36 C
Phnom Penh

ព្រះមហាក្សត្រ៖ រដ្ឋសភា​ត្រូវ​បំពេញ​ភារកិច្ច​របស់​ខ្លួន​តាម​រដ្ឋធម្មនុញ្ញ​និង​ច្បាប់​ជា​ធរមាន

ដោយ ឌឹ ខេមបូឌា ដេលី

បទវិភាគ

ព្រះមហាក្សត្រ​មាន​ព្រះរាជ​បន្ទូល​ទៅ​កាន់​រដ្ឋសភា​ដែល​ជា​អង្គការ​មាន​អំណាច​នីតិប្បញ្ញត្តិ អំណាច​នីតិប្បញ្ញត្តិ ត្រូវ​បំពេញ​ភារកិច្ច​របស់​ខ្លួន​ឲ្យ​ដូច​មាន​កំណត់​ក្នុង​រដ្ឋធម្មនុញ្ញ និង​ច្បាប់​ជា​ធរមាន បន្ទាប់ពី​បេក្ខជន​ជាប់​ឆ្នោត​ទាំង ១២៥​រូប​ចូល​ធ្វើ​សច្ចាប្រណិធាន​នៅ​ក្នុង​ព្រះបរមរាជវាំង ដើម្បី​ចូល​កាន់​តំណែង​ក្នុង​រដ្ឋសភា​ជា​ផ្លូវការ។

ព្រះករុណា​ព្រះបាទ​សម្តេច​ព្រះ បរមនាថ នរោត្តម សីហមុនី មាន​បន្ទូល​ដូច្នេះ​នៅ​ក្នុង​កិច្ចប្រជុំ​លើកដំបូង និង​សម័យ​ប្រជុំ​លើក​ទី​១ សម្រាប់​នីតិកាល​ទី​៧ នា​ថ្ងៃទី​២១ ខែ​សីហា ឆ្នាំ​២០២៣ នេះ ដើម្បី​ប្រកាស​ពី​សុពលភាព​ក្រុម​សមាជិក​សភា​ថ្មី និង​អនុម័ត​បទបញ្ជា​ផ្ទៃក្នុង​របស់​រដ្ឋសភា។

ក្នុង​សេចក្តី​ប្រកាស​ព័ត៌មាន​របស់​រដ្ឋសភា​ដដែល​ថា ក្រុម​សមាជិក​សភា​ទាំង ១២៥​រូប ក្នុង​នោះ​មកពី​គណបក្ស​ប្រជាជន​កម្ពុជា ១២០​រូប និង​គណបក្ស​ហ៊្វុនស៊ិនប៉ិច ៥​រូប។ ក្រោយពី​បញ្ចប់​កិច្ចប្រជុំ​នា​ពេល​ព្រឹក និង​ពេល​រសៀល ពួកគេ​នឹង​ធ្វើ​ដំណើរ​ទៅ​ស្បថ​នៅ​ព្រះបរមរាជវាំង។

ក្នុង​ពិធី​ប្រកាស​សុពលភាព​នោះ ព្រះបាទ​បរមនាថ នរោត្តម សីហមុនី មាន​បន្ទូល​ថា រដ្ឋសភា​ដែល​ជា​អង្គការ​មាន​អំណាច​នីតិប្បញ្ញត្តិ អំណាច​នីតិប្បញ្ញត្តិ ត្រូវ​បំពេញ​ភារកិច្ច​របស់​ខ្លួន​ឲ្យ​ដូច​មាន​កំណត់​ក្នុង​រដ្ឋធម្មនុញ្ញ និង​ច្បាប់​ជា​ធរមាន ដើម្បី​បន្ត​និរន្តរភាព​នយោបាយ សេដ្ឋកិច្ច​សង្គម វប្បធម៌ កសាង​កម្ពុជា​ជា​រដ្ឋ​ដ៏​រឹងមាំ និង​ជឿនលឿន។

ដោយ​ផ្អែក​លើ​ច្បាប់ ធានា និង​អនុវត្ត​ច្បាប់​ដោយ​ស្មើភាព​សម្រាប់​ប្រជាពលរដ្ឋ​គ្រប់​រូប និង​ធានា​ការពារ​លើកស្ទួយ​សិទ្ធិ​សេរីភាព​គ្រប់​បែប​យ៉ាង​របស់​ប្រជាពលរដ្ឋ ដោយសារ​តំណាងរាស្ត្រ​ក្នុង​រដ្ឋសភា​ជា​តំណាង​ប្រជាជាតិ​ខ្មែរ​ទាំងមូល។

