27 C
Phnom Penh

មន្ត្រី​បក្ស​ប្រឆាំង​ថា​សមាជិក​រដ្ឋាភិបាល​អាណត្តិ​ថ្មី​នេះ​នឹង​កើន​ឡើង​ដល់​ប្រមាណ​១​ម៉ឺន​នាក់

ដោយ ឌឹ ខេមបូឌា ដេលី

បទវិភាគ

តំណាងរាស្ត្រ​អតីត​គណបក្ស​សង្គ្រោះ​ជាតិ​លោក អ៊ុំ សំអាន អះអាង​ថា សមាជិក​រាជរដ្ឋាភិបាល​ថ្មី បើ​គិត​ទាំង​ទីប្រឹក្សា និង​ជំនួយការ ព្រមទាំង​មន្ត្រី​ជាន់ខ្ពស់​សរុប​ទាំងអស់​មិន​តិច​ជាង ១​ម៉ឺន​នាក់​នោះ​ទេ បន្ទាប់ពី​រដ្ឋាភិបាល​បាន​តែងតាំង​សមាជិក​រួច​ហើយ​មាន​ចំនួន​ជាង ២​ពាន់​នាក់។

លោក អ៊ុំ សំអាន បាន​សរសេរ​លើ​គណនី​ហ្វេសប៊ុក​របស់​ខ្លួន​កាលពី​ថ្ងៃទី​២៨ ខែ​សីហា ឆ្នាំ​២០២៣ នេះ​ថា សមាជិក​រាជរដ្ឋាភិបាល​ថ្មី​នេះ បើ​គិត​ទាំង​ទីប្រឹក្សា និង​ជំនួយការ ព្រមទាំង​មន្ត្រី​ជាន់ខ្ពស់​សរុប​ទាំងអស់​មិន​តិច​ជាង ១​ម៉ឺន​នាក់​នោះ​ទេ ព្រោះ​ថា​បើ​គិត​ចំនួន​សមាជិក​រដ្ឋាភិបាល​ដែល​តែងតាំង​រួច​មាន​ចំនួន​ជាង ២​ពាន់​នាក់​ទៅ​ហើយ​នោះ។

លោក អ៊ុំ សំអាន លើកឡើង​ថា ប្រធាន​រដ្ឋសភា អនុប្រធាន​រដ្ឋសភា និង​ព្រឹទ្ធសភា អគ្គលេខាធិការដ្ឋាន​រដ្ឋសភា និង​ព្រឹទ្ធសភា ឧបនាយករដ្ឋមន្ត្រី ទេសរដ្ឋមន្ត្រី រដ្ឋមន្ត្រី និង​ក្រសួង​ស្ថាប័ន​ទាំង ៣០ ប្រាកដជា​នឹង​ត្រូវ​តែងតាំង​ទីប្រឹក្សា និង​ជំនួយការ​បន្ត​ទៀត​ជា​មិន​ខាន ដូច្នេះ​បើ​គិត​សរុប​ទាំងអស់ សមាជិក​រដ្ឋាភិបាល​ដែល​នឹង​ត្រូវ​តែងតាំង​តាម​ក្រោយ​ទៀត ច្បាស់​ជា​មិន​តិច​ជាង ៨​ពាន់​នាក់​ទេ ដូច្នេះ​បើ​បូក​សរុប​ទាំងអស់ សមាជិក​រដ្ឋាភិបាល​ថ្មី​នេះ​នឹង​មាន​ចំនួន​មិន​តិច​ជាង ១​ម៉ឺន​នាក់​នោះ​ឡើយ។

