នាយករដ្ឋមន្ត្រីចាំផ្ទះលោក ហ៊ុន សែន បានកាត់ផ្ទៃដីបឹងតាមោក ៧ហិកតារប្រគល់ឲ្យបុគ្គលមានប្រាក់ដែលពុំសូវស្គាល់ឈ្មោះ ដើម្បីឲ្យធ្វើជាកម្មសិទ្ធិផ្ទាល់ខ្លួន ដោយពន្ធអាករជាបន្ទុករបស់រដ្ឋ ដែលរហូតមកដល់ពេលនេះ ផ្ទៃដីបឹងធម្មជាតិមួយនេះត្រូវបានកាត់អស់ជាង ២០០០ហិកតារហើយ ដើម្បីឲ្យអ្នកមានអំណាច និងមានលុយ។
យោងតាមអនុក្រឹត្យចុះថ្ងៃទី២៦ ខែមករា ឆ្នាំ២០២៣ បុរសខ្លាំងក្រាញអំណាចតពូជនៅកម្ពុជា លោក ហ៊ុន សែន បានកាត់ផ្ទៃដីបឹងតាមោកចំនួន ៤ទីតាំងស្ថិតនៅសង្កាត់សំរោង និងសង្កាត់ព្រែកព្នៅ ខណ្ឌព្រែកព្នៅ សរុប ៧ហិកតារ ដើម្បីប្រគល់ឲ្យបុគ្គលមានប្រាក់ធ្វើជាកម្មសិទ្ធិ ដោយពន្ធអាករជាបន្ទុករបស់រដ្ឋ។
បុគ្គលដែលទទួលបានដីបឹងតាមោកមិនសូវមានស្គាល់ឈ្មោះនោះ មានលោកស្រី សុក ស្រីពៅ, អេង ស៊ីឆេង និងលោកស្រី វ៉ាន់ ធីតា ចាប់ពីថ្ងៃចុះហត្ថលេខានេះតទៅ។
បើតាមអង្គការសមាគមធាងត្នោត ឲ្យដឹងថា គិតមកដល់ពេលនេះ លោក ហ៊ុន សែន ដែលជានាយករដ្ឋមន្ត្រីចាំផ្ទះ បានកាត់ផ្ទៃបឹងតាមោកកើនឡើងដល់ ៧១ដង ដែលមានទំហំសរុបចំនួន ២៣៧៦,៩៩៨២ហិកតារ ឬស្មើនឹងជាង ៧៣% នៃផ្ទៃបឹងធម្មជាតិទាំងមូល ខណៈផ្ទៃបឹងនៅសល់តែប្រមាណ ១០០០ហិកតារទៀតប៉ុណ្ណោះ។
ក្រៅពីបុគ្គល ៤នាក់ខាងលើ លោក ហ៊ុន សែន បានកាត់ផ្ទៃបឹងតាមោកឲ្យសាច់ញាតិរបស់លោក ក្នុងនោះមានប្អូនស្រី កូនៗរបស់លោក និងមន្ត្រីជាន់ខ្ពស់គណបក្សប្រជាជនកម្ពុជា ព្រមទាំងក្រសួងស្ថាប័ន ជាដើម។
បន្ទាប់ពីទទួលបានដីពីរដ្ឋាភិបាលនោះ បច្ចុប្បន្ន រថយន្តនិងគ្រឿងចក្រកំពុងសម្រុកចាក់ដីបឹងធម្មជាតិយ៉ាងសកម្ម ដោយមិនខ្វល់ផលប៉ះពាល់ និងប្រជាពលរដ្ឋឡើយ។ លើសពីនេះ ការកាត់ផ្ទៃបឹងតាមោក ដែលជាបឹងធម្មជាតិចុងក្រោយនេះ ក៏បានបង្កឲ្យមានជំនន់ទឹកភ្លៀងលិចទីក្រុងភ្នំពេញ ដោយសារបឹងនេះជាអាំងស្តុកទឹក និងរំដោះទឹកចេញពីទីក្រុងភ្នំពេញ៕