ព្រះអង្គ​មាន​បន្ទូល​ថា តំណាងរាស្ត្រ​ត្រូវ​ធ្វើ​យ៉ាង​ណា​ខិតខំ​ប្រឹងប្រែង​បន្ថែម​ទៀត​ជួយ​ប្រជាពលរដ្ឋ​ឲ្យ​រស់នៅ​បាន​ស្មើភាព​គ្នា​ក្នុង​ជំនឿ​សាសនា ការ​សិក្សា​រៀនសូត្រ ការ​មាន​ការងារ​ធ្វើ​សមរម្យ​ទៅ​តាម​កម្លាំង​សមត្ថភាព និង​កម្រិត​វិជ្ជា​របស់​ខ្លួន។

សម័យប្រជុំ​លើកដំបូង​របស់​រដ្ឋសភា​នា​ថ្ងៃទី​១២ សីហា នេះ បាន​រង​ការ​រិះគន់​ពី​សហគមន៍​ជាតិ និង​អន្តរជាតិ​ខ្លាំង ខណៈ​ប្រជាពលរដ្ឋ​ខ្មែរ​នៅ​ក្រៅ​ប្រទេស​ក៏​បាន​នាំគ្នា​ចេញ​ធ្វើ​បាតុកម្ម ដើម្បី​ប្រឆាំង​នឹង​រដ្ឋាភិបាល​ថ្មី​ដែល​ដឹកនាំ​ដោយ​កូនប្រុស​របស់​លោក ហ៊ុន សែន គឺ​លោក ហ៊ុន ម៉ាណែត។

លោក ហ៊ុន ម៉ាណែត ត្រូវ​បាន​លោក ហ៊ុន សែន ផ្ទេរ​តំណែង​ឲ្យ​បន្ត​ស្នង​អំណាច​ជា​នាយករដ្ឋមន្ត្រី​ថ្មី​របស់​កម្ពុជា​ចាប់ពី​ថ្ងៃទី​២២ ខែ​សីហា នេះ​ទៅ បន្ទាប់ពី​រដ្ឋសភា​បើក​កិច្ចប្រជុំ​លើក​ទី​១ សម្រាប់​នីតិកាល​ទី​៧ នា​ថ្ងៃទី​២១ ខែ​សីហា ឆ្នាំ​២០២៣។

ការ​ផ្ទេរ​អំណាច​ត​ពូជ​ពី​ឪពុក​ទៅ​កូន​នេះ បាន​ធ្វើឡើង​បន្ទាប់ពី​លោក ហ៊ុន សែន ជា​ឪពុក​បាន​ដឹកនាំ​ប្រទេស​កម្ពុជា​អស់​រយៈពេល​ជិត ៤០​ឆ្នាំ ហើយ​បាន​ឈាន​ទៅ​ដឹកនាំ​តាម​បែប​ផ្ដាច់ការ​ត​ពូជ​ពង្ស​វង្ស​នៃ​គ្រួសារ​ហ៊ុន និង​បក្ខពួក។

លោក ហ៊ុន ម៉ាណែត នឹង​ដឹកនាំ​គណបក្ស​ប្រជាជន​កម្ពុជា​ដែល​បង្កើត​ឡើង​រដ្ឋាភិបាល​វៀតណាម​បន្ត​វេន​ពី​ឪពុក​ចាប់​ថ្ងៃទី​២២ ខែ​សីហា ឆ្នាំ​២០២៣ ខណៈ​រដ្ឋាភិបាល​វៀតណាម​ក៏​បាន​ចេញ​សេចក្ដី​ថ្លែងការណ៍​មួយ​អបអរ​ឈាម​ថ្មី​នេះ​ដែរ។

ជុំវិញ​រឿង​នេះ វេទិកា​ពលរដ្ឋ​ដែល​មាន​មូលដ្ឋាន​នៅ​សហរដ្ឋ​អាមេរិក ក៏​បាន​ចេញ​សេចក្ដី​ថ្លែងការណ៍​មួយ​ដោយ​ទុក​រដ្ឋាភិបាល​ថ្មី​ដឹកនាំ​ដោយ​លោក ហ៊ុន ម៉ាណែត ថា​ជា​នាយករដ្ឋមន្ត្រី​ខុស​ច្បាប់ មិន​តំណាង​ផល​ប្រយោជន៍​ប្រជាពលរដ្ឋ​ខ្មែរ។

ការ​លើកឡើង​ដូច្នេះ ដោយ​វេទិកា​ពលរដ្ឋ​ថា​ការ​បោះឆ្នោត​នៅ​ថ្ងៃទី​២៣ ខែ​កក្កដា ឆ្នាំ​២០២៣ មិន​អាច​ចាត់ទុក​ថា​ជា​ការ​បោះឆ្នោត​ជ្រើសតាំង​តំណាងរាស្ត្រ​ដើម្បី​បង្កើត​រដ្ឋសភា​របស់​ប្រទេស​ជាតិ​ឡើយ ដោយសារ​ការ​បោះឆ្នោត​នោះ​ធ្វើឡើង​ដោយ​គ្មាន​សេរីភាព មិន​ត្រឹមត្រូវ និង​យុត្តិធម៌ ព្រមទាំង​គំរាមកំហែង​ភាព​សម្ងាត់​នៅ​ពេល​ក្រុម​អ្នក​នយោបាយ និង​បក្ស​នយោបាយ​គូប្រជែង​ត្រូវ​បាន​ផាត់​ចេញពី​សង្វៀន​ប្រកួត។

រីឯ​គណៈកម្មាធិការ​ជាតិ​រៀបចំ​ការ​បោះឆ្នោត​វិញ ស្ថិត​នៅ​ក្រោម​ឥទ្ធិពល​ផ្ដាច់មុខ​របស់​លោក ហ៊ុន សែន ដែល​ផ្ទុយ​ស្រឡះ​ពី​ខ្លឹមសារ​ស្នូល​នៃ​ច្បាប់​បោះឆ្នោត​ជ្រើសតាំង​តំណាងរាស្ត្រ​មាត្រា​២ និង​ជាពិសេស​ស្មារតី​រដ្ឋធម្មនុញ្ញ​មាត្រា​៧​ថ្មី។

វេទិកា​ពលរដ្ឋ​ក៏​ប្រកាស​ប្រឆាំង​ការ​តែងតាំង​លោក ហ៊ុន ម៉ាណែត ជា​នាយករដ្ឋមន្ត្រី​ថ្មី​នៅ​កម្ពុជា ដោយសារ​វា​ជា​ដំណើរការ​ដែល​កើត​ពី​ការ​បោះឆ្នោត​ខុស​ច្បាប់ ជាពិសេស​ផ្ទុយ​ពី​ខ្លឹមសារ​រដ្ឋធម្មនុញ្ញ​ដែល​ជា​ច្បាប់​កំពូល​របស់​ប្រទេស​ជាតិ ខណៈ​លទ្ធផល​បោះឆ្នោត​កាលពី​ថ្ងៃទី​២៣ ខែ​កក្កដា ជា​ការ​បោះឆ្នោត​ដោយ​ខុស​ច្បាប់ ដូច្នេះ​ការ​បង្កើត​រដ្ឋសភា និង​រដ្ឋាភិបាល​ថ្មី​ដែល​ដឹកនាំ​នាយករដ្ឋមន្ត្រី និង​ទីស្ដីការ​គណៈរដ្ឋមន្ត្រី​ក៏​ខុស​ច្បាប់​ដែរ។

អគ្គលេខាធិការ​វេទិកា​ពលរដ្ឋ លោក អ៊ាប សេង លើកឡើង​ក្នុង​សេចក្ដី​ថ្លែងការណ៍​ថា កាលណា​ការ​បោះឆ្នោត​ខុស​ច្បាប់​ដែល​បង្កើត​បាន​រដ្ឋសភា និង​រដ្ឋាភិបាល​ខុស​ច្បាប់​នោះ វា​មិនមែន​ជា​ស្ថាប័ន​ជាតិ​តំណាង​ផល​ប្រយោជន៍​ប្រជាពលរដ្ឋ​នោះ​ទេ ហើយ​ប្រជាពលរដ្ឋ​ក៏​មិន​អាច​ប្រើ​សិទ្ធិ​អំណាច​ជា​ម្ចាស់​ប្រទេស​តាមរយៈ​រដ្ឋសភា និង​រដ្ឋាភិបាល​ដូច​មាន​ចែង​ក្នុង​មាត្រា​៥១​ថ្មី នៃ​រដ្ឋធម្មនុញ្ញ ព្រមទាំង​សិទ្ធិ និង​ករណីយកិច្ច​របស់​ប្រជាពលរដ្ឋ​ខ្មែរ​ត្រង់​ជំពូក​ទី​៣ នៃ​រដ្ឋធម្មនុញ្ញ៕

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស