានតែបង្ខំចិត្តផ្ដិតស្នាមមេដៃលើលិខិតនោះតែប៉ុណ្ណោះ បើទោះបីជាស្នាមមេដៃរបស់គាត់ហាក់ដូចជាជំរុញឱ្យកូនគាត់ស្លាប់ទាំងអយុត្តិធម៌ក៏ដោយ។ សាកសពកូនប្រុសរបស់គាត់ទើបតែត្រូវបូជាតាមប្រពៃណីសាសនាកាលពីថ្ងៃទី១៤ ខែសីហា កន្លងទៅនេះ។
ទាក់ទិននឹងបញ្ហានេះ អធិការស្រុកមង្គលបុរី លោក ស៊ីន ណារ៉ាក់ បានចោទជាសំណួរជាច្រើនទៅកាន់អ្នកសារព័ត៌មានដែលតាមដានករណីនេះថា តើពួកគេទទួលបានព័ត៌មានថាក្មេងប្រុស លាង ឡាង នេះស្លាប់ដោយសារការធ្វើទារុណកម្មសួរចម្លើយពីសំណាក់អធិការស្រុកមង្គលបុរី មកពីអ្នកណា បើឪពុកជនរងគ្រោះបានផ្ដិតស្នាមមេដៃទទួលស្គាល់ថាកូនរបស់គាត់ស្លាប់ដោយសារជំងឺគាំងបេះដូងទៅហើយនោះ។
អធិការស្រុកមង្គលបុរីរូបនេះបញ្ជាក់ថា បើចង់ដឹងរឿងនេះច្បាស់ ត្រូវសួរទៅអ្នកនាំពាក្យស្នងការដ្ឋានខេត្តបន្ទាយមានជ័យ លោក រ៉ើន វីរៈ វិញ ប៉ុន្តែលោក រ៉ើន វីរៈ មិនបានបកស្រាយទេនៅពេលដែលអ្នកសារព័ត៌មានចោទសួរអំពីករណីនេះ ដោយលោកបិទទូរសព្ទផ្ដាច់ការទាក់ទងតែម្តង។
ទាក់ទិននឹងបញ្ហានេះ ជនរងគ្រោះដែលធ្លាប់រងនូវការចាប់ខ្លួន និងធ្វើទារុណកម្មសួរចម្លើយពីសមត្ថកិច្ចកម្ពុជា បានប្រាប់សារព័ត៌មាន The Cambodia Daily ក្នុងលក្ខខណ្ឌមិនបញ្ចេញឈ្មោះកាលពីពេលកន្លងទៅថា លោកធ្លាប់ត្រូវបានសមត្ថកិច្ចចាប់ខ្លួនម្តងដែរពីបទឆបោក ប៉ុន្តែតាមការពិត វាជារឿងអយុត្តិធម៌បំផុតសម្រាប់រូបលោកដែលមិនបានប្រព្រឹត្ត ប៉ុន្តែបែរជាត្រូវចាប់ខ្លួនទៅវិញ។
ប្រភពដដែលរៀបរាប់ថា នីតិវិធីក្នុងការសួរចម្លើយ គេមានក្រុមលួងលោម និងក្រុមប្រើទារុណកម្មស្ថិតក្នុងកៅអីជ័រ ដោយដៃជាប់ខ្នោះព័ទ្ធស្លាបសេកទៅខាងក្រោយ ហើយលោកត្រូវបានសមត្ថកិច្ចម្នាក់វាយចំកណ្តាលមុខមួយដៃពេញទំហឹងដោយមិនដឹងខ្លួន ដែលធ្វើឲ្យលោកដួលផ្ងាកទៅក្រោយបែកអំពិលអំពែកហ៊ឹងត្រចៀកស្តាប់អ្វីមិនលឺនោះទេ។
បុរសរូបនោះបញ្ជាក់ថា សមត្ថកិច្ចបានប្រើទណ្ឌកម្មលើគាត់ចំនួន ៣ដង រហូតទាល់តែគាត់ព្រមឆ្លើយទៅតាមអ្វីដែលគេចង់បាន ទើបគេឈប់ធ្វើទារុណកម្ម ហើយគេនិយាយចំអកឲ្យថា បើឆ្លើយបែបនេះតាំងពីយូរមក ប្រហែលមិនឈឺខ្លួននោះទេ។
ទាក់ទិននឹងបញ្ហានេះ កាលពីអំឡុងខែមេសា ឆ្នាំ២០២១ ជនសង្ស័យម្នាក់ឈ្មោះ ពេជ្រ ធារ៉េត បានស្លាប់ភ្លាមៗដែរបណ្ដាលមកពីការធ្វើទារុណកម្មរបស់សមត្ថកិច្ចកម្ពុជា អំឡុងពេលសួរចម្លើយនៅស្នងការដ្ឋានខេត្តបាត់ដំបង ក្នុងនោះគេពិនិត្យឃើញថា សពរបស់គាត់មានស្នាមរបួសបែកឈាមខ្មៅពេញខ្លួន ប៉ុន្តែសមត្ថកិច្ចប្រកែកថាជនរងគ្រោះស្លាប់ដោយសារជំងឺគាំងបេះដូង៕