មន្ត្រី​ជាន់ខ្ពស់​បក្ស​ប្រឆាំង​រូប​នេះ​ត្អូញត្អែរ​ថា គួរ​ឱ្យ​អាណិត​ប្រជារាស្ត្រ​ខ្មែរ​ដែល​ខំ​បង់​ពន្ធ​ឱ្យ​រដ្ឋ​ដើម្បី​កសាង​ជាតិ ប៉ុន្តែ​លុយ​បង់​ពន្ធ​ទាំងនោះ​ត្រូវ​បែងចែក​មួយ​ចំណែក​ធំ​ដើម្បី​ចិញ្ចឹម​មន្ត្រី​ជាន់ខ្ពស់ ទីប្រឹក្សា និង​ជំនួយការ​ដ៏​ច្រើន​លើសលប់​ដូច​ដែល​គេ​បាន​ឃើញ​ស្រាប់​នៅ​ពេលនេះ ខណៈ​ប្រសិទ្ធភាព​ការងារ​ត្រូវ​គេ​មើល​ឃើញ​ថា​ស្ថិត​ក្នុង​ភាព​អវិជ្ជមាន​ដូច​រដ្ឋាភិបាល​ចាស់​ដដែល។

យ៉ាងនេះ​ក្តី អតីត​រដ្ឋមន្ត្រី​ក្រសួង​ព័ត៌មាន​លោក ខៀវ កាញារីទ្ធ បាន​លើកឡើង​កាលពី​ពេល​ថ្មីៗ​នេះ​ថា លោក​បាន​ឃើញ​អ្នកវិភាគ​មួយ​ចំនួន​នាំគ្នា​រិះគន់​ថា កម្ពុជា​មាន​សមាជិក​រដ្ឋាភិបាល​ច្រើន​លើសលប់ ហើយ​ពួកគេ​ប្រៀបធៀប​ថា​ប្រទេស​ផ្សេង​មាន​សមាជិក​រដ្ឋាភិបាល​តិច​ជាង​កម្ពុជា ខណៈ​ប្រជាជន​របស់​គេ​មាន​រាប់​សិប​លាន​នាក់។

លោក ខៀវ កាញារីទ្ធ លើកឡើង​ថា ប្រហែលជា​អ្នកវិភាគ​ទាំងនោះ​មិន​ស្គាល់​ពាក្យ​ថា «សមាជិក​រដ្ឋាភិបាល» និង «មន្ត្រី​រាជការ» ទេ បាន​ជា​ពួកគេ​ចេះ​តែ​រិះគន់​គ្មាន​ភាព​អៀនខ្មាស​បែប​នេះ ដូច្នេះ​ពួកគេ​គួរ​រៀនសូត្រ​ឡើងវិញ​ចំពោះ​បញ្ហា​នេះ។

យ៉ាងណា​ក៏ដោយ មន្ត្រី​ជាន់ខ្ពស់​គណបក្ស​សង្គ្រោះ​ជាតិ​លោក សួន សុរីដា លើកឡើង​ថា ប្រទេស​អូស្ត្រាលី​មាន​ប្រជាជន ២៦​លាន​នាក់ ប៉ុន្តែ​មន្ត្រី​ជាន់ខ្ពស់​នៃ​រដ្ឋាភិបាល​របស់​ប្រទេស​នេះ​មាន​ចំនួន​តិច​ជាង​កម្ពុជា​ឆ្ងាយ​ណាស់ ក្នុង​នោះ​សមាជិក​ព្រឹទ្ធសភា​មាន​ចំនួន ៧៦​នាក់ សមាជិក​រដ្ឋសភា​មាន​ចំនួន ១៥១​នាក់ ស្ថាប័ន​រដ្ឋាភិបាល​មាន​សមាជិក ៣១​នាក់ ដែល​មាន​នាយករដ្ឋមន្ត្រី​ម្នាក់ រដ្ឋមន្ត្រី ១៨​នាក់ និង​អនុរដ្ឋមន្ត្រី ១២​នាក់​ប៉ុណ្ណោះ ព្រោះ​ថា​ប្រទេស​នេះ​គ្មាន​ឧបនាយករដ្ឋមន្ត្រី រដ្ឋលេខាធិការ ឬ​អនុរដ្ឋលេខាធិការ ជំនួយការ និង​ទីប្រឹក្សា​ដូច​ប្រទេស​កម្ពុជា​ឡើយ។

ចំណែក​នៅ​ប្រទេស​វៀតណាម​វិញ មាន​ប្រជាជន ៩៧​លាន​នាក់ ប៉ុន្តែ​មន្ត្រី​ជាន់ខ្ពស់​នៃ​រដ្ឋាភិបាល​របស់​គេ​មាន​ត្រឹមតែ ១០៥​នាក់​ប៉ុណ្ណោះ ក្នុង​នោះ​គឺ​មាន​នាយករដ្ឋមន្ត្រី ១​នាក់ ឧបនាយករដ្ឋមន្ត្រី ៤​នាក់ រដ្ឋមន្ត្រី ២០​នាក់ ដើម្បី​ដឹកនាំ​ក្រសួង​ទាំង​២០ និង​អនុរដ្ឋមន្ត្រី​ត្រឹមតែ ៨០​នាក់​ប៉ុណ្ណោះ។

ដូច្នេះ បើ​សរុប​ចំនួន​សមាជិក​ព្រឹទ្ធសភា សមាជិក​រដ្ឋសភា នាយករដ្ឋមន្ត្រី រដ្ឋមន្ត្រី និង​អនុរដ្ឋមន្ត្រី​របស់​ប្រទេស​អូស្ត្រាលី គឺ​មាន​ចំនួន​ត្រឹមតែ ២៨៩​នាក់​ប៉ុណ្ណោះ ហើយ​បើ​បូក​បញ្ចូល​គ្នា​ជាមួយ​ចំនួន​មន្ត្រី​ជាន់ខ្ពស់​នៃ​រដ្ឋាភិបាល​វៀតណាម ដែល​មាន​នាយករដ្ឋមន្ត្រី ឧបនាយករដ្ឋមន្ត្រី រដ្ឋមន្ត្រី និង​អនុរដ្ឋមន្ត្រី​ដែល​មាន​ចំនួន​សរុប ២១០​នាក់ គឺ​បាន​ត្រឹមតែ ៤៩៩​នាក់​ប៉ុណ្ណោះ ខណៈ​កម្ពុជា​មាន​ប្រជាជន​ប្រមាណ​ជា ១៧​លាន​នាក់ មាន​មន្ត្រី​រដ្ឋាភិបាល​ជាន់ខ្ពស់​ដល់​ទៅ​ជាង ១​ពាន់​នាក់ (១៥៤៣​នាក់) ឯណោះ។

សមាជិក​រដ្ឋាភិបាល​ថ្មី​អាណត្តិ​ទី​៧ រួម​មាន​នាយករដ្ឋមន្ត្រី រដ្ឋមន្ត្រី ទេសរដ្ឋមន្ត្រី រដ្ឋមន្ត្រី​ប្រតិភូ​អម​នាយករដ្ឋមន្ត្រី រដ្ឋលេខាធិការ អនុរដ្ឋលេខាធិការ ទីប្រឹក្សា ជំនួយការ និង​ក្រុម​អ្នក​ពិធីការ​នាយករដ្ឋមន្ត្រី​មាន​ចំនួន​សរុប​ជាង ២​ពាន់​នាក់ (២១៨០​នាក់) ហើយ​ខណៈ​ទីប្រឹក្សា និង​ជំនួយការ​របស់​ឧបនាយករដ្ឋមន្ត្រី ទេសរដ្ឋមន្ត្រី រដ្ឋមន្ត្រី និង​ទីប្រឹក្សា ជំនួយការ​អម​ក្រសួង​ស្ថាប័ន​ទាំង ៣០ នឹង​ត្រូវ​តែងតាំង​បន្ត​ទៀត គេ​មិន​ទាន់​ដឹង​ពី​ចំនួន​ជាក់លាក់​នៅឡើយ​ទេ៕

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស